.jpg)
សកម្មភាពសិស្សកំពុងរៀនក្រោមដើមឈើនៅស្រុកជាំក្សាន្ត ខេត្តព្រះវិហារ។ រូបថត ហ្វេសប៊ុក
ព្រះវិហារៈ លោកនាយករដ្ឋមន្ត្រី ហ៊ុន សែន ពីម្សិលមិញចាត់ឲ្យលោក គន់ គីម អនុប្រធានទី ១ គណៈកម្មាធិការជាតិគ្រប់គ្រង គ្រោះមហន្តរាយ ចុះទៅពិនិត្យស្វែងយល់ពីតម្រូវការចាំបាច់ និងសង់អគារសិក្សាជាបន្ទាន់សម្រាប់ការសិក្សារបស់សិស្ស ក្រោយពីទទួលព័ត៌មានថាសិស្សានុសិស្សអង្គុយរៀនលើកម្រាលតង់ក្រោមដើមឈើតាមរយៈការបង្ហោះសារដោយលោកគ្រូ-អ្នកគ្រូនៃសាលាបឋមសិក្សាអូរជុញ ខេត្តព្រះវិហារ។
ក្រោយពីបានពិនិត្យ និងបានស្ដាប់សេចក្ដីរាយការណ៍ដោយផ្ទាល់ពីលោកគ្រូ-អ្នកគ្រូ និងនាយកគ្រប់គ្រងសាលានេះរួចពីម្សិលមិញលោក គន់ គីម ប្រាប់ភ្នំពេញប៉ុស្តិ៍ថា សាលានោះពិតជាមានភាពខ្វះខាតបន្ទប់សម្រាប់បង្រៀនសិស្សមែន ហើយសិស្សភាគច្រើនគឺជាកូនចៅរបស់គ្រួសារកងទ័ព។
លោកបញ្ជាក់ថា៖ «នៅពេលនេះសម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត បានសម្រេចផ្ដល់អគារ ២ ខ្នងមាន ១២ បន្ទប់ ធ្វើអំពីថ្មប្រក់ក្បឿង ដល់លោកគ្រូ-អ្នកគ្រូ និងសិស្សានុសិស្សនៃសាលានេះ ដើម្បីឲ្យក្មួយៗសិស្សានុសិស្ស អង្គុយរៀនសូត្រប្រកបដោយផាសុកភាព»។ លោក គន់ គីម ក៏បានឲ្យដឹងថា ដំណើរការសាងសង់អគារសិក្សាចំនួន ២ ខ្នងមាន ១២ បន្ទប់នោះនឹងត្រូវចាប់ផ្ដើមនៅខែក្រោយនេះ។
សាលាបឋមសិក្សាអូរជុញមានទីតាំងស្ថិតនៅភូមិសែនរុងរឿង ១ ឃុំទឹកក្រហម ស្រុកជាំក្សាន្ត ខេត្តព្រះវិហារមានសិស្សសរុបចំនួន ៤២៥ នាក់ ក្នុងនោះសិស្សស្រី ២៣៤ នាក់ និង មានបន្ទប់រៀនចំនួន ៥ ធ្វើពីឈើប្រក់ស័ង្កសី។ នេះបើយោងតាមការអះអាងរបស់លោក ស៊ីម សុខលីម ជាគ្រូបង្រៀនម្នាក់នៅក្នុងសាលានេះកាលពីម្សិលមិញ។
លោកថ្លែងថា៖ «ដោយសារកង្វះបន្ទប់សិក្សា និងដោយមានការឯកភាពពីលោកនាយកគ្រប់គ្រងសាលា យើងខ្ញុំជាគ្រូបង្រៀនបានសម្រេចចិត្តនាំគ្នាបង្រៀនសិស្សនៅក្រោមដើមឈើ ដោយក្រាលតង់កៅស៊ូឲ្យសិស្សអង្គុយរៀន។ សិស្សដែលអង្គុយរៀនក្រោមដើមឈើនោះ ជាសិស្សថ្នាក់ទី ៥»។
លោករៀបរាប់ថា កន្លងមកពួកគាត់បានដាក់សិស្សឲ្យរៀនបញ្ចូលគ្នាដោយក្នុង ១ បន្ទប់ មានសិស្សពី ៧០-៨០ នាក់។ យោងតាមគោលការណ៍ណែនាំរបស់ក្រសួងអប់រំ ពួកគាត់មិនអាចដាក់សិស្សឲ្យរៀនបញ្ចូលគ្នានូវចំនួនដ៏ច្រើនបែបនេះទេ។ ប៉ុន្តែនៅពេលពួកគាត់ បំបែកសិស្សឲ្យរៀនតាមថ្នាក់ និងតាមកម្រិតនីមួយៗទៅតាមគោលការណ៍ណែនាំរបស់ក្រសួង អប់រំធ្វើឲ្យសាលាខ្វះខាតបន្ទប់រៀនកាន់តែច្រើនថែមទៀត ជាហេតុនាំឲ្យពួកគាត់ចាំបាច់ត្រូវតែបង្រៀនសិស្សនៅក្រោមដើមឈើ។
បើតាមលោក សុខលីម ការថតបង្ហោះនូវរូបភាពសិស្សរៀនក្រោមដើមឈើនេះ គឺដោយសាតែពួកគាត់អាណិតអាសូរដល់សិស្ស និងដើម្បីស្វែងរកជំនួយគាំទ្រពីសប្បុរសជននានាក្នុងការជួយកសាងរោងដោលចំនួន ២ បន្ទប់សម្រាប់ឲ្យសិស្សអង្គុយរៀនបានសមរម្យតែប៉ុណ្ណោះ មិនមានចេតនាផ្សេងនោះទេ។
លោក ចេង លឹមហ៊ន់ ប្រធានមន្ទីរអប់រំយុវជន និងកីឡា ខេត្តព្រះវិហារ ប្រាប់ភ្នំពេញប៉ុស្តិ៍ថា លោកបានចាត់ឲ្យមន្ត្រីជំនាញនាំយកតុ កៅអីចំនួន ៤៨ ទៅផ្ដល់ជូនខាងសាលាបឋមសិក្សាអូរជុញ ដើម្បីឲ្យសិស្សអង្គុយរៀនបានសមរម្យ និងដើម្បីសិក្សាពីតម្រូវការចាំបាច់ និងបន្ទាន់សម្រាប់សិស្ស និងលោកគ្រូ-អ្នកគ្រូ នៃសាលានេះ។
លោកបានបន្តថា៖ «ពេលនេះតុកៅអីទាំងនោះបានដឹកទៅដល់សាលារៀននោះហើយ។ ជាមួយគ្នានេះក្រុមការងាររបស់យើងកំពុងពិនិត្យទីតាំងដែលត្រូវសាងសង់បន្ទប់រៀនធ្វើអំពីដែកប្រក់ស័ង្កសីចំនួន ២ បន្ទប់ ដើម្បីឲ្យសិស្សរៀនជាបណ្ដោះអាសន្ន»។
ជុំវិញករណីនេះលោក រស់ សុវាចា អ្នកនាំពាក្យក្រសួងអប់រំ យុវជន និងកីឡាប្រាប់ភ្នំពេញប៉ុស្តិ៍ថាក្នុង ១ ឆ្នាំៗ ក្រសួងអប់រំទទួលបានថវិកាប្រមាណ ១៨ ០០០ លានរៀល ពីក្រសួងសេដ្ឋកិច្ច និងហិរញ្ញវត្ថុដើម្បីជួសជុល និងសាងសង់សាលារៀន។ ចំនួននេះនៅមិនទាន់គិតបញ្ចូលថវិកាសាងសង់ដែលជាអំណោយដ៏ថ្លៃថ្លារបស់លោកនាយករដ្ឋមន្ត្រី ហ៊ុន សែន និងដៃគូអភិវឌ្ឍន៍នោះទេ។
លោកបន្តថា បើទោះជាសំណង់អគារសិក្សាជាច្រើនត្រូវបានកសាងឡើងមែន ប៉ុន្ដែកត្ដាធម្មជាតិជាកត្ដាជះឥទ្ធិពលមួយផ្នែកនាំឲ្យហេដ្ឋារចនាសម្ព័ន្ធសាលារៀនរងការខូចខាតមួយចំនួន។ ក្រសួងអប់រំបានបញ្ចេញថវិកាជារៀងរាល់ឆ្នាំដើម្បីជួសជុលក៏ដូចជាសាងសង់ សំណង់អគារសិក្សាថ្មីជូនសិស្សានុសិស្សដោយធ្វើទៅតាមឋានានុក្រមបែបបទរដ្ឋបាល ក្រោយពីទទួលបានសំណើរមន្ទីរ អប់រំខេត្ដ និងពិនិត្យមើលជាក់ស្ដែង។
លោកបានបញ្ជាក់ថា៖ «ក្រសួងអប់រំមិនធ្លាប់បានព្រងើយកន្ដើយចំពោះសាលាណាមួយនោះឡើយ។ ពោលក្រសួងតែងតែព្យាយាមជានិច្ច ដើម្បីផ្ដល់ជូនការសិក្សាដល់សិស្សគ្រប់កម្រិតសិក្សាដើម្បីបានទទួលនូវការអប់រំមានគុណភាព»។
បើតាមលោក សុវាចា សាលារៀនសាធារណៈទាំងអស់មាន ១៣ ៣០០។ ក្រសួងអប់រំយុវជន និងកីឡាបន្តជួសជុលហេដ្ឋារចនាសម្ព័ន្ធអគារសិក្សានៅសាលារៀនចំនួន ៣៩ សរុបថវិកា ៧ ២០០ លានរៀល នៅតាមរាជធានី-ខេត្តចំនួន ១៩ រួមមាន ខេត្តពោធិ៍សាត់ កំពង់ចាម បាត់ដំបង បន្ទាយមានជ័យ ព្រៃវែង កំពង់ស្ពឺ ស្វាយរៀង ត្បូងឃ្មុំ កណ្តាល កំពង់ឆ្នាំង កំពត កំពង់ធំ តាកែវ កោះកុង ព្រះវិហារ មណ្ឌលគិរី រាជធានី-ភ្នំពេញ ក្រចេះ និងខេត្តសៀមរាប៕
