.jpg)
មន្ត្រីនគរបាលចរាចរណ៍ចែកម៉ាស់ដល់អ្នកដំណើរពីម្សិលមិញនៅជិតរង្វង់មូលខាងលិចស្ពានជ្រោយចង្វារ រាជធានីភ្នំពេញ។ រូបថត សហការី
ភ្នំពេញៈ លោកនាយករដ្ឋមន្ត្រី ហ៊ុន សែន បដិសេធចំពោះពាក្យចចាមអារ៉ាម ដែលថា លោកបិទប្រទេស ខណៈវិបត្តិកូវីដកំពុងផ្ទុះឡើងនេះ ដោយចាត់ទុកថា ការឃោសនាអកុសលនេះសំដៅធ្វើឱ្យប្រទេសមានចលាចល។ ជាមួយគ្នានេះលោកបញ្ជាឱ្យអាជ្ញាធរចែកម៉ាស់ក្រណាត់ចំនួន ២ លានម៉ាស់ ដល់ពលរដ្ឋក្រីក្រក្នុងរាជធានីភ្នំពេញ ដើម្បីរួមចំណែកទប់ស្កាត់ការរីករាលដាលជំងឺកូវីដ ១៩។
នៅលើទំព័រហ្វេសប៊ុកពីម្សិលមិញលោក ហ៊ុន សែន បានសរសេរថា ថ្មីៗនេះមានមនុស្សអាក្រក់មួយចំនួនបានបំផុសពាក្យចចាមអារ៉ាមថា រាជរដ្ឋាភិបាល នឹងបិទរាជធានីភ្នំពេញ និងហាមឃាត់ការធ្វើដំណើរពីខេត្តមួយទៅកាន់ខេត្តមួយ។
ក្នុងឋានៈជាប្រមុខរាជរដ្ឋាភិបាលលោកបញ្ជាក់ថា៖ «នឹងមិនមានការបិទប្រទេស ឬ រាជធានី-ខេត្ត ឬតំបន់ណាមួយនោះទេ។ ការឃោសនាអកុសលរបស់ពួកអាក្រក់ទាំងនេះសំដៅធ្វើឱ្យប្រទេសមានចលាចល ទំនិញឡើងថ្លៃ ប្រជាជនរស់នៅមិនបានស្ងប់ចិត្ត ដើម្បីពួកគេកេងចំណេញខាងនយោបាយតែប៉ុណ្ណោះ»។
ក្រៅពីអះអាងយ៉ាងដូច្នេះលោក ហ៊ុន សែន មានប្រសាសន៍ថា បញ្ហាសំខាន់ក្នុងការប្រយុទ្ធនឹងជំងឺកូវីដ ១៩ នៅពេលនេះ គឺប្រជាជនគ្រប់រូបការពារខ្លួនតាមការណែនាំរបស់ក្រសួងសុខាភិបាល ពិសេសការពាក់ម៉ាស់ ការលាងដៃ ការមិនជួបជុំប្រមូលផ្តុំ ការរក្សាគម្លាតសុវត្ថិភាព។
លោកបន្ថែមថា៖ «សម្រាប់ការពាក់ម៉ាស់ដែលកាលពីម្សិលមិញ (ថ្ងៃពុធ) នេះខ្ញុំបានបញ្ជាឱ្យបញ្ចេញម៉ាស់ក្រណាត់ចំនួន ២ លានម៉ាស់ជូនទៅសាលារាជធានីភ្នំពេញ ដើម្បីចែកជូនប្រជាជនក្រីក្រ។ នគរបាលចរាចរណ៍ក៏នឹងជូនម៉ាស់សម្រាប់អ្នកជិះកង់ ជិះម៉ូតូដែលមិនបានពាក់ម៉ាស់។ សូមបងប្អូនពាក់ម៉ាស់ទាំងអស់គ្នា ដើម្បីយើងឈានទៅបញ្ចប់ព្រឹត្តិការណ៍ ៣ វិច្ឆិកាឱ្យបានឆាប់ដើម្បីនាំប្រទេសមកកាន់ភាពប្រក្រតីដូចមុនថ្ងៃ ៣ វិច្ឆិកា ២០២០ វិញ»។
លោក ឃួង ស្រេង អភិបាលរាជធានីចែកម៉ាស់ដល់ពលរដ្ឋពីម្សិលមិញ។ រូប សហការី
ចំពោះប្រជាពលរដ្ឋដែលបាននិងកំពុងធ្វើចត្តាឡីស័កនៅតាមផ្ទះ លោកនាយករដ្ឋមន្ត្រីនៅតែជំរុញឱ្យបន្តធ្វើចត្តាឡីស័កឱ្យបានហ្មត់ចត់ ហើយអាជ្ញាធរមូលដ្ឋានត្រូវតាមដានត្រួតពិនិត្យ និងជួយដោះស្រាយជីវភាពសម្រាប់គ្រួសារក្រីក្រដែលមិនអាចចេញប្រកបរបររកស៊ីបានក្នុងពេលធ្វើចត្តាឡីស័ក។
លោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ដែលកំពុងផ្តាច់ខ្លួន និងបន្តធ្វើចត្តាឡីស័ក បន្ទាប់ពីចូលរួមក្នុងព្រឹតិ្តការណ៍ ៣ វិច្ឆិកា បានបញ្ជាក់ពីម្សិលមិញថា សុខភាពរបស់លោកនៅតែស្ថិតក្នុងស្ថានភាពល្អជាប្រក្រតី ហើយការធ្វើតេស្តចំនួន ២ ដងនៅតែទទួលលទ្ធផលអវិជ្ជមាន។
លោករៀបរាប់ថា៖ «កម្តៅក្នុងខ្លួនធម្មតា បាយក៏បាន សម្រាន្តក៏ស្រួល។ ខ្លាចតែឡើងគីឡូទៅវិញទេ! អ្វីដែលប្លែកខុសពីមុន គឺក្នុងផ្ទះរបស់ខ្ញុំគឺយើងនាំគ្នាអនុវត្តវិធានការការពារ រឹតត្បិតយ៉ាងហ្មត់ចត់។ ពាក់ម៉ាស់គ្រប់គ្នា គ្រប់ពេល ពាក់ស្រោមដៃ លាងដៃញឹកញាប់ រក្សាគម្លាត និងតាមសង្កេតការប្រែប្រួលយ៉ាងជាប់លាប់»។
កាលពីម្សិលមិញក្រសួងសុខាភិបាលបានប្រកាសថា មិនមានអ្នកឆ្លងថ្មី និងមិនមានករណីព្យាបាលជាសះស្បើយពីជំងឺកូវីដ ១៩ ទេ។ គិតត្រឹមថ្ងៃទី ១២ វិច្ឆិកា កម្ពុជាមានអ្នកជំងឺកូវីដ ១៩ សរុបចំនួន ៣០១ នាក់ក្នុងនោះជាសះស្បើយ ២៨៨ នាក់ និងគ្មានករណីស្លាប់ទេ។
រដ្ឋមន្ត្រីក្រសួងសុខាភិបាលលោក ម៉ម ប៊ុនហេង និយាយថា ម៉ាស់ក្រណាត់ចំនួន ២ លានម៉ាស់ត្រូវបានបញ្ចេញពីឃ្លាំងយុទ្ធសាស្ត្ររបស់រាជរដ្ឋាភិបាល ដើម្បីផ្តល់ជូនអភិបាលរាជធានីភ្នំពេញបន្តចែកជូនពលរដ្ឋដោយផ្ទាល់។
ដើម្បីជាវិធានការទប់ស្កាត់ការនាំជំងឺកូវីដចូលប្រទេស ក្រសួងសុខាភិបាល កាលពីថ្ងៃទី ១១ វិច្ឆិកា បានធ្វើការកែសម្រួលលក្ខខណ្ឌធ្វើដំណើរចូលមកប្រទេសកម្ពុជាដោយអនុវត្តវិធានការសុខាភិបាល និងការធ្វើចត្តាឡីស័ក ឆ្លើយតបការរីករាលដាលជំងឺកូវីដ ១៩ ឱ្យកាន់តែមានប្រសិទ្ធភាព។
សេចក្តីជូនដំណឹងរបស់ក្រសួង សុខាភិបាលបញ្ជាក់ថា រាល់អ្នកដំណើរជាជនបរទេស និងអ្នកដំណើរជាជនជាតិខ្មែរ គឺតម្រូវឱ្យធ្វើចត្តាឡីស័ករយៈពេល ១៤ ថ្ងៃ ដើម្បីរង់ចាំលទ្ធផលតេស្តរកកូវីដ ១៩។
ចំណែកអ្នកដំណើរជាជនបរទេសដែលមានលិខិតធានា សុខភាពក៏តម្រូវឱ្យធ្វើចត្តាឡីស័ក និងធ្វើតេស្តដូចគ្នា ប៉ុន្តែនៅពេលទទួលបានលទ្ធផល អវិជ្ជមានជាលើកទី ១ ពួកគេនឹងអនុញ្ញាតឱ្យបំពេញការងារទៅតាមតារាងពេលវេលាដែលបានភ្ជាប់មកជាមួយ ហើយបន្តធ្វើចត្តាឡីស័ក។
មន្ត្រីនាំពាក្យសាលារាជធានីភ្នំពេញលោក មេត មាសភក្តី មិនអាចទាក់ទងសុំអត្ថាធិប្បាយករណីចែកម៉ាស់បានទេពីម្សិលមិញ៕
វីដេអូ៖
