ខេត្តតាកែវៈ លោកនាយករដ្ឋមន្ត្រី ហ៊ុន សែន កាលពីម្សិលមិញបានជំរុញឲ្យពលរដ្ឋម្ចាស់ឆ្នោតប្រើសិទ្ធិរបស់ខ្លួនក្នុងការជ្រើសរើសគណបក្សនយោបាយថ្មីជាជាងដេកឱប «បក្សខ្មោច» ដែលលោកថាបានងាប់ទៅហើយ និងអះអាងថា ការប៉ុនប៉ងបំផ្លាញការបោះឆ្នោតនឹង «មិនអាចទៅរួច» ទេ ប៉ុន្តែអតីតមន្ត្រីបក្សប្រឆាំងថា ស្មារតីនៃអ្នកគាំទ្រខ្លួននឹងមិនស្លាប់ឡើយ។
ក្នុងពិធីជួបសំណេះសំណាលជាមួយកម្មករ-កម្មការិនីសរុប ១៧ ៧០០ នាក់ មកពីរោងចក្រសហគ្រាសចំនួន ១៣ នៅខេត្តតាកែវលោកនាយករដ្ឋមន្ត្រី ហ៊ុន សែន បានថ្លែងដោយមិនបញ្ចេញឈ្មោះគណបក្ស តែលោកហៅថា «បក្សខ្មោច» ដោយសំដៅលើអតីតគណបក្សសង្គ្រោះជាតិដែលត្រូវបានរំលាយដោយតុលាការកំពូលហើយជំរុញឲ្យអ្នកគាំទ្រគណបក្សនោះជ្រើសរើសបក្សណាមួយដែលខ្លួនពេញចិត្ត។
លោកបានថ្លែងថា៖ «មានការប៉ុនប៉ងបំផ្លាញការបោះឆ្នោតតាមរយៈអំពាវនាវឲ្យពលរដ្ឋកុំទៅបោះឆ្នោត ក៏ប៉ុន្តែប្រហែលជាមិនអាចទៅរួចទេ ប្រជាពលរដ្ឋរបស់យើង [ត្រូវ] ប្រើប្រាស់សិទ្ធិ... បក្សមួយបានងាប់ទៅតើដេកឱបអាបក្សងាប់ហ្នឹងទេ ឬក៏ត្រូវប្រើសិទ្ធិនយោបាយ សិទ្ធិរបស់ខ្លួនដើម្បីទៅជ្រើសរើសបក្សនយោបាយណាមួយដែលខ្លួនស្រឡាញ់ទេ»។
លោកលើកជាឧទាហរណ៍ថាសូម្បីតែជីវិតមនុស្ស បើមានប្រពន្ធ ឬប្ដីដែលស្លាប់ទៅហើយនោះពួកគេភាគច្រើននឹងជ្រើសរើសគូស្រករថ្មីមកជំនួស បើទោះណាជាមនុស្សមានវ័យចំណាស់ទៅហើយក្ដី។
លោកបន្ថែមថា៖ «នៅស្រុកខ្មែរមិនមានបក្សនយោបាយ ១-២ ទេ បក្សនយោបាយមានជាង ៣០ ជិត ៤០ ឯណោះ។ ប៉ុន្តែបក្សចូលរួមបោះឆ្នោតមាន ២០ គណបក្ស អ៊ីចឹងទេអ្នកដែលចាត់ទុកឲ្យគេឱបខ្មោចរបស់ខ្លួនប្រហែលជាមិនមានសំណាងឲ្យគេឱបជាមួយទេ ខ្លួនឯងព្រាត់ប្រាសទៅណា ព្រាត់ប្រាស់ទៅ»។
ទន្ទឹមនឹងនេះលោកក៏មិនភ្លេចអំពាវនាវជាថ្មីឲ្យអាជ្ញាធរមូលដ្ឋាន «បង្កលក្ខណៈងាយស្រួល» ដល់បណ្ដាបក្សនយោបាយនានាឲ្យអាចធ្វើសកម្មភាពនៅមូលដ្ឋានដោយគ្មានការរើសអើង។ លោកសំណូមពរឲ្យពលរដ្ឋកុំជេរលោក ដោយសារតែកំហុសឆ្គងរបស់មន្ត្រីថ្នាក់ក្រោម និងបន្តបោះឆ្នោតឲ្យគណបក្សប្រជាជនកម្ពុជា។
លោកបញ្ជាក់ថា៖ «សូមកុំខឹងគោវាយរទេះ ខឹងមេភូមិមកជេរ ហ៊ុន សែន ដែរ...ឥឡូវឪពុកម្ដាយរបស់ក្មួយៗមានកូនត្រឹមតែ ៥ នាក់ពិបាកគ្រប់គ្រងណាស់ទៅហើយ ទាស់គ្នាកូនខ្លះល្អកូនខ្លះមិនល្អ...ពិបាកណាស់ទៅហើយ ចុះទម្រាំពូ គឺមន្ត្រីកងកម្លាំងប្រដាប់អាវុធជាងកន្លះលាននាក់វាមានមន្ត្រីល្អ និងមន្ត្រីមិនល្អដែរ»។
ប៉ុន្តែលោក អ៊ូ ច័ន្ទរ័ត្ន អតីតតំណាងរាស្ត្រអតីតគណបក្សសង្គ្រោះជាតិថ្លែងថា ស្មារតីរបស់អ្នកគាំទ្រគណបក្សសង្គ្រោះជាតិនឹងមិនស្លាប់នោះទេ ហើយលោកជឿថា ពួកគេក៏មិនជ្រើសរើសគណបក្សថ្មីដូចការជំរុញរបស់លោកនាយករដ្ឋមន្ត្រីដែរ។
លោកថ្លែងថា៖ «ខ្ញុំជឿថាមនុស្សដែលគាំទ្រគណបក្សសង្គ្រោះជាតិ វាជាស្មារតីមួយជា ឆន្ទៈមួយដែលលោកពេញចិត្តដែលលោកបានសម្រេចចិត្ត ហើយ អ្វីដែលលោកសម្រេចចិត្តហើយ មានសេចក្ដីសង្ឃឹមក្នុងការផ្លាស់ប្ដូរ ក្នុងការអភិវឌ្ឍប្រទេស ក្នុងការទទួលបាននូវសិទ្ធិសេរីភាពពេញលេញក្នុងការជំរុញប្រទេសឲ្យមានលទ្ធិប្រជាធិបតេយ្យពេញលេញទៅហើយ ស្រាប់តែបែរជាមកខកចិត្តវិញ ដោយគ្មានសង្គ្រោះជាតិចូលរួមក្នុងការបោះឆ្នោត ខ្ញុំជឿថាមនុស្សមួយចំនួនធំដែលនៅគាំទ្រគណបក្សហាក់ដូចជាមិនអាចទៅជ្រើសរើសអ្នកណាផ្សេងទៀតទេ»។
លោកបានបន្តថា៖ «ខ្ញុំជឿថាគណបក្សវាគ្រាន់តែជាឈ្មោះទេ ប៉ុន្តែស្មារតីវាមិនអាចស្លាប់ទេ ព្រោះវាជាស្មារតីប្រជាធិបតេយ្យពិតប្រាកដមួយ»។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាមិនធ្វើអត្ថាធិប្បាយយ៉ាងណាចំពោះវោហារស័ព្ទរបស់អ្នកនយោបាយទេកាលពីម្សិលមិញ តែលោកយល់ថាពលរដ្ឋម្ចាស់ឆ្នោតនឹងមានការសម្រេចចិត្តត្រឹមត្រូវមួយ។
លោកបានសរសេរតាមសារអេឡិចត្រូនិកថា៖ «ខ្ញុំយល់ថាពលរដ្ឋនឹងមានការសម្រេចចិត្តត្រឹមត្រូវរបស់ខ្លួនទាក់ទងនឹងការបោះឆ្នោតនៅខែកក្កដាខាងមុខនេះ។ យើងចង់ឃើញសេរីភាពពិតប្រាកដត្រូវបានផ្តល់ជូនប្រជាពលរដ្ឋក្នុងការសម្រេចចិត្តដ៏មានសារៈសំខាន់នេះ ទោះជាពួកគេឱបខ្មោចបក្សដែលគេជឿទុកចិត្ត ឬឱបអ្វីក៏ដោយ»។
លោកបណ្ឌិត ឡៅ ម៉ុងហៃ អ្នកវិភាគនយោបាយថ្លែងថា៖ «ទាក់ទងនឹងគណបក្សសង្គ្រោះជាតិ រូបកាយវាអាចបាត់បង់ ប៉ុន្តែស្មារតីនៃការផ្លាស់ប្តូរនៅតែមានក្នុងចិត្ត និងគំនិតពលរដ្ឋជាច្រើន។ វាអាចកើតឡើងជាថ្មីម្តងទៀតក្នុងទម្រង់នៃគណបក្សដដែលជាមួយនឹងឈ្មោះថ្មីមួយ។ បញ្ហាគណបក្សសង្គ្រោះជាតិគឺនៅមិនទាន់ដាច់ស្រេចទេ ដរាបណាវាមិនត្រូវបានដោះស្រាយដោយយុត្តិធម៌»៕