The Phnom Penh Post Search

Search form




Logo of Phnom Penh Post newspaper Phnom Penh Post - នាយករដ្ឋមន្ត្រី​ថា ការ​ចំណាយ​ធ្វើ​ពហុកីឡដ្ឋាន​មិន​ទាន់​ដឹង​ទេ

នាយករដ្ឋមន្ត្រី​ថា ការ​ចំណាយ​ធ្វើ​ពហុកីឡដ្ឋាន​មិន​ទាន់​ដឹង​ទេ

Content image - Phnom Penh Post
ប្លង់​គំរូ​សម្រាប់​សង់​ពហុកីឡដ្ឋាន​ថ្មី​នៅ​ព្រែកព្នៅ ។ រូបថត សហការី

នាយករដ្ឋមន្ត្រី​ថា ការ​ចំណាយ​ធ្វើ​ពហុកីឡដ្ឋាន​មិន​ទាន់​ដឹង​ទេ

ភ្នំពេញៈ លោក​នាយករដ្ឋមន្រ្តី ហ៊ុន សែន កាលពី​ថ្ងៃ​ម្សិលមិញ បាន​បដិសេធ​អំពី​ថ្លៃ​នៃ​ការ​សាងសង់​ពហុកីឡដ្ឋាន​ជាតិ​មរកត​តេជោ​ជា​ជំនួយ​របស់​ចិន​ដែល​ថា​អស់​ប្រហែល​​ ១០០ ​លាន​ដុល្លារ។

ថ្លែង​ក្នុង​ពិធី​​​ចែក​សញ្ញាបត្រ​នៅ​កោះពេជ្រ​កាលពី​ព្រឹក​ថ្ងៃ​អង្គារ លោក​នាយករដ្ឋមន្រ្តី​បាន​លើក​ឡើង​ថា​លោក​បាន​អនុម័ត​ប្លង់​សាងសង់ ប៉ុន្តែ​លោក​​មិន​បាន​​​​​​​​​និយាយ​ថា​ការ​សាងសង់​ចំណាយ​ប្រហែល ១០០ លាន​ដុល្លារ​ទេ។

លោក​បាន​ថ្លែង​ថា៖ «​ខ្ញុំ​អត់​បាន​ប្រើ​ពាក្យ​ថា ចិន​ឲ្យ​ប្រាក់ ១០០ លាន​ដុល្លារ​ មក​សាងសង់​ពហុកីឡដ្ឋាន​នេះ​ទេ តើ​ភ្នំពេញ​ប៉ុស្តិ៍ បាន​ពាក្យ​នេះ​មកពី​ណា? ខ្ញុំ​មិន​បាន​និយាយ​ទេ។ ខ្ញុំ​គ្រាន់តែ​អនុម័ត​យក​ប្លង់​​សាងសង់​ [ប្លង់​ពីរ​] ដែល​​ដាក់​មក​​​ខ្ញុំ​អនុម័ត​»។

លោក ហ៊ុន សែន បាន​បញ្ជាក់​ជាថ្មី​ពី​ការ​ចរចា​ជាមួយ​នឹង​សមភាគី​ចិន ​ទាក់ទង​នឹង​ការសាងសង់​កីឡដ្ឋាន​ប៉ុន្តែ​ថ្លៃ​សាងសង់ មិន​ទាន់​បាន​សម្រេច​ទេ។ ​លោក​ថា៖ «​ការ​ចរចា​របស់​ខ្ញុំ​គឺ ចិន​នឹង​ផ្តល់​ប្រាក់ ប៉ុន្តែ​ចំណាយ​ប៉ុន្មាន​មិន​ទាន់​បាន​ប៉ាន់​ប្រមាណ​ទេ។ មិត្ត​ចិន​គ្រាន់តែ​និយាយ​ថា ប៉ុន្មាន​ក៏ដោយ ចិន​ធ្វើ​ឲ្យ​ទាំងអស់ ហើយ​កម្ពុជា ពេញចិត្ត នាយករដ្ឋមន្រ្តី​ ហ៊ុន សែន ពេញ​ចិត្ត​»។

ពហុកីឡដ្ឋាន​មរតក​តេជោ ដែល​ស្ថិត​នៅ​ជាយ​រាជធានី​ភ្នំពេញ​ត្រូវ​​បាន​​សាងសង់​នៅ​ខែ​មេសា​ឆ្នាំ ២០១៣ ដែល​លោក​នាយករដ្ឋមន្រ្តី ហ៊ុន សែន បាន​ចូលរួម​ពិធី​បញ្ចុះ​ខណ្ឌសីមា។

លោក វាត់ ចំរើន អគ្គលេខាធិការ​គណៈកម្មាធិការ​ជាតិ​អូឡាំពិក​កម្ពុជា​ថ្លែង​ថា ក្រុម​បច្ចេកទេស​កម្ពុជា បាន​វាយតម្លៃ​ថា​ការ​សាងសង់ ដែល​ជា​អំណោយ​ពី​ចិន​នឹង​ចំណាយ​អស់​ប្រហែល ១០០ លាន​ដុល្លារ​អាមេរិក។

លោក​បាន​បញ្ជាក់​ថា៖ «​ចិន​​មិន​ខ្វល់​ថា​ចំណាយ​ប៉ុន្មាន​ទេ ប៉ុន្តែ​យើង​ប៉ាន់​ប្រមាណ​ទៅ​នឹង​ចំណាយ​ប្រហែល ១០០ លាន​ដុល្លារ​»៕

អត្ថបទគួរចាប់អារម្មណ៍