.jpg)
លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងកិច្ចប្រជុំនៅរដ្ឋសភាជាតិ នាពេលកន្លងមក។ ហ៊ាន រង្សី
ភ្នំពេញ៖ លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានប្រកាសថា នឹងទៅចូលរួមកិច្ចប្រជុំអាស៊ាននៅទីក្រុងហ្សាការតា ប្រទេសឥណ្ឌូនេស៊ី នាថ្ងៃទី ២៤ ខែមេសាខាងមុខនេះ ដោយសារភាពចាំបាច់។ ប៉ុន្ដែលោកត្រូវអនុវត្ដស្របតាមវិធានការសុខាភិបាល ដើម្បីការពារការឆ្លងកូវីដ ១៩។
លោកនាយករដ្ឋមន្រ្ដីសរសេរលើហ្វេសប៊ុកនាព្រឹកនេះថា កាតព្វកិច្ចដែលនឹងត្រូវអនុវត្ដតាមវិធានការសុខាភិបាលនោះ រួមមានការចាក់វ៉ាក់សាំងដូសទី២ នៅថ្ងៃទី ២០ ខែ មេសា ២០២១ ដែលដើមឡើយ លោកនាយករដ្ឋមន្រ្ដីគ្រោងចាក់នៅថ្ងៃទី ២៩ មេសា ២០២១។
លោកនាយករដ្ឋមន្រ្ដីថ្លែងថា៖ «កិច្ចការដែលខ្ញុំត្រូវធ្វើដើម្បីការពារការឆ្លងកូវីដ ១៩ ស្របតាមវិធានការសុខាភិបាល ដំបូងខ្ញុំត្រូវចាក់វ៉ាក់សាំងដូសទី២ នៅថ្ងៃទី ២០ មេសា ២០២១ ដែលមុននោះគ្រោងចាក់នៅថ្ងៃទី ២៩ មេសា ២០២១។ ថ្ងៃទី ២៣ មេសា ២០២១ ត្រូវយកសំណាកពិនិត្យ ដើម្បីទទួលលិខិតបញ្ជាក់សម្រាប់ឲ្យអាជ្ញាធរសុខាភិបាលឥណ្ឌូនេស៊ី»។
បើតាមលោកនាយករដ្ឋមន្រ្ដីនៅព្រឹកថ្ងៃទី ២៤ ខែ មេសា ឆ្នាំ ២០២១ លោកនឹងត្រូវចេញដំណើរទៅហ្សាការតា។ ពេលទៅដល់ត្រូវយកសំណាកពិនិត្យម្តងទៀត។ រហូតដល់ពេលរសៀលការប្រជុំចាប់ផ្តើមហើយពេលចប់ប្រជុំមិនថា ថ្ងៃឬយប់ លោកនឹងត្រូវត្រឡប់មកកម្ពុជាវិញ។
លោកនាយករដ្ឋមន្រ្ដីថ្លែងថា៖ «ពេលមកដល់ព្រលានយន្តហោះអន្តរជាតិភ្នំពេញ ខ្ញុំត្រូវយកសំណាកពិនិត្យម្តងទៀត។ មកដល់ផ្ទះខ្ញុំត្រូវធ្វើចត្តាឡីស័ក ១៤ ថ្ងៃ ជាមួយនឹងការពិនិត្យសំណាក ២ ទៅ ៣ ដងទៀត"។
លោកនាយករដ្ឋមន្រ្ដីបានឱ្យដឹងថា មន្រ្ដីរបស់លោកបានឱ្យយោបល់ថា ដោយសារតែលោកបានចាក់វ៉ាក់សាំងរួចហើយ ដូច្នេះក្រោយត្រឡប់ពីប្រទេសឥណ្ឌូនេស៊ី វិញគួរធ្វើចត្តាឡីស័កតែ ៧ ថ្ងៃបានហើយ។ ប៉ុន្ដែយោបល់នេះ ត្រូវបានលោកបដិសេធ ហើយតបទៅវិញថា លោកចង់ឱ្យប្រាកដថា មិនមានវិជ្ជមានកូវីដ ១៩ នោះទេ ដោយអនុវត្ដស្របតាមវិធានការសុខាភិបាល៕
