ភ្នំពេញ៖ លោកនាយករដ្ឋមន្ត្រី ហ៊ុន សែន បានឱ្យដឹងថា អ្នកចាក់វ៉ាក់សាំងមកដល់ពេលនេះបានជិត ១ លាននាក់ហើយ ហើយវ៉ាក់សាំងការពារកូវីដ១៩នឹងមកដល់កម្ពុជាជាបន្តបន្ទាប់ទៀតចាប់ពីខែមេសានេះដល់ខែសីហា ខាងមុខ។
លោក ហ៊ុន សែន បានថ្លែងនៅព្រឹកថ្ងៃសៅរ៍ទី ១០ ខែមេសានេះថា ចំនួនអ្នកចាក់វ៉ាក់សាំងក្នុងប្រទេសកម្ពុជាមានអត្រាមិនទាបជាងប្រទេសដទៃទេដែលកម្ពុជាមានប្រជាជនតែជាង ១៦ លាននាក់ តែបានចាក់បានជិត ១ លាននាក់ហើយ។
លោកបានប្រាប់ថា៖ «ក្នុងឆ្នាំនេះ បើវ៉ាក់សាំងមកតាមផែនការនេះ គម្រោងរបស់យើងមាន ២០ លានដូស តែនឹងមកដល់ក្នុងឆ្នាំនេះជាង ១១ លានដូស ដែលយើងអាចដំណើរការចាក់ ដែលពេលនេះយើងមានចំនួនជាង ២ លានហើយ ហើយនៅថ្ងៃទី ១៧ នេះ វ៉ាក់សាំងនឹងមកដល់កន្លះលានដូសទៀត»។
លោក ហ៊ុន សែន បានបន្តថា នៅក្នុងខែឧសភាបនឹងមកដល់ចំនួន ១,៥ លានដូស ខែមិថុនានឹងមកដល់ចំនួន ៣ លានដូសវក្នុងខែកក្កដានឹងមកដល់ចំនួន ២ លានដូស និងខែសីហាមកដល់ចំនួន ១ លានដូសទៀត។
លោកថា៖ «វ៉ាក់សាំងរបស់យើងអាចនឹងបម្រើដល់ការចាក់បានដល់ប្រជាពលរដ្ឋយើង ប៉ុន្តែក្នុងប៉ុន្មានថ្ងៃនេះ គេបន្ទោសខ្ញុំថាបានរំលោភលើគោលការណ៍ស្ម័គ្រចិត្ត។ តែខ្ញុំសូមបញ្ជាក់ឱ្យបានច្បាស់ក្នុងឋានៈជាប្រមុខរាជរដ្ឋាភិបាលរបស់ប្រទេស ខ្ញុំមានភារកិច្ចដាក់ជាវ៉ាក់សាំងកាតព្វកិច្ចឱ្យកងកម្លាំងប្រដាប់អាវុធ មន្ត្រីរាជការស៊ីវិលទាំងអស់ តែសម្រាប់ពលរដ្ឋគឺជាគោលការណ៍ស្ម័គ្រចិត្ត»៕