The Phnom Penh Post Search

Search form




Logo of Phnom Penh Post newspaper Phnom Penh Post - នាយករដ្ឋមន្ត្រី​ថៃ​ប្រឹងប្រែង​កែ​ស្ថានភាព​អាក្រក់​របស់​ពលករ​បរទេស

នាយករដ្ឋមន្ត្រី​ថៃ​ប្រឹងប្រែង​កែ​ស្ថានភាព​អាក្រក់​របស់​ពលករ​បរទេស

ពលករ​បរទេស​កំពុង​ធ្វើ​ការ​លើ​ទូក​នេសាទ​ថៃ ក្នុង​ខេត្ត សុថេប។ AFP
ពលករ​បរទេស​កំពុង​ធ្វើ​ការ​លើ​ទូក​នេសាទ​ថៃ ក្នុង​ខេត្ត សុថេប។ AFP

នាយករដ្ឋមន្ត្រី​ថៃ​ប្រឹងប្រែង​កែ​ស្ថានភាព​អាក្រក់​របស់​ពលករ​បរទេស

ភ្នំពេញៈ នាយករដ្ឋមន្ត្រី​ថៃ​លោក ប្រាយុធ ចានអូចា បាន​តាំង​ខ្លួនឯង​ទទួល​បន្ទុក​ជាថ្មី​ម្តង​ទៀត លើក​នេះ​គឺ​ខិតខំ​ប្រឹងប្រែង​ផ្លាស់ប្តូរ​កំណត់ត្រា​អាក្រក់​របស់​ប្រទេស​ថៃ​ក្នុង​ការ​រំលោភបំពាន​លើ​ពលករ​ចំណាកស្រុក​បរទេស​ពី​មុន​ការ​ដាក់​ចំណាត់ថ្នាក់​ដែល​បាន​ចងក្រង​អំពី​ការ​ជួញដូរ​ជា​អន្តរជាតិ​ប្រចាំ​ឆ្នាំ​។

កាល​សប្តាហ៍​មុន នាយករដ្ឋមន្រ្តី​ថៃ​បាន​ចាប់ផ្តើម​បង្កើត​គំនិត​ផ្តួចផ្តើម​ថ្មី​មួយ​និង​បង្កើត​គណៈកម្មាធិការ​ក្នុង​គោលដៅ​បន្ទន់ចិត្ត​រដ្ឋាភិបាល​អាមេរិក ដែល​កាលពី​ឆ្នាំ​មុន​​ បាន​ដាក់​ចំណាត់ថ្នាក់​ប្រទេស​ថៃ​ទាប​បំផុត​នៅក្នុង​របាយការណ៍​ជួញដូរ​មនុស្ស​ប្រចាំ​ឆ្នាំ​។

ការ​បន្ទាប​ចំណាត់ថ្នាក់​នេះ​កើតឡើង​មួយ​ផ្នែក​ធំ​គឺ​ដោយសារ​ការ​រំលោភបំពាន​ទៅលើ​ពលករ​បរទេស​នៅក្នុង​ប្រទេស​ថៃ ជាពិសេស​ ពលករ​មកពី​ប្រទេស​កម្ពុជា​និង​មីយ៉ាន់ម៉ា​ដែល​ត្រូវ​បាន​បង្ខំ​និង​កេងប្រវ័ញ្ច​យ៉ាង​ព្រៃផ្សៃ​នៅលើ​ទូក​នេសាទ​ថៃ​។

នៅក្នុង​កិច្ចខិតខំប្រឹងប្រែង​ធ្វើឲ្យ​ប្រសើរ​ឡើង​នូវ​របាយការណ៍​អាក្រក់​របស់​ថៃ លោក ប្រាយុធ បាន​បោះឆ្នោត​តាំង​ខ្លួនឯង​ឲ្យ​ធ្វើ​ជា​ប្រធាន​ប្រឆាំង​ការ​ជួញដូរ​មនុស្ស​និង​គោលនយោបាយ​នេសាទ​ខុស​ច្បាប់ ដែល​នឹង​គ្រប់គ្រង​អនុគណៈកម្មាធិការ​តូចៗ រួមមាន​គណៈកម្មាធិការ​ស្តីពី​ពលករ​លើ​ទូកនេសាទ គណៈកម្មាធិការ​ពលករ​ចំណាកស្រុក ហើយ​និង​គណៈកម្មាធិការ​ពលកម្ម​កុមារ​។

គណៈកម្មាធិការ​នេះ​នឹង​រាយការណ៍​អំពី​សមិទ្ធផល​នានា​នៅក្នុង​ខែ​ក្រោយ គឺ​នៅ​មុន​ពេល​ចងក្រង​ព័ត៌មាន​បច្ចុប្បន្នភាព​សម្រាប់​សហរដ្ឋអាមេរិក​។ នេះ​បើ​តាម​ប្រព័ន្ធ​ផ្សព្វផ្សាយ​ ថៃ​ ដែល​បាន​រាយការណ៍​ថ្មីៗ​នេះ​។

ការ​តាំង​ខ្លួន​បែប​នេះ វា​ជា​ផ្នែក​នៃ​ការ​បង្កើន​កិច្ចខិតខំ​ប្រឹងប្រែង​របស់​លោក ប្រាយុធ លោក​ក៏​បាន​ប្រកាស​ផង​ដែរ​អំពី​ការ​ដាក់​បញ្ញត្តិ​ប្រសើរ​ឡើង​ទៅលើ​ឧស្សាហកម្ម​អាហារសមុទ្រ​ដែល​រក​ចំណូល​បាន​៨​ពាន់​លាន​ដុល្លារ ក្នុង​មួយ​ឆ្នាំ និង​រួម​ទាំង​ការ​ចុះបញ្ជី​ថ្មី​ទៅលើ​ទូកនេសាទ​និង​កម្មករ​ទូកនេសាទ ដែល​ភាគច្រើន​បំផុត​គ្មាន​ឯកសារ​។

ការ​ខ្វះខាត​ពលករ​នៅក្នុង​វិស័យ​ឧស្សាហកម្ម​ព្រៃផ្សៃ​នេះ​បាន​បណ្តាល​ឲ្យ​មាន​ពលករ​ប្រមាណ​២០​ម៉ឺន​ទៅ ​៣០​ ម៉ឺននាក់ ទៅ​ពី​ប្រទេស​កម្ពុជា ឡាវ និង មីយ៉ាន់ម៉ា។

ប្រទេស​ថៃ​ត្រូវ​បាន​រិះគន់​ជាយូរ​មក​ហើយ ចំពោះ​ការ​កេងប្រវ័ញ្ច​ទៅលើ​ពលករ​បរទេស ខណៈ​ការ​សន្យា និង​គោល​នយោបាយ​របស់​ខ្លួន​មិន​ត្រូវ​បាន​អនុវត្ត ហើយ​ដែល​នេះ​ជា​បញ្ហា​ដែល​លោក ប្រាយុធ បាន​ទទួល​ស្គាល់។

លោក ប្រាយុធ ត្រូវ​បាន​ស្រង់សម្តី​នៅក្នុង​កាសែត​បាងកក​ប៉ុស្តិ៍ថា ៖ «​យើង​បាន​ចាត់វិធានការ​មួយ​ចំនួន​កាលពី​អតីតកាល ប៉ុន្តែ វិធានការ​ទាំងនោះ​មិន​ដែល​ត្រូវ​បាន​អនុវត្ត​ទេ។​យើង​ត្រូវការ​កែលម្អ​ទាំង​ប្រសិទ្ធភាព​និង​បញ្ហា​ច្បាប់​»។

ប៉ុន្តែ​ក្រុម​អ្នកជំនាញ​នៅ​តែ​បន្ត​ដាក់​ការសង្ស័យ​ចំពោះ​វោហារស័ព្ទ​របស់​ថៃ​។

លោក Phil Robertson អនុប្រធាន​អង្គការ​ឃ្លាំមើល​សិទ្ធិមនុស្ស​នៅ​អាស៊ី បាន​ថ្លែង​ថា​៖ «​រដ្ឋាភិបាល​ប្រទេស​ជិត​ខាង​ដែល​ប្រជាជន​ខ្លួន​ជា​ញឹកញាប់​ជា​ជនរងគ្រោះ​ពី​ការ​ជួញដូរ​ក្នុង​ប្រទេស​ថៃ​គួរ​តែ​ទទូច​ឲ្យ​មាន​ចំណាត់ការ​ពិតប្រាកដ មិន​ត្រឹមតែ​ការ​និយាយ​ទេ​។

កាលដើម​ខែ​នេះ លោកស្រី ជូ ប៊ុនអេង រដ្ឋលេខាធិការ​ក្រសួង​មហាផ្ទៃ បាន​ទទួល​ស្គាល់​នូវ​តម្រូវការ​ទាមទារ​ឲ្យ​មាន​ការ​សហការ​ពី​ថៃ​លើ​បញ្ហា​កំណែទម្រង់​នេះ ដោយ​លោកស្រី​ថ្លែង​ថា «​ប្រទេស​កម្ពុជា​តែងតែ​រត់​ពី​ក្រោយ​ថៃ​»។

ទោះ​យ៉ាងណា​ក្តី ការ​សើរើ​គោលនយោបាយ​របស់​ថៃ​មិន​បាន​ធ្វើឲ្យ​មាន​ការ​ជឿជាក់​នោះ​ទេ។ កាលពី​ខែ​តុលា ថៃ​បាន​សន្យា​ថា​នឹង​ដាក់​បញ្ញត្តិ​ទៅលើ​ទូក​នេសាទ​ថៃ ប៉ុន្តែ​មិន​បាន​ធ្វើតាម​ការ​សន្យា​របស់​ខ្លួន​ទេ។

លោក មឿន តុលា អ្នក​សម្របសម្រួល​កម្មវិធី​ផ្នែក​ការងារ​នៅ​មជ្ឈមណ្ឌល​អប់រំ​ច្បាប់​សម្រាប់​សហគមន៍ បាន​ថ្លែង​ថា​៖ «​យើង​នឹង​រង់ចាំ​មើល​ផែនការ​ថ្មី​នេះ​។ ឥឡូវ​នេះ យើង​ឃើញ​ថា ស្ថានភាព​អាក្រក់​របស់​ពលករ​ចំណាកស្រុក​កម្ពុជា​នៅ​តែ​កើត​មាន​»៕

រាយការណ៍​បន្ថែមៈ បាងកក​ប៉ុស្តិ៍

អត្ថបទគួរចាប់អារម្មណ៍