ភ្នំពេញៈ មន្ត្រីរដ្ឋាភិបាលកម្ពុជាស្វាគមន៍ចំពោះជំហររបស់នាយករដ្ឋមន្ត្រីថៃ ប្រាយុធ ចាន-អូចា (Prayut Chan-o-cha) ដែលបានលើកឡើងថា មិនឲ្យលោក សម រង្ស៊ី ឆ្លងកាត់ប្រទេសថៃក្នុងដំណើរវិលមកកម្ពុជា។ ការស្វាគមន៍នេះធ្វើឡើងបន្ទាប់ពីលោក ប្រាយុធ បានថ្លែងក្នុងសន្និសីទសារព័ត៌មានកាលពីម្សិលមិញថា លោកនឹងមិនអនុញ្ញាតឲ្យក្រុមណាមួយប្រើប្រាស់ទឹកដីថៃក្នុងសកម្មភាពអ្វីមួយនោះទេ។
លោក ប្រាយុធ ត្រូវបានស្រង់សម្តីដោយសារព័ត៌មានបាងកកប៉ុស្តិ៍ ដោយថ្លែងថា៖ «យោងតាមការប្ដេជ្ញារបស់យើងសម្រាប់សមាគមអាស៊ាន យើងនឹងមិនជ្រៀតជ្រែកកិច្ចការផ្ទៃក្នុងគ្នាទេ ហើយយើងនឹងមិនអនុញ្ញាតឲ្យអ្នកប្រឆាំងរដ្ឋាភិបាលណាម្នាក់ប្រើប្រាស់ប្រទេសថៃដើម្បីសកម្មភាពនយោបាយឡើយ»។ លោកថ្លែងដូច្នេះដោយនិយាយដល់ទំនាក់ទំនងរវាងថៃ និងកម្ពុជាដែលជាសមាជិកអាស៊ានដូចគ្នា។
លោក កុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិបានថ្លែងថា កម្ពុជា និងថៃតែងតែសហការគ្នាល្អក្នុងនាមជាអ្នកជិតខាង ហើយមិនដែលអនុញ្ញាតឲ្យក្រុមណាមួយប្រើប្រាស់ទឹកដីនៃប្រទេសទាំង ២ ដើម្បីប្រឆាំងនឹងអ្នកជិតខាង ឬប្រទេសដទៃទៀតទេ។
លោកថ្លែងថា៖ «ដូច្នេះសំណើរបស់ សម រង្ស៊ី ដែលស្នើសុំការអនុញ្ញាតពីនាយករដ្ឋមន្ត្រីថៃ ដើម្បីប្រើប្រាស់ទឹកដីថៃចូលមកកម្ពុជានោះគឺថាមិនអាចទៅរួចទេ»។
លោក សម រង្ស៊ី ប្រធានស្ដីទីអតីតគណបក្សសង្គ្រោះជាតិដែលតុលាការកំពូលរំលាយកាលពីថ្ងៃទី ៣១ ខែតុលា បានសរសេរលិខិតមួយទៅកាន់លោក ប្រាយុធ ចាន-អូចា តាមរយៈស្ថានទូតថៃប្រចាំទីក្រុងប៉ារីសដោយលោកស្នើសុំឆ្លងកាត់ទឹកដីថៃ ដើម្បីចូលទៅប្រទេស កម្ពុជា តាមច្រកអន្តរជាតិប៉ោយប៉ែត។
លោក សម រង្ស៊ី បានសរសេរនៅក្នុងលិខិតនោះថា៖ «លោកប្រហែលជាបានដឹងហើយថា ខ្ញុំមានគម្រោងត្រឡប់ទៅកម្ពុជាវិញនៅថ្ងៃទី ៩ ខែវិច្ឆិកា ដែលជាថ្ងៃឯករាជ្យរបស់យើង។ ខ្ញុំគ្មានជម្រើសអ្វីផ្សេងទេ មានតែប្រឈមមុខនឹងទង្វើដែលអ្នកគាំទ្រខ្ញុំជាច្រើនបានទទួលរង»។
លោកបញ្ជាក់ថា សំណើរបស់លោកដើម្បីឆ្លងកាត់ប្រទេសថៃដោយសុវត្ថិភាពនោះ គឺអាស្រ័យលើការទទួលខុសត្រូវរបស់លោកចំពោះអ្នកគាំទ្រដែលបានរងទុក្ខយ៉ាងខ្លាំង ហើយក៏ដោយសារតែប្រជាជនកម្ពុជាទាំងអស់ដែលពួកគេគួរតែទទួលបានការជជែកវែកញែកបែបប្រជាធិបតេយ្យអំពីអនាគតសង្គមរបស់ពួកគេ។
លោកបន្តថា បើសិនជាលោក ប្រាយុធ អនុញ្ញាតលោកនឹងមកដល់ព្រលានយន្តហោះអន្តរជាតិសុវណ្ណភូមិនៅថ្ងៃទី ៨ ខែវិច្ឆិកា តាមរយៈជើងយន្តហោះ Thai Airway លេខ TG931។ បន្ទាប់មកលោកនឹងធ្វើដំណើមកកម្ពុជាតាមច្រកប៉ោយប៉ែត ជិតខេត្តអារញ្ញប្រាថេត (Aranhyaprathet)។
លោក កុយ គួង បានថ្លែងថាកាលពីពេលថ្មីៗនេះមានស្ត្រីម្នាក់បានព្យាយាមចូលមកកម្ពុជាតាមរយៈប្រទេស ថៃ ប៉ុន្តែថៃបានបង្វែរមិនឲ្យចូលមកកម្ពុជាទេ។
លោក កុយ គួង ថ្លែងដូច្នេះដោយសំដៅដល់លោកស្រី មូរ សុខហួរ ដែលត្រូវបានអាជ្ញាធរថៃមិនអនុញ្ញាតឲ្យចូលប្រទេស ថៃ កាលពីពេលថ្មីៗនេះ។
លោក កុយ គួង ថ្លែងថា៖ «សូម្បីនៅតាមព្រំដែនថៃក៏មានការបង្ហាញរូបថតនៃក្រុមខុសច្បាប់ដែរ។ ថៃនិយាយថា ពួកគេសហការក្នុងការចាប់ពួកគេទាំងនោះ។ ដូច្នេះខ្ញុំលើកជាសំណួរថា តើថៃនឹងមិនពិចារណាលើលិខិតស្នើសុំរបស់លោក សម រង្ស៊ី ទេ»។
លោក ខៀវ សុភ័គ អ្នកនាំពាក្យក្រសួងមហាផ្ទៃបានថ្លែងស្វាគមន៍វិធានការរបស់រាជរដ្ឋាភិបាលថៃដោយលោកបញ្ជាក់ថា៖ «យើងសូមអបអរសាទរការយោគយល់របស់រាជរដ្ឋាភិបាលថៃ។ រាជរដ្ឋាភិបាលថៃស្គាល់ស្ថានភាពការពិតនៅកម្ពុជាដោយសារគេដឹងថា គាត់មកមិនមែននាំសន្តិភាពមកទេ តែមកដើម្បីផ្ដួលរំលំរដ្ឋ ហើយយើងគ្មានការរំលោភសិទ្ធិមនុស្សដូចគេថានោះទេ»។
លោកសង្ឃឹមថា នគរបាលថៃ និងជួយសហការជាមួយប្រទេសកម្ពុជាក្នុងការទប់ស្កាត់ការបង្កចលាចលប៉ុនប៉ងធ្វើរដ្ឋប្រហារ។
ស្រដៀងគ្នានេះលោក ជិន ម៉ាលីន អ្នកនាំពាក្យក្រសួងយុត្តិធម៌បានថ្លែងថា៖ «នេះគឺជាការសម្រេចរបស់រដ្ឋអាធិបតេយ្យមួយ ហើយការសម្រេចនេះគឺផ្អែកទៅលើកិច្ចសហប្រតិបត្តិការរវាងរដ្ឋ ដែលជាសមាជិកអាស៊ាន ហើយក៏ផ្អែកទៅលើគោលការណ៍នៃធម្មនុញ្ញអាស៊ានផងដែរ ដែលជាគោលការណ៍មិនជ្រៀតជ្រែកចូលកិច្ចការផ្ទៃក្នុងរបស់រដ្ឋអាធិបតេយ្យមួយ ហើយក៏មិនផ្តល់ និងអនុញ្ញាឲ្យក្រុមណាមួយប្រើប្រាស់ទឹកដីរបស់ខ្លួនក្នុងការធ្វើសកម្មភាពប្រឆាំង ឬផ្តួលរំលំរដ្ឋាភិបាលស្របច្បាប់របស់រដ្ឋអធិបតេយ្យមួយដែលជាសមាជិក»។
លោក សម រង្ស៊ី មិនបានឆ្លើយតបនឹងសំណួរដែលសួរតាមអ៊ីមែលទេកាលពីម្សិលមិញ។ នៅលើទំព័រហ្វេសប៊ុករបស់លោក សម រង្ស៊ី បានបង្ហោះសំបុត្រយន្តហោះដែលលោកបានទិញដោយប្រើប្រាស់លិខិតឆ្លងដែនបារាំង។
លោក សុខ ទូច ប្រធានរាជបណ្ឌិត្យសភាកម្ពុជាយល់ថា ការសម្រេចចិត្តរបស់លោក ប្រាយុធ គឺធ្វើឡើងដោយគោរពដល់កម្ពុជា ព្រោះប្រទេសកម្ពុជាក៏មិនដែលអនុញ្ញាតឲ្យគណបក្សណាមួយពីប្រទេសថៃប្រើប្រាស់ទឹកដីកម្ពុជាទេ។ លោកបន្តថាការស្នើសុំសហការពីសំណាក់រដ្ឋាភិបាលកម្ពុជាមានន័យច្រើនជាងការស្នើសុំរបស់លោក សម រង្ស៊ី។
លោកថ្លែងថា៖ «ខ្ញុំជឿថា អាស៊ាននឹងមិនជ្រៀតជ្រែកកិច្ចការផ្ទៃក្នុងរបស់សមាជិកផ្សេងទេ។ បើសិនជាមានការជ្រៀតជ្រែក វាផ្ទុយនឹងធម្មនុញ្ញរបស់អាស៊ាន»។
យោងតាមអ្នកវិភាគនយោបាយលោក ឡៅ ម៉ុងហៃ បានថ្លែងឲ្យដឹងកាលពីម្សិលមិញថា វាជាឧត្តមប្រយោជន៍របស់ប្រទេស ថៃ។ ការវិលត្រឡប់របស់អតីតមេបក្សប្រឆាំងលោក សម រង្ស៊ី តាមរយៈប្រទេស ថៃ អាចប៉ះពាល់ដល់ផលប្រយោជន៍របស់ថៃនៅកម្ពុជា និងសេដ្ឋកិច្ចរបស់ខ្លួន (នៅថៃ) ដែលផ្ដល់ការងារឲ្យពលរដ្ឋខ្មែរប្រមាណ ២ លាននាក់៕
វីដេអូ៖