.jpg)
លោកនាយករដ្ឋមន្ត្រីហ៊ុន សែន។ រូបថត SPM
ភ្នំពេញ៖ លោកនាយករដ្ឋមន្រ្តី ហ៊ុន សែន បានបញ្ជាឱ្យរដ្ឋមន្រ្តីនៃក្រសួងការពារជាតិ ក្រសួងសុខាភិបាល ក្រសួងសេដ្ឋកិច្ចនិងហិរញ្ញវត្ថុ អគ្គមេបញ្ជាការកងយោធពលខេមរភូមិន្ទ មេបញ្ជាការកងទ័ពជើងគោក និងសាលារាជធានីភ្នំពេញ ធ្វើការរៀបចំសណ្ឋាគារចំនួន ២ បន្ថែមទៀត ជាមន្ទីរពេទ្យសម្រាប់ដាក់ព្យាបាលអ្នកជំងឺកូវីដ ១៩។
លោក ហ៊ុន សែន បានថ្លែងតាមរយៈសារសំឡេងមួយ នៅយប់ថ្ងៃពុធទី ១០ ខែ មីនា ឆ្នាំ ២០២១ នេះ ដោយមានការបារម្ភពីការកើនឡើងនូវអ្នកឆ្លងជំងឺកូវីដ ១៩ និងជំងឺផ្សេងៗទៀត លោកក៏បានបញ្ជាឱ្យសាលារាជធានីភ្នំពេញ និងមេបញ្ជាការកងទ័ពជើងគោក រៀបចំមន្ទីរពេទ្យចំនួន ២ បន្ថែមទៀត ដោយយកសណ្ឋាគារធ្វើជាទីកន្លែងរៀបចំ ដែលអាចមានប្រមាណជា ២០០ បន្ទប់ ឬអាចលើសនេះ។
លោកមានប្រសាសន៍ថា៖ «ខ្ញុំបានពិភាក្សាជាមួយនឹងសម្តេចពិជ័យសេនា ទៀ បាញ់ បញ្ចេញពេទ្យកងទ័ពដើម្បីជួយដល់គ្រូពេទ្យស៊ីវិល។ ខាងកងទ័ពក៏បានរៀបចំ៣០ក្រុមនៃក្រុមវេជ្ជបណ្ឌិតនិងគ្រូពេទ្យដើម្បីជួយដល់ផ្នែកស៊ីវិល»។
លោក ហ៊ុន សែន បានបន្តថា នៅពេលដែលមន្ទីរពេទ្យ ២ នេះ បានបង្កើតឡើងគឺត្រូវប្រគល់ឱ្យពេទ្យកងទ័ពជាអ្នករៀបចំនិងគ្រប់គ្រងតែម្តង និងត្រូវបានផ្គត់ផ្គង់ដោយក្រសួងសេដ្ឋកិច្ចនិងហិរញ្ញវត្ថុ ហើយកម្លាំងសល់ក៏នឹងត្រូវត្រៀមទៅតាមគោលដៅដែលមានហានិភ័យខ្ពស់៕
