ព្រះសីហនុៈ លោកនាយករដ្ឋមន្ត្រី ហ៊ុន សែន បានប្រកាសបិទបញ្ចប់ប្រតិបត្តិការរុករកជនរងគ្រោះដោយការរលំបាក់អគារ ៧ ជាន់នៅខេត្តព្រះសីហនុត្រឹមយប់ថ្ងៃចន្ទ ប៉ុន្តែលោកបានប្រកាសបើកធ្វើការស្រាវជ្រាវ រកឱ្យឃើញនូវការទទួលខុសត្រូវរបស់ស្ថាប័នរដ្ឋ របស់សមត្ថកិច្ចចំពោះករណីនេះ និងបានសម្រេចបង្កើតគណៈកម្មការមួយ ដើម្បីត្រួតពិនិត្យសំណង់នៅទូទាំងខេត្តទេសចរណ៍ជាប់មាត់សមុទ្រមួយនេះ។
ជាមួយគ្នានេះ អង្គការពលកម្មអន្តរជាតិ ILO ក៏បានបង្ហាញក្តីបារម្ភ អំពីហានិភ័យដែលកម្មកររាប់ពាន់នាក់ កំពុងប្រឈមមុខរាល់ថ្ងៃនិងទាមទារឱ្យមានវិធានការជាបន្ទាន់ដើម្បីលើកកម្ពស់សុវត្ថិភាព និងសុខភាពនៅកន្លែងធ្វើការរបស់កម្មករ។
ថ្លែងពីកន្លែងកើតហេតុ ក្នុងសន្និសីទសារព័ត៌មាន កាលពីយប់ថ្ងៃចន្ទ លោកនាយករដ្ឋមន្ត្រី ហ៊ុន សែន ដែលបានស្ថិតក្នុងប្រតិបត្តិការរុករកជនរងគ្រោះ តាំងពីថ្ងៃអាទិត្យមក បានបញ្ជាក់ថា ប្រតិបត្តិការសង្គ្រោះបែបនេះ គឺជារឿងដំបូងដែលបានកើតឡើងក្នុងប្រទេសកម្ពុជា ដែលវាជារឿងមួយគួរឲ្យសោកស្តាយ ហើយសោកនាដកម្មនេះបានផ្តល់មេរៀនឲ្យកម្ពុជា។
ជាមួយនឹងភាពសោកសង្រេង លោក ហ៊ុន សែន ក៏បានលើកឡើងផងដែរថា មេរៀននេះត្រូវតែបញ្ជាក់ឲ្យច្បាស់អំពីការទទួលខុសត្រូវរបស់រដ្ឋ របស់សមត្ថកិច្ច និងត្រូវរកឲ្យឃើញថា អំណាចរដ្ឋស្ថិតនៅកន្លែងណាដែលបណ្តែតបណ្តោយឲ្យអ្នកសាងសង់ អាចសាងសង់បានដោយមិនមានច្បាប់អនុញ្ញាតបែបនេះ។
លោកថ្លែងថា៖ «ខ្ញុំសោកស្តាយប្រសិនបើមានប្រតិបត្តិការពេញទំហឹងយើងនឹងអាចរកលើការជាក់ស្តែងខ្ញុំមកដល់ទីនេះក៏វាមានប្រយោជន៍មួយចំនួនក្នុងការផ្តល់មតិ និងការយកសម្ភារពីកន្លែងនេះកន្លែងនោះ ប៉ុន្តែប្រតិបត្តិការនេះត្រូវបានបណ្តែតបណ្តោយ ខ្ញុំមិននឹកស្មាន ហើយបទពិសោធបែបនេះ បើទោះជាមានមនុស្ស ២-៣ នាក់ ក៏មានមនុស្សទទួលត្រូវ ចុះទៅដល់ទីកន្លែង ដើម្បីដោះស្រាយបញ្ហានៅនឹងកន្លែង.ដូច្នេះ ពីថ្ងៃនេះទៅ គ្មានការលើកលែងណាមួយបានទេ»។
លោកបន្តថា៖ «ហើយរឿងនេះ យើងធ្លាប់ឮតែការបាក់អគារ នៅប្រទេសបង់ក្លាដែសនៅឥណ្ឌា នៅចិន និងប្រទេសផ្សេងៗ ក៏ប៉ុន្តែយើងមិនធ្លាប់ឮប្រទេសកម្ពុជាទេ តែនេះគឺជាការបាក់អគារមួយ ដែលយើងត្រូវធ្វើប្រតិបត្តិការមួយដ៏ធំ ហើយរហូតមកដល់ពេលនេះយើងបានបញ្ចប់ ដោយនៅសល់តែការសម្អាតតែប៉ុណ្ណោះ។ ប៉ុន្តែយើងមិនទាន់បញ្ចប់នូវការស្រាវជ្រាវ ដើម្បីរកឲ្យឃើញនូវការទទួលខុសត្រូវនោះទេ សំណង់មានច្បាប់ ឬអត់ច្បាប់ ហើយវានៅក្នុងក្របខ័ណ្ឌបែបណាបានវាកើតមានរឿងបែបនេះ?»។
ក្រោយហេតុការណ៍រលំបាក់អគារនេះ អភិបាលខេត្តព្រះសីហនុលោក យន្ត មីន កាលពីថ្ងៃចន្ទ បានសម្រេចសុំលាលែងពីតំណែង ដោយព្រមទទួលស្គាល់កំហុសលើការអសមត្ថកិច្ចរបស់ខ្លួន ហើយសំណើនេះ ក៏ត្រូវបានយល់ព្រមពីលោកនាយករដ្ឋមន្ត្រី ខណៈលោក ហ៊ុន សែន ក៏បានសម្រេចដកលោក ញឹម វណ្ណដា ចេញពីតួនាទីអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ ឲ្យកាន់តួនាទីថ្មី ដោយមូលហេតុខ្វះការទទួលខុសត្រូវនិងភូតភរផងដែរ។
លោកនាយករដ្ឋមន្ត្រី ថ្លែងថា លោកមិនអាចទុកឲ្យមន្ត្រីណាមួយនៅក្នុងប្រទេសឲ្យភូតកុហកលោករបៀប នេះដូចលោក ញឹម វណ្ណដា តទៅទៀតទេ ដែលលោកថែមទាំងថ្កោលទោសយ៉ាងម៉ឺងម៉ាត់ និងធ្វើការសម្រេចដកមន្ត្រីរូបនេះចេញពីសមាជិកគណៈរដ្ឋមន្ត្រី ហើយទុកឲ្យធ្វើជាទីប្រឹក្សារាជរដ្ឋាភិបាលហើយថាបើសិនជាមិនពេញចិត្ត លោកនឹងដកចេញជាបន្តទៀត។
លោកបញ្ជាក់ថា៖ «ខ្ញុំសម្រេចបណ្តេញសមាជិករដ្ឋាភិបាលម្នាក់ចេញ ដោយខ្ញុំជាប្រធាន ខ្ញុំមិនបានចុះមក ដល់ទីនេះ (ពីដំបូង)។ ពីទីក្រុងបាងកក ខ្ញុំមិនបានទទួលរបាយការណ៍ណាមួយពីគាត់។ ខ្ញុំមានការ យោគ យល់ខ្លាំងណាស់ម្សិលមិញ នៅពេលដែលខ្ញុំមកដល់ទីនេះ (មិនឃើញគាត់) ខ្ញុំបានសួរថា ឯកឧត្តម នៅណាពិតប្រាកដ? គាត់ថា នៅហ្នឹង។ អ៊ីចឹងបានជានៅទីនោះ ខ្ញុំនិយាយពីការមិនទទួលខុសត្រូវ និងការភូតកុហក»។
កាលពីថ្ងៃចន្ទ ក្រៅពីការកែប្រែរចនាសម្ព័ន្ធដោយការដោះដូរលោក យន្ត មីន ពីអភិបាលខេត្តព្រះសីហនុ មកធ្វើការនៅក្រសួងមហាផ្ទៃហើយជំនួសមកវិញដោយអភិបាលខេត្តកំពង់ចាម លោក គួច ចំរើន នោះលោក ហ៊ុន សែន ក៏បានសម្រេចបង្កើតគណៈកម្មការមួយ ដើម្បីត្រួតពិនិត្យសំណង់ទូទាំងខេត្តព្រះសីហនុ ដែលមានលោក ជា សុផារ៉ា រដ្ឋមន្ត្រីក្រសួងរៀបចំដែនដីជាប្រធាន។
លោកបញ្ជាក់ថា៖ «គ្រាន់តែជាអង្គការផ្នែកនយោបាយទេ គឺត្រូវតែរៀបចំអ្នកបច្ចេកទេសពិតប្រាកដ ដើម្បីមានសមត្ថកិច្ចវាយតម្លៃ ពិតប្រាកដ ទៅលើសំណង់ទាំងអស់ដែលកំពុងសាងសង់ត្រូវផ្អាកអ្នកដែលគ្មានច្បាប់សាងសង់ត្រូវតែផ្អាកទាំងអស់មិនអាចឲ្យមានករណីបែបនេះកើតឡើង។ អ៊ីចឹងយើងមិនចាំបាច់គ្រប់គ្រងរដ្ឋទេ បើសិនជាយើងមិនអាច រាំងស្កាត់នូវការកសាងបែបអនាធិបតេយ្យបែបនេះ»។
សំណង់អគារកម្ពស់ ៧ ជាន់ ដែលមានម្ចាស់ជាជនជាតិចិន និងមិនមានច្បាប់អនុញ្ញាតបានដួលរលំ កាលពីព្រឹកព្រលឹមថ្ងៃទី ២២ ខែ មិថុនា ដោយបានបង្កឲ្យកម្មករសំណង់កំពុងសម្រាកបណ្តោះអាសន្ននៅក្នុងអគារនោះប្រមាណជាង ៥០ នាក់ ទទួលរងគ្រោះក្នុងនោះស្លាប់ ២៨ នាក់ និងអ្នករបួសធ្ងន់ស្រាល ២៦ នាក់។
លោក ឡៅ ទិព្វសីហា រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ដែលជាប្រធានគណៈកម្មការគ្រប់គ្រងផ្នែកបច្ចេកទេសដែលទើបបង្កើតថ្មីដោយក្រសួងនេះ មិនអាចសុំការអត្ថាធិប្បាយបានទេ កាលពីម្សិលមិញ ដោយលោកអះអាងថា ជាប់ប្រជុំ។ ចំណែកលោក ជួន ណារិន្ទ ស្នងការខេត្តព្រះសីហនុ ក៏មិនអាចសុំការអត្ថាធិប្បាយបានដែរ ដោយលោកថ្លែងថា ជាប់បើកឡាន។
លោកស្រី លឹម សាមាន ប្រធានមន្ទីរសុខាភិបាលខេត្តព្រះសីហនុ ប្រាប់ភ្នំពេញប៉ុស្តិ៍ពីម្សិលមិញថា ក្នុង ចំណោមអ្នកស្លាប់ចំនួន ២៨ នាក់ គឺមានជនរងគ្រោះម្នាក់ នៅមិនទាន់ស្គាល់អត្តសញ្ញាណនៅឡើយទេ ព្រោះតែមិនទាន់មានសាច់ញាតិមកសួររក ហើយសូម្បីតែកម្មករដែលរងរបួសនៅកន្លែងកើតហេតុ ក៏មិនស្គាល់ជនរងគ្រោះដែរ។
ចំណែកអ្នករបួសវិញ គឺមាន ២ នាក់ហើយ បានចេញពីមន្ទីរពេទ្យត្រឡប់ទៅផ្ទះ ខណៈអ្នកដែលនៅបន្តសម្រាកក្នុងមន្ទីរពេទ្យ គឺស្ថានភាពល្អប្រសើរ រួមទាំងអ្នករបួសធ្ងន់ម្នាក់ដែលបានបញ្ជូនមកភ្នំពេញ។
លោកស្រីបញ្ជាក់ថា៖ «ប្រហែលជាអ្នកធូរស្រាល គាត់អាចសុំចេញពីមន្ទីរពេទ្យបាន ព្រោះយើងតាមដានគាត់ឲ្យរាងកាយគាត់ស្រួលបួលអស់ បានយើងឲ្យគាត់ចេញពីមន្ទីរពេទ្យ។ ពេលខ្លះពួកគាត់ថា ស្រួលខ្លួន ចង់ទៅផ្ទះ តែយើងនៅតែតាមដានទៀតព្រោះពួកគាត់ភាគច្រើន របួសក្បាល ដាច់រលាត់ដៃជើង មានតែម្នាក់ ដែលបាក់ដៃ»។
តាមការប្រកាសរបស់លោក ហ៊ុន សែន ជនរងគ្រោះទាំងអស់ក្នុងឧបទ្ទវហេតុដែលបានស្លាប់ គ្រួសារសពនីមួយៗនឹងទទួលបានថវិកាឧបត្ថម្ភជិត ៨ ម៉ឺនដុល្លារ ចំណែកជនរងគ្រោះ ចំនួន ២ នាក់ ដែលត្រូវបានក្រុមជួយសង្គ្រោះជួយបានពីគំនរបាក់បែកចុងក្រោយគេនោះ នឹងទទួលបានថវិកាក្នុងម្នាក់ៗ ៣ ម៉ឺនដុល្លារ។ ដោយឡែកអ្នករងគ្រោះដទៃទៀត នឹងទទួលថវិកាក្នុងម្នាក់ ១ ម៉ឺនដុល្លារ បន្ថែមពីលើថវិការដ្ឋ ៥ លានរៀល។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្ស អាដហុក បាននិយាយថាការជួយដល់ជនរងគ្រោះ តាមរយៈថវិកាទាំងនេះ គឺជារឿងមួយដែលល្អ ព្រោះបង្ហាញពីអំពើមនុស្សធម៌ហើយការលាលែងពីតំណែងក៏បង្ហាញពីការទទួលខុសត្រូវផងដែរក្នុងរឿងនេះ។ ប៉ុន្តែលោក ករុណា បន្ថែមថា ក្រៅពីការទទួលខុសត្រូវនេះ ការទទួលខុសត្រូវតាមនីតិវិធីច្បាប់កម្ពុជា គឺត្រូវតែធ្វើការស្រាវជ្រាវឲ្យបានច្បាស់លាស់ ជុំវិញអ្នកពាក់ព័ន្ធដែលបណ្តាលឲ្យមានសោកនាដកម្មនេះកើតឡើង។
លោកបញ្ជាក់ថា៖ «ហើយបើមានការចាត់វិធានការលើអំពើនេះហើយ យើងឃើញមានការបង្កើតគណៈកម្មការ ដើម្បីត្រួតពិនិត្យគុណភាពសំណង់ផ្សេងទៀត ព្រោះវាជារឿងមួយដែលត្រឹមត្រូវ។ ប៉ុន្តែយើងចង់ឃើញ ការអនុវត្តមានប្រសិទ្ធភាពកម្រិតណា? ហើយយើងនឹងធ្វើការតាមដាន ស្របពេលដែលពួកគាត់អះអាងថា មានសំណង់អគារជាច្រើន មិនមានច្បាប់អនុញ្ញាតទេ គឺត្រូវពិនិត្យឡើងវិញ ដើម្បីបញ្ចៀសគ្រោះមហន្តរាយនៅពេលខាងមុខទៀត»។
ទាក់ទងនឹងជនជាតិចិនដែលជាម្ចាស់អគារវិញ លោក សុក ហេង ចៅក្រមស៊ើបសួរ នៃសាលាដំបូងខេត្តព្រះសីហនុ កាលពីថ្ងៃចន្ទ បានសម្រេចចេញដីកាបង្គាប់ឲ្យឃុំខ្លួន ជនជាតិចិន ចំនួន ៤ នាក់ (ស្រីម្នាក់) ដែលជាអ្នកទទួលខុសត្រូវ ចំពោះឧបទ្ទវហេតុរលំបាក់អគារនេះ ពីបទមនុស្សឃាតដោយអចេតនា, បង្កឲ្យមានរបួសដោយអចេតនា និងធ្វើឲ្យខូចខាតដោយចេតនាមានស្ថានទម្ងន់ទោស ដោយសារបង្ករបួសស្នាមដល់អ្នកដទៃ យោងតាមមាត្រា ២០៧,មាត្រា ២៣៦ និងមាត្រា ៤១៤ នៃក្រមព្រហ្មទណ្ឌ និងតាមមាត្រា ២៩ ពីបទសមគំនិត។
យោងតាមដីកាបង្គាប់ឲ្យឃុំខ្លួនចំនួន ៤ សន្លឹកផ្សេងគ្នា បានបញ្ជាក់ថា តុលាការចោទប្រកាន់ និងឃុំខ្លួន ជនត្រូវចោទឈ្មោះ Cheng Kun ភេទប្រុស អាយុ ៣៩ ឆ្នាំ ជនជាតិចិន មុខរបរពាណិជ្ជករ លំនៅបច្ចុប្បន្ននៅភូមិ ៤ សង្កាត់លេខ ៤ ក្រុងព្រះសីហនុ ពីបទ មនុស្សឃាតដោយអចេតនា បង្កឲ្យមានរបួសដោយអចេតនា និងធ្វើឲ្យខូចខាតដោយចេតនាមានស្ថានទម្ងន់ទោស ដោយសារបង្ករបួសស្នាមដល់អ្នកដទៃ។
ចំណែកជនត្រូវចោទឈ្មោះ Deng Xin Gul ភេទប្រុស អាយុ ៤៨ ឆ្នាំ ជនជាតិចិន មុខរបរ អ្នកម៉ៅការសំណង់ លំនៅបច្ចុប្បន្ននៅផ្ទះជួល សង្កាត់លេខ ២ ក្រុងព្រះសីហនុ ឈ្មោះ Gao Yu ភេទប្រុស អាយុ ២៩ ឆ្នាំ ជនជាតិចិន មុខរបរជាងសំណង់ លំនៅមិនពិតប្រាកដ និងឈ្មោះ Xie Ya Ping ភេទស្រី អាយុ ៤៣ ឆ្នាំ ជាជនជាតិចិន មុខរបរ មើលការងារក្នុងការដ្ឋាន លំនៅបច្ចុប្បន្ននៅផ្ទះជួលភូមិ ៤ សង្កាត់លេខ ៤ ក្រុងព្រះសីហនុ ត្រូវចោទប្រកាន់ និងឃុំខ្លួនពីបទ សមគំនិតក្នុងអំពើខាងលើ។
ជាមួយគ្នានេះ អង្គការ ILO បានចេញសេចក្តីថ្លែងការណ៍កាលពីម្សិលមិញ បង្ហាញក្តីបារម្ភ អំពីហានិភ័យ ដែលកម្មកររាប់ពាន់នាក់ ប្រឈមមុខរាល់ថ្ងៃ និងទាមទារឱ្យមានវិធានការជាបន្ទាន់ ដើម្បីលើកកម្ពស់សុវត្ថិភាព និងសុខភាពនៅកន្លែងធ្វើការ។
សេចក្តីថ្លែងការណ៍នោះបញ្ជាក់ថា៖ «ហានិភ័យបែបនេះ អាចមានការដោះស្រាយ និងការពារបានរហ័ស។ ការដោះស្រាយបញ្ហានេះទាមទារ នូវវិធានការក្នុងផ្នែកជាច្រើន ដូច្នេះវិធានការសម្របសម្រួល និងទូលំទូលាយនាំមកនូវអ្នកជាប់ពាក់ព័ន្ធថ្នាក់ជាតិជាច្រើនឲ្យជួបជុំគ្នា គឺជាការចាំបាច់។ ទាំងនេះរួមមានការពិនិត្យមើលនូវបទប្បញ្ញត្តិ និងការអនុវត្តនៅក្នុងវិស័យសំណង់ ការដាក់ចេញនូវសុវត្ថិភាពការងារ និងបទដ្ឋានសុខភាព និងបទដ្ឋានសុវត្ថិភាព សាងសង់ ការបង្កើនការត្រួតពិនិត្យការងារ និងយុទ្ធនាការគ្មានឧបទ្ទវហេតុព្រមទាំងជំរុញឲ្យមានវប្បធម៌បង្ការសុវត្ថិភាពនៅក្នុងវិស័យនេះ»។
យោងតាមរបាយការណ៍របស់ក្រសួងការងារ និងបណ្តុះបណ្តាលវិជ្ជាជីវៈក្នុងឆ្នាំ ២០១៨ មានកម្មករសរុប ប្រមាណ ២៥ ២០៦ នាក់ បានជួបគ្រោះថ្នាក់ការងារ នៅកន្លែងធ្វើការ ក្នុងនោះមានកម្មករ ប្រមាណ ២០០ នាក់ បានស្លាប់ និង ២ ៧១១ នាក់ផ្សេងទៀតរងរបួស៕