.jpg)
សមត្ថកិច្ចជំនាញលើកគ្រាប់កាំភ្លើងដែលស្រង់ចេញពីទន្លេមេគង្គក្នុងស្រុកស្រីសន្ធរ ខេត្តកំពង់ចាមពីថ្ងៃទី ៨ ខែ មីនា ឆ្នាំ ២០២១។ រូប ក្រសួងមហាផ្ទៃ
ភ្នំពេញៈ លោកនាយករដ្ឋមន្ត្រី ហ៊ុន សែន បានសម្រេចឱ្យមន្ត្រីក្រុមការងារជំនាញបន្តរុករកយកគ្រាប់យុទ្ធភណ្ឌមិនទាន់ផ្ទុះចេញពីក្នុងនាវាដែលលិចក្នុងទន្លេមេគង្គ ចំនួន ៤ ទីតាំងផ្សេងទៀត ស្ថិតក្នុងភូមិសាស្ត្រស្រុកល្វាឯម និងស្រុក ខ្សាច់កណ្ដាល ខេត្តកណ្ដាល និងស្រុកពាមជរ ស្រុកពាមរក៍ ខេត្តព្រៃវែងដែលបានលិចក្នុងសម័យសង្គ្រាមស៊ីវិលចន្លោះ ឆ្នាំ ១៩៧០ ដល់ ១៩៧៥។
លោក ម៉ី សុភា មេបញ្ជាការបោសសម្អាតគ្រាប់មិនទាន់ផ្ទុះនៃមជ្ឈមណ្ឌលជាតិគ្រប់គ្រង កងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាម (NPMEC) ប្រាប់ ភ្នំពេញ ប៉ុស្តិ៍ ពីម្សិលមិញថា ការសម្រេចនេះ បន្ទាប់ពីការរុករកគ្រាប់យុទ្ធភណ្ឌមិនទាន់ផ្ទុះក្នុងនាវាដែលលិចក្នុងទន្លេស្ថិតនៅភូមិវាល ឃុំមានជ័យ ស្រុកស្រីសន្ធរ ខេត្តកំពង់ចាមជិតត្រូវបានបញ្ចប់។
លោក ម៉ី សុភា ថ្លែងថា ចាប់តាំងពីខែតុលា ឆ្នាំ ២០២០ រហូតមកដល់ខែមីនា ឆ្នាំ ២០២១ នេះ ប្រតិបត្តិការបោសសម្អាតគ្រាប់យុទ្ធភណ្ឌមិនទាន់ផ្ទុះក្នុងនាវាចម្បាំងលិចក្នុងទន្លេមេគង្គស្ថិតក្នុងភូមិវាល ឃុំមានជ័យ ស្រុកស្រីសន្ធរ ខេត្តកំពង់ចាម បានចំនួន ១៥ ២៨២ គីឡូក្រាម រួមទាំងឆ្អឹងសពមនុស្ស និងសម្ភារសឹកមួយចំនួនទៀត។ ដោយឡែកសម្រាប់នាវានឹងត្រូវស្រង់ចេញពីក្នុងទន្លេមេគង្គនៅចុងខែនេះ ឬ ដើមខែមេសា ឆ្នាំ ២០២១។
លោកថ្លែងថា លោកនាយករដ្ឋមន្ត្រី ហ៊ុន សែន អនុញ្ញាតឱ្យមានការចុះយកគ្រាប់យុទ្ធភណ្ឌមិនទាន់ផ្ទុះ និងនាវានៅក្នុងទន្លេនេះកាលពីថ្ងៃទី ២៦ ខែ មករា ឆ្នាំ ២០២១ ដោយលោកនាយករដ្ឋមន្ត្រីយល់ឃើញថា វាពាក់ព័ន្ធនឹងសន្តិភាពនៅក្នុងប្រទេស។ ដូច្នេះរាល់គ្រាប់យុទ្ធភណ្ឌមិនទាន់ផ្ទុះដែលសល់ពីសម័យសង្គ្រាមរួមមានស្ថិតក្នុងដីក្នុងទឹក និងលើគោកត្រូវយកចេញឱ្យអស់ ដើម្បីឱ្យកម្ពុជាមានសន្តិភាព និងសុវត្ថិភាពគ្រប់ទីកន្លែង។
ក្រុមមន្ត្រីចុះពិនិត្យគ្រាប់មិនទាន់ផ្ទុះនៅស្រុកស្រីសន្ធរពីថ្ងៃទី ៨ មីនា។ រូប ក្រសួងមហាផ្ទៃ
លោក ម៉ី សុភា ថ្លែងថា៖ «សម្តេចនាយករដ្ឋមន្ត្រីបានគិតគូរពីសុវត្ថិភាពដល់ប្រជាពលរដ្ឋជំនាន់ក្រោយៗទៀត ព្រោះគ្រាប់យុទ្ធភណ្ឌមិនទាន់ផ្ទុះនេះ នៅពេលស្ថិតនៅក្នុងរយៈពេល ១០០ ឆ្នាំទៀត វានឹងអាចបំប្លែងទៅជាសារធាតុពុលផ្សេងៗទៀត ដែលបង្កឱ្យប៉ះពាល់ដល់ប្រទេសកម្ពុជា ដូចជាការប្រើប្រាស់ទឹករបស់ប្រជាពលរដ្ឋដែលរស់នៅតាមដងទន្លេនេះ»។
លោកមេបញ្ជាការបន្ថែមថា៖ «មួយទៀតគឺប្រទេសកម្ពុជា ត្រូវបានកំណត់នៅក្នុងសន្ធិសញ្ញាទីក្រុងអូតាវ៉ា និងធ្វើយ៉ាងណាឱ្យអស់គ្រាប់មីននៅឆ្នាំ ២០២៥។ ដោយឡែកគ្រាប់យុទ្ធភណ្ឌមិនទាន់ផ្ទុះក៏ត្រូវបានរាប់បញ្ចូលនៅក្នុងសន្ធិសញ្ញានេះដែរ»។
បើតាមលោក ម៉ី សុភា បន្ទាប់ពីទទួលបានការអនុញ្ញាតពីលោកនាយករដ្ឋមន្ត្រីរួចហើយ ក្រុមការងាររបស់លោកបាននិងកំពុងរៀបចំដំណើរការបើកការដ្ឋាន ចុះស្រាវជ្រាវ និងយកគ្រាប់យុទ្ធភណ្ឌមិនទាន់ផ្ទុះចេញពីទន្លេទាំង ៤ ទីតាំងនេះនៅសប្តាហ៍ក្រោយ។ ប្រតិបត្តិការនេះចាប់ផ្តើមពីចំណុចឃុំបឹងគ្រំ ស្រុកល្វាឯម ខេត្តកណ្តាល និងត្រូវប្រើប្រាស់រយៈពេល ១ ឆ្នាំដើម្បីឱ្យចប់នៅទីតាំងទាំង ៤ នេះ។
យោងតាមការសិក្សាបឋមបានបង្ហាញថា ទីតាំងដែលនាវាចម្បាំងលិចនៅក្នុងទន្លេស្ថិតក្នុងឃុំបឹងគ្រំ ស្រុកល្វាឯមតែមួយនោះត្រូវបានគេប៉ាន់ប្រមាណមានគ្រាប់យុទ្ធភណ្ឌមិនទាន់ផ្ទុះជាប្រភេទគ្រាប់ធំៗគឺមាន ៥០០ តោន។ គ្រាប់ទាំងនេះត្រូវបានដឹកចេញពីព្រៃនគរដែលជាមូលដ្ឋានយោធារបស់អាមេរិក យកមកផ្គត់ផ្គង់ក្នុងសម័យសង្គ្រាមនៅប្រទេសកម្ពុជា៕
