ភ្នំពេញៈ លោកនាយករដ្ឋមន្ត្រី ហ៊ុន សែន បានលើកឡើងនូវអនុសាសន៍ ៤ ចំណុច សម្រាប់សហព័ន្ធអតីតយុទ្ធជនអាស៊ានហៅកាត់ថា VECONAC ដើម្បីឲ្យសហព័ន្ធនេះសម្រេចបាននូវសមិទ្ធផលថ្មីបន្ថែមទៀតក្នុងក្របខ័ណ្ឌផែនការសកម្មភាពអាស៊ាន។
ការផ្ដល់នូវអនុសាសន៍ទាំងនេះបានធ្វើឡើងក្នុងពេលលោកធ្វើជាអធិបតីនៃពិធីបើកមហាសន្និបាតសហព័ន្ធអតីតយុទ្ធជនអាស៊ានលើកទី ១៩ នៅវិមានសន្តិភាពកាលពីព្រឹកថ្ងៃអង្គារម្សិលមិញដែលកម្ពុជាគឺជាប្រធានប្តូរវេននៃស្ថាប័ននេះ។
លោក ហ៊ុន សែន ដែលជាប្រធានសមាគមអតីតយុទ្ធជនកម្ពុជាបានលើកនូវអនុសាសន៍ទី ១ ដោយលោកស្នើឲ្យមានការរួមគ្នាលើកកម្ពស់ប្រណីតភាពជីវិត និងការពារផលប៉ះពាល់អាយុកាលដែលបណ្ដាលមកពីសង្គ្រាមទៅលើសុខភាពតាមរយៈការការពារសិទ្ធិស្របច្បាប់។
ចំពោះអនុសាសន៍ទី ២ លោកស្នើឲ្យមានការរួមគ្នារៀបចំគោលនយោបាយ ផែនការសកម្មភាព និងយន្តការអនុវត្តន៍នានាដើម្បីពង្រីកវិស័យអតីតយុទ្ធជនឱ្យបានកាន់តែទូលំទូលាយ។ អនុសាសន៍ទី ៣ លោកស្នើឲ្យបន្តលើកកម្ពស់សមត្ថភាពចំណេះដឹងឱ្យបានទូលំទូលាយដល់អតីតយុទ្ធជន និងជនរងគ្រោះដោយសារសង្គ្រាមក្នុងតំបន់តាមរយៈការរៀបចំជាកម្មវិធីអភិវឌ្ឍន៍សិក្ខាសាលាការចែកចាយព័ត៌មាន ការផ្លាស់ប្តូរបទពិសោធ ចំណេះដឹងព័ត៌មានវិទ្យា និងសកម្មភាពដទៃទៀត។
រីឯអនុសាសន៍ចុងក្រោយគឺលោកបានស្នើឲ្យថ្នាក់ដឹកនាំប្រទេសសមាជិកអាស៊ានទាំងអស់បន្តចូលរួមឲ្យកាន់តែសកម្មដើម្បីពង្រីកវិសាលភាពនៃការលើកទឹកចិត្តដល់អតីតយុទ្ធជនអាស៊ាន ការការពារសិទ្ធិរស់រានមានជីវិតសុវត្ថិភាពបុគ្គលជាមួយនឹងការពង្រឹងចំណងមិត្តភាព និងសាមគ្គីភាពឱ្យកាន់តែជិតស្និទ្ធ។
លោកថ្លែងថា៖ «ខ្ញុំសង្ឃឹមថា សមាគមអតីតយុទ្ធជនកម្ពុជា និងសហព័ន្ធអតីតយុទ្ធជនអាស៊ាននឹងបន្តកិច្ចសហការកាន់តែជិតស្និទ្ធក្នុងស្មារតីសាមគ្គីភាព និងការទទួលខុសត្រូវខ្ពស់ ដើម្បីជម្នះនូវរាល់បញ្ហាប្រឈមនានាទទួលបានសមិទ្ធផលថ្មីៗបន្ថែមទៀតជូនដល់អតីតយុទ្ធជន និងគ្រួសារអតីតយុទ្ធជនដោយសារសង្គ្រាមដើម្បីរួមចំណែកសម្រេចបានគោលដៅរបស់សហព័ន្ធអតីតយុទ្ធជនអាស៊ានគឺសន្តិភាព វិបុលភាព និងភាពសុខដុមរមនាជាមួយនឹងការលើកកម្ពស់ការគោរពសិទ្ធិ និងសេចក្តីថ្លៃថ្នូររបស់អតីតយុទ្ធជនទាំងក្នុងតំបន់ និងនៅលើពិភពលោក»។
ដោយឡែកនៅកម្ពុជាវិញលោកបញ្ជាក់ថា អតីតយុទ្ធជនបានឆ្លងកាត់នូវទុក្ខសោក និងមហាវិនាសកម្មដោយសារសង្គ្រាមជាច្រើនជំនាន់ចាប់ពីសង្គ្រាមឥណ្ឌូចិនឆ្នាំ ១៩៧០-១៩៧៥ និងរបបប្រល័យពូជសាសន៍ប៉ុលពតពីឆ្នាំ ១៩៧៥ ដល់ ១៩៧៩។ លើសពីនេះក៏មានបញ្ហាប្រឈមជាច្រើនដែលកម្ពុជាត្រូវដោះស្រាយទាំងផ្នែកសេដ្ឋកិច្ចសង្គម នយោបាយ និងការទូត ជាពិសេសការតស៊ូជាមួយសង្គ្រាមស៊ីវិលរ៉ាំរ៉ៃ។
លោកក៏បានរំឭកដែរថា កម្ពុជាទទួលបានសន្តិភាពពេញលេញនៅចុងឆ្នាំ ១៩៩៨ តាមរយៈនយោបាយឈ្នះ ឈ្នះ ដែលធ្វើឲ្យកម្ពុជាមានឯកភាពទឹកដីទាំងស្រុង ហើយសន្តិភាពនេះក៏មានមូលដ្ឋានគ្រឹះចេញពីការធ្វើសមាហរណកម្មកងកម្លាំងប្រដាប់អាវុធ និងភាគីពាក់ព័ន្ធទាំងអស់។
លោកបន្តថា កម្ពុជាបានយកចិត្តទុកដាក់ខ្ពស់ចំពោះអតីតយុទ្ធជន និងក្រុមគ្រួសាររបស់ពួកគេដោយមានការផ្ដល់សេវាថែទាំអតីតយុទ្ធជន ការគាំពារសុខភាព និងការឧបត្ថម្ភសម្ភារចាំបាច់ទាំងឡាយ ការជួយបណ្ដុះបណ្ដាលវិជ្ជាជីវៈ ការដោះស្រាយការងារ មុខរបរ ការផ្ដល់ដីសម្បទានសង្គមកិច្ច ការជួយកសាងលំនៅឋានដើម្បីឲ្យពួកគេមានធនធានដីធ្លី មានលំនៅឋាន និងអាចប្រកបមុខរបបផ្សេងៗសម្រាប់ផ្គត់ផ្គង់ជីវភាពគ្រួសារឲ្យកាន់តែប្រសើរ។
លោកបានបញ្ជាក់ថា៖ «ទាំងអស់នេះគឺជាប្រពៃណីដ៏ថ្លៃថ្លារបស់ប្រជាជាតិកម្ពុជាដែលមានតាំងពីសម័យបុរាណរហូតដល់បច្ចុប្បន្នក្នុងការជួយគ្នាទៅវិញទៅមក...» ។
លោក គន់ គីម អនុប្រធានសមាគមអតីតយុទ្ធជនកម្ពុជា និងជាប្រធានប្ដូរវេននៃ VECONAC បានថ្លែងថា សហព័ន្ធអតីតយុទ្ធជនអាស៊ានត្រូវបានទទួលស្គាល់ដោយអាស៊ានថាជាអង្គភាពមនុស្សធម៌ ដែលបាននិងកំពុងធ្វើសកម្មភាពផ្ទាល់ជាមួយអតីតយុទ្ធជនដោយសារសង្គ្រាម។
លោកបន្តថា៖ «សហព័ន្ធអតីតយុទ្ធជនអាស៊ានតែងអនុវត្តជាប្រចាំនូវគោលបំណងរបស់សហព័ន្ធដូចជា ការផ្លាស់ប្ដូរបទពិសោធ ទស្សនកិច្ចទៅបណ្ដាប្រទេសជាសមាជិកដើម្បីស្វែងយល់ ដកស្រង់បទពិសោធអំពីការផ្ដល់សេវា និងការលើកកម្ពស់ដល់អតីតយុទ្ធជនប្រទេសជាសមាជិកដែលតែងតែសហការ និងជួយផ្ដល់ការហ្វឹកហ្វឺន បំប៉នជំនាញទៅវិញទៅមកដល់អតីតយុទ្ធជន»៕