.jpg)
លោកនាយករដ្ឋមន្ត្រី ហ៊ុន សែន ថ្លែងក្នុងរដ្ឋសភានាពេលកន្លងមក។ ហ៊ាន រង្សី
ភ្នំពេញៈ លោកនាយករដ្ឋមន្ត្រី ហ៊ុន សែន ព្រមានចាត់វិធានការក្តៅដោយមិនមានការលើកលែងចំពោះអាជ្ញាធរមូលដ្ឋាន ប្រសិនបើរកឃើញថា នៅក្នុងភូមិ ឃុំ សង្កាត់ មានការឃុបឃិតគ្នាដាក់បញ្ចូលសាច់ញាតិរបស់ខ្លួនដែលមិនមែនជាគ្រួសារក្រីក្រ ដើម្បីទទួលបានការឧបត្ថម្ភសាច់ប្រាក់ពីរដ្ឋាភិបាលក្នុងអំឡុងពេលការរាតត្បាតជំងឺកូវីដ ១៩។
លោក ហ៊ុន សែន បានសរសេរនៅលើទំព័រហ្វេសប៊ុកកាលពីថ្ងៃអង្គារថា ដើម្បីធានាថា ប្រជាពលរដ្ឋក្រីក្រដែលកំពុងជួបបញ្ហាលំបាកពិតប្រាកដទទួលបាននូវជំនួយឧបត្ថម្ភពីរាជរដ្ឋាភិបាល គឺការងារធ្វើបច្ចុប្បន្នភាពគ្រួសារក្រីក្រ និងជនងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ១៩ នេះមានសារៈសំខាន់ខ្លាំងណាស់។
លោក ហ៊ុន សែន ថ្លែងថាដើម្បីធានាឲ្យបាននូវតម្លាភាព និងសុចរិតភាពក្នុងការផ្តល់សេវាសម្រាប់កម្មវិធីឧបត្ថម្ភសាច់ប្រាក់ លោកបានចេញបទបញ្ជាយ៉ាងម៉ឺងម៉ាត់ដល់អាជ្ញាធរមូលដ្ឋានគ្រប់លំដាប់ថ្នាក់ ពិសេសចំពោះអ្នកអនុវត្តផ្ទាល់នៅតាមឃុំសង្កាត់ទាំងអស់គឺត្រូវផ្តោតការយកចិត្តទុកដាក់បំពេញការងារនេះឲ្យបានត្រឹមត្រូវ និងខ្ជាប់ខ្ជួនបំផុត។
លោក ហ៊ុន សែន ថ្លែងថា៖ «ខ្ញុំនឹងចាត់វិធានការក្តៅហើយនឹងមិនមានការលើកលែងឡើយ ប្រសិនបើរកឃើញថានៅក្នុងភូមិ និងឃុំ សង្កាត់មួយណាមានករណីមិនប្រក្រតីនេះកើតមានឡើង។ (អាជ្ញាធរមូលដ្ឋាន) គឺត្រូវចៀសវាងដាច់ខាតនូវការឃុបឃិតគ្នាដាក់បញ្ចូលសាច់ញាតិបងប្អូនកូនក្មួយខ្លួនឯងដែលមិនមែនជាគ្រួសារក្រីក្រនឹងងាយរងគ្រោះពិតប្រាកដដើម្បីទទួលបាននូវប្រាក់ឧបត្ថម្ភនេះ»។
លោក ហ៊ុន សែន បន្តថា ការងារនេះគឺត្រូវពឹងផ្អែកស្ទើរតែទាំងស្រុងលើអាជ្ញាធរមូលដ្ឋាន គឺមេភូមិ និងក្រុមប្រឹក្សាឃុំ សង្កាត់ ដែលត្រូវតែធ្វើឱ្យបានច្បាស់លាស់ និងហ្មត់ចត់បំផុត។
កាលពីថ្ងៃទី ២៤ ខែមិថុនា លោក ហ៊ុន សែន បានប្រកាសដាក់ឱ្យប្រើជាផ្លូវការនូវកម្មវិធីផ្តល់សាច់ប្រាក់ដល់ប្រជាពលរដ្ឋដែលមានជីវភាពក្រីក្រ និងងាយរងគ្រោះ ដោយសារផលប៉ះពាល់នៃជំងឺកូវីដ១៩។
លោក ណុប កនណាវុឌ្ឍ អ្នកនាំពាក្យក្រសួងផែនការ មិនអាចទាក់ទងសុំអត្ថាធិប្បាយបានទេកាលពីថ្ងៃអង្គារ។ យោងតាមហ្វេសប៊ុកលោក ហ៊ុន សែន កាលពីថ្ងៃទី ២៤ ខែមិថុនា បានឱ្យដឹងថា បច្ចុប្បន្នគ្រួសារដែលមានបណ្ណសមធម៌ ទាំងក្រ ១ និងក្រ ២ មានប្រមាណជាង ៥៦ ម៉ឺនគ្រួសារ ដែលរាជរដ្ឋាភិបាលត្រូវចំណាយថវិកាប្រមាណ ២៥ លានដុល្លារក្នុង ១ ខែៗសម្រាប់បើកផ្តល់ជូនពួកគាត់។
លោក ឡាំ សុជាតិ នាយកប្រតិបត្តិវិទ្យាស្ថានតស៊ូមតិ និងគោលនយោបាយ បានប្រាប់ភ្នំពេញប៉ុស្តិ៍កាលពីថ្ងៃអង្គារថា នីតិវិធីក្នុងការធ្វើបច្ចុប្បន្នភាពអ្នកក្រីក្រគឺមិនប្រកាន់និន្នាការនយោបាយ ឬនិន្នាការសាច់ញាតិនោះទេ។ ប្រសិនបើការងារនេះអនុវត្តតាមបច្ចេកទេសពិតប្រាកដ អ្នកក្រីក្រពិតប្រាកដនឹងទទួលបានការគាំទ្រថវិកា។ ការបញ្ជាក់បន្ថែមរបស់លោក ហ៊ុន សែន គឺជារឿងដែលល្អដែលបញ្ជាក់ពីការតាំងចិត្តរបស់រដ្ឋាភិបាលថ្នាក់ជាតិដើម្បីឱ្យមន្ត្រីធ្វើការកំណត់អ្នកក្រីក្រឱ្យបានពិតប្រាកដ និងទទួលបានការឧបត្ថម្ភសាច់ប្រាក់ដើម្បីចៀសវាងការរិះគន់នៅថ្ងៃក្រោយ។
លោក សុជាតិ បានថ្លែងថា៖ «ការជួយថវិកាដល់ប្រជាជន វាអាចនឹងទទួលផលវិបាកអវិជ្ជមាននៅថ្ងៃក្រោយ ប្រសិនបើការជួយហ្នឹងវាអត់បានទៅដល់ដៃអ្នកក្រីក្រពិតប្រាកដ ហើយអ្នកដែលក្រីក្រពិតប្រាកដ ចុងក្រោយគាត់អត់បានទទួល គាត់អាចតវ៉ា ឬត្អូញត្អែរ»។
«យើងធ្វើឱ្យបានត្រឹមត្រូវតាមនីតិវិធី ហើយឱ្យបានប្រជាពលរដ្ឋ [ក្រីក្រ] ទាំងអស់គ្នាច្បាស់លាស់ ហើយមានតម្លាភាព ហើយមានការចូលរួមពីប្រជាជននៅមូលដ្ឋានមានបញ្ជីឈ្មោះអាចផ្សាយជាសាធារណៈ»៕
វីដេអូ៖
