The Phnom Penh Post Search

Search form




Logo of Phnom Penh Post newspaper Phnom Penh Post - នាយក​រដ្ឋ​មន្ត្រី​រិះគន់​តុលាការ​ភ្នំពេញ​ រឿង​ដោះ​លែង​ឪពុក​ម្តាយ ថោង សារ៉ាត់

នាយក​រដ្ឋ​មន្ត្រី​រិះគន់​តុលាការ​ភ្នំពេញ​ រឿង​ដោះ​លែង​ឪពុក​ម្តាយ ថោង សារ៉ាត់

លោកនាយករដ្ឋមន្ត្រី​ ហ៊ុន សែន ថ្លែង​នៅ​វិទ្យា​ស្ថាន​ជាតិ​អប់រំ ក្នុង​ពិធី​ចែក​សញ្ញាបត្រ​ដល់​និស្សិត​បញ្ចប់​ការ​សិក្សា កាល​ពី​ម្សិលមិញ។
លោកនាយករដ្ឋមន្ត្រី​ ហ៊ុន សែន ថ្លែង​នៅ​វិទ្យា​ស្ថាន​ជាតិ​អប់រំ ក្នុង​ពិធី​ចែក​សញ្ញាបត្រ​ដល់​និស្សិត​បញ្ចប់​ការ​សិក្សា កាល​ពី​ម្សិលមិញ។ ហេង ជីវ័ន

នាយក​រដ្ឋ​មន្ត្រី​រិះគន់​តុលាការ​ភ្នំពេញ​ រឿង​ដោះ​លែង​ឪពុក​ម្តាយ ថោង សារ៉ាត់

ភ្នំពេញៈ លោក​នាយក​រដ្ឋមន្រ្តី ហ៊ុន សែន កាល​ពី​ម្សិល​មិញ​នេះ បាន​ស្នើ​ជា​សាធារណៈ​ទៅ​​ឧត្តម​ក្រុម​ប្រឹក្សា​នៃ​អង្គ​ចៅក្រម​ឲ្យ​ពិនិត្យ​លើ​សេចក្តី​សម្រេច​របស់​ចៅក្រម លី សុខលេង ដែល​ដាក់​ឲ្យ​ឪពុក​ម្តាយ​ឧកញ៉ា ​ថោង សារ៉ាត់ នៅ​ក្រៅ​ឃុំ​កាល​ពី​ថ្ងៃទី​៧ ខែ​មករា និង​បាន​ស្តី​​បន្ទោស​ជា​​ចំហ​ទៅ​លើ​ចៅ​ក្រម​សាលា​ដំបូង​រាជធានី ដែល​អះ​អាង​ថា​លោក ថោង សារ៉ាត់ មិន​ពាក់​ព័ន្ធ​នឹង​រឿង​ឃាតកម្ម​នេះ ទាំង​មិន​ទាន់​បាន​​កាត់​ទោស​នៅឡើយ។

ថ្លែង​នៅ​វិទ្យា​ស្ថាន​ជាតិ​អប់រំ ក្នុង​ពិធី​ចែក​សញ្ញាបត្រ​ដល់​និស្សិត​បញ្ចប់​ការ​សិក្សា លោក​ ហ៊ុន សែន បាន​រិះ​គន់​ពី​ចំណាត់​ការ​របស់​ចៅក្រម​សាលា​ដំបូង​រាជធានី និង​បាន​ស្នើ​ទៅ​លោក ​អង្គវង្ស វឌ្ឍានា រដ្ឋមន្រ្តី​ក្រសួង​យុត្តិធម៌​និង​ជា​សមាជិក​ឧត្តម​ក្រុម​ប្រឹក្សា​នៃ​អង្គ​ចៅក្រម​ឲ្យ​ចាត់​វិធានការ​លើ​ចៅក្រម ដែល​សម្រេច​​ដោះលែង​លោក ថោង ចំរើន និង​អ្នក​​ស្រី កែវ សារី ដែល​ជា​ឪពុក​ម្តាយ​លោក​ ថោង សារ៉ាត់ ឲ្យ​នៅ​ក្រៅ​ឃុំ កាល​ពី​ថ្ងៃ​ទី​៧ ខែ​កុម្ភៈ និង​ធ្វើ​អធិការ​កិច្ច​លើ​សំណុំ​រឿង​នេះ ដើម្បី​ពន្លឿន​ការ​ចាប់​ឃាតករ​ដាក់​ទោស។

លោក​បន្ត​ថា ចំពោះ​មតិ​សាធារណ​ជន​មួយ​ចំនួនដែល​ថា មាន​ការ​បញ្ជា​ពី​វៀតណាម​លើ​ករណី​លោក ថោង សា​រ៉ាត់​នេះ ​គឺ​លោក​មិន​បាន​លូក​លាន់​ឬ​បញ្ជា​ឲ្យ​ដោះ​លែង​ឪពុក​ម្តាយ​លោក​ ថោង សារ៉ាត់ ​ទេ ប៉ុន្តែ​ចៅ​ក្រម​ទៅ​វិញ​ទេ ដែល​បំពាន​លើ​សេចក្តី​សម្រេច​របស់​ខ្លួន ទាំង​​ហេតុ​ផល​មិន​សមរម្យ។

លោក​បន្ត​ថា៖ «ការ​បក​ស្រាយ​ រាក់​កំផែល ទី១ យក​ហេតុ​ផល សុខភាព បើ​ហេតុ​ផលសុខ​ភាព ម៉េច​ក៏​មិន​យក​មនុស្ស​ទៅ​ព្យាបាល ប៉ុន្តែ​ថា បទ​ល្មើស​មជ្ឈិម​ទេ អា​កាំ​ភ្លើង ៨ ដើម គេ​ចាត់​ទុក​ជា​បទ​ល្មើស​មជ្ឈិម បាន​ខ្ញុំ​ស្រែក​តែ​ម្តង​ ថា​គ្រាន់​តែ​កាន់​ព្រនង់ វា​ជាប់​គុក ប៉ុន្តែ​អានេះ​កាំ​ភ្លើង ៨ ដើម បែរ​ជា​រួច​ខ្លួន​ទៅ​ឲ្យ​នៅ​ក្រៅ​ឃុំ រួច​ហើយ​ប្រិប​ ចេះ​ទៅ​តាម​ចាប់​បាន​វិញ កុំ​អី​រឿង​ធំ​ហើយ»។

ពាក់ព័ន្ធ​នឹង​រឿង​ឪពុក​ម្តាយ​លោក ថោង សារ៉ាត់ នេះលោក​នាយក​រដ្ឋ​មន្រ្តី បាន​ឲ្យ​ដឹង​តាម​ការ​សិក្សា​សំ​ណុំ​រឿង​ឃើញ​ថា ចៅក្រម​សាលា​ដំបូង​ថែម​ទាំង​បាន​ទម្លាក់​ការ​ទទួល​ខុស​ត្រូវ​របស់​ខ្លួន​ចំពោះ​ការ​ដោះ​លែង​នៅ​ក្រៅ​ឃុំ​នេះ​ទៀត៖ «រឿង​ធំ​ជាង​គេ​មួយ​ទៀត ហ៊ាន​និយាយ​ថា សាលា​ឧទ្ធរណ៍​ចង់​ដោះ​លែង​ ដល់​មើល​ផ្លូវ​ការ​មែន​ទែន​ទៅ​ទម្លាក់​កំហុស​ថា មក​ពី​សាលា​ឧទ្ធរណ៍​ចង់​ឲ្យ​នៅ​ក្រៅ​ឃុំ គ្រោះ​ថ្នាក់​ណាស់​រឿង​នេះ ហើយ​សំណុំ​រឿង​ក្តី​កំពុង​បំបែក បែរ​ជា​អះ​អាង​ថា​ ថោង សារ៉ាត់ អត់​ជាប់​ពាក់​ព័ន្ធ»។

លោក ហ៊ុន សែន ក៏​បាន​លើក​ឡើង​តាម​អ្វី​ដែល​លោក​បាន​ដឹង​ថា មាន ​ចៅក្រម​សាលា​ដំបូង​ភ្នំពេញ បាន​អះអាង​ហ៊ាន​យក​ក្បាល​មក​ធានា​ថា លោក ថោង សារ៉ាត់ ​មិន​ពាក់​ព័ន្ធ​នឹង​រឿង​ឃាតកម្ម​ឧកញ៉ា អ៊ឹង ម៉េង​ជឺ ទាំង​សំណុំ​រឿង​កំពុង​ស្រាវ​ជ្រាវ​ហើយ​លោក​ព្រមាន​ថា នឹង​ចាត់​វិធាន​ការ​ផ្លូវ​ច្បាប់​លើ​ចៅ​ក្រម​ប្រភេទ​នេះ ប៉ុន្តែ​លោក មិន​បាន​បញ្ជាក់​ឈ្មោះ​ចៅ​ក្រមនោះ​ទេ។

ជុំវិញ​រឿង​នេះ ប្រធាន​ផ្នែក​ស៊ើប​អង្កេត​នៃ​សមាគម​សិទ្ធិ​មនុស្ស​អាដហុក​លោក នីចរិយា ចាត់​ទុក​ថា​ នេះ​ជា​ទម្លាប់​ដាក់​បញ្ជា​តក់​ក្រហល់​របស់​លោក​នាយក​រដ្ឋ​មន្រ្តី ក្នុង​គោល​ដៅ​ជ្រៀត​ជ្រែក​ទៅ​លើ​ដំណើរ​ការ​ការងារ​និង​ភាព​ឯករាជ្យ​របស់​តុលាការ។

លោកថា៖«លោក​នាយក​រដ្ឋ​មន្រ្តីចង់​បង្ហាញ​ថា គាត់​ចង់​ធ្វើ​កំណែ​ទម្រង់​លើ​ប្រព័ន្ធ​តុលាការ​ ប៉ុន្តែ​យើង​មិន​អាច​ធ្វើ​ដោយ​ស្រែក​បែប​នេះ​ទេ... យើង​ឃើញ​ថា ភាគ​ច្រើន​នៃ​ចៅក្រម​គឺ​ស្ថិត​ក្រោម​បក្ស អ៊ីចឹង​វា​មិន​អាច​ធានា​ឯករាជ្យ​បាន​ទេ»។

អ្នក​នាំ​ពាក្យ​ក្រសួង​យុត្តិ​ធម៌​លោក ជិន ម៉ាលីន បាន​អះ​អាង​ថា ការ​ស្នើ​របស់​លោក​នាយក​រដ្ឋ​មន្រ្តី​មិន​ប៉ះពាល់​ដល់​សេចក្តី​សម្រេច​របស់​ឧត្តម​ក្រុម​ប្រឹក្សា​អង្គ​ចៅក្រម​ទេ៖ «លោក​នាយក​រដ្ឋ​មន្រ្តី​ ក្នុង​នាម​ប្រមុខ​រដ្ឋាភិបាល នៅ​ពេល​​មិន​​ពេញ​ចិត្ត​ចំ-​ណាត់​ការ​របស់​តុលាការ​ គឺ​គាត់​អាច​ស្នើ ​ហើយ​ឧត្តម​ក្រុម​ប្រឹក្សា​នៃ​អង្គ​ចៅក្រម ធ្វើ​អធិការ​កិច្ច​ការងារ​ហ្នឹង​ តែ​ការ​សម្រេច​ជា​ភារកិច្ច​របស់​ឧត្តម​ក្រុម​ប្រឹក្សា​ នោះ​គ្រាន់​តែ​​ជា​សំណើ»។

លោក​ចៅ​ក្រម លី សុខ​លេង ដែល​កាន់​សំណុំ​រឿង​នេះ​ មិន​អាច​សុំ​ការ​បំភ្លឺ​បាន​ទេ​ កាល​ពី​ម្សិល​មិញ​នេះ។ ចំណែក​ប្រធាន​សាលា​ដំបូង លោក អំាង មាលតី បដិសេធ​ឆ្លើយ​ពាក់​ព័ន្ធ​នឹង​បញ្ហា​នេះ។

កាល​ពី​ថ្ងៃ​ទី ១២ ខែ​កុម្ភៈ​ លោក ស ខេង រដ្ឋមន្រ្តី​ក្រសួង​មហា​ផ្ទៃ​បាន​រិះ​គន់​ចំៗ​ទៅ​លើ​ស្ថាប័ន​តុលា​ការ​ ដែល​ជា​ញឹក​ញាប់​ដោះលែង​អ្នក​ទោស បើ​ទោះ​ជា​សមត្ថ​កិច្ច​បាន​រក​ឃើញ​​ភ័ស្តុតាង​ដាក់​បន្ទុក​ក្តី។

កាលពី​ថ្ងៃ​ទី ៧ កុម្ភៈ ចៅ​ក្រម​ស៊ើប​សួរ​សាលា​ដំបូង​លោក លី ​សុខលេង បាន​ចេញ​ដីកា​ដោះ​លែង​ឪពុក​ម្តាយ​លោក ថោង សារ៉ាត់ ដែល​រង​ការ​ចោទ​ពី​បទ​រក្សា​អាវុធ​ខុស​ច្បាប់​នៅ​ក្រៅ​ឃុំ​ក្រោម​មូល​ហេតុ​បញ្ហា​សុខភាព។ តែ​ក្រោយ​មក​អ្នក​ទាំង​ពីរ ត្រូវ​បាន​​ឃាត់​ខ្លួន​ឡើង​វិញ​នៅ​ម៉ោង​ ១០ ​យប់ ថ្ងៃទី ១៥ ខែ​កុម្ភៈ ពេល​ធ្វើ​ដំណើរ​តាម​ឡាន​ពេទ្យ​​ឆ្លង​ដែន​ទៅ​​ប្រទេស​វៀតណាម និង​ត្រូវ​​លោក​ចៅក្រម លី សុខលេង សម្រេច​បញ្ជូនទៅ​ឃុំ​​នៅ​ពន្ធនាគារ​វិញ នៅ​ថ្ងៃ​បន្ទាប់។

គួរ​រំឭក​ថា លោក​ ថោង សារ៉ាត់ ត្រូវ​តុលាការ​ចោទ​ថា ជា​មេ​ខ្លោង​នៃ​ករណី​ឃាតកម្ម​លើ​ឧកញ៉ា អ៊ឹង ម៉េង​ជឺ កាល​ពី​ថ្ងៃ​ទី​២២ ខែ​វិច្ឆិកា ចំណែក​អង្គរក្ស ៤ នាក់​របស់​លោក​បាន​រង​ការ​ចោទ​ពី​បទ​ឃាតកម្ម​គិត​ទុក​ជា​មុន​ និង​​បាន​កំពុង​ជាប់​ឃុំ​ខ្លួន​ក្នុង​ពន្ធនាគារ​ព្រៃ​ស​ រង់​ចាំ​សវនាការ។

តាម​ប្រភព​មន្រ្តី​ឧត្តម​ក្រុម​ប្រឹក្សា​អង្គ​ចៅក្រម​ពី​ថ្ងៃ​អង្គារ ក្រោយ​ការ​ប្រកាស​របស់​លោក​នាយក​រដ្ឋ​មន្រ្តី ឧត្តម​ក្រុម​ប្រឹក្សា​នៃ​អង្គ​ចៅក្រម​បាន​កោះ​ប្រជុំ​បន្ទាន់​មួយ​ធ្វើ​សេចក្តី​សម្រេច​ចំនួន ៣ ចំណុច។

ទី​១ ដក​តំណែង លោក ​អំាង ​មាលតី ​ពី​ប្រធាន​សាលា​ដំបូង​រាជធានី​មក​បញ្ឈរ​ជើង​នៅ​ក្រសួង​យុត្តិធម៌​រង់​ចាំ​ឲ្យ​ក្រុម​ប្រឹក្សា​វិន័យពិនិត្យ និង​សម្រេច​នៅ​ពេល​ក្រោយ។ ទី២ អង្គ​ប្រជុំ​សម្រេច​ជា​ឯកច្ឆន្ទ តែង​តាំង​លោក តាំង​ ស៊ុយ​ឡាយ ​​អនុ​ប្រធាន​មក​ជា​ប្រធាន​ជំនួស​លោក​ អំាង មាលតី និង​ទី ៣ គឺ​សម្រេច​ឲ្យ​ក្រុម​ប្រឹក្សា​វិន័យ​ធ្វើ​អធិការ​កិច្ច​លើ​លោកចៅ​ក្រម​ស៊ើប​សួរ លី សុខ​លេង។

ប្រភព​បន្តថា សាលា​ដំបូង​រាជធានី​នឹង​ប្រកាស​ផ្លាស់​ប្តូរ​តំណែង​នេះ អាចនឹង​ធ្វើ​ឡើង​នៅ​ថ្ងៃ​ពុធ​នេះ​នៅ​ម៉ោង ២រសៀល។

សមាជិក​ឧត្តម​ក្រុម​ប្រឹក្សា​អង្គ​ចៅក្រម លោក អ៊ិត រ៉ាឌី បាន​ឲ្យ​ដឹង​ថា កាល​ពី​រសៀល​ថ្ងៃ​អង្គារ​ក្រុម​អធិការ​កិច្ច​ក្រសួង​យុត្តិធម៌ បាន​ចុះ​អធិការ​កិច្ច​លើ​សេចក្តី​សម្រេច​របស់​លោក​ចៅក្រម លី សុខ​លេង ដើម្បី​ធ្វើ​របាយ​ការណ៍​ទៅ​ក្រុម​ប្រឹក្សា​វិន័យ​នៃ​ឧត្តម​ក្រុម​ប្រឹក្សា​នៃ​អង្គ​​ចៅក្រម។

ជុំវិញ​ព័ត៌​មាន​ពាក់​ព័ន្ធ​នឹង​ការ​ផ្លាស់​ប្តូរ​តំណែង​ប្រធាន​សាលា​ដំបូង​រាជធានី លោក​ អ៊ិត រ៉ាឌី​ ​ថា លោក​នៅ​មិន​ទាន់​បាន​ឃើញ​ព្រះ​រាជ​ក្រឹត្យ​ព្រះ​មហាក្សត្រ​លើ​ការ​តែង​តាំង​ឬផ្លាស់​ប្តូរ​នេះ​នៅ​ឡើយ​ទេ​ តែ​លោកក៏​ដូច​ជា​​អ្នក​នាំ​ពាក្យ​ក្រសួង​យុត្តិធម៌ លោក គឹម សន្តិភាព ​អះ​អាង​ថា ​អាច​នឹង​មាន​សេចក្តី​សម្រេច​ជាក់​លាក់​មួយនៅ​ថ្ងៃ​ពុធ​នេះ។

ប្រភព​ពី​ក្រសួង​យុត្តិធម៌​ឲ្យ​ដឹងថា លោក​លី សុខ​លេង ត្រូវ​បាន​ព្យួរ​ការងារ​រហូត​ដល់​បញ្ចប់​ការ​ធ្វើ​អធិការ​កិច្ច៕

រាយការណ៍​បន្ថែមៈ ជាង សុខា

អត្ថបទគួរចាប់អារម្មណ៍