The Phnom Penh Post Search

Search form




Logo of Phnom Penh Post newspaper Phnom Penh Post - នាយក​រដ្ឋមន្ត្រី​រុស្ស៊ី​ស្នើ​កុំ​ឲ្យ​អ្នក​យក​ព័ត៌មាន​ទៅ​យក​ព័ត៌មាន

នាយក​រដ្ឋមន្ត្រី​រុស្ស៊ី​ស្នើ​កុំ​ឲ្យ​អ្នក​យក​ព័ត៌មាន​ទៅ​យក​ព័ត៌មាន

Content image - Phnom Penh Post
នាយករដ្ឋ​មន្ត្រី​នៃ​សហព័ន្ធ​រុស្ស៊ី​លោក Dmitry Medvedev។ AFP

នាយក​រដ្ឋមន្ត្រី​រុស្ស៊ី​ស្នើ​កុំ​ឲ្យ​អ្នក​យក​ព័ត៌មាន​ទៅ​យក​ព័ត៌មាន

សៀមរាបៈ រុស្ស៊ី​តាម​រយៈ​ក្រសួង​ការបរទេស​កម្ពុជា​បាន​ស្នើ​កុំ​ឲ្យ​​អ្នក​យក​ព័ត៌មាន​ក្នុង​ស្រុក​ចូល​យក​ព័ត៌មាន​អំឡុង​ទស្សនកិច្ច​កម្សាន្ត​រយៈពេល ៣ ថ្ងៃ​របស់​នាយករដ្ឋមន្ត្រី​រុស្ស៊ី​នៅ​ខេត្ត​សៀមរាប និង​នៅ​ព្រះបរម​រាជវាំង​ដោយ​ថា​នេះ​ជា​កម្មវិធី​លក្ខណៈ​ឯកជន។

ការ​ស្នើ​របស់​ភាគី​រុស្ស៊ី​ធ្វើ​ឡើង​តាមរយៈ​លិខិត​របស់​ក្រសួង​ការបរទេស​កម្ពុជា​ចុះ​ហត្ថលេខា​ដោយ​រដ្ឋមន្ត្រី​ស្តីទី​លោក ឡុង វិសាលោ ចុះ​ថ្ងៃ​ទី​ ២០ ខែ​វិច្ឆិកា ឆ្នាំ ២០១៥ ផ្ញើ​ទៅ​កាន់​រដ្ឋមន្ត្រី​ក្រសួង​ព័ត៌មាន​ដោយ​ការ​ស្នើ​នេះ​ផ្អែក​លើ​ស្មារតី​នៃ​កិច្ចប្រជុំ​ថ្ងៃ​ទី ១១ ដល់​ថ្ងៃ​ទី ១៩ ខែ​វិច្ឆិកា ឆ្នាំ​ ២០១៥ ​ជាមួយ​គណៈប្រតិភូ​នាំ​មុខ​រុស្ស៊ី​ ទទួល​បន្ទុក​ផ្នែក​ព័ត៌មាន​នៅ​ក្រសួង​ការបរទេស និង​សហប្រតិបត្តិការ​អន្តរជាតិ។

លិខិត​ក្រសួង​ការបរទេស​បាន​ឲ្យ​ដឹង​ថា​ក្នុង​ដំណើរ​ទស្សនកិច្ច​ផ្លូវការ​របស់​នាយករដ្ឋ​មន្ត្រី​នៃ​សហព័ន្ធ​រុស្ស៊ី​លោក Dmitry Medvedev នៅ​កម្ពុជា​ចាប់ផ្តើម​ពី​ថ្ងៃ​ទី ២២ ដល់ ២៤ ខែ​វិច្ឆិកា ឆ្នាំ ២០១៥ ដើម្បី​ពង្រឹង​នូវ​ចំណង​មិត្តភាព និង​កិច្ច​សហការ​រវាង​ប្រទេស​ទាំង​ពីរ​ហើយ​ការ​ស្នើ​របស់​ភាគី ​រុស្ស៊ី​កុំ​ឲ្យ​មាន​អ្នក​យក​ព័ត៌មាន​ក្នុង​ស្រុក​ចូល​យក​ព័ត៌មាន​នេះ​គឺ​ដោយ​គូស​បញ្ជាក់​ថា​នេះ​ជា​កម្មវិធី​ដែល​មាន​លក្ខណៈ​ជា​ឯកជន។ យ៉ាង​នេះ​ក្តី​បើ​តាម​លិខិត​នេះ​ចំពោះ​ទស្សនកិច្ច​នៅ​ខេត្ត​សៀមរាប​ភាគី​រុស្ស៊ី​បាន​យល់​ព្រម​ឲ្យ​មាន​តែ​ការ​ចូលរួម​យក​ព័ត៌មាន​ពី​ទូរទស្សន៍​ជាតិ​កម្ពុជា (TVK) ម្នាក់​ និង​ភា្នក់ងារ​សារព័ត៌មាន AKP ម្នាក់​តាម​ការ​ស្នើ​សុំ​របស់​តំណាង​ក្រសួង​ព័ត៌មាន​តែ​ប៉ុណ្ណោះ​។

យ៉ាង​នេះ​ក្តី​អគ្គនាយក​នៃ​អគ្គ​នាយកដ្ឋាន​ព័ត៌មាន និង​សោតទស្សន៍​ក្រសួង​ព័ត៌មាន​លោក​ ផុស សុវណ្ណ បាន​ឲ្យ​ដឹង​ថា​លោក​បាន​ចាត់ចែង​មន្ត្រី​សម្រប​សម្រួល​អ្នក​សារព័ត៌មាន​ក្នុង​ការ​ចូល​យក​ព័ត៌មាន​នៃ​កម្មវិធី​នេះ​ដោយ​មិន​បាន​បិទ​បាំង​ទាំង​ស្រុង​នោះ​ទេ។

លោក​ថា៖ «មាន​កម្មវិធី​ខ្លះ​អាច​ផ្សព្វផ្សាយ​គេ​ឲ្យ​ផ្សាយ​តែ​ខ្លះ​ជា​កម្មវិធី​ឯកជន​បើ​ចូល​បរមរាជវាំង​គឺ​អត់​ឲ្យ​ចូល​ទេ​មិនមែន​ចូល​សវនាការ​ជាមួយ​ព្រះករុណា​ទេ​តែ​គាត់​គ្រាន់តែ​ចូល​ទៅ​ទស្សនកិច្ច​ព្រះបរមរាជវាំង​អ៊ីចឹង​​គាត់​មិន​ចង់​ឲ្យ​ផ្សាយ​តែ​បើ​គាត់​ជួប​សវនាការ​ជាមួយ​សម្តេច​គឺ​មាន​កម្មវិធី​ផ្សាយ​ធម្មតា»។

ក្នុង​កិច្ច​រួម​ចំណែក​ការពារ​សន្តិសុខ សុវត្ថិភាព ក្នុង​ដំណើរ​ទស្សនកិច្ច​នេះ​អគ្គស្នងការ​នគរបាល​ជាតិ​លោក នេត សាវឿន បាន​បើក​កិច្ចប្រជុំ​រៀបចំ​ផែនការ​កាលពី​ថ្ងៃ​ទី​ ២០ ខែ​វិច្ឆិកា​ដោយ​ប្រកាស​ដាក់​កម្លាំង​នគរបាល​ជាតិ និង​កងរាជ​អាវុធហត្ថ​ប្រមាណ ១ ម៉ឺន​នាក់​នៅ​ទីតាំង​គោលដៅ​ក្នុង​រាជធានី​ភ្នំពេញ​ និង​ខេត្ត​សៀមរាប។ ជាមួយ​គ្នា​នេះ​បណ្តា​អ្នក​សារព័ត៌មាន​ទាំងអស់​នឹង​ត្រូវ​រឹត​បន្តឹង​ផង​ដែរ​ប្រសិន​បើ​គ្មាន​ឯកសារ​បញ្ជាក់​អត្តសញ្ញាណ​គ្រប់គ្រាន់​។

តាម​សេចក្តី​ជូន​ព័ត៌មាន​របស់​ក្រសួង​ការបរទេស​លោក​នាយក​រដ្ឋមន្ត្រី​រុស្ស៊ី Dmitry Medvedev បាន​មក​ដល់​កម្ពុជា​នៅ​ម៉ោង​ ៨ ​យប់​ថ្ងៃ​អាទិត្យ​នៅ​អាកាសយានដ្ឋាន​អន្តរជាតិ​សៀមរាប​ហើយ​លោក​នឹង​ចំណាយ​ពេល​មួយ​ថ្ងៃ​ដើម្បី​ទស្សនា​ប្រាសាទ​អង្គរវត្ត ​និង​ប្រាសាទ​នានា​នៅក្នុង​ខេត្ត​​ទេសចរណ៍​មួយ​នេះ​មុន​នឹង​ធ្វើ​ដំណើរ​មក​កាន់​រាជធានី​ភ្នំពេញ​ដើម្បី​ជួប​ពិភាក្សា​ការងារ​ផ្លូវការ​ជាមួយ​លោក​នាយក​រដ្ឋមន្ត្រី​ ហ៊ុន សែន នៅក្នុង​ពិធី​ចុះ​ហត្ថលេខា​លើ​ឯកសារ​មួយ​ចំនួន៕

អត្ថបទគួរចាប់អារម្មណ៍