ភ្នំពេញ៖ លោកនាយករដ្ឋមន្ត្រី ហ៊ុន សែន កាលពីរំលងអធ្រាត្រឈានចូលថ្ងៃ ១២ មេសា បានចេញសារបន្ទាន់មួយដោយបានអំពាវនាវកុំឱ្យពលរដ្ឋនាំគ្នាទៅដណ្តើមចាក់វ៉ាក់សាំង ខណៈចំនួនវ៉ាក់សាំងនៅមានកំណត់ ដែលនាំឱ្យប៉ះពាល់ដល់ផែនការមេនៃការចាក់វ៉ាក់សាំង ស្របពេលដែលរាជរដ្ឋាភិបាលកំពុងប្រឹងរកវ៉ាក់សាំងមកចាក់ជូនពលរដ្ឋទៅតាមលំដាប់លំដោយ។
ការអំពាវនាវរបស់លោកយករដ្ឋមន្ត្រី ហ៊ុន សែន បានធ្វើឡើងបន្ទាប់ពីលោក សម រង្ស៊ី អតីតប្រធានអតីតគណបក្សសង្គ្រោះជាតិ ដែលកំពុងនិរទេសខ្លួននៅក្រៅប្រទេសកាលពីថ្ងៃ ១១ មេសា បានប្ដូរមកអំពាវនាវឱ្យពលរដ្ឋទៅចាក់វ៉ាក់សាំងចិនដែលផ្ទុយពីលើកមុនលោកធ្លាប់តែអំពាវនាវកុំឱ្យពលរដ្ឋចាក់វ៉ាក់សាំងចិន។
លោក ហ៊ុន សែន ហៅការអំពាវនាវនេះថា មិនមែនជាបំណងល្អរបស់ពួកគេនោះទេ ប៉ុន្តែគឺជាផែនការពិសពុលដែលចង់ឱ្យពលរដ្ឋទៅដណ្តើមវ៉ាក់សាំង ខណៈដែលកម្ពុជានៅមិនទាន់មានវ៉ាក់សាំងគ្រប់គ្រាន់សម្រាប់ចាក់។
លោកបានមានប្រសាសន៍យ៉ាងដូច្នេះថា «គោលបំណងរបស់វាឱ្យចាក់វ៉ាក់សាំងចិន មិនមែនជាគោលបំណងដែលវាមានពិតប្រាកដក្នុងចិត្តទេ។ ក៏ប៉ុន្តែជាគោលបំណងជំរុញឱ្យប្រជាជនមកដណ្តើមវ៉ាក់សាំង ក្នុងពេលវ៉ាក់សាំងរបស់យើងមានមិនគ្រប់។ យើងដឹងហើយថា យើងត្រូវការចាក់ប្រជាជនចំនួន ១០ លាននាក់យ៉ាងតិច ដែលត្រូវការ ២០ លានដូស។ គ្រាន់តែការចាក់កុំថាឡើយការផ្គត់ផ្គង់វ៉ាក់សាំង សូម្បីតែសមត្ថភាពចាក់វ៉ាក់សាំង ក្នុង ១ ខែ យើងបានត្រឹមតែ ១ លានដូសប៉ុណ្ណោះ ដូច្នេះយើងត្រូវការជិត ២០ ខែ ទើបអាចចាក់អស់ចំនួនវ៉ាក់សាំង បើសិនយើងមានគ្រប់ ១ លានដូស។ ប៉ុន្តែវាបែរជាជំរុញប្រជាជន មិនមែនជាបំណងល្អរបស់វាទេ តែទិសដៅរបស់វាមានទិសដៅផ្សេង ត្រង់ថា ជំរុញប្រជាជនឱ្យទទួលវ៉ាក់សាំង ក្នុងពេលតែមួយ ដែលជាចំណុចដ៏អាក្រក់នៃពូជក្បត់ជាតិមួយនេះ»។
កាលពីថ្ងៃទី ១១ មេសា រាជរដ្ឋាភិបាលបានចេញអនុក្រឹត្យមួយស្ដីពីកាតព្វកិច្ចក្នុងការទទួលការចាក់វ៉ាក់សាំងការពារជំងឺកូវីដ ១៩ ដែលមាន ៥ ជំពូក និង ៨ មាត្រា ដោយបានជំរុញឱ្យមានការចូលរួមចាក់វ៉ាក់សាំងជាពិសេសមន្ត្រីរាជការនៅតាមស្ថាប័នរដ្ឋ។
ក៏ប៉ុន្តែក្នុងពេលចំនួនវ៉ាក់សាំងនៅមានកម្រិតលោកនាយករដ្ឋមន្ត្រីបានអំពាវនាវដល់ពលរដ្ឋឱ្យរក្សាភាពនឹងនរ ដើម្បីទុកលទ្ធភាពជូនរាជរដ្ឋាភិបាលរកវ៉ាក់សាំង និងចាក់ទៅតាមផែនការដែលបានគ្រោងទុក។
លោកបានបញ្ជាក់ថា៖ «ខ្ញុំស្នើសូមឱ្យប្រជាពលរដ្ឋយើងនឹងនរចិត្តរាជរដ្ឋាភិបាលនឹងចាក់ជូនទៅតាមលំដាប់អាទិភាពនៅពេលវ៉ាក់សាំងមកដល់យើងនឹងពិនិត្យថា តើក្រុមណាត្រូវចាក់មុន ក្រុមណាត្រូវចាក់ក្រោយ ហើយយើងក៏មានការបែងចែកប្រភេទអ្នកណាត្រូវទទួល អាយុប៉ុន្មានត្រូវទទួល»។
ទាក់ទងនឹងដំណើរការចាក់វ៉ាក់សាំងនេះ បើគិតចាប់ផ្ដើមពីថ្ងៃទី ១០ ខែកុម្ភៈ រហូតទល់ថ្ងៃទី ១១ ខែមេសា រាជរដ្ឋាភិបាលកម្ពុជាចាក់វ៉ាក់សាំងជូនពលរដ្ឋបានជាង ១ លាននាក់ហើយ នៅពេលអ្នកចាក់ម្ជុលទី១ គឺលោក ហ៊ុន ម៉ាណែត ជាកូនប្រុសច្បងលោក ហ៊ុន សែន ហើយ អ្នកចាក់នៅលេខរៀងទី១ លាន គឺជាបុរសឈ្មោះ ប៉ាន់ សុវណ្ណរិទ្ធ ដែលបានទទួលរង្វាន់ពីលោកនាយករដ្ឋមន្ត្រីចំនួន ៥ លានរៀល តាមរយៈលោកស្រី ឱ វណ្ឌឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល៕