ភ្នំពេញៈ លោកនាយករដ្ឋមន្ត្រី ហ៊ុន សែន បានអំពាវនាវជាថ្មីទៀតដល់ប្រជាពលរដ្ឋឲ្យបន្តយកចិត្តទុកដាក់ការពារកុំឱ្យឆ្លងជំងឺកូវីដ ១៩ ពីម្នាក់ទៅម្នាក់ ក្រោយរកឃើញនិស្សិតខ្មែរមកពីក្រៅប្រទេសចំនួន ១៥ នាក់បានឆ្លងជំងឺកូវីដ-១៩ ធ្វើឱ្យករណីសរុបកើនដល់ ១៥៦ នាក់ ក្នុងនោះជាសះស្បើយ ១៣៣ នាក់ ចាប់តាំងពីរកឃើញករណីដំបូងតាំងពីខែមករាមក។
លោក ហ៊ុន សែន បានសរសេរបង្ហោះក្នុងទំព័រហ្វេសប៊ុករបស់លោកកាលពីថ្ងៃម្សិលមិញថា វាជាពេលសំខាន់ដែលប្រជាពលរដ្ឋត្រូវតែបន្តយកចិត្តទុកដាក់ ថែរក្សាសុខភាពឱ្យបានល្អ កុំឱ្យឆ្លងជំងឺកូវីដ ១៩ ខណៈជំងឺដែលពុំទាន់មានថ្នាំព្យាបាលនេះ នៅតែជាជំងឺឆ្លងរាតត្បាតដ៏កាចសាហាវនៅឡើយ។
លោកថា៖ «សូមបងប្អូនប្រជាពលរដ្ឋកុំធ្វេសប្រហែសឲ្យសោះ ហើយសូមឧស្សាហ៍ដុសលាងសម្អាតដៃជាមួយសាប៊ូ ជែល ឬទឹកអាល់កុល ហើយពាក់ម៉ាស់ការពារឲ្យបានត្រឹមត្រូវ។ ទីកន្លែងដែលមានមនុស្សច្រើនដូចជាទីផ្សារ និងផ្សារទំនើប តូបលក់ដូរទូទៅ ភោជនីយដ្ឋានផ្ទះសំណាក់ សណ្ឋាគារ កាស៊ីណូដែលទទួលបានការអនុញ្ញាតឲ្យបើកដំណើរការ ជាពិសេសមន្ទីរពេទ្យឯកជន និងមន្ទីរពេទ្យរដ្ឋត្រូវតែមានទឹកអាល់កុលជែលសម្លាប់មេរោគ និងម៉ាស់ សម្រាប់អតិថិជន រួមទាំងអ្នកជំងឺ និងបងប្អូនមកសួរសុខទុក្ខត្រូវពាក់ម៉ាស់ការពារចៀសវាងការឆ្លងរោគពីម្នាក់ទៅម្នាក់»។
ការអំពាវនាវរបស់លោក ហ៊ុន សែន គឺកើតឡើងតែប៉ុន្មានម៉ោងប៉ុណ្ណោះក្រោយពីក្រសួងសុខាភិបាលបានប្រកាសករណីនាំចូលថ្មីនៃជំងឺកូវីដ ១៩ ចំនួន ១៥ នាក់ទៀត ដែលស្ថិតក្នុងចំណោមក្រុមនិស្សិតខ្មែរ ៨០ នាក់ ទើបត្រឡប់ពីប្រទេសអារ៉ាប៊ី សាអ៊ូឌីត មកដល់កម្ពុជាកាលពីថ្ងៃទី ១០ ខែកក្កដា។ ក្រុមនិស្សិតទាំង ៨០ នាក់ គឺបានធ្វើដំណើរចេញពីប្រទេសអារ៉ាប៊ីសាអ៊ូឌីត ទៅប្រទេសម៉ាឡេស៊ី ហើយបានបន្តដំណើរចេញពីទីក្រុងគូឡាឡាំពួតាមជើងហោះហើរដែលមានអ្នកដំណើរជាពលរដ្ឋខ្មែរ ១៣ នាក់ និងម៉ាឡេស៊ីម្នាក់ទៀតសរុបទាំងអស់ចំនួន ៩៤ នាក់ បានមកកាន់ទីក្រុងភ្នំពេញ។
ក្រសួងសុខាភិបាលបញ្ជាក់ថាអ្នកជំងឺទាំង ១៥ នាក់ គឺមានអាយុចាប់ពី ២១ ឆ្នាំ ដល់ ៣៣ ឆ្នាំ និងដែលមានទីលំនៅនៅភ្នំពេញចំនួន ២ នាក់ខេត្តកណ្ដាល ៣ នាក់ ខេត្តតាកែវ ២ នាក់ ខេត្តត្បូងឃ្មុំចំនួន ៧ នាក់ និងខេត្តក្រចេះមានម្នាក់ ដែលត្រូវបានបញ្ជូនទៅសម្រាកព្យាបាលនៅមណ្ឌលសុខភាពចាក់អង្រែ ខណៈអ្នកដំណើរ ៧៩ នាក់ដែលធ្វើតេស្ដអវិជ្ជមានត្រូវបានបញ្ជូនទៅធ្វើចត្តាឡីស័ក ១៤ ថ្ងៃនៅមណ្ឌលចត្តាឡីស័កជម្ពូវ័ន១។
កាលពីថ្ងៃទី ១០ ខែកក្កដា លោក ម៉ម ប៊ុនហេង រដ្ឋមន្ត្រីក្រសួងសុខាភិបាលក៏បានលើកឡើងដែរថា កម្ពុជានៅតែប្រឈមនឹងហានិភ័យនៅឡើយ ខណៈដែលលោកបានចាត់ទុកករណីមួយនៃជំងឺកូវីដ ១៩ ថាដូចជាផ្កាភ្លើងដែលត្រូវសហការគ្នាពន្លត់ឱ្យបានទាន់ពេលវេលា ដើម្បីកុំឱ្យរាលដាលជាអណ្ដាតភ្លើងនៅកម្ពុជាដូចដែលកំពុងកើតឡើងនៅក្នុងប្រទេសមួយចំនួន។
លោកជំរុញឱ្យពលរដ្ឋត្រូវបន្តចៀសវាងការជួបជុំកកកុញ និងការមានទំនាក់ទំនងជិតស្និទ្ធ និងលម្ហចង្អៀតរួមទាំងលាងដៃឱ្យបានទៀងទាត់ ពាក់ម៉ាស់នៅពេលចាំបាច់ និងរក្សាបាននូវគម្លាតសុវត្ថិភាពបុគ្គល ទើបអាចការពារការចម្លង និងកាត់បន្ថយនូវឱកាសនៃការរីករាលដាលក្នុងករណីមានផ្កាភ្លើងកើតឡើង។
លោកថា៖ «យើងទាំងអស់គ្នាត្រូវចូលរួមចំណែកទាំងអស់គ្នា ដើម្បីធានាឱ្យបានថា ករណីនីមួយៗមិនក្លាយជាអណ្តាតភ្លើង ហើយមិនវិវឌ្ឍទៅជាភ្លើងនាពេលបន្ទាប់។ ប្រសិនបើយើងធ្វើសកម្មភាពដោយមានសាមគ្គីភាព យើងអាចការពារប្រទេសកម្ពុជាពីការចម្លងជំងឺជាទ្រង់ទ្រាយធំក្នុងសហគមន៍ដូចដែលយើងធ្លាប់បានឃើញនៅក្នុងបណ្តាប្រទេសមួយចំនួនលើសកលលោក។ រួមគ្នាទប់ស្កាត់ការចម្លងវីរុសកូវីដ១៩ គឺជាកាតព្វកិច្ចរបស់បុគ្គលគ្រប់រូប ដើម្បីសហគមន៍គ្មានការរាតត្បាតជំងឺដ៏កាចសាហាវនេះ»។
លោក ម៉ម ប៊ុនហេង បន្តថាការរីករាលដាលនៃជំងឺកូវីដនៅទូទាំងពិភពលោក គឺចាំបាច់ឱ្យកម្ពុជាត្រូវធ្វើតេស្ដឱ្យបានតឹងរ៉ឹងនៅតាមព្រំដែន ចំពោះអ្នកដំណើរទាំងអស់ដែលចូលកម្ពុជា និងត្រូវធ្វើចត្តាឡីស័ក ១៤ ថ្ងៃ ខណៈកម្ពុជាមិនអាចកាត់ផ្តាច់ខ្លួនឯងទាំងស្រុងពីពិភពលោកបានឡើយ ហើយរឹតតែមានសារៈសំខាន់ណាស់ដែលសេដ្ឋកិច្ចកម្ពុជាត្រូវតែរក្សាឲ្យបាននៅរឹងមាំ។
ការលើកឡើងនេះធ្វើឡើងក្រោយពីលោកបានចុះត្រួតពិនិត្យអំពីការបង្កើតមន្ទីរពិសោធន៍ដើម្បីធ្វើតេស្ដរកជំងឺកូវីដ ១៩ នៅក្នុងខេត្តសៀមរាបកាលពីថ្ងៃទី ៩ ខែកក្កដា។
លោក ប៊ុនហេង បញ្ជាក់ថា មន្ទីរពិសោធន៍នេះនឹងអាចបើកដំណើរការនៅដើមខែក្រោយ ហើយអាចមានលទ្ធភាពធ្វើតេស្ដរកឃើញជំងឺកូវីដ ១៩ ក្នុងរយៈពេលតែប៉ុន្មានម៉ោងប៉ុណ្ណោះដោយមិនចាំបាច់បញ្ជូនសំណាកមកធ្វើតេស្ដនៅភ្នំពេញឡើយ។ លោកបន្ថែមថា ក្រសួងក៏គ្រោងនឹងបង្កើតឱ្យមានមន្ទីរពិសោធន៍នៅខេត្តមួយចំនួនទៀតដែរ នៅពេលខាងមុខ។
ថ្វីដ្បិតមានការអំពាវនាវឱ្យពលរដ្ឋបន្តប្រុងប្រយ័ត្នអំពីការរីករាលដាលនៃជំងឺកូវីដ ១៩ ក្ដី ប៉ុន្តែរដ្ឋាភិបាលនឹងសងថ្ងៃឈប់សម្រាកសម្រាប់ពិធីបុណ្យចូលឆ្នាំចំនួន ៥ ថ្ងៃដល់កម្មករបុគ្គលិក និងមន្ត្រីរាជការវិញ គឺចាប់ពីថ្ងៃទី ១៧ ដល់ថ្ងៃទី ២១ សីហា ខាងមុខ។ នេះបើតាមអនុក្រឹត្យមួយដែលត្រូវបានគេផ្សព្វផ្សាយកាលពីពេលថ្មីៗនេះ។
ភ្នំពេញប៉ុស្ដិ៍មិនអាចសុំការបញ្ជាក់បន្ថែមជុំវិញបញ្ហានេះពីលោក ផៃ ស៊ីផាន អ្នកនាំពាក្យរដ្ឋាភិបាលបានទេ ដោយសារទូរស័ព្ទលោកមិនអាចទាក់ទងបាន។ ប៉ុន្តែលោក ហ៊ុន សែន បានបញ្ជាក់ក្នុងសារបែកធ្លាយមួយកាលពីពេលថ្មីៗនេះថា ការគិតគូរពីការសងថ្ងៃឈប់សម្រាកនេះដោយសារកម្ពុជាកំពុងត្រួតត្រាបានជំងឺកូវីដ ១៩៕