.jpg)
អ្នកជាសះស្បើយពីជំងឺកូវីដ១៩ចុងក្រោយគេបង្អស់ (នៅក្នុងឡានដៃកាន់បាច់ផ្កា) ពេលចេញពីមន្ទីរពេទ្យមិត្តភាពខ្មែរ-សូវៀតកាលពីថ្ងៃសៅរ៍។ រូប SPM
ភ្នំពេញៈ លោកនាយករដ្ឋមន្ត្រី ហ៊ុន សែន បានអំពាវនាវឱ្យពលរដ្ឋបន្តប្រុងប្រយ័ត្នខ្ពស់អំពីជំងឺរាតត្បាតកូវីដ ១៩ បើទោះបីជាកម្ពុជាលែងមានអ្នកជំងឺនេះក្ដី ខណៈស្ដ្រីដែលព្យាបាលជាសះស្បើយពីជំងឺកូវីដ ១៩ ចុងក្រោយគេត្រូវបានអនុញ្ញាតឲ្យចេញពីមន្ទីរពេទ្យមិត្តភាពខ្មែរ-សូវៀតកាលពីថ្ងៃសៅរ៍។
នៅថ្ងៃទី ១៦ ខែឧសភា លោក ហ៊ុន សែន បានអបអរសាទរចំពោះស្ដ្រីអាយុ ៣៦ ឆ្នាំជាអ្នកជំងឺកូវីដ១៩ចុងក្រោយក្នុងចំណោមអ្នកជំងឺសរុបទាំង ១២២ នាក់ដែលត្រូវបានក្រសួងសុខាភិបាលប្រកាសថាបានជាសះស្បើយ និងអនុញ្ញាតឱ្យចាកចេញពីមន្ទីរពេទ្យមិត្តភាពខ្មែរ-សូវៀតក្រោយពីការធ្វើតេស្ដចំនួន ២ លើកមានលទ្ធផលអវិជ្ជមានជាមួយជំងឺកូវីដ ១៩។
ប៉ុន្តែលោក ហ៊ុន សែន បានលើកឡើងថា ពិតមែនតែកម្ពុជាពុំមានករណីថ្មីក៏ដោយប៉ុន្តែប្រជាពលរដ្ឋបន្តត្រូវប្រុងប្រយ័ត្នខ្ពស់ដោយត្រូវអនុវត្តវិធានការអនាម័យជាប់ជាប្រចាំគឺត្រូវពាក់ម៉ាស់ ដុសលាងសម្អាតដៃជាមួយសាប៊ូ ទឹកអាល់កុល ឬជែលសម្លាប់មេរោគឆ្លងផ្សេងៗ ហើយត្រូវបន្តរក្សាគម្លាតសុវត្ថិភាពឆ្ងាយពីគ្នា និងកុំចេញក្រៅផ្ទះបើគ្មានការចាំបាច់។
លោកបន្តថា៖ «នៅពេលនេះប្រទេសជិតខាងយើង និងពិភពលោកទាំងមូល ក៏កំពុងបន្តរាតត្បាតដោយជំងឺកូវីដ១៩ ដែលជាក្តីបារម្ភដ៏ធំបំផុត ហើយមកទល់ពេលនេះក៏មិនទាន់មានថ្នាំព្យាបាលជំងឺកូវីដ ១៩ នៅឡើយដែរ។ សូមអរគុណដែលបងប្អូន ជនរួមជាតិដែលបានចូលរួមប្រយុទ្ធប្រឆាំងជំងឺកូវីដ១៩ ទាំងអស់គ្នា»។
ក្រសួងសុខាភិបាលក៏បានប្រកាសដែរថា ថ្វីដ្បិតក្នុងរយៈពេលជាង ១ ខែ កម្ពុជាពុំមានករណីឆ្លងថ្មីហើយអ្នកជំងឺទាំងអស់ត្រូវបានព្យាបាលជាសះស្បើយ ១០០ ភាគរយ ប៉ុន្តែកម្ពុជានៅតែត្រូវធ្វើកិច្ចការជាច្រើនទៀត ដើម្បីការពារកុំឱ្យកើតមានការឆ្លងរលកទី ២ ជាពិសេសគឺការត្រួតពិនិត្យឱ្យបានហ្មត់ចត់នូវសុខភាពអ្នកដំណើរដែលចូលមកកម្ពុជា ដើម្បីចៀសវាងការនាំចូលជំងឺកូវីដ១៩បន្ថែមទៀតហើយពលរដ្ឋគ្រប់រូបក៏ត្រូវតែកែប្រែទម្លាប់ និងឥរិយាបថរស់នៅឱ្យស្របតាមបរិបទប្រយុទ្ធនឹងជំងឺកូវីដ ១៩ ដែរ។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានថ្លែងបញ្ជាក់នៅពេលទៅស្វាគមន៍ស្ដ្រីដែលជាសះស្បើយពីជំងឺកូវីដ១៩ កាលពីថ្ងៃសៅរ៍ថា បន្ថែមពីការអំពាវនាវឱ្យពលរដ្ឋបន្តប្រុងប្រយ័ត្នខ្ពស់ កម្ពុជាក៏ត្រូវបន្តយកចិត្តទុកដាក់បន្ថែមទៀតក្នុងទប់ស្កាត់ការនាំចូលករណីជំងឺកូវីដ ១៩ ខណៈដែលលោកបានលើកឡើងថា បច្ចុប្បន្ននៅតែមានពលរដ្ឋនៅក្រៅប្រទេស វិលចូលប្រទេសវិញជាបន្តបន្ទាប់ ជាពិសេសគឺចេញពីប្រទេសថៃ។
ស្ត្រីទើបជាសះស្បើយពីជំងឺកូវីដ១៩ទទួលបាច់ផ្កាពីអាជ្ញាធរខេត្តបន្ទាយមានជ័យពេលទៅដល់។ រូប សាលាខេត្តបន្ទាយជ័យ
លោកថ្លែងថា៖ «យើងគិតថា ភាគច្រើនគឺការនាំជំងឺចូល។ អ៊ីចឹង!យើងត្រូវតែប្រយ័ត្ននៅតាមទល់ដែនតាមអាកាសយានដ្ឋានតាមផែ ដែលត្រូវតែតាមដាន និងពិនិត្យ អ៊ីចឹងបានរដ្ឋាភិបាលដាក់ប៉ុស្ដិ៍ត្រួតពិនិត្យនៅតាមទល់ដែន និងនៅតាមអាកាសយានដ្ឋាននានា។ បងប្អូនដែលមកពីក្រៅត្រូវតែមានលិខិតបញ្ជាក់សុខភាពថា មិនមានកូវីដ១៩ ទើបបានឱ្យចូល ហើយនៅពេលចូលត្រូវធ្វើចត្តាឡីស័ក ១៤ ថ្ងៃទៀត»។
លោក កែវ សុភ័ក្ត្រា ប្រធានមន្ទីរសុខាភិបាលខេត្តបន្ទាយមានជ័យបានប្រាប់ភ្នំពេញប៉ុស្ដិ៍កាលពីថ្ងៃម្សិលមិញថា ស្ដ្រីដែលជាសះស្បើយពីជំងឺកូវីដ១៩ ចុងក្រោយគេគឺត្រូវបន្តដាក់ឱ្យនៅដាច់ដោយឡែកចំនួន ១៤ ថ្ងៃទៀតនៅមន្ទីរពេទ្យក្រុងប៉ោយប៉ែត ដើម្បីរង់ចាំការធ្វើតេស្ដអវិជ្ជមានជាមួយជំងឺកូវីដ១៩ជាលើកទី ៣ ទៀតនៅចុងខែនេះ មុននឹងអនុញ្ញាតឱ្យគាត់ទៅជួបជុំជាមួយគ្រួសារដូចធម្មតាវិញ។
លោកបញ្ជាក់ថា ស្ដ្រីរូបនេះត្រូវបានសម្រាកព្យាបាលជំងឺកូវីដ១៩អស់រយៈពេល ១ ខែ ១៦ ថ្ងៃហើយ នៅមុនពេលនាងត្រូវបានប្រកាសថា បានព្យាបាលជាសះស្បើយ។
ស្ដ្រីរូបនេះត្រូវបានក្រសួងសុខាភិបាលបញ្ជូនពីមន្ទីរពេទ្យខេត្តបន្ទាយមានជ័យ មកព្យាបាលនៅមន្ទីរពេទ្យមិត្តភាពខ្មែរ-សូវៀតក្នុងរាជធានីភ្នំពេញកាលពីថ្ងៃទី ៨ ខែឧសភា បន្ទាប់ពីស្ត្រីរូបនេះត្រូវគេអះអាងថាមានជំងឺផ្លូវចិត្តមិនបានដេកឱ្យបានគ្រប់គ្រាន់ និងត្រូវការពេលវេលាព្យាបាលយូរជាងអ្នកជំងឺដទៃទៀត។
មុនពេលត្រូវបញ្ជូនត្រឡប់តាមរថយន្តពេទ្យទៅកាន់មន្ទីរពេទ្យខេត្តបន្ទាយមានជ័យវិញ ស្ដ្រីរូបនេះបានអរគុណដល់គ្រូពេទ្យដែលបានខិតខំមើលថែនាងបានល្អ។ នាងនិយាយថា៖ «អរគុណដល់រាជរដ្ឋាភិបាល និងគ្រូពេទ្យដែលផ្គត់ផ្គង់អាហារហូបចុកបានល្អ ព្រឹក ៣ មុខ ថ្ងៃ ៣ មុខ ល្ងាច ៣ មុខ។ ចំណុចនេះហើយដែលខ្ញុំបានជាសះស្បើយលឿន ហើយលោកគ្រូ និងអ្នកគ្រូពេទ្យក៏បានយកចិត្តទុកដាក់ គឺមើលថែខ្ញុំយ៉ាងខ្លាំង មិនថាយប់ ឬថ្ងៃគឺ ២៤ ម៉ោងនៅពេលដែលខ្ញុំមានអីគឺពួកគាត់ចូលទៅមើលខ្ញុំរហូត តែគោលការណ៍គាត់ចូលមើលខ្ញុំ ២ ដងគឺនៅពេលព្រឹក និងពេលល្ងាច»។
ស្ត្រីរូបនេះនិយាយថា៖ «នៅពេលខ្លះខ្ញុំហូបថ្នាំ វាធ្វើទុក្ខខ្លាំង នៅពេលខ្លះខ្ញុំវង្វេងពេញពេទ្យក៏មានដែរ លោកគ្រូ-អ្នកគ្រូដេញតាមចាប់ខ្ញុំពេញពេទ្យ ដោយសារតែអារម្មណ៍ខ្ញុំអត់មូល។ ពួកគាត់បានជួយជំរុញឱ្យខ្ញុំឧស្សាហ៍ងូតទឹក ១ ថ្ងៃ ៣ ដង បាញ់អាល់កុលសម្អាតគឺខ្ញុំបានស្ដាប់តាមការណែនាំរបស់គ្រូពេទ្យផង និងពីក្រុមគ្រួសារផង»។
ស្ត្រីរូបនេះបាននិយាយទៀតថា៖ «ដូចដឹងហើយថា អ្នកកើតអារោគហ្នឹង (បញ្ហាផ្លូវចិត្ត) វាតែងគិតបន្តិចបន្តួចហើយ វាមិនអត់ទេ និងរាងពិបាកចិត្តវាមិនអត់ទេ តែឥឡូវនេះបើគិតក៏មិនបានអីមកវិញដែរអ៊ីចឹង! មានតែគិតពីរឿងសប្បាយៗ»៕
