The Phnom Penh Post Search

Search form




Logo of Phnom Penh Post newspaper Phnom Penh Post - នាយក​រដ្ឋ​មន្ត្រី​ឲ្យ​សិស្ស​ខំ​រៀន ដើម្បី​រួម​ចំណែក​អភិវឌ្ឍ​សង្គម

នាយក​រដ្ឋ​មន្ត្រី​ឲ្យ​សិស្ស​ខំ​រៀន ដើម្បី​រួម​ចំណែក​អភិវឌ្ឍ​សង្គម

Content image - Phnom Penh Post
សិស្ស​​ក្នុង​ពិធី​បើក​បវេសនកាល​នៅវិទ្យា​ល័យ​ហ៊ុនសែនបូរី ១០០​ ខ្នងក្នុង​ខណ្ឌ​ សែន​សុខ ពីម្សិល​មិញ​។ រូប ហ្វេសប៊ុក

នាយក​រដ្ឋ​មន្ត្រី​ឲ្យ​សិស្ស​ខំ​រៀន ដើម្បី​រួម​ចំណែក​អភិវឌ្ឍ​សង្គម

ភ្នំពេញៈ ក្នុងឱកាស​បើក​បវេសន​កាល​ឆ្នាំ​សិក្សា ថ្មី​ ២០១៥-២០១៦ លោក​នាយក​រដ្ឋមន្ត្រី ហ៊ុន សែន បាន​អំពាវនាវ​ ឲ្យ​សិស្សានុសិស្ស​ បន្ត​ពង្រឹង​ការ​សិក្សា កសាង​សមត្ថភាព​ឲ្យ​កាន់​តែ​ខ្លាំង​ ដើម្បី​ប្រែក្លាយ​សង្គមឲ្យ​មាន​ការ​អភិវឌ្ឍ​ជឿនលឿន ឆ្លើយ​តប​នឹង​សកល​ភាវូបនីយកម្ម ទាំង​ក្នុង​កម្រិត​តំបន់ និង​ពិភពលោក។

តាមរយៈ​វីដេអូឃ្លីប ដែល​ចាក់​ផ្សាយ​ឡើង​ដោយ​ទូរទស្សន៍​ជាតិ​កម្ពុជា កាលពី​ម្សិល​មិញ​លោក​នាយក​រដ្ឋមន្ត្រី ហ៊ុន សែន បាន​ថ្លែងថា វិស័យ​អប់រំ គឺជា​ការងារ​មួយ ដែល​តម្រូវ​ឲ្យ​មាន​ការ​បន្ត​លើក​កម្ពស់ និង​អភិវឌ្ឍ​គ្មាន​ទីបញ្ចប់ ​ដើម្បី​ពង្រឹង​សមត្ថភាព​ធនធាន​មនុស្ស​ប្រកប​ដោយ​គុណភាព ​ទេពកោសល្យ ផលិត​ភាព សក្តានុពល មាន​សីលធម៌ គុណធម៌ ដែល​នឹង​រួម​ចំណែក​សម្រាប់​ការ​អភិវឌ្ឍ សង្គម-សេដ្ឋកិច្ច​ជាតិ ឲ្យ​មាន​ការ​រីក​ចម្រើន។

លោក​បាន​រំឭក​ទៅ​កាន់​សិ​ស្សានុសិស្ស​ថា៖ «ក្មួយៗ​ត្រូវ​គិត​ថា អនាគត​ប្រទេស​ជាតិ​របស់​យើង ត្រូវ​តែ​មាន​ការចូល​រួម​ចំណែក​​យ៉ាង​សកម្ម​ពី​ក្មួយ ព្រោះ​ថា ក្មួយៗ ជា​មូលធន​មនុស្ស ដែល​ប្រទេស​ជាតិ​ត្រូវ​ការ ​និង​ផ្ញើ​សេចក្តី​សង្ឃឹម​ក្នុង​ការ​អភិវឌ្ឍ និង​កសាង​កម្ពុជា​ឲ្យ​ក្លាយ​ជា​ប្រទេស​អភិវឌ្ឍ​នា​ពេល​អនា​គត»។

លោក​នាយក​រដ្ឋមន្ត្រី ក៏បាន​បញ្ជា​ឲ្យ​អាជ្ញាធរ​ដែនដី​គ្រប់​លំដាប់​ថ្នាក់​ត្រូវ​ជួយ​​សម្រប​សម្រួល​ជំរុញ​លើក​​ទឹក​ចិត្ត និង​ផ្តល់​​លទ្ធភាព​ជូន​ដល់​អាណា​ព្យាបាល​សិស្ស ឲ្យ​បាន​នាំ​កូនចៅ​ចូល​រៀន និង​រៀន​បាន​ចប់​កម្រិត​សិក្សា​មូលដ្ឋាន​ឲ្យ​បាន ៩ ឆ្នាំ​​យ៉ាង​តិច។ ទន្ទឹម​នឹង​នេះ លោក ក៏​បាន​អំពាវនាវ​ឲ្យ​សិស្សានុសិស្ស ត្រូវ​នៅ​ឲ្យ​ឆ្ងាយ​ពី​គ្រឿង​ញៀន ប្រតិបត្តិ​ច្បាប់​ចរាចរណ៍​ឲ្យ​បាន​ខ្ជាប់​ខ្ជួន ដើម្បី​ធានា​នូវ​សុវត្ថិ​ភាព។

កំណែ​ទម្រង់​ថ្មី​ ក្នុង​វិស័យ​អប់រំ នា​រយៈពេល ២ ឆ្នាំ​ចុង​ក្រោយ​នេះ ត្រូវបាន​គេ​មើល​ឃើញថា គុណភាព​ក្នុង​វិស័យ​អប់រំ​នៅ​កម្ពុជា បាន​កំពុង​បោះ​ជំហាន​ទៅ​មុខ ខណៈ​ដែល​គ្រូ​បង្រៀន​មួយ​ចំនួន អះអាង​ថា បញ្ហា​ប្រាក់​បៀវត្សរ៍​ទាប នៅ​តែ​កំពុង​ធ្វើ​ឲ្យ​ប៉ះ​ពាល់​ដល់​ជីវភាព​របស់​​គ្រូ​បង្រៀន​ និង​គុណ​ភាព​អប់រំ។

លោក សែម ​សម្បត្តិ ជា​ឪពុ​ក​របស់​កូនស្រី​ពីរ​នាក់ ដែល​ជា​សិស្ស​រៀន​នៅ​សាលា​បឋម​សិក្សា​​​មួយ​ក្នុង​ខណ្ឌ​ច្បារ​អំពៅ​បាន​ឲ្យ​ដឹងថា លោក នៅ​តែ​មាន​ក្តី​បារម្ភ​ ចំពោះ​គុណភាព​អប់រំ​នៅ​កម្ពុជា​ដែល​គ្រូ​បង្រៀន​មិន​អាច​ផ្តល់​នូវ​ការ​បង្រៀន​ប្រកប​ដោយ​គុណ​ភាព​​ដល់​កូនៗ​របស់​លោក​បាន។

លោក​បាន​ថ្លែង​ថា៖«ខ្ញុំគិតថា គ្រូ​មិន​អាច​ផ្តោតលើ​ការ​បង្រៀន​បាន​ពេញ​លេញ​នោះ​ទេ ពីព្រោះ​ពួក​គាត់​ មាន​ប្រាក់​ខែ​ទាប​ពេក​...​​កាល​ណា​ពួក​គាត់​មាន​ប្រាក់​ខែ​ទាប​ ចាយ​មិន​គ្រប់​សម្រាប់​ជីវភាព​ប្រចាំ​ថ្ងៃ​អ៊ីចឹង​គាត់​ត្រូវ​​រក​ការងារ​ក្រៅធ្វើ ដើម្បី​រក​ប្រាក់​បង្គ្រប់​ជីវភាព។ ចំណែក​កម្មវិធី​សិក្សា នៅមាន​ភាព​ចាស់​គំ​រឹល ដែល​ត្រូវការ​ផ្លាស់ប្តូរ ទើប​អាច​ឆ្លើយ​តប​តម្រូវ​ការ​សង្គម​បាន»​។

អ្នក​នាំ​ពាក្យ​ក្រសួង​អប់រំ យុវជន និង​កីឡា លោក រស់ សាលីន​​ធ្លាប់​បាន​ឲ្យ​ដឹង​ថា ក្រសួង បាន​កំពុង​យក​ចិត្ត​ទុក​ដាក់​ក្នុង​​ការ​សម្រេច​ដំឡើង​ប្រាក់​បៀវត្សរ៍​សម្រាប់​គ្រូ​បង្រៀន និង​ពង្រឹង​គុណភាព​អប់រំ​ប្រដំ​ប្រសង​គ្នា។

លោក​ថា៖ «ក្រសួង បាន​ដឹង​​ពី​ទុក្ខ​លំបាក​ របស់​បងប្អូន​គ្រូ​បង្រៀន តែ​ការ​ដំឡើង​​ប្រាក់​បៀវត្សរ៍​គឺ​ត្រូវ​ធ្វើ​ឡើង​តាម​ដំណាក់ និង​ធានា​នូវ​តុល្យភាព​ចរន្ត​ចំណូល និង​ចំណាយ ដែល​ជា​ថវិកា​រដ្ឋ​ផង​ដែរ»។

បើ​តាម​លោក រស់ សា​លីន បច្ចុប្បន្ន​គ្រូបង្រៀន​កម្រិត​បឋម​សិក្សា ទទួល​បាន​ប្រាក់​បៀវត្សរ៍​ចន្លោះ​ពី ៦៥​ម៉ឺន​រៀល ដល់ ៨៦ ម៉ឺន​រៀល កម្រិត​អនុវិទ្យាល័យ​ពី ៧៣ ម៉ឺន​រៀល ទៅ​ ៩៩ ​ម៉ឺន​រៀល កម្រិត​មធ្យម​សិក្សា​ពី ៨០ ម៉ឺន​រៀល ទៅ​ ១​ លាន​ ១ ​សែន ៦ ម៉ឺន​រៀល និង​កម្រិត​ឧត្តម​សិក្សា​ពី ៩០ ម៉ឺន​រៀល ទៅ​ ១ ​លាន ​២​ សែន ​៨ ម៉ឺន​រៀល។

លោក​ បាន​បញ្ជាក់​ថា សម្រាប់​​ផែន​ការ ឆ្នាំ​ ២០១៦​ ខាង​មុខ​នេះ បៀវត្សរ៍​គ្រូបង្រៀន​កម្រិត​បឋម​សិក្សា នឹងត្រូវ​ដំឡើង​ឲ្យ​បាន​យ៉ាង​តិច​បំផុត ៨០ ម៉ឺន​រៀល៕

អត្ថបទគួរចាប់អារម្មណ៍