ភ្នំពេញៈ លោកនាយករដ្ឋមន្ត្រី ហ៊ុន សែន បានលើកឡើងថា ការបិទជើងហោះហើរមកពីប្រទេសចិនដោយសារខ្លាចឆ្លងវីរុសកូរ៉ូណា គឺជាការសម្លាប់សេដ្ឋកិច្ចកម្ពុជា និងកាត់បន្ថយទំនាក់ទំនងជាមួយចិន។ រីឯការបញ្ជូននិស្សិត ឬមន្ត្រីទូតកម្ពុជាចេញពីប្រទេស ចិន គឺប្រៀបដូចជាការរត់ចោលប្រជាជនចិនដែលជាមិត្តល្អរបស់កម្ពុជា។
លោក ហ៊ុន សែន បានលើកឡើងបែបនេះនៅក្នុងសន្និសីទកាសែតមួយនៅវិមានសន្ដិភាពកាលម្សិលមិញជាការឆ្លើយតបនឹងការលើកឡើងខ្លះដែលចង់ឱ្យរដ្ឋាភិបាលកម្ពុជាផ្អាកជើងហោះហើរជាមួយប្រទេសចិនដើម្បីទប់ស្កាត់ការរាលដាលវីរុសកូរ៉ូណាថ្មី និងកំពុងបន្តឆ្លងដល់ប្រទេសដទៃ។
លោក ហ៊ុន សែន ថ្លែងថាចិនគឺជាប្រទេសធំ និងមានប្រជាជនជិត ១ ៤០០ លាននាក់ ប៉ុន្តែប្រជាជនចិនដែលស្លាប់ និងឆ្លងជំងឺដោយសារវីរុសកូរ៉ូណាគឺតិចតួចបំផុត ហើយរដ្ឋាភិបាលចិនក៏បានបិទចរាចរណ៍ទាំងផ្លូវអាកាស ផ្លូវទឹក និងផ្លូវគោកនៅក្រុងវូហានហើយដែរដើម្បីទប់ស្កាត់ការរាលដាលបន្ថែម។
លោកបានបញ្ជាក់ថា៖ «ការបិទជើងហោះហើរជាមួយចិន វាមិនមែនជាការវាយប្រហារទៅលើប្រទេសចិនទេ តែវាគឺជាការវាយប្រហារទៅលើសេដ្ឋកិច្ចកម្ពុជាដោយផ្ទាល់តែម្ដងជាពិសេសអ្នករកស៊ីចិនដែលបោះវិនិយោគទុននៅកម្ពុជាយ៉ាងច្រើន និងអ្នកទេសចររបស់ចិនមកកម្ពុជាយ៉ាងច្រើនដែលមិនទាក់ទងនឹងជំងឺហ្នឹងសោះ។ ដូច្នោះវានឹងសម្លាប់សណ្ឋាគារនៅកម្ពុជា វានឹងសម្លាប់ផ្នែកសេវារបស់កម្ពុជាក្នុងចំណែកមួយ...»។
លោកបន្តថាកម្ពុជានៅតែដំណើរការផ្នែកសេវាដោយគ្មានការរើសអើងឡើយ ហើយថាបើរដ្ឋាភិបាលធ្វើតាមអ្នករិះគន់គឺត្រូវបិទជើងហោះហើរមកពីប្រទេសទាំងអស់មានទាំងជើងហោះហើរពីកូរ៉េខាងត្បូង ថៃ ម៉ាឡេស៊ី សិង្ហបុរី និងវៀតណាមជាដើម ព្រោះប្រទេសទាំងនេះក៏កំពុងមានករណីវីរុសកូរ៉ូណាដែរ។
លោកថា៖ «...អ៊ីចឹងកម្ពុជាស្ថិតនៅជាប្រទេសឯកោ អានេះគឺដាក់ក្នុងភាពឯកោខ្លួនឯង។ អស់លោកអ្នកនយោបាយ និងអ្នកវិភាគ បើបិទមែនមិនមែនបិទតែចិនទេ គឺបិទទាំងអស់ ព្រោះប្រទេសទាំងហ្នឹងកើតដែរ។ រាប់ទាំងអាមេរិក និងបារាំងក៏មានអ៊ីចឹងៗក៏បិទទាំងអស់ដែរ។ អ៊ីចឹង! កម្ពុជាសូន្យ ហើយក៏មិនអាចចេញទៅប្រទេសក្រៅបានដែរ»។
ចំពោះការស្នើសុំឱ្យជម្លៀសនិស្សិតខ្មែរដែលកំពុងរៀននៅចិនមកកម្ពុជាវិញ ក៏ត្រូវលោកនាយករដ្ឋមន្ត្រីចាត់ទុកថា ជាវិធានការអាចធ្វើឱ្យប្រទេសចិនបញ្ចប់មិនឱ្យមាននិស្សិតខ្មែរសិក្សានៅក្នុងប្រទេសនេះតែម្ដង ខណៈនិស្សិតខ្មែរនៅទីនោះត្រូវបានរដ្ឋាភិបាលចិន យកចិត្តទុកដាក់ខ្ពស់មើលថែទាំ។ ប៉ុន្តែលោកកំពុងបារម្ភពីនិស្សិតខ្មែរមួយចំនួនដែលវិលមកកម្ពុជាដោយមិនបានសុំច្បាប់សាលាដែលអាចត្រូវគេលុបឈ្មោះឈប់ឲ្យរៀន។
លោកបន្តថា៖ «និស្សិតខ្មែរ អ្នកការទូតខ្មែរ កុងស៊ុលខ្មែរ នៅតាមបណ្ដាកន្លែងនានា (ក្នុងប្រទេស ចិន) មិនត្រូវជម្លៀសមកកម្ពុជាទេ ដោយយើងទុកនៅទីនោះ ដើម្បីជាការរួមសុខរួមទុក្ខជាមួយគ ដើម្បីដោះស្រាយបញ្ហានេះ ហើយបើជ្រុលជម្លៀសនិស្សិតហើយមិនបាច់សុំអាហារូបករណ៍ចិនទៅទៀតទេ ច្បាស់ជាចិនមិនឱ្យទេ អាហ្នឹងខ្ញុំប៉ាន់ស្មានទុក...»។
លោកនាយករដ្ឋមន្ត្រី ហ៊ុន សែន បញ្ជាក់ទៀតថា លោកតែងសម្រេចចិត្តត្រូវចំពោះការមិនជម្លៀសពលរដ្ឋចេញពីប្រទេសណាដែលកំពុងមានបញ្ហាអាសន្ន។ ពេលជប៉ុនជួបគ្រោះរញ្ជួយដីធ្វើឲ្យសាយភាយថាមពលនុយក្លេអ៊ែរគឺលោកបានសម្រេចទុកពលរដ្ឋ និងមន្ត្រីទូតកម្ពុជានៅរួមសុខទុក្ខជាមួយជប៉ុនដែលធ្វើឱ្យអ្នកនយោបាយជប៉ុនអរគុណទឹកចិត្តពលរដ្ឋកម្ពុជា។
ជាមួយគ្នានេះលោក ហ៊ុន សែន បានរំឭកថា កាលពីប្រទេស កូរ៉េខាងជើង ព្រមានធ្វើសង្គ្រាមជាមួយកូរ៉េខាងត្បូងក៏លោកមិនបញ្ជូនពលករខ្មែរចេញពីកូរ៉េខាងត្បូងដែរ។ ការមិនរត់ចោលពលរដ្ឋកូរ៉េខាងត្បូងពេលនោះបានបង្កើនចំនួនពលករកម្ពុជាទៅធ្វើការនៅកូរ៉េខាងត្បូងច្រើន។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានលើកឡើងថា ការប្រកាន់យកវិធានការរបស់លោក ហ៊ុន សែន ពេលនេះជាឥរិយាបថការទូតទន់ភ្លន់ ប៉ុន្តែក៏ត្រូវប្រឈមហានិភ័យដែរគឺនឹងធ្វើឱ្យទស្សនៈមហាជនមិនសប្បាយចិត្ត និងអាចធ្វើឱ្យពលរដ្ឋខ្មែរនៅចិនឆ្លងវីរុសកូរ៉ូណាជាយថាហេតុ។
លោកថា៖ «យ៉ាងណាក៏ដោយក្នុងទំនាក់ទំនងការបរទេស យើងត្រូវថ្លឹងទម្ងន់ថា តើអ្វីជាផលប្រយោជន៍សម្រាប់ប្រទេសជាតិ ហើយអ្វីដែលជាបញ្ហាដែលយើងកែច្នៃបាន។ អ៊ីចឹង! ខ្ញុំគិតថា ការប្រកាន់យកឥរិយាបថបែបនេះគឺជាការសម្រេចចិត្តមួយដ៏សំខាន់ និងមានចក្ខុវិស័យវែងឆ្ងាយ...»។
លោក តុប សុភ័ក រដ្ឋលេខាធិការ និងជាអ្នកនាំពាក្យក្រសួងទេសចរណ៍បានលើកឡើងថា ការភ័យព្រួយរឿងរាលដាលវីរុសកូរ៉ូណាបានធ្វើឱ្យភ្ញៀវបរទេសមកកម្ពុជាថយពិសេសភ្ញៀវចិន។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានប្រាប់ភ្នំពេញប៉ុស្ដិ៍កាលពីថ្ងៃទី ២៩ មករាថា បុរសចិនម្នាក់ដែលរកឃើញមានរីរុសកូរ៉ណានោះ ត្រូវព្យាបាលឲ្យមានសុខភាពល្អវិញហើយ ប៉ុន្តែត្រូវបន្តដាក់ឱ្យនៅដាច់ដោយឡែកគម្រប់ ១៤ ថ្ងៃ។
រីឯលោក លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លងបានសរសេរក្នុងហ្វេសប៊ុកពីម្សិលមិញថា កម្ពុជាពុំទាន់រកឃើញមានវីរុសកូរ៉ូណាថ្មីនៅឡើយទេ៕