ភ្នំពេញៈ លោកនាយករដ្ឋមន្ដ្រី ហ៊ុន សែន បានថ្លែងថា រដ្ឋាភិបាលបានបញ្ចូនសាច់ប្រាក់ចំនួន ១២៥ លានដុល្លារទៅកាន់គោលដៅ សម្រាប់ក្នុងរយៈពេល ៥ ខែរួចហើយ ដើម្បីចែកជូនប្រជាពលរដ្ឋដែលមានជីវភាពក្រីក្រ និងងាយរងគ្រោះជិត ៦០ ម៉ឺនគ្រួសារ ដែលមានមនុស្សប្រមាណ ២ លាន ៣ សែននាក់ ក្នុងអំឡុងពេលមានការរាត្បាតនៃជំងឺកូវីដ ១៩។
លោក ហ៊ុន សែន បានថ្លែងយ៉ាងដូច្នេះនៅក្នុងពិធីប្រកាសជាផ្លូវការកម្មវិធីឧបត្ថម្ភសាច់ប្រាក់ជូនប្រជាពលរដ្ឋមានជីវភាពក្រីក្រ និងងាយរងគ្រោះក្នុងអំឡុងពេលមានការរាតត្បាតនៃជំងឺកូវីដ១៩ កាលពីថ្ងៃម្សិលមិញនៅវិមានសន្តិភាព រាជធានីភ្នំពេញ។
លោក ហ៊ុន សែន ថ្លែងថា បើសិនជារដ្ឋាភិបាលចង់ផ្តល់ជំនួយសង្គម មិនមែនយកក្រដាសទៅឲ្យប្រជាពលរដ្ឋទេគឺយកសាច់ប្រាក់ទៅឲ្យប្រជាពលរដ្ឋតែម្តង។ ដូច្នេះភាពមានមារយាទរបស់រដ្ឋាភិបាលទើបនាំឲ្យរដ្ឋាភិបាលមានលទ្ធភាព មានសាច់ប្រាក់ ដើម្បីចែកជូនប្រជាពលរដ្ឋដែលនឹងត្រូវចាប់ផ្តើមនៅប៉ុន្មានថ្ងៃខាងមុខហើយខែក្រោយនេះ ក៏នឹងត្រូវបើកថែមទៀត។
លោកបញ្ជាក់ថា៖ «ឯកឧត្តម អូន ព័ន្ធមុនីរ័ត្ន បានបញ្ជាក់ប្រាប់ខ្ញុំថា បានបញ្ជូនរួចទៅហើយចំនួន ១២៥ លានដុល្លារអាមេរិកសម្រាប់រយៈពេល ៥ ខែ។ ពិតមែនតែខ្ញុំនិយាយនៅក្នុងនេះផ្តល់ជូន ២ ខែម្តងៗ ប៉ុន្តែយើងបានបញ្ចេញសាច់ប្រាក់រួចស្រេចទៅហើយ ដើម្បីទៅកាន់គោលដៅក្នុងទំហំដែលនិយាយជាប្រាក់ដុល្លារគឺ ១២៥ លានដុល្លារ»។
លោកនាយករដ្ឋមន្ត្រីបានពន្យល់ថា ព្រោះប្រាក់ឧបត្ថម្ភនឹងត្រូវបើកផ្តល់ដល់ពលរដ្ឋនៅក្នុងសប្តាហ៍ទី ៤ នៃខែនីមួយៗ ដោយក្នុង ១ ខែៗត្រូវចំណាយប្រមាណ ២៥ លានដុល្លារ ហើយក្នុងដំណាក់កាលទី ១ នេះរដ្ឋាភិបាលបានកំណត់រយៈពេល ២ ខែម្តង ដើម្បីអនុវត្ត។
លោក ហ៊ុន សែន ក៏បានលើកឡើងដែរថា នេះគឺជាជំនួយសង្គមនៅពេលមានវិបត្តិនៃជំងឺកូវីដ ១៩ ដោយមិនមែនជាការចិញ្ចឹមរបស់រដ្ឋជាអចិន្រៃ្តយ៍នោះទេហើយប្រជាពលរដ្ឋដែលមានលទ្ធភាពអាចប្រកបអាជីវកម្ម ឬការងារបានគួរតែបន្តសកម្មភាពរបស់ខ្លួនដោយមិនត្រូវពឹងអាស្រ័យតែទៅលើប្រាក់ឧបត្ថម្ភនេះទេ។
លោកបន្ថែមថា៖ «រាជរដ្ឋាភិបាលរៀបចំកម្មវិធីនេះឡើង សម្រាប់ផ្តល់ជំនួយនៅក្នុងពេលមានវិបត្តិនៃជំងឺកូវីដ១៩ដោយការបើកផ្តល់នឹងត្រូវធ្វើឡើងក្នុងរយៈពេល ២ ខែម្តងនៅជុំទី ១ នឹងត្រូវធ្វើឡើងសម្រាប់ខែមិថុនា ១ លើក និងខែកក្កដា ១ លើក។ រាជរដ្ឋាភិបាលនឹងបន្តតាមដាន និងធ្វើការវាយតម្លៃអំពីសភាពការណ៍ និងផលប៉ះពាល់ជាក់ស្តែងនៃជំងឺកូវីដ ១៩ នេះបន្តទៀត»។
លោកបន្តថា៖ «បើសិនជាសភាពការណ៍ និងផលប៉ះពាល់នៅតែបន្តអូសបន្លាយនឹងមិនមានភាពល្អប្រសើរ កម្មវិធីជំនួយសង្គមនេះនឹងត្រូវបានអនុវត្តក្នុងជុំថ្មី សម្រាប់រយៈពេល ២ ខែបន្តទៀត។ តែបើផលប៉ះពាល់ជំងឺកូវីដ១៩មានភាពធូរស្បើយ រាជរដ្ឋាភិបាលនឹងបញ្ឈប់កម្មវិធីជំនួយសង្គមមួយនេះហើយបង្វែរថវិកា (នៅសល់) ទៅវិយោគលើកិច្ចការចាំបាច់នានាដើម្បីស្តារកំណើនសេដ្ឋកិច្ចឡើងវិញ»។
យោងតាមអនុក្រឹត្យចុះហត្ថលេខាដោយលោក ហ៊ុន សែន កាលពីថ្ងៃទី ១២ ខែមិថុនា ឲ្យដឹងថា គ្រួសារក្រីក្រដែលស្ថិតក្នុងកម្រិត ១ និងកម្រិត ២ នៅតាមទីប្រជុំជនក្នុងរាជធានី-ខេត្តក្នុងមួយគ្រួសារៗនឹងទទួលបានប្រាក់ឧបត្ថម្ភចន្លោះពី ១២ ម៉ឺនរៀលក្នុង ១ ខែ ឬអាចទទួលបានច្រើនជាងនេះយោងទៅតាមលក្ខខណ្ឌនៃគ្រួសារនីមួយៗដូចជាមានកូនច្រើនក្នុងបន្ទុកជនពិការចាស់ជរា និងគ្រួសារមានសមាជិកផ្ទុកជំងឺអេដស៍ជាដើម។
ក្រសួងផែនការបានឲ្យដឹងថា ការធ្វើបច្ចុប្បន្នភាពកំណត់អត្តសញ្ញាណកម្មគ្រួសារពលរដ្ឋក្រីក្រគិតត្រឹមថ្ងៃទី ១ ខែមិថុនា ដើម្បីទទួលបានប្រាក់ឧបត្ថម្ភពីរដ្ឋាភិបាលក្នុងអំឡុងពេលការរីករាលដាលជំងឺកូវីដ ១៩ គឺបានរកឃើញជាង ៥៦ ម៉ឺនគ្រួសារ ឬស្មើប្រមាណ ២ លាន ៣ សែននាក់។
នៅក្នុងពិធីកាលពីម្សិលមិញលោក ហ៊ុន សែន ក៏បានណែនាំឲ្យគ្រប់រាជធានី-ខេត្ត បន្តចុះស្រង់ស្ថិតិពលរដ្ឋក្រីក្រជាបន្តផងដែរ បើទោះជាក្នុងពេលនេះ ពលរដ្ឋខ្លះមិនទាន់ធ្លាក់ក្នុងស្ថានភាពក្រីក្រ ប៉ុន្តែក្នុងករណីវិបត្តិកូវីដ ១៩ មិនទាន់បញ្ចប់ ពលរដ្ឋនៅតែអាចប្រឈមនឹងភាពក្រីក្រក្នុងពេលខាងមុខ។
លោក ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជា សាទរចំពោះចំណាត់ការរបស់រដ្ឋាភិបាល ដែលសម្រេចផ្តល់កញ្ចប់ថវិកាជួយទ្រទ្រង់ដល់ជីវភាពរបស់ប្រជាពលរដ្ឋដែលកំពុងរងផលប៉ះពាល់ពីវិបត្តិជំងឺកូវីដ ១៩។ លោកថ្លែងថា ការចាត់វិធានការជួយដល់ប្រជាពលរដ្ឋគឺជាកាតព្វកិច្ចរបស់រដ្ឋាភិបាល ដែលជាការធានាដល់សេចក្តីសុខសុវត្ថិភាព សុខុមាលភាពរបស់ពលរដ្ឋដែលមានចែងក្នុងច្បាប់។
លោកបានប្រាប់ភ្នំពេញប៉ុស្តិ៍ពីម្សិលមិញថា៖ «ជំនួយដែលរដ្ឋាភិបាលបានផ្តល់ និងកំពុងផ្តល់ឲ្យនេះគឺជាទុនមួយដើម្បីឲ្យប្រជាពលរដ្ឋអាចដោះទាល់បានមួយរយៈដើម្បីមានលទ្ធភាពមួយចំនួនក្នុងការប្រយុទ្ធប្រឆាំងនឹងកូវីដ ១៩នេះ»។ ទោះយ៉ាងណាលោកចង់ឃើញដំណើរការនៃការស្រង់ស្ថិតិពលរដ្ឋក្រីក្រក្នុងពេលនេះត្រូវបានធ្វើឡើងប្រកបដោយតម្លាភាព និងភាពត្រឹមត្រូវដើម្បីធានាថាការចាយវាយថវិកាជាតិក្នុងពេលនេះចំគោលដៅ និងមានប្រសិទ្ធភាព ទៅកាន់ពលរដ្ឋដែលកំពុងមានតម្រូវការចាំបាច់ចៀសវាងកើតមានអំពើអយុត្តិធម៌៕