.jpg)
លោក ហ៊ុន សែន ថ្លែងក្នុងពិធីបិទសន្និបាតម្សិលមិញនៅក្រសួងមហាផ្ទៃ។ រូប SPM
ភ្នំពេញៈ លោកនាយករដ្ឋមន្ត្រី ហ៊ុន សែន គាំទ្រឲ្យមានការធ្វើវិសោធនកម្មច្បាប់ចរាចរណ៍ជាថ្មីក្នុងការដាក់ទណ្ឌកម្មបន្ថែមទៀតរហូតដល់ការដកហូតសិទ្ធិបើកបរក្នុងករណីល្មើសច្បាប់ចរាចរណ៍ម្តងហើយម្តងទៀត ដើម្បីចូលរួមទប់ស្កាត់គ្រោះថ្នាក់ចរាចរណ៍ ដោយលោកចាត់ទុកថា នេះជាពេលវេលាមួយល្អបំផុត។
ថ្លែងក្នុងពិធីបិទសន្និបាតបូកសរុបលទ្ធផលការងារឆ្នាំ ២០១៩ និងលើកទិសដៅការងារឆ្នាំ ២០២០ របស់ក្រសួងមហាផ្ទៃពីម្សិលមិញ លោក ហ៊ុន សែន ថ្លែងថា៖ «ខ្ញុំស្នើឲ្យយកចិត្តទុកដាក់នូវវិធានការទាំងឡាយដែលត្រូវប្រកាន់យកក្នុងពេលខាងមុខទៅលើការពង្រឹងការអនុវត្តច្បាប់ ដោយរាប់ទាំងវិធានការនានាដែលដាក់ចេញសម្រាប់ដំណើរការទៅមុខកែវិសោធនកម្មច្បាប់បានក៏ធ្វើទៅដោយធ្វើអ្វីបានក៏ធ្វើ»។
លោកបន្ថែមថា៖ «ខ្ញុំលើកឧទារហណ៍ឥឡូវអ្នកបើកបរតែងមានបណ្ណបើកបរ អ្នកឯងខុសម្តង ខ្ញុំកិបមួយ [លើបណ្ណបើកបរ] ហើយផាកពិន័យទៀត ៤០ ម៉ឺនរៀល។ នគរបាលគ្រប់ទីកន្លែង នៅពេលឃើញកិប [លើបណ្ណបើកបរ] គឺអ្នកហ្នឹងបានបំពានម្តងហើយដល់ខុសលើកទី ២ គឺត្រូវផាកពិន័យគុណនឹង ២ គឺ ៨០ ម៉ឺនរៀល។ ដល់ទៅបំពានលើកទី ៣ គឺផាកពិន័យគុណនឹង ២ ទៀត។ បានសេចក្តីថាពី ៨០ ម៉ឺនរៀលដល់ ១ លាន ៦ សែនរៀល ហើយការកិបលើកទី ៣ នេះបានសេចក្តីថា ផ្តល់ឱកាសដកសិទ្ធិមិនឲ្យបើកបរ ១ ឆ្នាំឬ ២ ឆ្នាំតែម្តង»។
ការគាំទ្រការកែវិសោធនកម្មច្បាប់នេះលោក ហ៊ុន សែន បានផ្តល់សិទ្ធិអាទិភាពរបស់ក្រុមការងារបច្ចេកទេសនៃក្រសួងមហាផ្ទៃក្នុងការពិភាក្សា និងសម្រេចកែប្រែឲ្យបានត្រឹមត្រូវ។ លោកអះអាងថា ការលើកឡើងរបស់លោកគ្រាន់តែជាការគាំទ្រមួយ ដោយធ្វើយ៉ាងណាឲ្យបញ្ហាគ្រោះថ្នាក់ចរាចរណ៍នៅកម្ពុជាត្រូវបានកាត់បន្ថយ។
លោកថ្លែងថា៖ «ដោយមិនឲ្យបើកបរតែម្តងដល់ទៅគ្រប់ ១ ឆ្នាំ ឬ ២ ឆ្នាំចាំយើងផ្តល់សិទ្ធិបើកបរឡើងវិញ។ ក្នុងរយៈពេលហ្នឹង គាត់ឲ្យកូនគាត់ មិត្តភក្តិគាត់ អ្នកណាក៏បាន បើកទៅ ព្រោះបើគាត់បើក គាត់អាងតែលុយទៅបុក។ ស្អីហ៎ គ្រាន់តែ ១០០ ដុល្លារឲ្យប៉ូលិសយកទៅស៊ីលេង វាធ្វើអ៊ីចឹងទៀត។ បើអ៊ីចឹង ខ្ញុំគាំទ្រឲ្យធ្វើវិធីនេះគ្រាន់តែពិភាក្សាគ្នាមើលទៅ នៅពេលយើងកាត់សិទ្ធិ [បើកបរ] ខុសប៉ុន្មានដង បានយើងកាត់សិទ្ធិ ត្រឹម ៣ ដង ឬ ៤ ដង ឬ ៥ ដង ចូរពិភាក្សាគ្នាទៅ ហើយកាត់សិទ្ធិទៅទៀត កាត់ ១ ឆ្នាំ ឬ ២ ឆ្នាំ ឬកាត់សិទ្ធិ [បើកបរ] រយៈពេលប៉ុន្មាន? ប៉ុន្តែនៅតែមានតែម្តង ព្រោះបើមិនអ៊ីចឹង អាងទឹកលុយនៅតែបំពានរហូត»។
តាមរបាយការណ៍របស់ក្រសួងមហាផ្ទៃស្តីពីបញ្ហាគ្រោះថ្នាក់ចរាចរណ៍នេះឲ្យដឹងថាកាលពីឆ្នាំ ២០១៩ មានមនុស្សយ៉ាងហោចណាស់ជាមធ្យម ៥,៥ នាក់ បានស្លាប់ក្នុង ១ ថ្ងៃហើយតួលេខនេះក៏កើនឡើងក្នុងខែមករាដើមឆ្នាំ ២០២០ ប៉ុន្តែចំនួននេះមានការថយចុះវិញបន្តិចនៅក្នុងខែកុម្ភៈ។
លោក ហ៊ុន សែន ថ្លែងថាកត្តាដែលធ្វើឲ្យមានការកើនឡើងនៃគ្រោះថ្នាក់ចរាចរណ៍នៅខែមករា និងធ្លាក់ចុះទៅវិញក្នុងខែកុម្ភៈគឺបណ្តាលមកពីកត្តាចំនួន ២ គឺគ្រឿងស្រវឹង និងការពង្រឹងអនុវត្តច្បាប់ដែលចាត់ទុកថា ការពង្រឹងច្បាប់ គឺជាបញ្ហាពិតប្រាកដ។ វិធានការទាំងនេះក៏មិនមែនជាការបិទសិទ្ធិសេរីភាពរបស់អ្នកបើកបរនៅតាមដងផ្លូវនោះដែរ ប៉ុន្តែលោកថា វាជាវិធានការមួយដែលចូលរួមការពារអាយុជីវិតរបស់អ្នកបើកបរខ្លួនឯងផ្ទាល់ និងអ្នកធ្វើដំណើរនៅតាមដងផ្លូវដទៃទៀត។
លោករំឭកថា នេះគឺពេលវេលាមួយដែលល្អបំផុតក្នុងការចូលរួមទប់ស្កាត់ ស្របពេលប្រជាពលរដ្ឋភាគច្រើន បានចូលរួមគោរពច្បាប់ចរាចរណ៍ដោយការពាក់មួកសុវត្ថិភាព និងច្បាប់នានានៅលើដងផ្លូវដែលមានតែមនុស្សតិចតួចប៉ុណ្ណោះ ដែលនៅតែបន្តបំពានច្បាប់។
លោកថា៖ «គិតមួយភ្លែត អ្នកដែលកំពុងស្តាប់ ប្រហែលជាមិនតិចលានទេ គាត់ថានាយករដ្ឋមន្ត្រីគ្រោងដាក់ទណ្ឌកម្មមកលើប្រជាពលរដ្ឋហើយ ប៉ុន្តែបើអ្នកឯងគិតឲ្យបានច្បាស់ ខ្ញុំការពារជីវិត អ្នកឯងវិញទេ ព្រោះអ្នកឯងខុសលើកទី ១ ហើយលើកទី ២ ហើយលើកទី ៣ ហើយ ខុសលើកទី ៤ ងាប់បណ្តោយ»។
លោក ស ខេង រដ្ឋមន្ត្រីក្រសួងមហាផ្ទៃថ្លែងថា ការអនុវត្តច្បាប់ចរាចរណ៍កន្លងមក មន្ត្រីអ្នកអនុវត្តច្បាប់បានអនុវត្តដល់កម្រិតមួយដែលឈានដល់យន្តការក្តៅទៅហើយ បន្ទាប់ពីបានដាក់ចេញវិធានការអប់រំណែនាំមួយរយៈពេលកន្លងមក។ លោកថានៅសប្តាហ៍ក្រោយក្រុមការងារ ក្រសួងមហាផ្ទៃ នឹងមានកិច្ចប្រជុំពិភាក្សាលើការធ្វើវិសោធនកម្មច្បាប់ចរាចរណ៍ផ្លូវគោក ដោយរួមទាំងការបន្ថែមការផាកពិន័យផងដែរ។
លោកបញ្ជាក់ថា៖ «នៅពេលនេះវិធានការយើងដាក់ចេញ នៅពេលមិនពាក់មួកសុវត្ថិភាពគឺយើងឃាត់ទាំងម៉ូតូ និងមនុស្សដោយមិនឲ្យគាត់ទៅណាទេ គឺនៅមើលម៉ូតូរបស់គាត់ ហើយបានយើងផាកពិន័យ ហើយយកមួកសុវត្ថិភាពមកដោយយើងបានអនុវត្តហួស ១ កម្រិតពីវិធានការអប់រំហើយ»។
លោក គង់ សុវណ្ណ ទីប្រឹក្សាជំនាញ និងជាអនុប្រធានក្រុមកម្មវិធីសុវត្ថិភាពចរាចរណ៍សហគមន៍នៃគម្រោងអភិវឌ្ឍន៍ផ្លូវជនបទជំហានទី ២ របស់ក្រសួងអភិវឌ្ឍន៍ជនបទថ្លែងថា៖ «ជាការពិតយើងត្រូវតែមានវិធានការ បើមិនអ៊ីចឹងទេនឹងមានការកើនឡើងអ្នកស្លាប់ខ្ពស់ ដែលការគ្រោងទុកឆ្នាំ ២០២០ ហ្នឹងនឹងឡើងដល់ ៣ ២០០ នាក់ ប៉ុន្តែបើមានការទប់ស្កាត់នឹងមិនឡើងដល់ថ្នាក់នេះទេ៕
