.jpg)
លោកនាយករដ្ឋមន្ត្រី ហ៊ុន សែន កាលពីថ្ងៃ ៤ មីនា។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន ចេញអនុក្រឹត្យថ្មីផ្តល់ប្រាក់សោធនសម្រាប់បុគ្គលទាំងឡាយ ដែលស្ថិតក្រោមបទប្បញ្ញត្តិនៃច្បាប់ស្តីពីការងារដោយនាំឱ្យបុគ្គលិកក្នុងវិស័យឯកជនអាចទទួលបានអត្ថប្រយោជន៍នេះ ដូចនឹងបុគ្គលិកក្នុងវិស័យរដ្ឋដែរ ប៉ុន្តែរដ្ឋាភិបាលមិនទាន់បានបញ្ជាក់ថា ការអនុវត្តនេះនឹងចាប់ផ្តើមនៅពេលណានោះទេ។
អនុក្រឹត្យដែលមាន ១០ ជំពូក និង ៤០ មាត្រាចុះហត្ថលេខាដោយលោកនាយករដ្ឋមន្ត្រីកាលពីថ្ងៃទី ៤ មីនា ឆ្នាំ ២០២១ បានឱ្យដឹងថា អនុក្រឹត្យនេះមានគោលបំណងដាក់ឱ្យដំណើរការរបបសន្តិសុខសង្គមផ្នែកសោធនសម្រាប់បុគ្គលទាំងឡាយដែលស្ថិតក្រោមច្បាប់ការងារតាមរយៈការកំណត់យន្តការ លក្ខខណ្ឌ បែបបទ និងនីតិវិធីនៃការចុះបញ្ជិកាបង់ភាគទាន អត្រាភាគទាន អត្រាសមាច័យ ការទាមទារ និងការផ្តល់តាវកាលិក។
អនុក្រឹត្យដដែលបានបញ្ជាក់ថា «អនុក្រឹត្យនេះមានវិសាលភាពអនុវត្តចំពោះបុគ្គលទាំងឡាយណាដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារ ដោយរាប់បញ្ចូលទាំងបុគ្គលដែលធ្វើការចាប់ពី ២ កន្លែងឡើងទៅ។ បេឡាជាតិសន្តិសុខសង្គមដែលហៅថាប ស ស គឺជាស្ថាប័នប្រតិបត្តិករតែមួយគត់ដែលមានសមត្ថកិច្ចក្នុងការគ្រប់គ្រង និងចាត់ចែងរបបសន្តិសុខសង្គមផ្នែកប្រាក់សោធន ដូចមានចែងក្នុងអនុក្រឹត្យនេះ»។
ជាមួយនឹងការផ្តល់ជូនប្រាក់សោធននេះ អនុក្រឹត្យបានកំណត់ថា សម្រាប់រយៈពេល ៥ ឆ្នាំដំបូង ភាគទាននេះត្រូវកំណត់ក្នុងអត្រាស្មើនឹង ៤% នៃប្រាក់ឈ្នួលជាប់ភាគទាន។ ក្នុងនោះ ២% ជាបន្ទុកនិយោជក និង ២% ជាបន្ទុកកម្មករនិយោជិត។ ការបង់ភាគទានផ្នែកប្រាក់សោធនត្រូវធ្វើជាប្រចាំខែ។
ទោះជាយ៉ាងណា កាលបរិច្ឆេទនៃការអនុវត្តរបបសន្តិសុខសង្គមផ្នែកប្រាក់សោធននេះមិនទាន់កំណត់នៅឡើយទេ។ ក៏ប៉ុន្តែអនុក្រឹត្យនេះបានលើកឡើងថាក្រសួងការងារ និងបណ្តុះបណ្តាលវិជ្ជាជីវៈ និងក្រសួងសេដ្ឋកិច្ច និងហិរញ្ញវត្ថុត្រូវចេញប្រកាសពីការអនុវត្តឱ្យបុគ្គលិកក្រុមហ៊ុនឯកជនអាចទទួលបានប្រាក់ខែចូលនិវត្តន៍ដូចមន្ត្រីរាជការនេះ។
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានប្រាប់ភ្នំពេញប៉ុស្តិ៍ពីម្សិលមិញថា ក្រៅពីមានអនុក្រឹត្យ ការងារបន្តគឺក្រសួងត្រូវរៀបចំប្រកាស និងសេចក្តីជូនដំណឹងមួយចំនួនដើម្បីអនុវត្តអនុក្រឹត្យនេះ។ លោកបន្តថា នៅពេលអនុក្រឹត្យនេះចូលជាធរមាននោះ អ្នកដែលស្ថិតក្នុងវិសាលភាពនៃច្បាប់ស្តីពីការងារទាំងអស់ នឹងត្រូវជាប់កាតព្វកិច្ចបង់ភាគទាន និងទទួលបានអត្ថប្រយោជន៍។
លោក មឿន តុលា នាយកប្រតិបត្តិមជ្ឈមណ្ឌលសម្ព័ន្ធភាពការងារ សាទរចំពោះរដ្ឋាភិបាលដែលបានចេញអនុក្រឹត្យថ្មីក្នុងការផ្តល់អត្ថប្រយោជន៍ជូនមនុស្សគ្រប់រូបឱ្យទទួលបានប្រាក់សោធននេះ។ ប៉ុន្តែលោកក៏មិនទាន់ច្បាស់ថា ពេលអនុក្រឹត្យនេះចូលជាធរមាន នីតិវិធី និងដំណើរការអាចប្រព្រឹត្តទៅល្អឬយ៉ាងណាទេ ព្រោះលោកបារម្ភថា ប្រសិនបើមិនបានរៀបចំឱ្យត្រឹមត្រូវ នោះនឹងអាចកើតមានរូបភាពមិនប្រក្រតីផ្សេងៗ។
លោកថា៖ «ជារឿងល្អ ប៉ុន្តែយើងត្រូវមើលលក្ខខណ្ឌមួយចំនួននៃការបង់ប្រាក់ភាគទាន ឬការធានានៃតម្លាភាព គណនេយ្យភាពក្នុងការគ្រប់គ្រងកញ្ចប់ថវិកានេះ ព្រោះលុយនេះ ជាលុយរបស់បុគ្គលិកដែលកាត់រៀងរាល់ខែ។ យើងត្រូវតាមដានរឿងហ្នឹង ហើយយើងត្រូវចូលរួមចំណែកភាគទានមួយផ្នែកទៀត ពីនិយោជក»។
យ៉ាងណា លោកអះអាងថា លោកនឹងឃ្លាំមើលនីតិវិធីបន្តទៀតថា៖ «យើងចាំមើលសិន ព្រោះវាមានរឿងមួយចំនួន តើការកាត់ភាគទានរបស់បុគ្គលិក ឬនិយោជកហ្នឹងត្រឹមត្រូវទេ?
បន្ទាប់មកតើការគ្រប់គ្រងថវិកានេះអ្នកណាមានតួនាទី តម្លាភាព និងការផ្តល់ព័ត៌មានបច្ចុប្បន្ននៃចំណូលអីហ្នឹងយ៉ាងណា? ព្រោះក្នុងប្រទេសខ្លះគេយកលុយនេះទៅវិនិយោគផ្សេង។ ប៉ុន្តែប្រសិនបើយកលុយនេះទៅប្រើក្នុងន័យអាក្រក់ណាមួយ នាំឱ្យមានការរំលោភបំពានសិទ្ធិកម្មករ»។
បន្ថែមពីនេះ លោករំពឹងថា រដ្ឋាភិបាលនឹងរកលទ្ធភាពផ្តល់អត្ថប្រយោជន៍ផ្សេងៗបន្ថែមទៀតដល់ពលរដ្ឋដូចជា ប្រាក់អត្ថប្រយោជន៍ពេលគ្មានការងារ និងប្រាក់ចូលនិវត្តន៍ ឬប្រាក់សោធននេះ ខណៈរដ្ឋាភិបាលទើបផ្តល់ជូនអត្ថប្រយោជន៍បាន ២ ប៉ុណ្ណោះ គឺគ្រោះថ្នាក់ការងារ និងសុខភាព ដែលកម្ពុជាបានអនុវត្ត៕
