កំពតៈ លោកនាយករដ្ឋមន្ត្រី ហ៊ុន សែន ក្នុងពិធីសម្ពោធដាក់ឲ្យដំណើរការជាផ្លូវការនូវប្រព័ន្ធផ្គត់ផ្គង់ទឹកស្អាតខេត្តកំពត កាលពីម្សិលមិញ បានជំរុញឲ្យលោកទេសរដ្ឋមន្ត្រី ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្ម រៀបចំសាងសង់ទំនប់បង្ហៀរទឹកមួយឲ្យបានកាន់តែឆាប់កាន់តែប្រសើរ សម្រាប់ទប់ទឹកសមុទ្រកុំឲ្យជន់ជោរចូលមកក្នុងព្រែក ដើម្បីរួមចំណែកក្នុងការដោះស្រាយវិបត្តិទឹកសាបប្រើប្រាស់នៅក្នុងខេត្តនេះ។
លោកនាយករដ្ឋមន្ត្រី បញ្ជាក់ថា៖ «ខ្ញុំមិនខ្វល់ថា អ្នកណាត្រូវធ្វើឬមិនធ្វើនោះទេ តែខ្ញុំដឹងតែពីធ្វើម៉េច ធ្វើទំនប់បង្ហៀរទឹកនេះឲ្យបាន បើពុំនោះទេអ្នកកំពតនឹងផឹកទឹកប្រៃនៅពេលខាងមុខនេះ បើទោះជាយើងមានម៉ាស៊ីនសម្រាប់កែច្នៃទឹកស្អាតនេះក៏ដោយ»។
បើតាមលោកនាយករដ្ឋមន្ត្រី គម្រោងសាងសង់ទំនប់បង្ហៀរទឹកនោះត្រូវការចំណាយថវិកាប្រមាណជាង ១ លានដុល្លារ។ គម្រោងនេះនឹងក្លាយជាផ្នែកមួយដ៏សំខាន់ក្នុងការគាំទ្រប្រព័ន្ធផ្គត់ផ្គង់ទឹកស្អាតខេត្តកំពត ដែលជាជំនួយឥតសំណងរបស់រដ្ឋាភិបាលជប៉ុន ដែលត្រូវបានសម្ពោធដាក់ឲ្យប្រើប្រាស់នាពេលនេះ មាន ដំណើរការល្អប្រកបដោយនិរន្តរភាព ព្រោះវាអាចជួយទប់ទឹកប្រៃមិនឲ្យហូរចូលមកដល់ចំណុចដែលត្រូវបូមសម្រាប់យកមកស្តុកក្នុងអាងចម្រាញ់នៃ ប្រព័ន្ធផ្គត់ផ្គង់ទឹកស្អាតខេត្តកំពត ដើម្បីផលិត និងផ្គត់ផ្គង់ទឹកស្អាតដល់អ្នកប្រើប្រាស់ ខណៈកំណើនប្រជាពលរដ្ឋ និង វិនិយោគិន នៅក្នុងខេត្តនេះមានកាន់តែច្រើនឡើង។
លោកបានមានប្រសាសន៍ថា៖ «ការកើតមានប្រព័ន្ធផ្គត់ផ្គង់ទឹកស្អាតនៅក្នុងខេត្តកំពត ដែលកើតចេញពីជំនួយឥតសំណងរបស់រដ្ឋាភិបាលជប៉ុននាពេលនេះ ជាការរួមចំណែកយ៉ាងសំខាន់ក្នុងការលើកកម្ពស់សុខុមាលភាពប្រជាពលរដ្ឋ ការអភិវឌ្ឍសេដ្ឋកិច្ច និងសង្គម ជាពិសេស ការទាក់ទាញឲ្យមានការវិនិយោគ កាន់តែច្រើនបន្ថែមទៀតនៅទីក្រុងឆ្នេរសមុទ្រមួយនេះ»។
ប្រព័ន្ធផ្គត់ផ្គង់ទឹកស្អាតខេត្តកំពត ដែលមានសមត្ថភាពផលិតទឹកស្អាតសរុប ប្រមាណ ១៣២៦០ ម៉ែត្រគុបក្នុង ១ ថ្ងៃ បានចាប់ផ្តើមដំណើរការសាងសង់កាលពីខែកក្កដា ឆ្នាំ ២០១៦ ដល់ ខែ សីហា ឆ្នាំ ២០១៨ ក្រោមជំនួយឥតសំណងរបស់រដ្ឋាភិបាលជប៉ុននូវទឹកប្រាក់ ២៦ លានដុល្លារអាមេរិក។
លោកទេសរដ្ឋមន្ត្រី ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្ម បាននិយាយថា វត្តមានប្រព័ន្ធផ្គត់ផ្គង់ទឹកស្អាតថ្មីនេះ រួមជាមួយបណ្តាញចែកចាយសរុបប្រវែង ១៧៦.៩ គីឡូម៉ែត្រ ធ្វើឱ្យអង្គភាពរដ្ឋាករទឹកខេត្តកំពតអាចមានលទ្ធភាពផ្គត់ផ្គង់ទឹកស្អាតដែលមានគុណភាព សុវត្ថិភាព និរន្តរភាព និងតម្លៃសមរម្យ ដោយគិតជាថ្លៃមធ្យម ១ ៤០០ រៀលក្នុង ១ ម៉ែត្រគុប ជូនប្រជាពលរដ្ឋនៅក្រុងកំពត និងស្រុកទឹកឈូ សរុបជាង ១៣ ០០០ គ្រួសារ។
លោក ប្រសិទ្ធ បន្តថា៖ «ប្រព័ន្ធផ្គត់ផ្គង់ទឹកស្អាតនេះ ក៏ជាការរួមចំណែកធ្វើឱ្យអង្គភាពរដ្ឋាករទឹកខេត្តកំពត សម្រេចបាននូវគោលនយោបាយរបស់រដ្ឋាភិបាលក្នុងការពង្រីកវិសាលភាពនៃការផ្គត់ផ្គង់ទឹកស្អាតនៅទីក្រុង ទីប្រជុំជនឱ្យបាន ៩០% ត្រឹមឆ្នាំ ២០២៣ និង ១០០% ត្រឹមឆ្នាំ ២០២៥ សម្រាប់បម្រើតម្រូវការចាំបាច់របស់ប្រជាជន ក៏ដូចជាសម្រាប់ផលិតកម្ម និងសេវាកម្មនានា»។
ខេត្តកំពត គឺជាខេត្តជាប់ឆ្នេរសមុទ្រមួយ ដែលមានសក្តានុពលអភិវឌ្ឍន៍ទេសចរណ៍ និងកំពង់ផែសមុទ្រ។ ក្នុងប៉ុន្មានឆ្នាំចុងក្រោយនេះខេត្តកំពតមានការប្រែប្រួលរីកចម្រើន ខាងផ្នែកហេដ្ឋារចនាសម្ព័ន្ធរូបវន្តគួរឲ្យកត់សម្គាល់ និងកំណើននៃការអភិវឌ្ឍសេដ្ឋកិច្ច និងសង្គម។ ជាមួយគ្នានោះតម្រូវការប្រើប្រាស់ទឹកស្អាតក៏មានការកើនឡើងជាខ្លាំងផងដែរ។
លោក ទី គៀន ប្រធានផ្នែកបណ្ដាញទឹកស្អាតខេត្តកំពត បាននិយាយថា កន្លងមកការផ្គត់ផ្គង់ទឹកស្អាតក្នុងខេត្តកំពតបានជួបប្រទះការខ្វះខាតយ៉ាងខ្លាំង ដោយសារប្រព័ន្ធផ្គត់ផ្គង់ទឹកស្អាតចាស់នៅក្នុងខេត្តនេះ ដែលបានកសាងឡើងតាំងពី ៥០ ឆ្នាំមុននោះ មានសមត្ថភាពផលិតទឹកស្អាតបានប្រហែល ៦ ០០០ ម៉ែត្រគុបប៉ុណ្ណោះក្នុង ១ ថ្ងៃ ខណៈតម្រូវការប្រើប្រាស់មានដល់ ៧ ៥០០ ម៉ែត្រគុបក្នុ ១ ថ្ងៃ។
លោក គៀន និយាយថា៖ «ប្រព័ន្ធផ្គត់ផ្គង់ទឹកស្អាតថ្មីនេះ នឹងជួយកាត់បន្ថយការខ្វះខាតទឹកស្អាតនៅក្នុងខេត្តនេះ ដោយសារប្រព័ន្ធថ្មីនេះមានសមត្ថភាពផលិតទឹកស្អាតបានច្រើនជាង២ដងបើធៀបទៅនឹងប្រព័ន្ធចាស់របស់យើងកាលពីមុន»។
បើតាមលោក គៀន ប្រភពទឹកដែលអង្គភាពរដ្ឋាករទឹកខេត្តកំពតបានបូមយកមកស្តុកទុកក្នុងអាងចម្រោះ ដើម្បីផលិតចេញជាទឹកស្អាតសម្រាប់ផ្គត់ផ្គង់ដល់អ្នកប្រើប្រាស់នោះ គឺបានមកពីប្រភពទឹកឈូខេត្តកំពត ដែលមានគុណភាពល្អជាងគេ បើធៀបនឹងបណ្ដាខេត្តមួយចំនួនទៀត។
លោកបន្តថា៖ «ទោះយ៉ាងណា យើងចាំបាច់ត្រូវធ្វើការចម្រោះចម្រាញ់វាឲ្យស្អាត ដើម្បីឲ្យប្រាកដថា វាមានសុវត្ថិភាព»។
ការដាក់ឲ្យដំណើរការនូវប្រព័ន្ធផ្គត់ផ្គង់ទឹកស្អាតថ្មីនេះ បានធ្វើឲ្យប្រជាពលរដ្ឋក្នុងខេត្តកំពតមានក្ដីត្រេកអរឥតឧបមា និងរំពឹងថា ក្រុមការងារភ្ជាប់បណ្ដាញទឹកស្អាតនៃអង្គភាពរដ្ឋាករទឹកខេត្តកំពត រត់បំពង់មេ និងភ្ជាប់បណ្ដាញទុយោទឹកជូនដល់ពួកគាត់បានប្រើប្រាស់គ្រប់ៗគ្នា។
លោក សុខ ជា អាយុ ៥៤ ឆ្នាំ រស់នៅភូមិចង្អោន ឃុំព្រែកត្នោត ស្រុកទឹកឈូ ខេត្តកំពត ប្រាប់ភ្នំពេញប៉ុស្តិ៍ថា នៅពេលនេះការភ្ជាប់បណ្ដាញទឹកស្អាតនៅមិនទាន់បានទៅដល់ភូមិរបស់គាត់នៅឡើយទេ។
ដោយសារបច្ចុប្បន្ន ជារដូវក្ដៅ និងមានភាពហួតហែងស្ទើរគ្រប់កន្លែង ហើយភូមិរបស់គាត់ជាប់មាត់សមុទ្រ ដូច្នេះពួកគាត់ជួបប្រឈមនូវកង្វះខាតទឹកស្អាតប្រើប្រាស់យ៉ាងខ្លាំង។
លោកនិយាយថា៖ «ថ្វីបើពេលនេះ ភូមិរបស់យើងខ្ញុំនៅពុំទាន់មានការភ្ជាប់បណ្ដាញទឹកស្អាតមកដល់ ប៉ុន្តែយើងរីករាយជាមួយសមិទ្ធផលដែលបានបង្កើតឡើងថ្មីនេះ ហើយរំពឹងថាមិនយូរមិនឆាប់ ពួកយើងនឹងទទួលបានទឹកស្អាតប្រើប្រាស់ទាំងអស់គ្នា»។
អ្នកស្រី សេន រ៉ូទីយ៉ាស់ រស់នៅភូមិដូនតោក ឃុំត្រើយកោះ ស្រុកកំពង់បាយ ខេត្តកំពត និយាយថា កាលពីមុនការផ្គត់ផ្គង់ទឹកមានភាពរអាក់រអួល និងខ្វះខាតជាខ្លាំង។ ទឹកដែលបានបញ្ជូនមកផ្គត់ផ្គង់ទៀតសោតមានកករដី ពោលគឺ «គ្មានសុវត្ថិភាព» ។
អ្នកស្រីបញ្ជាក់ថា៖ «នៅពេលនេះខ្ញុំរីករាយខ្លាំងណាស់ ព្រោះខ្ញុំមានទឹកប្រើប្រាស់គ្រប់គ្រាន់ ហើយទឹកថ្លាល្អ និងមានអនាម័យដល់សុខភាព»៕