ភ្នំពេញៈ លោកនាយករដ្ឋមន្ត្រី ហ៊ុន សែន ពីម្សិលមិញណែនាំឱ្យស្ថាប័នពាក់ព័ន្ធ អាជ្ញាធររៀបចំយុទ្ធនាការផ្សព្វផ្សាយ ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ ហៅថា ធីវេទ (TVET) ឱ្យបានផុលផុស ដើម្បីជំរុញឱ្យកម្លាំងពលកម្មជំនាញមានភាពប្រសើរឡើង និងប្រាក់ចំណូលខ្ពស់។
រដ្ឋាភិបាលកំណត់យកថ្ងៃទី ១៥ ខែមិថុនា ជារៀងរាល់ឆ្នាំ ជាទិវា TVET ដើម្បីលើកកម្ពស់ និងផ្សព្វផ្សាយទិវានេះក្នុងន័យជំរុញឱ្យមានការអភិវឌ្ឍកម្លាំងពលកម្មជំនាញប្រកបដោយគុណភាព និងប្រសិទ្ធភាព ដើម្បីឆ្លើយតបតម្រូវការទីផ្សារការងារទាំងក្នុង និងក្រៅប្រទេស។
ទិវា TVET លើកទី ៤ ឆ្នាំនេះប្រារព្ធឡើង ក្រោមប្រធានបទ «TVET ធ្វើឱ្យជំនាញកាន់តែប្រសើរ និងប្រាក់ចំណូលខ្ពស់»។
តាមរយៈសារាចរ ដែលបានផ្សព្វផ្សាយនៅថ្ងៃទី ១៨ ឧសភា លោក ហ៊ុន សែន បានណែនាំឱ្យក្រសួងការងារ និងបណ្តុះបណ្តាលវិជ្ជាជីវៈរៀបចំទិវាជាតិនេះតាមរយៈការផលិតជាវីដេអូ និងខ្លឹមសារឯកសារ និងត្រូវសហការជាមួយក្រសួងស្ថាប័នពាក់ព័ន្ធ រដ្ឋបាលរាជធានី-ខេត្ត អង្គការជាតិ អន្តរជាតិ ដៃគូអភិវឌ្ឍន៍ និងវិស័យឯកជន ដើម្បីធ្វើការផ្សព្វផ្សាយឱ្យបានទូលំទូលាយទូទាំងប្រទេស។
លោក ហ៊ុន សែន ថ្លែងថា៖ «ក្រសួងស្ថាប័នពាក់ព័ន្ធនានាត្រូវចូលរួមសហការ គាំទ្រ និងផ្សព្វផ្សាយតាមគ្រប់មធ្យោបាយដើម្បីអបអរសាទរទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី ៤ ឆ្នាំ ២០២១ តាមអង្គភាពរៀងៗខ្លួន»។
លោកថ្លែងថា៖ «រដ្ឋបាលរាជធានី-ខេត្តត្រូវសហការផ្សព្វផ្សាយ និងគាំទ្រដល់មន្ទីរការងារ និងបណ្តុះបណ្តាលវិជ្ជាជីវៈនិងគ្រឹះស្ថានអប់រំ បណ្តុះបណ្តាលបច្ចេកទេស និងវិជ្ជាជីវៈសាធារណៈ និងឯកជន អង្គការ សមាគម និងសហគមន៍ រៀបចំចងបដាពាក្យស្លោកផ្សព្វផ្សាយពីទិវាជាតិនេះក្នុងដែនដីរបស់ខ្លួន»។
លោក ហ៊ុន សែន ណែនាំឱ្យក្រសួងព័ត៌មានត្រូវណែនាំប្រព័ន្ធឃោសនារបស់រដ្ឋ ឯកជន និងបណ្តាញសារព័ត៌មាន សង្គមឱ្យផ្សព្វផ្សាយសារាចរសារលិខិតរបស់លោក វីដេអូ និងខ្លឹមសារឯកសារផ្សេងៗក្នុងឱកាសប្រារព្ធទិវាជាតិនេះ។
លោកបញ្ជាក់ថា៖ «ក្រសួង ស្ថាប័នពាក់ព័ន្ធនានា រដ្ឋបាលរាជធានី-ខេត្តត្រូវរៀបចំចងបដាពាក្យស្លោកនៅតាមអង្គភាព និងទីសាធារណៈ»។
ជាមួយគ្នានេះលោកនាយករដ្ឋមន្ត្រីអំពាវនាវដល់គ្រូបង្រៀន សិស្ស និស្សិត មាតាបិតា អាណាព្យាបាល កម្មករ និយោជិត និយោជក អង្គការមិនមែនរដ្ឋាភិបាល ដៃគូអភិវឌ្ឍន៍ និង «បងប្អូនជនរួមជាតិ» ចូលរួម និងផ្សព្វផ្សាយទិវាជាតិនេះឱ្យបានផុលផុសឱឡារិក អធិកអធមទូទាំងប្រទេស។
លោកថ្លែងថា៖ «គ្រប់ក្រសួង ស្ថាប័ន អង្គភាពពាក់ព័ន្ធ រដ្ឋបាលរាជធានី-ខេត្ត ត្រូវ ផ្សព្វផ្សាយ និងអនុវត្តឱ្យមានប្រសិទ្ធភាព និងដោយស្មារតីទទួលខុសត្រូវខ្ពស់»។
លោក មាស សុភ័ណ្ឌ និងលោក ផុស សុវណ្ណ អ្នកនាំពាក្យក្រសួងព័ត៌មាន មិនអាចទាក់ទងដើម្បីសុំការបញ្ជាក់បានទេនៅថ្ងៃទី ១៨ ខែឧសភា។
កាលពីខែសីហា ឆ្នាំ ២០២០ ទីភ្នាក់ងារស្វ៊ីសសម្រាប់អភិវឌ្ឍន៍ និងសហប្រតិបត្តិការ (SDC) បានចុះកិច្ចសន្យាជាមួយក្រសួងការងារ ដើម្បីគាំទ្រលើគម្រោងបង្កើតប្រព័ន្ធបណ្ដុះបណ្ដាលពីចម្ងាយ ឬប្រព័ន្ធអនឡាញ សម្រាប់គ្រឹះស្ថាន TVET សម្រាប់ជួយដល់យុវជនកម្ពុជា អំឡុងពេលជំងឺកូវីដ១៩ និងថ្ងៃអនាគត។
នេះជាគម្រោងអភិវឌ្ឍន៍ថ្មីមួយទៀតរបស់ទីភ្នាក់ងារស្វ៊ីស SDC ដែលមានរយៈពេល ១០ ខែ ចាប់ពីខែសីហា ឆ្នាំ ២០២០ រហូតដល់ ខែឧសភា ឆ្នាំ ២០២១៕