.jpg)
ពលករខ្មែរទើបមកពីថៃត្រូវសមត្ថកិច្ចនាំយកទៅធ្វើចត្តាឡីស័កកន្លងមក។ រូបថត នគរបាល
ភ្នំពេញៈ លោកនាយករដ្ឋមន្ត្រី ហ៊ុន សែន បានសម្រេចលើកលែងការធ្វើចត្តាឡីស័កនៅតាមខេត្តជាប់ព្រំដែនកម្ពុជា-ថៃចំពោះពលករខ្មែរត្រឡប់មកពីប្រទេសថៃ សម្រាប់អ្នកដែលមានសុខភាពធម្មតា ប៉ុន្តែនឹងត្រូវបន្តឱ្យមានការធ្វើចត្តាឡីស័កចំពោះអ្នកដែលមានអាការសង្ស័យមានកូវីដ១៩។
យោងតាមសារជាសំឡេងរបស់លោក ហ៊ុន សែន នៅថ្ងៃទី ៧ ខែមីនា ឆ្នាំ ២០២១ បានឱ្យដឹងថា ការចាប់ផ្តើមធ្វើចត្តាឡីស័ករបស់ពលករខ្មែរបានធ្វើឡើងបន្ទាប់ពីមានការឆ្លងក្នុងសហគមន៍យ៉ាងច្រើនក្នុងប្រទេសថៃ ប៉ុន្តែបច្ចុប្បន្ននេះសភាពការណ៍ក្នុងប្រទេសថៃត្រូវត្រួតត្រាបានហើយ ខណៈដែលខេត្តរបស់ថៃ ដែលនៅជាប់នឹងព្រំដែនកម្ពុជាក៏បានដកចេញពីខេត្តហានិភ័យផងដែរ។
លោក ហ៊ុន សែន លើកឡើងទៀតថា ក្នុងរយៈកាលជាង ១ ខែកន្លងទៅនេះ មណ្ឌលចត្តាឡីស័កនៅតាមព្រំដែនរបស់ប្រទេសកម្ពុជាទាំងអស់មិនមានមនុស្សឆ្លងទៀតទេ។ ស្ថានភាពនៅតាមព្រំដែនមានការលំបាកដោយសារតែចំនួនមនុស្សចេញតិចជាងមនុស្សចូល ក្នុងមណ្ឌលចត្តាឡីស័កដែលធ្វើឱ្យមនុស្សក្នុងមណ្ឌលចត្តាឡីស័កមានការកើនឡើងយ៉ាងខ្លាំង និងមានការលំបាកក្នុងការចិញ្ចឹមថែទាំ។
លោក ហ៊ុន សែន មានប្រសាសន៍ថា៖ «ដូច្នេះសម្រាប់ថ្ងៃនេះ អ្នកដែលមកពីប្រទេសថៃមិនចាំបាច់ដឹកចូលទៅក្នុងមណ្ឌលចត្តាឡីស័កទៀតទេ គឺរថយន្តកងទ័ពដែលនៅព្រំដែនកម្ពុជា-ថៃស្រាប់ត្រូវដឹកពួកគាត់ទៅកាន់ខេត្តខាងក្រោយ (ស្រុកកំណើត) តែម្តង»។
លោកបន្តថា៖ «សម្រាប់អ្នកដែលនៅក្នុងមណ្ឌលចត្តាឡីស័កស្រាប់ត្រូវរង់ចាំដឹកចេញនៅព្រឹកស្អែក ហើយនៅក្នុងការធ្វើដំណើររបស់ពួកគាត់ត្រូវតែធានាថា ពួកគាត់បានទទួលទានអាហាររួចហើយ និងផ្គត់ផ្គង់ស្បៀងអាហារបន្ថែម ដើម្បីឱ្យពួកគាត់ធ្វើដំណើរមានអាហារតាមខ្លួន។ យើងមិនអនុញ្ញាតឱ្យដឹកជញ្ជូនពួកគាត់ពេលយប់ទេ គឺត្រូវដឹកពួកគាត់ពេលព្រឹក និងពេលថ្ងៃ»។
លោក ហ៊ុន សែន បញ្ជាក់ទៀតថា ក្នុងការធ្វើដំណើរ កងទ័ព និងកម្លាំងដឹកជញ្ជូនត្រូវតែយកចិត្តទុកដាក់ថែទាំសុខភាពរបស់ពួកគាត់ឱ្យបានហ្មត់ចត់ ជាទីបំផុត ចៀសវាងការធ្វេសប្រហែសណាមួយដែលបង្កជាបញ្ហា ពិសេស រថយន្តនីមួយៗកុំដាក់មនុស្សច្រើនពេក ដើម្បីចៀសវាងនូវភាពកកកុញ ដែលវាមិនសមស្របតាមគម្លាតសុវត្ថិភាព។
នាយករដ្ឋមន្ត្រីបន្តថា នៅពេលដែលរថយន្តដឹកពួកគាត់មកដល់ខេត្តជាស្រុកកំណើតហើយ ខេត្តត្រូវទទួលខុសត្រូវដើម្បីបញ្ជូនទៅកាន់មូលដ្ឋាន ប៉ុន្តែប្រសិនបើមានអ្នកសង្ស័យ ឬក្តៅខ្លួន ខេត្តមិនត្រូវបញ្ជូនទៅកាន់មូលដ្ឋានទេ គឺត្រូវទុកគាត់ដើម្បីធ្វើការពិនិត្យសំណាក និងព្យាបាលគាត់ ក្នុងករណីដែលមានវិជ្ជមានកូវីដ១៩។
បើតាមលោក ហ៊ុន សែន កាលពីថ្ងៃទី ៤ ខែមីនា ពលករដែលកំពុងធ្វើចត្តាឡីស័កនៅខេត្តតាមព្រំដែនកម្ពុជា-ថៃមានចំនួនជាង ១៥ ០០០ នាក់។
ដោយឡែកនៅថ្ងៃម្សិលមិញលោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានសម្រេចដាក់ឱ្យដំណើរការអគារនៃសណ្ឋាគារ The Great Duke ដែលជាអតីតសណ្ឋាគារអាំងទែកុងទីណង់តាល់ធ្វើជាមន្ទីរពេទ្យពិនិត្យ ថែទាំ និងព្យាបាលអ្នកជំងឺកូវីដ១៩កម្រិតស្រាល។ ការសម្រេចនេះធ្វើឡើងបន្ទាប់ពីលោក ហ៊ុន សែន បានបញ្ជាឱ្យយកអ្នកជំងឺកូវីដ១៩ ដែលកំពុងសម្រាកព្យាបាលនៅមណ្ឌលចត្តាឡីស័កព្រែកព្នៅទៅដាក់ព្យាបាលនៅសណ្ឋាគារ The Great Dukeនេះ វិញ។
លោក ម៉ម ប៊ុនហេង ឱ្យដឹងថា ការដាក់ឱ្យដំណើរការ ទីតាំងសណ្ឋាគារនេះជាមន្ទីរពេទ្យសម្រាប់អ្នកជំងឺកូវីដ១៩ កម្រិតស្រាល គឺដើម្បីផ្តល់លទ្ធភាពដល់ក្រសួងសុខាភិបាលក្នុងការប្រមូលផ្តុំធនធានមនុស្ស សម្ភារបរិក្ខារ និងបច្ចេកទេសចាំបាច់មួយចំនួន ជួយសង្គ្រោះដល់អាយុជីវិតមនុស្សឱ្យបានទាន់ពេលវេលា និងធានាទប់ស្កាត់ការរីករាលដាលកាន់តែធ្ងន់ធ្ងរនៃជំងឺនេះនៅក្នុងសហគមន៍។ ចំពោះអគារ និងបរិវេណនៃសណ្ឋាគារ The Great Duke នេះនឹងត្រូវរៀបចំអនុវត្តវិធានការគ្រប់គ្រងយ៉ាងហ្មត់ចត់ ទាំងផ្នែកសុខាភិបាល និងសន្តិសុខសណ្តាប់ធ្នាប់យ៉ាងតឹងរ៉ឹងបំផុតសំដៅធានាទប់ស្កាត់នូវការឆ្លង និងហានិភ័យចម្លងនៃជំងឺនេះមកខាងក្រៅបរិវេណអគារនៃសណ្ឋាគារ។
លោកសង្កត់ធ្ងន់ថា៖ «សុំបងប្អូនប្រជាពលរដ្ឋ ពាណិជ្ជករ និងអាជីវករទាំងអស់ដែលរស់នៅ និងកំពុងប្រកបរបរផ្សេងៗនៅជាប់ និងក្បែរទីតាំងសណ្ឋាគារនេះកុំឱ្យមានការភ័យខ្លាច និងសូមបន្តរក្សាភាពនឹងនរក្នុងចិត្ត និងជឿទុកចិត្តលើវិធានការឆ្លើយតបរបស់រាជរដ្ឋាភិបាល»។
លោកបន្តថា វីរុសកូវីដ១៩នេះ ឆ្លងពីមនុស្សម្នាក់ទៅមនុស្សម្នាក់ តាមដំណក់ទឹកតូចៗ ដែលចេញពីផ្លូវដង្ហើមរបស់អ្នកផ្ទុកវីរុស។ រហូតមកដល់ពេលនេះ មិនមានភ័ស្តុតាងវិទ្យាសាស្ត្របញ្ជាក់ថា វីរុសនេះឆ្លងតាមខ្យល់អាកាសនៅក្នុងទីលម្ហឡើយ។
ក្រសួងសុខាភិបាលនៅព្រឹកថ្ងៃទី ៧ ខែមីនា បានប្រកាសរកឃើញអ្នកឆ្លងជំងឺកូវីដ១៩ ចំនួន ៣៤ នាក់បន្ថែមទៀត ក្នុងនោះអ្នកឆ្លងក្នុងព្រឹត្តិការណ៍សហគមន៍ ២០ កុម្ភៈមានចំនួន ៣១ នាក់ ហើយអ្នកដែលត្រូវបានព្យាបាលជាសះស្បើយចំនួន ១៩ នាក់។ អ្នកឆ្លងក្នុងព្រឹត្តិការណ៍សហគមន៍ ២០ កុម្ភៈ មានជនជាតិខ្មែរចំនួន ៨ នាក់ ជនជាតិចិន ២២ នាក់ និងជនជាតិវៀតណាម ១ នាក់។
បើតាមក្រសួងសុខាភិបាលគិតរហូតមកដល់ពេលនេះ មានអ្នកឆ្លងជំងឺកូវីដ ១៩សរុបចំនួន ៩៨៧ នាក់ក្នុងនោះអ្នកឆ្លងក្នុងព្រឹត្តិការណ៍សហគមន៍ ២០ កុម្ភៈ មានចំនួន ៤៧៧ នាក់ អ្នកព្យាបាលជាសះស្បើយសរុបចំនួន ៥១០ នាក់ និងអ្នកកំពុងសម្រាកព្យាបាលមានចំនួន ៤៧៦ នាក់៕
