ភ្នំពេញៈ លោកនាយរដ្ឋមន្ត្រី ហ៊ុន សែន ហាមឃាត់ដាច់ខាតមិនឲ្យសមាជិកឧត្តមក្រុមប្រឹក្សាពិគ្រោះ និងផ្តល់យោបល់ ចុះដោះស្រាយទំនាស់ណាដែលកំពុងស្ថិតក្នុងនីតិវិធីរបស់តុលាការ និងបានដោះស្រាយបញ្ចប់ដោយរដ្ឋាភិបាលរួចហើយដោយលោកបានបញ្ជាឲ្យលេខាធិការដ្ឋាននៃស្ថាប័ននេះរឹតបន្តឹងបន្ថែមទៀតក្នុងការចេញលិខិតបេសកកម្ម។
ការសម្រេចបែបនេះបានធ្វើឡើងនៅក្នុងកិច្ចប្រជុំពេញអង្គគណៈរដ្ឋមន្ត្រី ដែលដឹកនាំដោយលោកនាយករដ្ឋមន្ត្រី ហ៊ុន សែន កាលពីថ្ងៃសុក្រ នាទីស្តីការគណៈរដ្ឋមន្ត្រី។ នេះបើតាមសេចក្តីប្រកាសព័ត៌មានរបស់ទីស្តីការគណៈរដ្ឋមន្ត្រី ក្រោយបញ្ចប់កិច្ចប្រជុំ។
លោកនាយករដ្ឋមន្ត្រី ហ៊ុន សែន លើកឡើងក្នុងសេចក្តីប្រកាសថា លេខាធិការដ្ឋាន និងសមាជិក សមាជិកានៃឧត្តមក្រុមប្រឹក្សាពីគ្រោះ និងផ្តល់យោបល់ ត្រូវបំពេញភារកិច្ច ដូចជាខាងក្រោម ដោយមិនអនុញ្ញាតឲ្យចុះដោះស្រាយរាល់ទំនាស់ទាំងឡាយណាដែលលោកបានដោះស្រាយបញ្ចប់ និងមានសេចក្តីជូនដំណឹងរបស់ទីស្តីការគណៈរដ្ឋមន្ត្រីរួចហើយនោះទេ។ លោកបន្តថា ក្នុងនោះក៏មិនអនុញ្ញាតឲ្យចុះដោះស្រាយទំនាស់ដីធ្លី ឬទំនាស់ទាំងឡាយណា ដែលកំពុងដំណើរការ និងបានដោះស្រាយបញ្ចប់ដោយស្ថាប័នតុលាការផងដែរ។
លោកហ៊ុនសែនបានបញ្ជាក់ថា៖«លេខាធិការដ្ឋាននៃឧត្តមក្រុមប្រឹក្សាពោគ្រោះនិងផ្តល់យោបល់ ត្រូវពិនិត្យគោលដៅ និងកម្មវត្ថុដែលសមាជិក និងសមាជិកានៃឧត្តមក្រុមប្រឹក្សាពោគ្រោះ និងផ្តល់យោបល់ បម្រុងចុះទៅដោះស្រាយ ដោយមិនត្រូវចេញលិខិតបេសកម្មជូនក្នុងករណីដូចបានរៀបរាប់ខាងលើឡើយ។ ទន្ទឹមនេះ ក៏មិនត្រូវបញ្ជូនសំណុំរឿងវិវាទដីធ្លីរវាងបុគ្គល និងបុគ្គលជូនលោក ដើម្បីធ្វើការដោះស្រាយដែរ»។
លោក ម៉ម សូណង់ដូ សមាជិកឧត្តមក្រុមប្រឹក្សាពិគ្រោះ និងផ្តល់យោបល់មកពីគណបក្សសំបុកឃ្មុំសង្គមប្រជាធិបតេយ្យ បានលើកឡើងពីថ្ងៃអាទិត្យថា តួនាទីរបស់សមាជិកឧត្តមក្រុមប្រឹក្សាពិគ្រោះ និងផ្តល់យោបល់ គឺធ្វើទៅតាមព្រះរាជក្រឹត្យ ដែលបានកំណត់ឲ្យតាមដាន ឃ្លាំមើលការអនុវត្តច្បាប់របស់មន្ត្រីថ្នាក់ជាតិ និងថ្នាក់ក្រោមជាតិ។ ក៏ប៉ុន្តែលោកថា បើមានការរឹតត្បឹតនឹងធ្វើឲ្យការចុះបំពេញសកម្មភាពរបស់សមាជិកនីមួយៗ កាន់តែចង្អៀត និងមិនអាចធ្វើអ្វីៗទៅបានដូចច្បាប់កំណត់។
លោកបញ្ជាក់ថា៖ «ប្រសិនបើដកនេះ ដកនោះ វាខុសកាន់តែច្រើនឡើងទៅនឹងព្រះរាជក្រឹត្យ ដែលឲ្យសិទ្ធិយើងច្រើនទាក់ទងទៅនឹងថ្នាក់ជាតិ ថ្នាក់ក្រោមជាតិ។ ព្រះរាជក្រឹត្យសម្រេចឲ្យយើងធ្វើ ហើយសម្តេចប្តូរកិច្ចការងារនេះ ក្នុងន័យថា មិនឲ្យធ្វើនេះមិនឲ្យធ្វើនោះហ្នឹង»។
ប៉ុន្តែដោយសារស្ថាប័ននេះ លោកនាយករដ្ឋមន្ត្រី ហ៊ុន សែន ជាអ្នកបង្កើត ដូច្នេះ លោក ម៉ម សូណង់ដូ មិនមានអ្វីជំទាស់ទៅនឹងការសម្រេចនេះនោះទេ ដោយគ្រាន់តែបារម្ភថា ករណីវិវាទមួយចំនួនដែលសមាជិកឧត្តមក្រុមប្រឹក្សាបានទទួលពីពលរដ្ឋ គឺសុទ្ធជារឿងដែលមានភាពមិនប្រក្រតីពីការអនុវត្តច្បាប់ ដូចជាក្នុងដំណាក់កាលនៃនីតិវិធីតុលាការ និងវិវាទរវាងបុគ្គល និងបុគ្គល ដែលភាគច្រើន មានការលូកដៃពីមន្ត្រីរាជការ ហើយបង្កឲ្យមានភាពអយុត្តិធម៌។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជា បានប្រាប់ភ្នំពេញប៉ុស្តិ៍ពីថ្ងៃអាទិត្យថា ការរឹតត្បឹតនៃការបំពេញការងាររបស់សមាជិកឧត្តមក្រុមប្រឹក្សាពិគ្រោះ និងផ្តល់យោបល់ គឺបង្ហាញថា ស្ថាប័ននេះ កាន់តែផុយស្រួយ និងមានភាពស្រពេចស្រពិល។
លោកថា ស្ថាប័ននេះ មិនបានបង្ហាញពីការប្រកួតប្រជែងតាមច្បាប់ ដែលបង្ហាញថា គណបក្សទាំងនោះ គឺជាសំឡេងមួយពេញលេញដូចសំឡេងក្នុងសភាដែលមានប្រសិទ្ធិភាព
ទេ ហើយនៅពេលមានការរឹតត្បឹតទៀតនោះគេកាន់តែមើលឃើញថា ស្ថាប័ននេះ មិនសូវមានតម្លៃ។
លោកបានបញ្ជាក់ថា៖ «នេះគឺជាទម្រង់មួយ ដែលមិនធ្លាប់មានពីមុនមក ប៉ុន្តែយើងមិនដែលគិតថា សំឡេងក្នុងរូបភាពឧត្តមក្រុមប្រឹក្សានេះ អាចដោះស្រាយបញ្ហារបស់ប្រជាពលរដ្ឋបានច្រើននោះទេ។ គឺជាអនាគតដ៏ស្រពេចស្រពិលមួយសម្រាប់ឧត្តមក្រុមប្រឹក្សាពិគ្រោះនិងផ្តល់យោបល់នៅពេលមានរឿងបែបនេះថាតើសមាជិកទាំងអស់នៅបន្តការងារនេះតទៅទៀត ឬក៏គេមានជម្រើសអ្វីផ្សេង?»៕