តាកែវៈ លោកនាយករដ្ឋមន្ត្រី ហ៊ុន សែន ថ្លែងអំណរគុណប្រទេសអូស្ត្រាលី ដែលបានជួយដល់វិស័យកសិកម្មកម្ពុជាអស់រយៈពេលជាច្រើនឆ្នាំមកហើយ។ ជាមួយគ្នានេះលោកក៏បានបញ្ជាទិញម៉ាស៊ីនសាបព្រោះស្រូវចំនួន ២ ០០០ គ្រឿង សម្រាប់ចែកជូនដល់កសិករប្រើប្រាស់។
លោកបានបង្ហាញការកោតសរសើរនេះធ្វើឡើងក្នុងពេលសំណេះសំណាលជាមួយប្រជាកសិករក្នុងស្រុកព្រៃកប្បាស ខេត្តតាកែវដោយមានវត្តមានឯកអគ្គរដ្ឋទូតអូស្ត្រាលី លោក Pablo Kang។ លោកមានប្រសាសន៍ថា៖ «ខ្ញុំសុំយកឱកាសនេះអរគុណចំពោះអូស្ត្រាលី តាមរយៈឯកឧត្តមអគ្គរដ្ឋទូត។ អូស្ត្រាលីបានហក់ចូលមកជួយតាំងពីពេលដែលអូស្ត្រាលីមិនទាន់ទទួលស្គាល់រដ្ឋាភិបាលយើងជំនាន់រដ្ឋកម្ពុជា។ តាមខ្ញុំចាំ បើខ្ញុំមិនច្រឡំទេតាំងពីឆ្នាំ ១៩៨៨»។
លោករំឭកថានៅឆ្នាំ ១៩៨៣ អូស្ត្រាលីបានផ្ដើមគំនិតឈប់ទទួលស្គាល់ខ្មែរក្រហមនៅអង្គការសហប្រជាជាតិក្នុងពេលដែលប្រទេសអូស្ត្រាលី ត្រូវបានដឹកនាំដោយបក្សពលករ។ ចាប់ពីពេលនោះមកអង្គការក្រៅរដ្ឋាភិបាលពីប្រទេសអូស្ត្រាលីបានចូលមកកម្ពុជាជាបន្តបន្ទាប់។ អូស្ត្រាលីក៏បានចូលរួមចំណែកនៅក្នុងវិស័យកសិកម្មនៅកម្ពុជា ហើយវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជាហៅកាត់ថា CARDI ដែលបង្កាត់ពូជស្រូវក៏មានចំណែកចូលរួមពីអូស្ត្រាលី។
លោកថ្លែងថានៅក្នុងឆ្នាំ ២០០៦ លោកបានធ្វើទស្សនកិច្ចទៅប្រទេសអូស្ត្រាលីក្នុងអាណត្តិនាយករដ្ឋមន្ត្រី ចន ហាវើត។ លោក ចន ហាវើត បាននាំលោកទៅមើលតំបន់កសិកម្មមួយដោយសារតែអូស្ត្រាលីដឹងថាកម្ពុជា គឺជាប្រទេសកសិកម្ម និងកំពុងស្វែងរកជំនួយផ្នែកកសិកម្ម។ រាល់ការចុះហត្ថលេខារបស់លោកជាមួយអូស្ត្រាលី គឺពាក់ព័ន្ធនឹងរឿងកសិកម្ម។
លោក ហ៊ុន សែន បញ្ជាក់ថា៖ «តំបន់នេះអូស្ត្រាលីបានចូលមកក្នុងកម្មវិធីគេហៅថា ចង្វាក់តម្លៃនៃវិស័យកសិកម្មរបស់យើង ដោយមានវិសាលភាពនៅខេត្តតាកែវ កំពត កំពង់ធំ ព្រៃវែង និងកណ្ដាល»។
អូស្ត្រាលីបានជួយកម្ពុជាលើវិស័យកសិកម្មទាំងហេដ្ឋារចនាសម្ព័ន្ធនៃប្រព័ន្ធស្រោចស្រព និងការបណ្ដុះបណ្ដាលបច្ចេកទេស ការផ្ដល់ពូជ និងការនាំទំនិញចូលទៅកាន់ទីផ្សារ។ លោកថ្លែងថា ជំនួយដែលលោកសុំពីបរទេស រួមមានពីអូស្ត្រាលី ចិន កូរ៉េ ជាដើមគឺដើម្បីយកមកកសាងកម្ពុជា។
ឯកអគ្គរដ្ឋទូតអូស្ត្រាលី លោក Pablo Kang បានថ្លែងប្រាប់ភ្នំពេញប៉ុស្តិ៍តាមអ៊ីមែលកាលពីម្សិលមិញថា អូស្ត្រាលីបានជួយគាំទ្រដល់វិស័យកសិម្មនៅកម្ពុជាតាំងពីទសវត្សរ៍ឆ្នាំ ១៩៩០។ កាលពីសម័យសង្គមរាស្ត្រនិយម អូស្ត្រាលីក៏ធ្លាប់បញ្ជូនអ្នកជំនាញកសិកម្មមកកម្ពុជាផងដែរ។ នៅចុងទសវត្សរ៍ ១៩៩០ អូស្ត្រាលីបានជួយដល់ការបង្កើតវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា។
លោកបន្តថា បច្ចុប្បន្ននេះអូស្ត្រាលីកំពុងអនុវត្តកម្មវិធី «ចង្វាក់តម្លៃនៃវិស័យកសិកម្មកម្ពុជា-អូស្ត្រាលី» ហៅកាត់ថា CAVAC ពីឆ្នាំ ២០១០ ដល់ឆ្នាំ ២០២០ មានទឹកប្រាក់ ១០០ លានដុល្លារ។ កម្មវិធីនេះជួយដល់កសិករក្នុងការបង្កើនផលិតភាព និងការប្រកួតប្រជែង។
CAVAC បានកសាងប្រព័ន្ធធារាសាស្ត្រនៅឆ្នាំ ២០១៦ នៅខេត្តព្រៃវែង តាកែវ កណ្ដាល ផ្គត់ផ្គង់ទឹកដល់គ្រួសារចំនួន ១២ ០០០ គ្រួសារ គ្របដណ្ដប់លើផ្ទៃដី ៩ ពាន់ហិកតា។ អូស្ត្រាលីនឹងបន្តធ្វើការជាមួយកម្ពុជាដើម្បីធ្វើឲ្យប្រសើរឡើងដល់វិស័យកសិកម្មកម្ពុជា។
ឆ្លើយនឹងសំណួរដែលសួរថា ហេតុអ្វីបានជាអូស្ត្រាលីផ្ដោតលើវិស័យកសិកម្មនៅកម្ពុជាលោក Pablo Kang បានថ្លែងដូច្នេះថា៖ «ក្នុងនាមជាមិត្ត និងអ្នកជិតខាងយូរមកហើយ កិច្ចសហប្រតិបត្តិការអភិវឌ្ឍន៍របស់អូស្ត្រាលីមានគោលបំណងការសាងភាពធន់របស់កម្ពុជា និងកាត់បន្ថយភាពក្រីក្រ។
នៅក្នុងប្រទេសទាំង ២ កសិកម្មគឺជាសសរស្ដម្ភសេដ្ឋកិច្ចយ៉ាងសំខាន់ ហើយយើងទាំង ២ កំពុងតែប្រឈមនឹងបញ្ហាអាកាសធាតុ។ ស្ថិតលើភាពដូចគ្នានេះ បទពិសោធ និងឯកទេសរបស់អូស្ត្រាលីមានសារៈសំខាន់ដើម្បីគាំទ្រដល់ការអភិវឌ្ឍវិស័យសេដ្ឋកិច្ចរបស់កម្ពុជា»។
លោកបន្តថា ខណៈពេលដែលវិបត្តិជំងឺកូវីដ ១៩ នេះកំពុងប៉ះពាល់វិស័យទេសចរណ៍ និងកាត់ដេរ វាជារឿងសំខាន់ដែលកម្ពុជាបន្តអភិវឌ្ឍផលិតផលកសិកម្ម ដែលអាចលក់ចេញទៅទីផ្សារអន្តរជាតិ និងបង្កើនចំណូលដល់ប្រទេសជាតិ។
កាលពីម្សិលមិញដែរលោកនាយករដ្ឋមន្ត្រី ហ៊ុន សែន បានបញ្ជាទិញម៉ាស៊ីនសាបព្រោះស្រូវចំនួន ២០០០ គ្រឿងដែលរួមមានខ្នាតធំ ១ ០០០ គ្រឿងនិង ខ្នាតតូច ១ ០០០ គ្រឿង។ ម៉ាស៊ីនទាំង ២ ០០០ គ្រឿងនេះនឹងត្រូវប្រគល់ឲ្យក្រសួងកសិកម្មចែកចាយដល់ពលរដ្ឋនៅតាមកន្លែងដែលត្រូវការប្រើប្រាស់ ហើយអ្នកក្រីក្រគ្មានដីស្រែអាចយកទៅស៊ីឈ្នួលដើម្បីបានប្រាក់ចំណូល។
លោកនាយករដ្ឋមន្ត្រីថ្លែងថា៖ «ដូច្នេះក្នុងចំនួន ១ ០០០ គ្រឿងធុនធំ យើងអាចដោះស្រាយ ការងារឲ្យ ១ ០០០ ដែលខ្វះដីធ្លី ខ្វះមុខរបរឲ្យគាត់កាន់កាប់អាហ្នឹង ថែទាំអាហ្នឹង ហើយគាត់ទៅស៊ីឈ្នួលគេ គាត់យកលុយ។ ចំពោះអ្នកដែលខ្ញុំឲ្យម្នាក់ៗ អានោះខ្ញុំឲ្យទទេ មិនបាច់សង ខ្ញុំទេ ឲ្យតែប្រឹងធ្វើឲ្យល្អទៅខ្ញុំអរហើយ»៕