.jpg)
អាជ្ញាធរបិទខ្ទប់ព្រំប្រទល់រាជធានីភ្នំពេញ និងក្រុងតាខ្មៅ តាមបណ្ដោយវិថីសម្ដេច ហ៊ុន សែន (ផ្លូវ ៦០ ម៉ែត្រ) ថ្ងៃទី ១៥ ខែ មេសា ឆ្នាំ ២០២១។ ហ៊ាន រង្សី
ភ្នំពេញ៖ លោកនាយករដ្ឋមន្ត្រី ហ៊ុន សែន បានអំពាវនាវដល់ប្រជាពលរដ្ឋខ្មែរគ្រប់រូបឱ្យរួមគ្នា ដើម្បីបិទបញ្ចប់នូវព្រឹត្តិការណ៍សហគមន៍ ២០ កុម្ភះ ដែលជាព្រឹត្តិការណ៍នៃការផ្ទុះឆ្លងជំងឺកូវីដ ១៩ ដ៏គ្រោះថ្នាក់បំផុតសម្រាប់កម្ពុជា។
ការអំពាវនាវនេះបានធ្វើឡើងកាលពីថ្ងៃទី ១៤ ខែ មេសា ឆ្នាំ ២០២១ តាមរយៈការដាក់ចេញនូវវិធានបិទខ្ទប់រាជធានីភ្នំពេញ និងក្រុងតាខ្មៅ។
លោកបានថ្លែងថា៖ «សូមអង្វរករបងប្អូនប្រជាពលរដ្ឋរបស់យើងខិតខំឡើងរួមគ្នា ដើម្បីបញ្ចប់នូវព្រឹត្តិការណ៍ដ៏គ្រោះថ្នាក់។ យើងកំពុងស្ថិតនៅមាត់ជ្រោះនៃមរណៈហើយ ប្រសិនបើយើងមិនប្រឹងរួមគ្នា យើងនឹងឈានទៅរកមរណៈពិតប្រាកដ។ ដូច្នេះវិធីតែមួយគត់ គឺរួមដៃគ្នាទាំងរដ្ឋ និងប្រជាជន»។
ព្រឹត្តិការណ៍សហគមន៍ ២០ កុម្ភៈ ដែលមានរយៈពេលជិត ២ ខែទៅហើយនោះ មិនទាន់មានសញ្ញាថមថយនៅឡើយនោះទេ ហើយការរីករាលដាលកាន់ធ្ងន់ធ្ងរពីមួយថ្ងៃទៅមួយថ្ងៃ។ របាយការណ៍របស់ក្រសួងសុខាភិបាលបានបង្ហាញថា ក្នុងព្រឹត្តិការណ៍នេះ មានមនុស្សសរុប ៤ ៣៣៧ នាក់ហើយ បានឆ្លងកូវីដ ១៩ ហើយមនុស្សរហូតដល់ទៅ ៣៦ នាក់បានស្លាប់បាត់បង់ជីវិត គិតត្រឹមថ្ងៃទី ១៤ ខែ មេសា ឆ្នាំ ២០២១។
នៅយប់ថ្ងៃទី ១៤ ខែមេសា ដដែលនេះ រាជរដ្ឋាភិបាលបានដាក់ចេញនូវវិធានការថ្មីបិទខ្ទប់រាជធានីភ្នំពេញ និងក្រុងតាខ្មៅរយៈពេល ១៤ ថ្ងៃ គិតចាប់ពីម៉ោងសូន្យយប់មិញទៅ ដើម្បីទប់ស្កាត់ការរីករាលដាលជំងឺកូវីដ ១៩។
វិធានការបានហាមឃាត់ប្រជាពលរដ្ឋមិនឱ្យចេញពីផ្ទះ និងបិទអាជីវកម្មនានាផងដែរ។ ទោះបីយ៉ាងណា វិធានការបានអនុញ្ញាតសម្រាប់ការធ្វើដំណើរចាំបាច់ដូចជាការទៅមន្ទីរពេទ្យ និងការទិញម្ហូបអាហារជាដើម។ ដោយឡែកអាជីវកម្មចាំបាច់មួយចំនួនក៏ត្រូវបានរក្សាទុកផងដែរ ជាពិសេសអាជីវកម្មពាក់ព័ន្ធការលក់ដូរ ឬផ្គត់ផ្គង់ស្បៀងអាហារ។
លោក ហ៊ុន សែន ថ្លែងថា៖ "គោលបំណងនៃការបិទដើម្បីប្រយុទ្ធប្រឆាំងជាមួយនឹងការឆ្លងរីករាលដាលនៃជំងឺកូវីដ ១៩ ហើយការបិទនេះក៏មិនមែនជាដំណើរការ ដើម្បីធ្វើឲ្យប្រជាជនស្លាប់ ឬរងទុកលំបាកនោះដែរ"។
លោកថ្លែងថា ការធ្វើដំណើរទៅកាន់កន្លែងលក់ម្ហូបអាហារ ឬសម្ភារប្រើប្រាស់ចាំបាច់ប្រចាំថ្ងៃអាចអនុញ្ញាតឲ្យបើកដំណើរការដោយអាជ្ញាធរមានសមត្ថកិច្ច ការធ្វើដំណើរដោយគោលបំណងនេះអាចធ្វើឡើងដោយសមាជិកយ៉ាងច្រើន ២ នាក់ ក្នុងផ្ទះ ឬទីស្នាក់នៅ ៣ ដងក្នុងមួយសប្ដាហ៍ និងនៅជិតបំផុតកន្លែងស្នាក់នៅដោយយកតាមអត្តសញ្ញាណបណ្ណ ឬបណ្ណសម្គាល់។ ការធ្វើដំណើរទៅពេទ្យ មណ្ឌលសុខភាព កន្លែងព្យាបាល ឱសថស្ថាន ឬមូលហេតុបន្ទាន់នៅភូមិសាស្រ្តបិទខ្ទប់ក៏នៅតែអាចធ្វើទៅបានដែរ។
លោក ហ៊ុន សែន ថ្លែងថា៖ "យើងមិនបិទខ្ទប់សម្លាប់ប្រជាពលរដ្ឋនោះទេ បងប្អូននឹងមិនដាច់បាយ និងខ្វះស្បៀងនោះទេ"៕
