ភ្នំពេញៈ លោកនាយករដ្ឋមន្ត្រី ហ៊ុន សែន បានឯកភាពកំណត់យកកាលបរិច្ឆេទថ្ងៃទី ២៥-២៦ ខែវិច្ឆិកា ឆ្នាំនេះ ដើម្បីរៀបចំកិច្ចប្រជុំកំពូលអាស៊ី-អឺរ៉ុប លើកទី១៣ (ASEM13) ដែលកម្ពុជាធ្វើជាម្ចាស់ផ្ទះ។
យោងតាមលិខិតរបស់ក្រសួងការបរទេស និងសហប្រតិបត្តិការអន្តរជាតិ ចេញផ្សាយនៅថ្ងៃទី ២៧ ខែឧសភា បានបញ្ជាក់ថា៖ «សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានឯកភាពកំណត់យកកាលបរិច្ឆេទថ្មីគឺថ្ងៃទី ២៥-២៦ វិច្ឆិកា ឆ្នាំ ២០២១ ដើម្បីរៀបចំកិច្ចប្រជុំកំពូលអាស៊ី-អឺរ៉ុប លើកទី១៣ (ASE-M13)»។
បើតាមលិខិតចុះហត្ថលេខាដោយលោក លុយ ដាវីត រដ្ឋលេខាធិការក្រសួងការបរទេសជាអនុប្រធានប្រចាំការ គណៈកម្មាធិការជាតិ និងជាប្រធានលេខាធិការដ្ឋានរៀបចំកិច្ចប្រជុំកំពូលអាស៊ី-អឺរ៉ុបលើកទី ១៣ (ASEM) កម្ពុជានឹងធ្វើជាម្ចាស់ផ្ទះនៅចុងឆ្នាំនេះនឹងបន្តសកម្មភាពការងាររបស់ខ្លួន ដើម្បីឱ្យការរៀបចំកិច្ចប្រជុំនេះប្រព្រឹត្តទៅបានរលូន និងជោគជ័យ។
លោក លុយ ដាវីត បានប្រាប់ភ្នំពេញប៉ុស្ដិ៍កាលពីម្សិលមិញថា ក្រុមការងារនៃលេខាធិការដ្ឋាន គណៈកម្មាធិការជាតិរៀបចំកិច្ចប្រជុំកំពូលអាស៊ី-អឺរ៉ុប កំពុងបន្តរៀបចំកិច្ចប្រជុំកំពូលនេះ ដើម្បីឱ្យកិច្ចប្រជុំអាចដំណើរការទៅបានជាលក្ខណៈប្រជុំទល់មុខ (physical)។
លោកថ្លែងថា៖ «ចាប់ពីពេលនេះទៅ យើងត្រៀមលក្ខណៈរៀបចំកិច្ចប្រជុំនេះ ជាការប្រជុំទល់មុខ (physical)។ អ៊ីចឹងបានកិច្ចប្រជុំនេះត្រូវបានលើកពេល ២ ដងរួចមកហើយ ដើម្បីធ្វើម៉េចឱ្យកិច្ចប្រជុំដ៏ធំនេះរៀបចំដោយការប្រជុំទល់មុខគ្នាបាន។ ប៉ុន្ដែវាអាស្រ័យទៅលើស្ថានភាពកូវីដ ១៩ បើពេលទៅមុខតទៅស្ថានភាពជំងឺកូវីដ ១៩ មានស្ថានភាពធ្ងន់ធ្ងរមិនអនុញ្ញាតឱ្យយើងរៀបចំបាននោះគឺយើងមានជម្រើសរៀបចំកិច្ចប្រជុំនេះផ្សេងដែរ»។
កាលពីឆ្នាំ ២០២០ កម្ពុជាគ្រោងនឹងរៀបចំកិច្ចប្រជុំកំពូលអាស៊ី-អឺរ៉ុប លើកទី១៣ នៅខែឧសភាឬខែមិថុនា នាពាក់កណ្ដាលឆ្នាំ ២០២១ នេះ បន្ទាប់ពីធ្លាប់បានលើកពេលកិច្ចប្រជុំដែលគ្រោងធ្វើនៅពាក់កណ្តាលខែវិច្ឆិកា ឆ្នាំ ២០២០ ដោយសារតែវិបត្តិនៃជំងឺកូវីដ ១៩។
បើតាមលោក ដាវីត កម្ពុជាបានក្លាយជាសមាជិក ASEM កាលឆ្នាំ ២០០៤ និងត្រូវបានផ្តល់សេចក្តីទុកចិត្តឱ្យធ្វើជាម្ចាស់ផ្ទះនៃកិច្ចប្រជុំកំពូលលើកទី ១៣ នេះ។ កិច្ចប្រជុំនេះនឹងមានការចូលរួមពីថ្នាក់ដឹកនាំកំពូលនៃប្រទេសចំនួន ៥១ រួមនឹងស្ថាប័នចំនួន ២ គឺសហភាពអឺរ៉ុប និងលេខាធិការដ្ឋានអាស៊ានសរុបមានចំនួន ៥៣ ដែលជាដៃគូ ASEM ដែលចូលរួម។
លោកឱ្យដឹងថា ដើម្បីរៀបចំកិច្ចប្រជុំនេះ កម្ពុជាបានត្រៀមលក្ខណៈរួចរាល់ ក្នុងនោះបានសាងសង់មជ្ឈមណ្ឌល OCIC ស្ថិតនៅខណ្ឌជ្រោយចង្វារ ដែលបានសាងសង់រួចរាល់៕