ភ្នំពេញៈ ប្រមុខរាជរដ្ឋាភិបាល ឯកភាពលើលទ្ធផលរបស់ក្រុមការងារអន្តរក្រសួងចំពោះការចុះស្រាវជ្រាវករណីកាប់រាន ទន្ទ្រានកាន់កាប់ដីព្រៃខុសច្បាប់ក្នុងតំបន់ការពារធម្មជាតិក្នុងខេត្តមណ្ឌលគិរី ប៉ុន្តែនៅមិនទាន់ចេញប្រកាសឲ្យអនុវត្ដជាផ្លូវការនៅឡើយ ក្រោយពីរដ្ឋមន្ត្រីមហាផ្ទៃស្នើសុំបញ្ចប់មុខតំណែងមន្ត្រីមួយចំនួន។ នេះបើតាមអ្នកនាំពាក្យក្រសួងមហាផ្ទៃ កាលពីថ្ងៃទី ២០ កញ្ញា។
លោក ខៀវ សុភ័គ អ្នកនាំពាក្យក្រសួងមហាផ្ទៃប្រាប់ភ្នំពេញប៉ុស្ដិ៍ថា ក្រុមការងារអន្តរក្រសួងបានបំពេញការងារចុះសិក្សាស្រាវជ្រាវលើករណីការកាប់រាន ទន្ទ្រាន កាន់កាប់ដីព្រៃខុសច្បាប់ក្នុងតំបន់ ការពារធម្មជាតិ ស្ថិតក្នុងខេត្ដមណ្ឌលគិរី ប្រកបដោយតម្លាភាព សុចរិតភាព និងមានភ័ស្ថុតាង។
លោកថ្លែងថា៖ «យើងមានគោលការណ៍អស់ហើយ។ ប៉ុន្ដែនៅពេលណាយើងមិនទាន់ទទួលបានការអនុវត្ដប្រកាសឲ្យធ្វើ យើងក៏មិនអាចធ្វើការផ្សព្វផ្សាយជាសាធារណៈបានដែរ។ វាមិនមែនជាការលាក់កំបាំងអីទេ»។
លោក សុភ័គ បញ្ជាក់ថា៖ «យើងមានរួចហើយអ្វីៗដែលសម្ដេចនាយករដ្ឋមន្ដ្រី [ហ៊ុន សែន] ចាត់តាំងឲ្យចុះទៅស្រាវជ្រាវនោះគឺទទួលបានលទ្ធផលល្អប្រសើរ។ យើងបានរាយការណ៍ទៅប្រមុខរាជរដ្ឋាភិបាល ហើយលោកក៏បានឯកភាពតាមអ្វីដែលក្រុមការងារអន្តរក្រសួងបានធ្វើ»។
ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃលោក ស ខេង កាលពីថ្ងៃទី ២២ កក្កដា បានចេញសេចក្តីសម្រេចស្តីពី «ការបង្កើតក្រុមការងារអន្តរក្រសួងដើម្បីចុះសិក្សាស្រាវជ្រាវលើករណីការកាប់រាន ទន្ទ្រានកាន់កាប់ដីព្រៃខុសច្បាប់ក្នុងតំបន់ការពារធម្មជាតិក្នុងខេត្តមណ្ឌលគិរី»។ សេចក្ដីសម្រេចបង្កើតក្រុមការងារអន្តរក្រសួងនេះលោក ស ខេង បានយោងតាមចំណាររបស់លោកនាយករដ្ឋមន្ដ្រី ហ៊ុន សែន ចុះកាលពីថ្ងៃទី ៨ កក្កដា ២០២០។
តាមសេចក្ដីសម្រេចនេះលោក ស ខេង បានចាត់តាំងឲ្យលោកអង មង្គល រដ្ឋលេខាធិការក្រសួងមហាផ្ទៃធ្វើជាប្រធានក្រុមការងារអន្តរក្រសួង ដើម្បីចុះសិក្សាស្រាវជ្រាវលើករណីការកាប់រាន ទន្ទ្រាន កាន់កាប់ដីព្រៃខុសច្បាប់ក្នុងខេត្តមណ្ឌលគិរី។
លោក ស ខេង កាលពីថ្ងៃទី ៣០ ខែសីហា បានដាក់លិខិតទៅលោក ហ៊ុន សែន ដើម្បីពិនិត្យ និងសម្រេចលើលទ្ធផលរបស់ក្រុមការងារអន្តរក្រសួងចំពោះការចុះសិក្សាស្រាវជ្រាវករណីកាប់រាន ទន្ទ្រានកាន់កាប់ដីព្រៃខុសច្បាប់ក្នុងតំបន់ការពារធម្មជាតិក្នុងខេត្តមណ្ឌលគិរី ដោយបានស្នើសុំសម្រួលភារកិច្ចអភិបាលខេត្ដមណ្ឌលគិរី និងបញ្ចប់មុខតំណែងមន្ដ្រីចំនួន ៩ រូបទៀត។
លិខិតបញ្ជាក់ថា៖ «បន្ទាប់ពីបានស្ដាប់របាយការណ៍ក្រុមការងារស្រាវជ្រាវ អង្គប្រជុំយល់ឃើញថា ឯកឧត្ដម ស្វាយ សំអ៊ាង ពុំមានកំហុសធ្ងន់ធ្ងរដូចការចោទប្រកាន់នោះទេ ហើយសូមគោរពស្នើសុំសម្ដេច [ហ៊ុន សែន] រក្សាទុក ឯកឧត្ដម ស្វាយ សំអ៊ាង ជាអភិបាលខេត្ដដដែល ហើយធ្វើការអប់រំណែនាំឲ្យខិតខំបំពេញតួនាទី ភារកិច្ចតាមសិទ្ធិអំណាចដែលបានប្រគល់ឲ្យបានត្រឹមត្រូវ»។
លិខិតដដែលបញ្ជាក់ថា ចំពោះករណីសំណើសុំបញ្ចប់តំណែងលោក ណយ ស្រូន សមាជិកព្រឹទ្ធសភាភូមិភាគ ៨ អង្គប្រជុំយល់ឃើញថា លោក ណយ ស្រូន បានប្រើប្រាស់តួនាទី អំណាច និងឥទ្ធិពលរបស់ខ្លួនជាសមាជិកព្រឹទ្ធសភា ធ្វើការណែនាំដល់មន្ដ្រីមូលដ្ឋានឲ្យចុះហត្ថលេខាលើឯកសារដីធ្លីដែលពុំស្របច្បាប់។
លិខិតបន្ថែមថា៖ «លើមូលដ្ឋាននេះ អង្គប្រជុំគោរពស្នើសុំសម្ដេចវិបុលសេនាភក្ដី សាយ ឈុំ [ប្រធានព្រឹទ្ធសភា] ដើម្បីធ្វើការអប់រំណែនាំឯកឧត្ដម ណយ ស្រូន»។
លិខិតរបស់លោក ស ខេង បង្ហាញថាលោក ស៊ិន វណ្ណវុឌ្ឍ អភិបាលស្រុក កោះញែក លោក សុក សេរ៉ា នាយករងរដ្ឋបាលខេត្ដមណ្ឌលគិរីត្រូវបានក្រសួងមហាផ្ទៃស្នើសុំសម្រួលភារកិច្ចដោយឲ្យមកបម្រើការងារនៅក្រសួងមហាផ្ទៃវិញ។ ឯ លោក សៀក មុន្នី អភិបាលស្រុកអូររាំងត្រូវបានស្នើសុំឲ្យធ្វើការអប់រំណែនាំឲ្យបំពេញតួនាទីភារកិច្ចត្រឹមត្រូវតាមច្បាប់។
ក្រៅពីនេះ លោក ពឿប ពេ មេឃុំស្រែព្រះនៃស្រុកកែវសីមា លោកស្រី ថ្វាន់ ត្រែល មេឃុំសែនមនោរម្យនៃស្រុកអូររាំង និងលោក ប៊ុត សំអ៊ែល មេឃុំស្រែខ្ទុមនៃស្រុកកែវសីមា ត្រូវបានក្រសួងមហាផ្ទៃស្នើសុំដាក់ទណ្ឌកម្មវិន័យតាមច្បាប់ស្ដីពីការគ្រប់គ្រងរដ្ឋបាលឃុំ សង្កាត់។
បើយោងតាមលិខិតនេះក្រៅពីមន្ដ្រីខាងលើក៏នៅមានមន្ដ្រីពាក់ព័ន្ធមួយចំនួនទៀតត្រូវបានស្នើសុំទៅលោក ហ៊ុន សែន ដើម្បីពិនិត្យ និងសម្រេចផងដែរ។
លោក សុក សេរ៉ា នាយករងរដ្ឋបាលសាលាខេត្ដមណ្ឌលគិរីប្រាប់ភ្នំពេញប៉ុស្ដិ៍ពីសប្ដាហ៍មុនថា៖ «ខ្ញុំប្ដូរមកក្រសួងមហាផ្ទៃវិញហើយ ព្រោះតែបញ្ហាមួយចំនួន»។
លោក គ្រើង តុលា សកម្មជនការពារព្រៃឈើក្នុងខេត្តមណ្ឌលគិរីទទូចឲ្យមានការផ្លាស់ប្ដូរមន្ដ្រីជាន់ខ្ពស់នៃរដ្ឋបាលខេត្ដមណ្ឌលគិរី។
លោកថា៖ «ការកាប់បំផ្លាញព្រៃឈើ និងការទន្ទ្រានយកដីរដ្ឋក្នុងខេត្ដមណ្ឌលគិរីនេះមិនអាចកើតឡើងដោយគ្មានការចូលរួមពីថ្នាក់ដឹកនាំខេត្ដនោះទេ។ បើកាលណាយើងទុកមន្ដ្រីដែលមានទម្លាប់ប្រព្រឹត្តបែបនេះ ពួកគេនៅតែបន្តធ្វើថែមទៀតមិនអាចកែទម្លាប់បានទេ។ ដូច្នេះមានតែការផ្លាស់ប្ដូរទើបអាចថែរក្សាព្រៃឈើ»៕និងធនធានធម្មជាតិក្នុងខេត្តមណ្ឌលគិរី»៕
វីដេអូ៖