ភ្នំពេញៈ លោកនាយករដ្ឋមន្ត្រី ហ៊ុន សែន បានឯកភាពឱ្យលោក សៅ សុខា អគ្គមេបញ្ជាការកងរាជអាវុធលើផ្ទៃប្រទេស និងជាប្រធានគណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិចារឈ្មោះក្រុមឧក្រិដ្ឋជនព្រៃឈើនៅលើផ្ទាំងសិលា ជាអ្វីដែលមន្ត្រីអះអាងថា គឺដើម្បីទុកភ័ស្ដុតាងឲ្យក្មេងជំនាន់ក្រោយបានដឹងពីកិច្ចខិតខំរបស់រដ្ឋាភិបាលក្នុងការថែរក្សាព្រៃឈើនាពេលបច្ចុប្បន្ន។
កាលពីថ្ងៃទី ២០ ខែ សីហាឆ្នាំនេះ លោក ហ៊ុន សែន បានចារឯកភាពលើលិខិតស្នើសុំចំនួន ៥ ចំណុច ក្នុងចំណោមទាំង ៦ ចំណុច របស់លោក សៅ សុខា ដើម្បីធ្វើឱ្យវិធានការទប់ស្កាត់បទឧក្រិដ្ឋកម្មព្រៃឈើទទួលបានជោគជ័យយូរអង្វែង ក្នុងនោះមានចំណុចមួយគឺ លោក ហ៊ុនសែន បានយល់ព្រមឱ្យចារឈ្មោះឧក្រិដ្ឋជនព្រៃឈើនៅលើផ្ទាំងថ្ម។ នេះបើតាមលិខិតមួយដែលមានចុះហត្ថលេខាដោយលោក សៅ សុខា។
លិខិតស្នើសុំនោះ បញ្ជាក់ថា «(ត្រង់ចំណុចទី៦) ដើម្បីឃោសនា អប់រំ និងបង្ហាញពីការយកចិត្តទុកដាក់ក្នុងកិច្ចការពារព្រៃឈើរបស់រាជរដ្ឋាភិបាលព្រមទាំងបង្ការ ទប់ស្កាត់ការប្រព្រឹត្តបទល្មើសព្រៃឈើ ស្នើសុំចារឹកឈ្មោះឧក្រិដ្ឋជននៅលើផ្ទាំងសិលាដាក់តាំងនៅកន្លែងគំនររថយន្តដែលជាមធ្យោបាយបំផ្លាញព្រៃឈើ»។
លោក អេង ហ៊ី មន្ត្រីនាំពាក្យគណៈកម្មាធិការជាតិទប់ស្កាត់ និងបង្ក្រាបបទល្មើសធនធានធម្មជាតិបានប្រាប់ភ្នំពេញប៉ុស្ដិ៍ម្សិលមិញថា ការចារឈ្មោះឧក្រិដ្ឋជនព្រៃឈើលើផ្ទាំងថ្មនេះ គឺដើម្បីអប់រំដល់ក្មេងជំនាន់ក្រោយកុំឱ្យប្រព្រឹត្តបទឧក្រិដ្ឋព្រៃឈើ។ លោកថា៖ «ហើយក៏ជាការបង្ហាញពីឆន្ទៈរបស់រាជរដ្ឋាភិបាល ដែលធ្វើការការពារ និងទប់ស្កាត់ការបំផ្លិចបំផ្លាញព្រៃឈើ»។
ប៉ុន្តែលោកបន្តថា ការចារឈ្មោះអ្នកបំផ្លាញព្រៃឈើនេះមិនទាន់បានចាប់ផ្ដើមទេ។
ការយល់ព្រមឱ្យចារឈ្មោះឧក្រិដ្ឋជនព្រៃឈើលើផ្ទាំងថ្មពីសំណាក់ លោក ហ៊ុន សែន នេះ គឺបន្ទាប់ពីលោក សៅ សុខា បានដឹកនាំបង្ក្រាបបទល្មើសព្រៃឈើអស់ពេល ១ ខែកន្លះមកនេះ បានរកឃើញមានអ្នកពាក់ព័ន្ធជាច្រើននាក់។
នៅក្នុងប្រតិបត្តិការជាថ្មីនេះ អ្នកដែលត្រូវបានតុលាការកោះហៅសួរមានទាំងជនជាតិវៀតណាម ចិន និងមន្ត្រីរដ្ឋបាលព្រៃឈើ ហើយមួយចំនួនទៀតជាឧកញ៉ា ដូចជា ឧកញ៉ា ស្រ៊ុន ម៉េងលាង, ឧកញ៉ា តុប វីដា និងឧកញ៉ា វន់ ប៊ុនថៃ ខណៈឧកញ៉ា ស៊ឹង សំអុល និងឧកញ៉ា គង់ គ្រឹង ត្រូវបានចាប់ឃុំខ្លួន។
លោក ប៉ែន ប៊ុណ្ណារ៍ មន្ត្រីកម្មវិធីខាងសិទ្ធិដីធ្លី និងសិទ្ធិមនុស្សនៃអង្គការអាដហុកបានថ្លែងថា ប្រសិនបើប្រតិបត្តិការរកឃើញមនុស្សតែ ៤ ឬ ១០ នាក់ ហើយចារឈ្មោះពួកគេលើផ្ទាំងថ្មរឿងបំផ្លាញព្រៃឈើនោះ គឺនាំតែខ្មាសក្មេងជំនាន់ក្រោយទៅវិញទេ។
លោកបន្តថា បទល្មើសព្រៃឈើគឺបានប្រព្រឹត្តជាប្រព័ន្ធដោយសារអំពើពុករលួយ ហើយអ្នកត្រូវជាប់ឈ្មោះជាឧក្រិដ្ឋជនព្រៃឈើគឺមានច្រើនជាងនេះ។
លោកថា៖ «អ្នកពាក់ព័ន្ធ និងមន្ត្រីស៊ីសំណូកក៏មានមិនតិចដែរ ហើយត្រូវស៊ើបពីឆ្នាំ ២០០៤ មកវិញ ពីព្រោះអាជ្ញាយុកាល នៃការប្រព្រឹត្តបទឧក្រិដ្ឋព្រៃឈើមិនទាន់ផុតទេក្នុងរង្វង់ ១៥ ឆ្នាំ»។ នៅក្នុងលិខិតដដែល លោក ហ៊ុន សែន ក៏បានឯកភាពឱ្យលោក សៅ សុខា មោឃភាពនិងលុបចោលលិខិតបើកផ្លូវដឹកជញ្ជូនផល និងអនុផលព្រៃឈើចេញពីដីសម្បទាន និងលិខិតអនុញ្ញាតដឹកជញ្ជូនផល និងអនុផលព្រៃឈើទាំងអស់ផងដែរ ប៉ុន្តែបានឱ្យរៀបចំចេញលិខិតអនុញ្ញាតជាថ្មី ដើម្បីងាយស្រួលគ្រប់គ្រង។
បន្ថែមពីនេះលោក ហ៊ុន សែន បានឯកភាពឱ្យក្រសួងស្ថាប័នជំនាញត្រួតពិនិត្យ និងដកហូតសិទ្ធិពីក្រុមហ៊ុនដែលមិនគោរពច្បាប់កិច្ចសន្យា និងកិច្ចព្រមព្រៀង និងឯកភាពឱ្យបង្កកទ្រព្យបុគ្គលពាក់ព័ន្ធនឹងបទល្មើសព្រៃឈើបន្ថែមពីការផ្ដន្ទាទោស និងពិន័យជាទឹកប្រាក់។
ចំពោះលោក ឈើយ ឧត្តមរស្មី ប្រធានអង្គការការពារធនធានធម្មជាតិបានថ្លែងថា ដើម្បីបង្ក្រាបបទល្មើសព្រៃឈើ លោក សៅ សុខា មិនចាំបាច់ស្នើសុំចំណុចច្រើនយ៉ាងនេះទេ ប៉ុន្តែគួរអនុវត្តឱ្យបាននូវ ៤ ចំណុចដូចជា បញ្ឈប់ផ្ដល់លិខិតស្នាម និងអាជ្ញាប័ណ្ណនាំឈើទៅក្រៅប្រទេស ការអនុវត្តច្បាប់ បិទរោងចក្រ និងសិប្បកម្មអារ និងកែច្នៃឈើ បញ្ឈប់ផ្ដល់ដីសម្បទានឱ្យជនបរទេស និងការបិទច្រកព្រំដែនសំខាន់ៗក្នុងខេត្តរតនៈគិរី ក្រចេះ និងខេត្តត្បូងឃ្មុំ ដែលនាំឈើទៅប្រទេស វៀតណាម៕