.jpg)
រថយន្តដែលត្រូវបានគេរៀបចំត្រៀមសម្រាប់ដឹកវ៉ាក់សាំង នៅឯមន្ទីរពេទ្យព្រះកេតុមាលាកាលពីថ្ងៃម្សិលមិញ។ ហេង ជីវ័ន
ភ្នំពេញ៖ លោកនាយករដ្ឋមន្រ្តី ហ៊ុន សែន បានប្រកាសនៅថ្ងៃព្រហស្បតិ៍នេះថា វ៉ាក់សាំង ដែលជាជំនួយរបស់សាធារណរដ្ឋប្រជាមានិតចិន នឹងមកដល់ប្រទេសកម្ពុជានៅថ្ងៃទី ០៧ ខែ កុម្ភៈ ឆ្នាំ ២០២១ នេះ។
តាមរយៈសារជាសំឡេងរបស់លោក ហ៊ុន សែន បានថ្លែងថា ៖ «ជូនចំពោះក្រុមការងារវ៉ាក់សាំង ខ្ញុំបានទទួលព័ត៌មានពីបង ម៉ម ប៊ុនហេង ថាវ៉ាក់សាំងនឹងមកដល់ថ្ងៃទី ០៧ គឺថ្ងៃអាទិត្យនេះ ហើយដូចការប្រកាសរបស់ខ្ញុំកន្លងទៅ គឺខ្ញុំបានបញ្ជាក់ថា ពេលវ៉ាក់សាំងមកដល់ខ្ញុំនឹងទៅទទួល»។
លោក ហ៊ុន សែន ក៏បានបញ្ជាឱ្យក្រុមការងាររៀបចំកម្មវិធីទទួលវ៉ាក់សាំងនៅឯព្រលានយន្តហោះពោធិ៍ចិនតុងផងដែរ។
ការប្រកាសរបស់លោកនាយករដ្ឋមន្រ្តីធ្វើឡើងមួយថ្ងៃ បន្ទាប់ពីឯកអគ្គរដ្ឋទូតចិនប្រចាំកម្ពុជា លោក វ៉ាង វិនធាន បានថ្លែងកាលពីថ្ងៃពុធ ទី០៣ ខែកុម្ភៈ ក្នុងពិធីសំណេះសំណាលជាមួយគ្រូពេទ្យចាក់វ៉ាក់សាំងការពារជំងឺកូវីដ១៩ នៅមន្ទីរពេទ្យ ព្រះកេតុមាលា ថា វ៉ាក់សាំងកូវីដ ១៩ ដែលរដ្ឋាភិបាលប្រទេសចិនផ្តល់ជូនដល់ប្រទេសកម្ពុជាដំបូងចំនួន ៦០ ម៉ឺនដូសនឹងត្រូវដឹកតាមយន្តហោះពិសេសរបស់ប្រទេសចិន មកកាន់រាជធានីភ្នំពេញនៅចុងសប្តាហ៍នេះ។
គួរបញ្ជាក់ផងដែរថា រដ្ឋាភិបាលចិន បានសម្រេចផ្តល់ជំនួយវ៉ាក់សាំងបង្ការជំងឺកូវីដ១៩ ឈ្មោះ ស៊ីណូហ្វាម ចំនួន ១ លានដូស ដល់រាជរដ្ឋាភិបាលកម្ពុជា ដើម្បីចាក់ជូនប្រជាពលរដ្ឋដោយឥតគិតថ្លៃ។ វ៉ាក់សាំង ៦០ ម៉ឺនដូសនឹងត្រូវបញ្ជូនមកដល់មុនគេ ហើយក្រោយទៀតនឹងត្រូវបញ្ជូនជាបន្តបន្ទាប់៕
