.jpg)
នាយកវិទ្យុរិទ្ធិសែននៅសាលាដំបូងខេត្តកំពង់ឆ្នាំងកាលពីម្សិលមិញ។ សហការី
កំពង់ឆ្នាំង: នាយកស្ថានីយវិទ្យុរិទ្ធិសែន លោក សុខ ឧត្តម កាលពីម្សិលមិញបានចូលទៅបំភ្លឺនៅសាលាដំបូងខេត្តកំពង់ឆ្នាំង បន្ទាប់ពីមានដីកាកោះកាលពីថ្ងៃទី ៣ ខែ មេសា ឆ្នាំនេះ តាមបណ្ដឹងរបស់លោក លន់ ឡន មេការក្រុមហ៊ុនឧកញ៉ា សុខ ប៊ុន ដោយចោទពីបទ «ញុះញង់ និងបរិហារកេរ្ដិ៍ជាសាធារណៈ» រឿងផ្សព្វផ្សាយពីទំនាស់ដីធ្លីនៅស្រុករលាប្អៀរ កាលពីដើមខែមេសាឆ្នាំនេះ ប៉ុន្ដែតុលាការមិនបានឃាត់ខ្លួនទេ ។
លោក សុខ ឧត្តម ដែលរងការចោទប្រកាន់បានប្រាប់ភ្នំពេញប៉ុស្ដិ៍កាលពីម្សិលមិញថា លោក ឡុង ស៊ីថា ព្រះរាជអាជ្ញារងនៃសាលាដំបូងខេត្តកំពង់ឆ្នាំងបានអនុញ្ញាតឲ្យលោកត្រឡប់មកគេហដ្ឋានវិញ បន្ទាប់ពីសាកសួរជាង ២ ម៉ោង នៅថ្ងៃទី ៦ សីហា ជុំវិញបណ្ដឹងរបស់លោក លន់ ឡន មេការក្រុមហ៊ុនឧកញ៉ា សុខ ប៊ុន។
លោកបន្តថា ការប្ដឹងនេះ បន្ទាប់ពីលោកបានចុះយកព័ត៌មានរឿងទំនាស់ដីធ្លី ១ កន្លែងរវាងក្រុមហ៊ុនឧកញ៉ា សុខ ប៊ុន ដែលលោកថា មានចេតនាប្លន់យកដីពលរដ្ឋស្ថិតនៅឃុំស្វាយជ្រំ ស្រុករលាប្អៀរ ខេត្តកំពង់ឆ្នាំង។
នៅថ្ងៃទី ១ មេសា ឆ្នាំ ២០១៩ នោះ លោកបានផ្សាយថា៖ «ក្រុមហ៊ុនលោកឧកញ៉ា សុខ ប៊ុន កំពុងមានបំណងប្លន់យកដីប្រជារាស្ត្រ ដោយមិនមានការដោះស្រាយសំណងឲ្យបានសមរម្យជូនពួកគាត់»។
លោកថា៖ «តុលាការឲ្យខ្ញុំស្រាវជ្រាវរកឯកសារបន្ថែមទៀតដើម្បីដោះបន្ទុក ហើយនៅខែក្រោយនេះ តុលាការនឹងកោះហៅខ្ញុំទៅសួរម្ដងទៀត។ ឥឡូវនេះ ខ្ញុំកំពុងពិភាក្សាជាមួយមេធាវីខ្ញុំរកឯកសារពាក់ព័ន្ធផ្សេងៗទៀត»។
លោក ឈួន ស៊ីវិន អ្នកនាំពាក្យសាលាដំបូងខេត្តកំពង់ឆ្នាំងបានថ្លែងកាលពីម្សិលមិញថា លោកបានទទួលព័ត៌មាននេះហើយ ដោយលោក ឡុង ស៊ីថា ព្រះរាជអាជ្ញារងនៃសាលាដំបូងខេត្តកំពង់ឆ្នាំង ជាអ្នកសួរលោក សុខ ឧត្តម ស្ដីពីការញុះញង់ពលរដ្ឋឲ្យមកតវ៉ាជាមួយក្រុមហ៊ុន និងបរិហារកេរ្ដិ៍ក្រុមហ៊ុនជាសាធារណៈ។
លោកបញ្ជាក់ថា៖ «នៅព្រឹកថ្ងៃទី ៦ សីហា នេះ លោក ឡុង ស៊ីថា ព្រះរាជអាជ្ញារងជាអ្នកសាកសួរផ្ទាល់ ហើយពេលចង់អស់ហើយ ក៏អនុញ្ញាតឲ្យលោក សុខ ឧត្តម ត្រឡប់ផ្ទះវិញ គឺអត់មានឃាត់គាត់ទេ ប៉ុន្ដែខ្ញុំមិនទាន់ដឹងពីនីតិវិធីសាកសួរជុំវិញរឿងហ្នឹងទេ»។
លោក ម៉ម ឈឿម ប្រធានមន្ទីរព័ត៌មានខេត្តកំពង់ឆ្នាំង បានថ្លែងថា លោកបានទទួលព័ត៌មាននេះ ប៉ុន្ដែមិនបានទៅតាមដានសាច់រឿងច្បាស់លាស់ទេ «ខ្ញុំអត់ដឹងរឿងហ្នឹងច្បាស់ទេ ប៉ុន្ដែស្ថានីយវិទ្យុរិទ្ធិសែនរបស់លោក សុខ ឧត្តម គាត់បានសុំច្បាប់ត្រឹមត្រូវតាមច្បាប់ហើយ»។
ចំណែក លោក ឈៀង វណ្ណៈ អនុប្រធានមន្ទីរព័ត៌មាន ខេត្តកំពង់ឆ្នាំង បានថ្លែងថា លោកបានទៅស៊ើបអង្កេតដល់តុលាការខេត្តនោះ តែមិនឃើញមានការគំរាមកំហែងឬចាប់ខ្លួនលោក សុខ ឧត្តម ទេ។ ពេលសាកសួររួចតុលាការបានក៏អនុញ្ញាតឲ្យលោកសុខឧត្តមត្រឡប់មកផ្ទះវិញ។
លោកថា៖ «គេប្ដឹងគាត់ រឿងគាត់ចុះយកព័ត៌មានពីបញ្ហាទំនាស់ដីធ្លីនៅស្រុករលាប្អៀរ ប៉ុន្ដែសាច់រឿងលម្អិតខ្ញុំដឹងមិនច្បាស់ទេ។ មិនមានអ្វីគួរឲ្យបារម្ភទេតុលាការគ្រាន់តែហៅសួរនាំតិចតួចទេ»។
លោក លន់ ឡន មេការក្រុមហ៊ុនឧកញ៉ា សុខ ប៊ុន ជាដើមបណ្ដឹងមិនអាចស្វែងរកប្រភពដើម្បីបញ្ជាក់ជុំវិញសំណុំរឿងនេះទេកាលពីម្សិលមិញ។ប៉ុន្ដែតាមសារព័ត៌មានក្នុងស្រុកមួយបានចុះផ្សាយកាលពីម្សិលមិញថា មេការរបស់ឧកញ៉ា សុខ ប៊ុន បានប្តឹងទាមទារប្រាក់ចំនួន ៥ ម៉ឺនដុល្លារអាមេរិក ប្ដឹងទាមទារឃាត់ខ្លួន ឬឃុំខ្លួនតាមផ្លូវច្បាប់ និងសុំផ្ដន្ទាទោសតាមផ្លូវច្បាប់។
លោក សំ ច័ន្ទគា មន្ត្រីសម្របសម្រួលនៃសមាគមការពារសិទ្ធិមនុស្សអាដហុក (ADHOC) ប្រចាំខេត្តកំពង់ឆ្នាំង និងពោធិ៍សាត់ បានថ្លែងថា ចំណាត់ការរបស់តុលាការនេះគឺបានរំលោភលើច្បាប់ស្ដីពីរបបសារព័ត៌មាន។ តុលាការគួរបង្គាប់ឲ្យភាគីដើមបណ្ដឹងសរសេរលិខិត ឬស្នើឲ្យភាគីសារព័ត៌មានកែតម្រូវឬរកភ័ស្ដុតាងបន្ថែម ប្រសិនបើអ្នកសារព័ត៌មាននោះផ្សាយព័ត៌មានមិនពិតមែន។
លោកថា៖ «មុនប្ដឹងទៅតុលាការ ភាគីដើមបណ្ដឹង គួរសរសេរលិខិត ឬស្នើសុំកែតម្រូវព័ត៌មាន ប្រសិនបើគាត់គិតថា មិនសុខចិត្ត ឬខុសកន្លែងណាមួយ ហើយបើអាច ភាគីដើមបណ្ដឹងត្រូវចេញមុខបកស្រាយ មិនគួរប្ដឹងអ្នកសារព័ត៌មានទៅតុលាការអ៊ីចឹងទេ ព្រោះពួកគាត់គ្រាន់តែជាអ្នកនាំសារប៉ុណ្ណោះ»។
លោកបានបន្ថែមថា ពលរដ្ឋនៅឃុំស្វាយជ្រំ ស្រុករលាប្អៀរ ខេត្តកំពង់ឆ្នាំងពិតជាមានទំនាស់ដីធ្លីប្រាកដមែន ហើយគណៈកម្មការដោះស្រាយទំនាស់ដីធ្លីនៅតំបន់នោះក៏បានចុះទៅដោះស្រាយដែរ ប៉ុន្ដែលោកមិនទាន់បានទទួលដំណឹងអ្វីបន្ថែមទៀតទេ។
ទោះយ៉ាងណា លោក សុខ ឧត្តម ដែលចុះទៅយកព័ត៌មានផ្ទាល់ទីនោះបានថ្លែងថា លោកបានផ្សព្វផ្សាយដោយឡាយវីដេអូផ្ទាល់ នៅពេលពលរដ្ឋជួបជុំគ្នានៅលើដីមានទំនាស់ នោះ ។
ពលរដ្ឋបានលើកឡើងថា ក្រុមហ៊ុនលោកឧកញ៉ា សុខ ប៊ុន ដែលមានលោក លន់ ឡន ជាមេការបានរំលោភបំពានលើដីរបស់ពួកគាត់ចំនួន ៣០ គ្រួសារ និងបានឈូសឆាយដីព្រៃលិចទឹករបស់រដ្ឋ ជិត ២ ពាន់ហិកតាទៀតផង៕
