The Phnom Penh Post Search

Search form

Logo of Phnom Penh Post newspaper Phnom Penh Post - នាយក​អង្គការ​អំពាវនាវ​ឲ្យ​គិតគូរ​ពី​ជនពិការ​ ដើម្បី​ទាក់ទាញ​ការ​គាំទ្រ

នាយក​អង្គការ​អំពាវនាវ​ឲ្យ​គិតគូរ​ពី​ជនពិការ​ ដើម្បី​ទាក់ទាញ​ការ​គាំទ្រ

Content image - Phnom Penh Post
ជនពិការ​កម្ពុជា​ក្នុង​ពេល​ជួបជុំ​ប្រចាំ​ឆ្នាំ​នៅ​ភ្នំពេញ​កាលពី​ម្សិលមិញ។ ហេង ជីវ័ន

នាយក​អង្គការ​អំពាវនាវ​ឲ្យ​គិតគូរ​ពី​ជនពិការ​ ដើម្បី​ទាក់ទាញ​ការ​គាំទ្រ

ភ្នំពេញៈ នាយក​អង្គការ​ជនពិការ​កម្ពុជា​អំពាវនាវ​ឱ្យ​គណបក្ស​នយោបាយ​ទាំងអស់​ជាពិសេស​គណបក្ស​ជាប់​ឆ្នោត​គិតគូរ​ពី​គោល​នយោបាយ​ផ្ដល់​ប្រយោជន៍​ដល់​ជនពិការ​ដើម្បី​ទាក់ទាញ​សន្លឹក​ឆ្នោត​​ពី​ពួកគាត់​ហើយ​​លោក​បាន​ស្នើឱ្យ គជប ផ្តល់​ទិន្នន័យ​ជនពិការ​ដែល​បាន​ចុះ​ឈ្មោះ និង​បង្ក​លក្ខណៈ​ងាយស្រួល​​បន្ថែម​ទៀត​។

ការ​អំពាវនាវ​នេះ​ធ្វើ​ឡើង​ក្នុង​កិច្ចប្រជុំ​បណ្តា​អង្គការ​ជនពិការ​ថ្នាក់​ជាតិ​ប្រចាំ​ឆ្នាំ​នៅ​រាជធានី​ភ្នំពេញ​កាលពី​ម្សិលមិញ​ដោយ​មាន​​ជនពិការ​ប្រមាណ​ ៧០ ​នាក់​ចូលរួម​ចែក​រំលែក​បទពិសោធ​ស្តីពី​ការ​ចុះ​ឈ្មោះ​បោះឆ្នោត​ឃុំ​សង្កាត់​ចំណេះដឹង​ព័ត៌មាន និង​អ្នក​ពាក់ព័ន្ធ​រួម​ទាំង​រដ្ឋាភិបាល​ជា​ដៃគូ​អភិវឌ្ឍន៍។

នាយក​ប្រតិបត្តិ​នៃ​អង្គការ​ជនពិការ​កម្ពុជា​លោក ងិន សៅរ័ត្ន ថ្លែង​ថា​គណបក្ស​គួរ​ងាក​មក​គិតគូរ​ពី​គោល​នយោបាយ​ដែល​អាច​ទាក់ទាញ​សន្លឹក​ឆ្នោត​ពី​ជនពិការ​។​

លោក​ថា៖ ​«ធ្វើ​យ៉ាង​ម៉េច​សុំ​ឱ្យ​គណបក្សនយោបាយ​ទាំងអស់​សន្យា​ថា​នៅ​ពេល​ជាប់​ឆ្នោត​គាត់​ត្រូវ​តែ​មាន​គោលនយោបាយ​សមស្រប ឬ​បន្ត​អនុវត្ត​ច្បាប់​ដើម្បី​ធានា​ឱ្យ​សិទ្ធិ​ជនពិការ​អ៊ីចឹង​ខ្ញុំ​ជឿ​ជាក់​ថា​គណបក្ស​នោះ​នឹង​អាច​ទាក់ទាញ​សំឡេង​ឆ្នោត​ពី​បងប្អូន​ជនពិការ​បាន​ច្រើន​ប្រសិន​បើ..​.មិន​បាន​យក​ចិត្ត​ទុក​ដាក់​ទេ​មាន​ន័យ​ថា​គាត់​កំពុង​បំភ្លេច​ចោល​សំឡេង​ជនពិការ និង​បំភេ្លច​សំឡេង​ឆ្នោត​របស់​ខ្លួន​ផង​ដែរ»។

លោក​ក៏​បាន​ស្នើ​ឱ្យ​ គជប បង្កើន​កិច្ចសហប្រតិបត្តិការ​ជាមួយ​អង្គការ​ជនពិការ​ដើម្បី​អាច​សម្រួល​ដល់​ជនពិការ​ក្នុង​ការ​ចុះ​ឈ្មោះ​ ឬ​ទៅ​បោះឆ្នោត​។

លោក​ថា៖ «ជាពិសេស គជប គួរ​ពិចារណា​កែ​ច្បាប់​បោះឆ្នោត​មួយ​ចំនួន​ដែល​មាន​ការ​រើសអើង​ដល់​ជនពិការ​ដើម្បី​ធ្វើ​យ៉ាង​ម៉េច​ឱ្យ​បងប្អូន​ជនពិការ​បាន​ចូលរួម​បោះឆ្នោត ឬ​ គជប អាច​មាន​ទិន្នន័យ​ពិតប្រាកដ​ទាក់ទង​ជនពិការ»​។ ​

លោក​ថា៖ ​«ទិន្នន័យ​នៅ​តែ​ជា​ក្តី​កង្វល់​ដែល​ គជប មិន​ទាន់​ផ្តល់​ឱ្យ​ព្រោះ​បើ​យើង​ដឹង​ទិន្នន័យ​ច្បាស់លាស់​នៅ​ក្នុង​ស្ថានីយ​មួយ​វា​ងាយ​ស្រួល​ដល់​យើង​ក្នុង​ការ​ជួយ​ពួកគាត់​ឧទាហរណ៍​ស្ថានីយ «ក» មាន​ជនពិការ​ជិះ​រទេះ​ប៉ុន្មាន​នាក់​ ពិការ​ភ្នែក ថ្លង់​ ពិការ​ដៃ​ប៉ុន្មាន​អ៊ីចឹង​យើង​អាច​រៀបចំ​ឧបករណ៍​ជួយ​ពួកគាត់»។

អគ្គលេខាធិការរង គជប លោក សោម សូរីដា ថា គជប នឹង​ខិតខំ​បន្ថែម​ទៀត​ដើម្បី​បង្ក​ភាព​ងាយស្រួល​ដល់​ជនពិការ។ ​
លោក​ថា៖ ​«បច្ចុប្បន្ន​ជនពិការ​មាន​អាទិភាព​ពិសេស​ជាង​ពលរដ្ឋ​ធម្មតា​គឺ​ គជប យក​ចិត្ត​ទុកដាក់​ជា​ពិសេស​គឺ​ជនពិការ​ទទួល​បាន​អាទិភាព​ទី​មួយ​អនុញ្ញាត​ឱ្យ​ចុះ​ឈ្មោះ​បោះឆ្នោត​មុន​គេ​តែ​សង់​ជម្រាល​អាស្រ័យ​លើ​ថវិកា​ដែល គជប មាន អ៊ីចឹង​កន្លែង​ណា​មាន​ជនពិការ​ គជប ស្នើ​សុំ​ឱ្យ​អាជ្ញាធរ និង​ក្រុម​ការងារ​បោះឆ្នោត​បង្ក​ភាព​ងាយស្រួល​ដល់​គាត់»​។

បើ​តាម​លោក សោម សូរីដា ជនពិការ​ដៃ​ម្ខាង និង​សង​ខាង​មាន​ចំនួន​ ៨៥០២ ​នាក់​ប៉ុន្តែ​​អ្នក​ពិការ​ភ្នែក ថ្លង់ គ មិន​ទាន់​មាន​ទិន្នន័យ​នៅ​ឡើយ​ទេ។ លោក​យល់​ស្រប​ថា​គណបក្ស​នយោបាយ​គួរ​គិត​ពី​​ផលប្រយោជន៍​ជនពិការ​។

លោក​ថា៖ «ព្រោះ​សំឡេង​របស់​ជនពិការ​ក៏​ជា​សំឡេង​មួយ​បូក​ជាមួយ​ចំនួន​សំឡេង​ឆ្នោត​ដែល​គណបក្ស​នីមួយៗ​​ទទួល​យក​បាន​ និង​បំពេញ​អាសនៈ​ដែល​អាច​ទទួល​បាន​អ៊ីចឹង​បើ​មាន​ការ​យក​ចិត្ត​ទុក​ដាក់​លើ​ជនពិការ​បក្ស​នោះ​នឹង​កើន​សំឡេង​ឆ្នោត»។

រដ្ឋលេខាធិការ​នៃ​ក្រសួង​សង្គមកិច្ច​អតីត​យុវជន​លោក សែម សុខា សង្កេត​ឃើញ​ថា​ជនពិការ​បាន​ទៅ​ចុះ​ឈ្មោះ​បោះឆ្នោត​ច្រើន​ជាង​អាណត្តិ​មុន​ខណៈ​លោក​ថា គជប លើក​នេះ​រៀបចំ​បាន​ប្រសើរ។

លោក​ថា៖ «ខ្ញុំ​គិត​ថា...​មាន​ការ​សំណូម​របស់​អង្គការ CDPO គឺ គជប រៀបចំ​ការ​បោះឆ្នោត​បាន​ល្អ​មាន​ការ​សម្រួល​ច្រើន​អ៊ីចឹង​ខ្ញុំ​គិត​ថា​ជនពិការ​បាន​ទៅ​ចុះ​ឈ្មោះ​បោះឆ្នោត​ច្រើន​ជា​អាណត្ដិ​មុន»។ បើ​តាម​លោក សែម សុខា ជនពិការ​ទូទាំង​ប្រទេស​មាន​ ៥០ ម៉ឺន​នាក់​នៅ​ឆ្នាំ ២០១៤។

អ្នកនាង សៀង សុខច័ន្ទ អាយុ​ ៣៤ ​ឆ្នាំ​ដែល​ពិការ​ជើង​ទាំង​ពីរ​រស់នៅ​ខេត្ត​បាត់ដំបង​ដែល​បាន​ទៅ​ចុះ​ឈ្មោះ​បោះឆ្នោត​កាល​ពី​ថ្ងៃ​ទី ២៥ ខែ​តុលា ថ្លែង​ថា​បញ្ហា​ប្រឈម​របស់​គាត់​គឺ​សាលា​ឃុំ​ពុំ​មាន​ជម្រាល​សម្រាប់​ជនពិការ​ និង​បង្កាន់​ផង​ដែរ។

អ្នកនាង​ថា៖ «សាលា​ឃុំ​ពិបាក​ធ្វើ​ដំណើរ​ដោយសារ​អត់​មាន​ជម្រាល​ឯ​កាំជណ្តើរ​ចង់​ ២០ ​កាំ​ហើយ​នៅ​ប៉ុស្តិ៍​ប៉ូលិស​គឺ​មាន​ជង្ហុក​ច្រើន​ហើយ​កន្លែង​ខ្លះ​ចាក់​បេតុង​ខ្ពស់​អត់​មាន​បង្កាន់​ដៃ​តោង​ទេ»។

ទោះ​យ៉ាង​ណា​អ្នកនាង​ថា​មន្ត្រី គជប និង​អាជ្ញាធរ​ដែនដី​បាន​សម្រួល​ដល់​អ្នកនាង​ច្រើន​នៅ​ពេល​ទៅ​ចុះ​ឈ្មោះ​បោះឆ្នោត​ខណៈ​អ្នក​នាង​អំពាវនាវ​បន្ថែម​ទៅ​លើ​ការ​សាងសង់​ជម្រាល​បង្កាន់​ដៃ ឬ​ដាក់​ហឹប​ឆ្នោត​ឱ្យ​ទាប​បន្ថិច​សម្រាប់​ជនពិការ៕

អត្ថបទគួរចាប់អារម្មណ៍