ភ្នំពេញ៖ នាយកអង្គការសុខភាពពិភព លោក WHO ប្រចាំតំបន់អាស៊ីប៉ាស៊ីហ្វិកលោក Takeshi Kasai បានផ្ញើលិខិតជូនលោកនាយករដ្ឋមន្ត្រី ហ៊ុន សែន ដោយបានចូលរួមចែករំលែកនូវក្ដីព្រួយបារម្ភជាមួយកម្ពុជាអំពីស្ថានភាពនៃការផ្ទុះឡើងដ៏អាក្រក់បំផុតមិនធ្លាប់មាននៃជំងឺកូវីដ ១៩ និងបានប្តេជ្ញាចិត្តឈរនៅជាមួយកម្ពុជា ដើម្បីប្រយុទ្ធនឹងជំងឺនេះផងដែរ។
នៅក្នុងលិខិតផ្ញើជូនលោកនាយករដ្ឋមន្ត្រី ហ៊ុន សែន ចុះថ្ងៃទី ៩ មេសា លោក Takeshi Kasai បានលើកឡើងថា អំឡុងពេលនៃការរាតត្បាតនៃជំងឺកូវីដ ១៩ ប្រទេសជាច្រើនបានប្រឈមនឹងពេលវេលាដ៏លំបាក ដូចនេះហើយមានតែការដឹកនាំ និងលទ្ធភាពនៅក្នុងការធ្វើសេចក្តីសម្រេចចិត្តដ៏លំបាកនោះទេ ដែលបានផ្តល់ជាមគ្គុទ្ទេសក៍ដល់ប្រទេសទាំងនោះឱ្យឆ្លងផុតពេលវេលាដ៏លំបាកទាំងនោះបាន។
លោកបន្តថា បុណ្យចូលឆ្នាំខ្មែរ គឺជាថ្ងៃឈប់សម្រាកដ៏សំខាន់មួយនៅក្នុងវប្បធម៌ខ្មែរ ដែលជាឱកាសមួយនាំឱ្យគ្រួសារបានជួបជុំគ្នា ហើយឆ្លុះបញ្ចាំងពីឆ្នាំចាស់ ដែលបានកន្លងផុតទៅ ក៏ដូចជាអបអរក្តីសង្ឃឹមរបស់ប្រជាជនកម្ពុជាសម្រាប់ឆ្នាំថ្មីខាងមុខ។
លោក Takeshi Kasai ថ្លែងថា៖ «ទោះជាយ៉ាងណាក៏ដោយដូចដែលយើងបានឃើញកើតឡើងនៅបណ្តាប្រទេសដទៃទៀត ការប្រារព្ធពិធីបែបនេះ មានហានិភ័យខ្ពស់ក្នុងការចម្លងវីរុស នៅទូទាំងប្រទេស។ ហានិភ័យ គឺកាន់តែធ្ងន់ធ្ងរទៅទៀត នៅពេលដែលមានវត្តមាន និងការចរាចររបស់វីរុសបំប្លែងថ្មី B.1.1.7»។
បើតាមលោក Takeshi Kasai អង្គការសុខភាពពិភពលោកបានកោតសរសើរចំពោះការសម្រេចចិត្តដ៏ខ្ពង់ខ្ពស់របស់លោកនាយករដ្ឋមន្ត្រី ហ៊ុន សែន ដោយផ្អែកលើការវាយតម្លៃអំពីហានិភ័យក្នុងការរឹតបន្ដឹងការធ្វើចរាចរណ៍ឆ្លងរាជធានី-ខេត្ត។ នោះគឺជាវិធានការគន្លឹះមួយក្នុងការកាត់បន្ថយហានិភ័យ និងការពារប្រទេសកម្ពុជា។ វិធានការមួយនេះ រួមជាមួយនឹងវិធានការសុខភាពសាធារណៈដទៃទៀត នឹងមានតួនាទីសំខាន់នៅក្នុងការទប់ស្កាត់ការរីករាលដាលនៃមេរោគ ជាពិសេសក្នុងអំឡុងពេលប្រារព្ធពិធីបុណ្យចូលឆ្នាំថ្មី។
លោកថ្លែងថា៖ «ខ្ញុំយល់ថា ទាំងនេះមិនមែនជាការធ្វើសេចក្តីសម្រេចចិត្តងាយស្រួលនោះទេ។ ជាធម្មតាប្រជាជននៅទូទាំងពិភពលោករួមទាំងនៅកម្ពុជាផង គឺតែងតែនឿយណាយនឹងការរឹតបន្ដឹងនានា»។
លោក Takeshi Kasai សម្តែងការស្តាយចំពោះការរីករាលដាលនៃវីរុសនេះ ដែលនឹងបន្តហួសពីពិធីបុណ្យចូលឆ្នាំខ្មែរទៅទៀត។ ជាការពិតប្រហែលជាអាចមានសេចក្តីសម្រេចចិត្តដ៏លំបាកជាច្រើនទៀត ដែលត្រូវធ្វើនៅក្នុងរយៈពេលប៉ុន្មានខែទៅមុខទៀត ដើម្បីបញ្ឈប់ការផ្ទុះឡើងនៃជំងឺកូវីដ ១៩ នេះ ប្រកបដោយប្រសិទ្ធភាព។ កម្ពុជាមិនប្រឈមនឹងការលំបាកនេះតែម្នាក់ឯងនោះទេ អង្គការសុខភាពពិភពលោកឈរនៅជាមួយកម្ពុជាជានិច្ច ហើយនឹងបន្តផ្តល់ការគាំទ្រផ្នែកគោលនយោបាយ បច្ចេកទេស និង ប្រតិបត្តិការដល់ក្រសួងសុខាភិបាល និងរាជរដ្ឋាភិបាលកម្ពុជា។
ជាការឆ្លើយតបនឹងលោក Takeshi Kasai នៅថ្ងៃទី ១២ មេសានេះ លោកនាយករដ្ឋមន្ត្រី ហ៊ុន សែន បានចេញលិខិតបង្ហាញនូវក្តីរីករាយចំពោះការលើកទឹកចិត្តពីតំណាងអង្គការ WHO នេះផងដែរ។
នៅក្នុងសារលិខិតឆ្លើយតបនេះ លោកនាយករដ្ឋមន្ត្រី ហ៊ុន សែន បានបញ្ជាក់ថា៖ «ខ្ញុំមានសេចក្តីរីករាយ និងត្រូវបានលើកទឹកចិត្ត ដោយបានទទួលសារលិខិតរបស់លោកវេជ្ជបណ្ឌិត ចុះថ្ងៃទី ០៩ ខែ មេសា ឆ្នាំ ២០២១ ដែលបានលើកឡើងពីការប្តេជ្ញាចិត្តជាថ្មីរបស់អង្គការសុខភាពពិភពលោកគាំទ្រដល់កិច្ចខិតខំប្រឹងប្រែងប្រកបដោយចីរភាពរបស់កម្ពុជាក្នុងការទប់ស្កាត់ការរីករាលដាលជំងឺកូវីដ ១៩»។
លោកបានបន្តថា៖ «ខណៈពេលដែលប្រទេសកម្ពុជា បានរួចផុតពីការរីករាលដាលនៃជំងឺកូវីដ ១៩ កាលពីឆ្នាំមុន នៅក្នុងឆ្នាំនេះ យើងខ្ញុំមិនមានភ័ព្វសំណាងណាស់នោះទេ ដោយបច្ចុប្បន្ននេះ យើងខ្ញុំកំពុងប្រឈមនឹងការឆ្លងរីករាលដាលនៃវីរុសកូរ៉ូណានាំចូលប្រភេទថ្មីក្នុងសហគមន៍ ដែលជាអកុសលបានធ្វើឱ្យចំនួននៃការបាត់បង់អាយុជីវិតមនុស្សមានការកើនឡើង»។
លោកនាយករដ្ឋមន្ត្រីបានបន្ថែមថា នៅចំពោះមុខគ្រោះអាសន្នដ៏ធ្ងន់ធ្ងរនៃសុខភាពសាធារណៈ នាពេលបច្ចុប្បន្ននេះ រាជរដ្ឋាភិបាលកម្ពុជា ត្រូវបង្ខំចិត្តជ្រើសយកការសម្រេចចិត្តដ៏លំបាកក្នុងការបិទតំបន់ដែលទទួលរងផលប៉ះពាល់ និងដាក់វិធានការរឹតត្បិតការធ្វើដំណើរដ៏តឹងរ៉ឹង រួមជាមួយនឹងវិធានការផ្សេងៗទៀត ដើម្បីទប់ស្កាត់ការរីករាលដាលនៃការផ្ទុះជំងឺនេះ។
លោកបានបន្ថែមថា៖ «វិធានការអស់ទាំងនេះមានភាពចាំបាច់ក្នុងការធានាសង្គ្រោះជីវិត សុវត្ថិភាពសុខភាពសាធារណៈ សុខុមាលភាពរបស់ប្រជាជន និងការវិលត្រឡប់ទៅរកភាពធម្មតាវិញនៃជីវិតរស់នៅឱ្យបានឆាប់។ កម្ពុជា គឺជាប្រទេសដែលគាំទ្រយ៉ាងខ្លាំងក្លាចំពោះពហុភាគីនិយម ហើយយើងខ្ញុំសូមកោតសរសើរចំពោះតួនាទីឈានមុខរបស់អង្គការសុខភាពពិភពលោក ក្នុងការប្រយុទ្ធប្រឆាំងនឹងជំងឺរាតត្បាតជាសកលនាពេលបច្ចុប្បន្ននេះ"។
ជាមួយគ្នានេះ លោកក៏បានថ្លែងអំណរគុណយ៉ាងជ្រាលជ្រៅចំពោះជំនួយដ៏មានតម្លៃដែលផ្តល់ដោយ WHO ក្នុងអំឡុងពេលនៃវិបត្តិដ៏លំបាកនេះ៕