ភ្នំពេញៈ លោកនាយករដ្ឋមន្ត្រី ហ៊ុន សែន បាន ថ្លែងថា បើអាចធ្វើទៅបាន គួរតែមានបណ្ណាល័យ នៅគ្រប់ពន្ធនាគារទាំងអស់ នៅទូទាំងប្រទេស ដើម្បីបង្កើនចំណេះដឹងដល់អ្នកទោស ខណៈដែលអង្គការក្រៅរដ្ឋាភិបាលមួយ បានសាងសង់បណ្ណាល័យរួចហើយ នៅតាមពន្ធនាគារមួយចំនួន និងកំពុងបន្តសាងសង់ នៅតាមពន្ធនាគារផ្សេងទៀត។
លោកនាយករដ្ឋមន្ត្រី បានថ្លែងកាលពីម្សិលមិញ ក្នុងពិធីប្រគល់សញ្ញាបត្រ ដល់និស្សិតនៃសាកលវិទ្យាល័យជាតិគ្រប់គ្រង នៅកោះពេជ្រថា វាជារឿងមួយល្អ ប្រសិនបើមានការរៀបចំឲ្យមានបណ្ណាល័យ នៅក្នុងពន្ធនាគារដើម្បីឲ្យអ្នកទោស បានអាន និងទទួលនូវចំណេះដឹងផ្សេងៗបន្ថែមទៀត ពីព្រោះបើទោះបីជាពួកគេ ជាអ្នកទោសក៏ដោយ ក៏ពួកគេអាចអានដូចប្រជាពលរដ្ឋដទៃទៀតផងដែរ។ លោក ហ៊ុន សែន បានថ្លែងថា៖«ទោះបីពួកគេជាអ្នកទោស ប៉ុន្តែពួកគេបានអាន បានយល់ បានដឹង នៅពេលដែលពួកគេរួចពីទោស គេក៏បានទទួលចំណេះដឹងនៅពេលដែលពួកគេនៅក្នុងពន្ធនាគារ»។
លោក កុយ ប៊ុនសន អគ្គនាយកនៃអគ្គនាយកដ្ឋានពន្ធនាគារ នៃក្រសួងមហាផ្ទៃ បានថ្លែងពីថ្ងៃម្សិលមិញថា នាយកដ្ឋានរបស់លោកបានសហការ ជាមួយអង្គការស៊ីប៉ា (SIPAR) ដើម្បីបង្កើតបណ្ណាល័យ សម្រាប់តម្កល់សៀវភៅទុកនៅក្នុងពន្ធនាគារចំនួនប្រហែល ១០ កន្លែង ហើយពួកគេ គ្រោងនឹងបង្កើតបណ្ណាល័យ នៅក្នុងពន្ធនាគារទូទាំងប្រទេសថែមទៀត។ លោកបានបន្តថា៖«បណ្ណាល័យ គឺមិនត្រឹមតែសម្រាប់ពលរដ្ឋធម្មតាប៉ុណ្ណោះទេ តែវាមានសារៈសំខាន់ផងដែរ ចំពោះអ្នកទោស ដែលអាចឲ្យពួកគេអាន និងស្រូបយកចំណេះដឹង ពីអ្វីដែលពួកគេចង់ដឹង នៅពេលពួកគេជាប់ឃុំនៅក្នុងពន្ធនាគារ»។
បើតាម លោក កុយ ប៊ុនសន បច្ចុប្បន្ន ប្រទេសកម្ពុជា មានអ្នកទោសសរុប ចំនួន ១៥ ០០០ នាក់ និងមានពន្ធនាគារចំនួន ២៧ កន្លែង នៅក្នុងខេត្ត-ក្រុងចំនួន ២៣ ហើយគ្រោងសាងសង់ពន្ធនាគារចំនួន ២ បន្ថែមទៀត។ លោក កុយ ប៊ុនសន បានថ្លែងថា៖«ដើម្បីបង្កើតបណ្ណាល័យនៅក្នុងពន្ធនាគារ យើងត្រូវបន្តធ្វើការជាមួយអង្គការ SIPAR ដើម្បីធ្វើឲ្យមានបណ្ណាល័យ នៅគ្រប់ពន្ធនាគារទាំងអស់ បន្ទាប់ពីយើងបានចុះហត្ថលេខា លើអនុស្សរណៈនៃការយោគយល់គ្នា ជាមួយអង្គការនេះ»។
កាលពីខែមេសា អង្គការ SIPAR បានចុះហត្ថលេខា លើអនុស្សរណៈនៃការយោគយល់គ្នា ជាមួយក្រសួងមហាផ្ទៃ ដើម្បីប្រតិបត្តិការ លើគម្រោងបង្កើតបណ្ណាល័យ នៅក្នុងពន្ធនាគារ ទាំងអស់ ដែលគម្រោងនេះ មានរយៈពេលបីឆ្នាំ គឺចាប់ពីខែមករា ឆ្នាំ២០១២ ដល់ខែធ្នូ ២០១៤ ដោយចំណាយប្រាក់ចំនួន ៥០ ម៉ឺនដុល្លារ ក្រោមការឧបត្ថម្ភពីសហភាពអឺរ៉ុប។
លោក ហុក សុទ្ធិ នាយកអង្គការ SIPAR មានប្រសាសន៍កាលពីថ្ងៃម្សិលមិញ ថា លោកគាំទ្រ ចំពោះប្រសាសន៍របស់លោកនាយករដ្ឋមន្ត្រី ព្រោះវាជាការលើកទឹកចិត្តដ៏ល្អមួយ ចំពោះគម្រោងសាងសង់បណ្ណាល័យក្នុងពន្ធនាគារ រវាងនាយកដ្ឋានពន្ធនាគារ និងអង្គការ SIPAR ដែលកំពុងដំណើរការនេះ និងដើម្បីធ្វើឲ្យគម្រោងនេះទទួលបានជោគជ័យ តាមការគ្រោងទុក។ លោកថ្លែងថា៖«បណ្ណាល័យចំនួនបីបានដាក់ឲ្យប្រើប្រាស់រួចហើយ ហើយបណ្ណាល័យ៧ទៀត គ្រោងនឹងបើកឲ្យប្រើប្រាស់ ក្នុងពេលឆាប់ៗនេះ ព្រោះយើងកំពុងរៀបចំសៀវភៅ សម្ភារបំពាក់នៅក្នុងបណ្ណាល័យ និងបណ្ដុះបណ្ដាលបណ្ណាគារិក »។
លោកបន្ថែមថា ពន្ធនាគារបីដែលមានបណ្ណាល័យហើយនោះ គឺពន្ធនាគារព្រៃស ម១ (សម្រាប់អ្នកទោសប្រុស) និង ម ២ (សម្រាប់អ្នកទោសស្រី) និងពន្ធនាគារនៅខេត្តសៀមរាប។ លោក ហុក សុទ្ធិ បញ្ជាក់ថា៖ «បុគ្គលិកខ្ញុំកំពុងនាំយកឧបករណ៍មកដាក់ក្នុងបណ្ណាល័យ ៧ ទៀត ដែលយើងបានសាងសង់រួចហើយ នៅក្នុងពន្ធនាគារខេត្តកណ្ដាល ព្រៃវែង កោះកុង កំពង់ស្ពឺ បន្ទាយមានជ័យ កំពង់ចាម និងខេត្តកំពង់ធំ។ បណ្ណាល័យទាំងនោះ នឹងបើកឲ្យប្រើនៅខែក្រោយនេះ»៕ PN
