The Phnom Penh Post Search

Search form




Logo of Phnom Penh Post newspaper Phnom Penh Post - នាយក​រដ្ឋ​មន្ត្រី​បង្ហាញ​មុខ​ជាមួយ​ព្រះ​មហាក្សត្រ​នៅ​ខេត្ត​ព្រះ​សីហនុ

នាយក​រដ្ឋ​មន្ត្រី​បង្ហាញ​មុខ​ជាមួយ​ព្រះ​មហាក្សត្រ​នៅ​ខេត្ត​ព្រះ​សីហនុ

នាយក​រដ្ឋ​មន្ត្រី​បង្ហាញ​មុខ​ជាមួយ​ព្រះ​មហាក្សត្រ​នៅ​ខេត្ត​ព្រះ​សីហនុ

130709_06a
ព្រះមហាក្សត្រយាងជួបកម្មករចម្ការដូងប្រេងឧកញ៉ា ម៉ុង ឫទ្ធី កឹម គុណវឌ្ឍន៍

ភ្នំពេញៈ ក្នុង​រយៈ​ពេល​ជិត​៣​សប្តាហ៍​មុន​ពេល​បោះឆ្នោត​មក​ដល់ លោក​នាយក​រដ្ឋ​មន្រ្តី ហ៊ុន សែន កាល​ពី​ម្សិលមិញ បាន​ចេញ​មុខ​ជា​សាធារណៈ​ជា​លើក​ទី១ ក្នុង​អំឡុង​ពេល​ធ្វើ​យុទ្ធនាការ​ឃោសនា​បោះឆ្នោត​ឆ្នាំ​នេះ។ បន្ទាប់​ពី​ដាក់​កំហិត​លើ​ការងារ​នៅ​ភ្នំពេញ ជាង​១​សប្តាហ៍​មក​នោះ លោក​នាយក​រដ្ឋ​មន្រ្តី​បាន​អញ្ជើញ​ទៅ​ខេត្ត​ព្រះ​សីហនុ ហើយ​ឈប់​សំចត​តាម​ផ្លូវ ដើម្បី​ជួប​កម្មករ​និង​អ្នក​ភូមិ។

ក្នុង​ព្រះ​រាជ​ដំណើរ​ដែល​នឹង​បញ្ចប់​នៅ​ថ្ងៃ​នេះ ព្រះ​មហាក្សត្រ ព្រះ​បាទ នរោត្តម សីហមុនី និង​ព្រះ​មហាក្សត្រិយ៍​នរោត្តម មុនីនាថ សីហនុ បាន​យាង​ជាមួយ​នឹង​លោក​នាយក​រដ្ឋ​មន្រ្តី​ផង​ដែរ។

លោក កឹម គុណវឌ្ឍន៍ អគ្គ​នាយក​ទូរទស្សន៍​ជាតិ​កម្ពុជា ដែល​បាន​ការ​អនុញ្ញាត​ឲ្យ​ចុះ​យក​ព័ត៌មាន​អំពី​ព្រះ​រាជ​ដំណើរ​ទស្សនកិច្ច នេះ​ឲ្យ​ដឹង​ថា៖ «​សម្តេច​នាយក​រដ្ឋ​មន្រ្តី ហ៊ុន សែន ព្រះ​មហាក្សត្រ និង​ព្រះ​មហាក្សត្រិយ៍​បាន​យាង​ទៅ​រោង​ម៉ាស៊ីន​កិន​ស្រូវ នៅ​ក្នុង​ខេត្ត​កណ្តាល បន្ទាប់​មក​យាង​ទៅ​កាន់​កសិដ្ឋាន​ដូង​ប្រេង របស់​ឧកញ៉ា ម៉ុង ឫទ្ធី និង​ពិនិត្យ​ផលិត​ផល​មួយ​ចំនួន​របស់​ក្រុមហ៊ុន និង​ជួប​ជាមួយ​នឹង​កម្មករ​នៅ​ទីនោះ»។

លោក​បន្ត​ថា​៖«​នៅ​រសៀល​ថ្ងៃ​ដដែល សម្តេច​នាយក​រដ្ឋ​មន្រ្តី​ព្រះ​មហាក្សត្រ និង​ព្រះ​មហាក្សត្រិយ៍​បាន​យាង​ទៅ​ជួប​កម្មករ​កំពង់ផែ​ស្វយ័ត​ក្រុង​ព្រះ​សីហនុ ប្រហែល ១២០០ នាក់​»។

ថ្ងៃ​នេះ លោក​នាយក​រដ្ឋ​មន្រ្តី រួម​ជាមួយ​ព្រះ​មហាក្សត្រ និង​ព្រះ​មហាក្សត្រិយ៍​នឹង​ចូល​រួម​ពិធី​ដាំ​កូន​ឈើ​ដើម្បី​ប្រារព្ធ​ទិវា​ដាំ​កូន​ឈើ​ប្រចាំ​ឆ្នាំ ក្រោម​ព្រះ​រាជាធិបតីភាព​របស់​ព្រះ​មហាក្សត្រ ដែល​ពិធី​នេះ​លោក ហ៊ុន សែន កម្រ​ឃើញ​ចូល​រួម​ណាស់។

លោក កឹម គុណវឌ្ឍន៍ បន្ត​ថា ៖«ទិវា​ដាំ​ដើមឈើ​ត្រូវ​រៀបចំ​ឡើង​នៅ​ខេត្ត​ព្រះ​សីហនុ​ដែល​នៅ​ឆ្ងាយ ដូច្នេះ ព្រះ​មហាក្សត្រ​ត្រូវ​គង់​មួយ​យប់ ហើយ​សម្តេច​នាយក​រដ្ឋ​មន្រ្តី ត្រូវ​នៅ​អម​ព្រះ​មហាក្សត្រ​ជា​ស្វ័យប្រវត្តិ​។ វា​មិន​មាន​អ្វី​ចម្លែក​ទេ»។

អ្នក​វិភាគ​ជា​ច្រើន​ដែល​សម្ភាស​ដោយ​ភ្នំពេញ ប៉ុស្តិ៍ កាល​ពី​ម្សិលមិញ មាន​ការ​ខ្វែង​គំនិត​គ្នា។

ក្នុង​នោះ អ្នក​វិភាគ​ម្នាក់​គិត​ថា ព្រះ​រាជ​ដំណើរ​រួម​គ្នា​រវាង​នាយក​រដ្ឋ​មន្ត្រី​និង​ព្រះ​មហាក្សត្រ​បែប​នេះ គឺ​ពុំ​ធ្លាប់​មាន​ពី​មុន​មក​ទេ។ ក្នុង​ខែ​មករា ឆ្នាំ​មុន​លោក​នាយក​រដ្ឋ​មន្រ្តី​និង​ព្រះ​មហាក្សត្រ​បាន​យាង​ក្នុង​ដំណើរ​រួម​គ្នា​តាម​រថយន្ត​ក្រុង​២ថ្ងៃ​ជុំវិញ​ខេត្ត​មណ្ឌលគិរី ដើម្បី​ជួប​ប្រជាជន និង​ពិនិត្យ​ការ​អភិវឌ្ឍ​ជនបទ។ ព្រះ​មហាក្សត្រិយ​និង​លោក ហ៊ុន សែន មិន​ដែល​ធ្វើ​ដំណើរ​រួម​គ្នា​នោះ​ទេ។

លោក​ស្រី ជា វណ្ណាត អ្នក​វិភាគ​នយោបាយ​ម្នាក់​ថ្លែង​ថា បើ​ទោះ​ជា​ពុំ​មាន​ការ​ឃោសនា​ច្បាស់​ក្នុង​ថ្ងៃ​ម្សិលមិញ​ក៏​ដោយ ក៏​ប៉ុន្តែ វា​មាន​ការ​សង្ស័យ​តិច​តួច ដែល​ការ​បង្ហាញ​ខ្លួន​របស់​លោក ហ៊ុន សែន គឺ​មាន​អត្ថន័យ​ច្រើន។

លោក​ស្រី​យល់​ថា៖ «ការ​នេះ​កើត​ឡើង​ក្នុង​អំឡុង​ពេល​ឃោសនា​បោះឆ្នោត ដូច្នេះ​អាច​ឲ្យ​គេ​សង្ស័យ​ថា អ្នក​នយោបាយ ឬ​គណបក្ស​នយោបាយ... នឹង​ព្យាយាម​បង្កើត​ព្រឹតិ្តការណ៍​សំខាន់​និង​បាន​ការ​ចាប់​អារម្មណ៍»។

បន្ទាប់​ពី​ទំនាក់​ទំនង​រកាំរកូស ជិត ២ទសវត្សរ៍​រវាង​សម្តេច​ឪ នរោត្តម សីហនុ ដែល​ទ្រង់​សោយទិវង្គត​និង​លោក ហ៊ុន សែន នោះ លោក​នាយក​រដ្ឋ​មន្រ្តី​បាន​ចំណាយ​ពេល​ច្រើន​ក្នុង​រយៈ​ពេល ១៥ ឆ្នាំ​នេះ ដើម្បី​បង្កើន​ទំនាក់​ទំនង​របស់​លោក​ជាមួយ​នឹង​រាជានិយម។

ការ​ខិតខំ​នោះ​បង្ហាញ​កាន់​តែ​ច្បាស់​នៅ​ពេល​សម្តេច​ឪ​សោយ​ទិវង្គត​បន្ទាប់​មក​លោក​ហ៊ុន សែន បាន​អម​ដំណើរ​គ្រួសារ​រាជវង្ស​ទៅ​ទទួល​ព្រះ​សព​ពី​ទីក្រុង​ប៉េកាំង បាន​ប្រែ​ក្លាយ​ពិធី​បុណ្យ​សព​ជា​កិច្ចការ​រដ្ឋ​ហើយ​ថែម​ទាំង​អះអាង​ថា រូប​លោក​មាន​តួនាទី​សំខាន់​ក្នុង​ការ​បូជា​ព្រះ​បរមសព ដោយ​សារ​ថា មាន​តែ​លោក​ទេ​ដែល​អាច​ថ្វាយ​ព្រះ​ភ្លើង​ព្រះ​បរម​សព។

លោក កែម ឡី អ្នក​វិភាគ​នយោបាយ​មួយ​រូប​ទៀត​ពន្យល់​ថា៖ «នេះ​ជា​យុទ្ធសាស្រ្ត​ថ្មី ដើម្បី​បង្កើន​ប្រជាប្រិយ​ភាព​។ [លោក ហ៊ុន សែន​] គាំទ្រ​រាជានិយម​ដោយ​សារ​ថា ប្រជាជន​កម្ពុជា​គាំទ្រ​ព្រះ​មហាក្សត្រ​យ៉ាង​ជាក់​ច្បាស់​។ តែ តើ​យុទ្ធសាស្រ្ត​នេះ​មាន​ជោគជ័យ​ឬ​យ៉ាង​ណា​? នោះ​ពុំ​មាន​លក្ខណៈ​ច្បាស់​លាស់​នោះ​ទេ។

លោក​ស្រី ជា វណ្ណាត បាន​ព្យាករ​ថា អ្នក​បោះឆ្នោត​កាន់​តែ​ឆ្លាត ហើយ​អាច​គិត​ថា គណបក្ស​កាន់​អំណាច​កំពុង​ព្យាយាម​ទាញ​ប្រយោជន៍​ពី​ទំនាក់​ទំនង​ជាមួយ​ព្រះ​មហាក្សត្រ ដើម្បី​ប្រើ​ប្រាស់​ក្នុង​យុទ្ធនាការ​ឃោសនា​ល្អ​បំផុត​ដែល​គេ​អាច​ធ្វើ​បាន។

លោក​ស្រី​បន្ត​ថា៖ «[ការ​គាំទ្រ] ជា​វិធី​ដែល​គណបក្ស​កាន់​អំណាច​ចង់​ឲ្យ​មើល​ឃើញ​បែប​នេះ​។ ប៉ុន្តែ ខ្ញុំ​មិន​គិត​ថា សាធារណជន​គិត​បែប​នោះ​ទេ»។

លោក កែម ឡី បាន​បង្ហាញ​ថា យុទ្ធសាស្រ្ត​យក​រាជានិយម​មក​ប្រើ​នេះ អាច​ប៉ះពាល់​ខ្លួន​ឯង​វិញ​ចំពោះ​គណបក្ស​ហ៊្វុនស៊ិនប៉ិច ដែល​បរាជ័យ​មិន​ទទួល​បាន​ប្រជាប្រិយ​ភាព​ច្រើន​ថែម​ទៀត។

លោក ស៊ឺន ស៊ូប៊ែរ្តិ៍ត ប្រធាន​គណបក្ស​សិទិ្ធ​មនុស្ស​និង​ជា​ទីប្រឹក្សា​ផ្ទាល់​របស់ ព្រះ​មហាក្សត្រ យល់​ស្រប​ថា អ្នក​បោះឆ្នោត​មិន​ពិចារណា​លើ​ចំណុច​នេះ​ឡើយ។ លោក​បន្ត​ថា ៖ «ខ្ញុំ​សោក​ស្តាយ​ចំពោះ​ព្រះ​មហាក្សត្រ​និង​ព្រះ​មហាក្សត្រិយ៍​ដែល​ត្រូវ​គណបក្ស​នយោបាយ​ប្រើ​ប្រាស់​ព្រះអង្គ​»៕ TK

អត្ថបទគួរចាប់អារម្មណ៍