The Phnom Penh Post Search

Search form

Logo of Phnom Penh Post newspaper Phnom Penh Post - នាយក​សាលា​ត្រូវ​គេ​ចោទ​ថា​ពុករលួយ

នាយក​សាលា​ត្រូវ​គេ​ចោទ​ថា​ពុករលួយ

នាយក​សាលា​ត្រូវ​គេ​ចោទ​ថា​ពុករលួយ

ពោធិ៍សាត់ៈ គ្រូ​ម្នាក់​នៅ​វិទ្យាល័យ ទា ចំរ៉ាត់ ក្នុង​ក្រុង ពោធិ៍សាត់ បាន​ចោទ​ប្រកាន់​នាយក​សាលា លោក ប៊ូ សុវណ្ណារិទ្ធ និង​នាយក​រង លោក ឈុប ប៊ុនថា ថា​បាន​បង្ខំ​ឲ្យ​សិស្ស​បង់​ប្រាក់​ថ្លៃ​ចុះ​ឈ្មោះ​ចូល​រៀន និង​ថ្លៃ​ផ្សេងៗ​ទៀត​សម្រាប់​ការ​ចូល​រៀន​ឆ្នាំ​សិក្សា ២០១៣‑២០១៤ ដែល​ខុស​ពី​គោល​ការណ៍​របស់​ក្រសួង អប់រំ។

លោក​ស្រី ផាត ម៉ាលីន ជា​គ្រូ​ដែល​បាន​លើក​ឡើង​អំពី​ករណី​យក​ប្រាក់​ពី​សិស្ស​នេះ​បាន​ថ្លែង​ថា នាយក​សាលា បាន​យក​ប្រាក់​ចំនួន ៥០០០ រៀល (ប្រហែល ១,២៥ ដុល្លារ) ពី​សិស្ស​ម្នាក់ៗ ដែល​ទៅ​ចុះ​ឈ្មោះ​ចូល​រៀន និង​បង្កើត​ឲ្យ​មាន​ការ​បង់​ថ្លៃ​ផ្សេងៗ​ទៀត ដើម្បី​យក​ប្រាក់​ពី​សិស្ស រឹត​តែ​ច្រើន​ជាង​នេះ។

លោក រ៉ុង ឈុន ប្រធាន​សមាគម​គ្រូ​បង្រៀន​កម្ពុជា​ឯករាជ្យ បាន​ថ្លែង​កាល​ពី​ថ្ងៃ​ចន្ទ​ថា អ្នក​ស្រី ម៉ាលីន បាន​ដាក់​បណ្តឹង​ទៅ​សមាគម​គ្រូ​បង្រៀន​កម្ពុជា​ឯករាជ្យ ហើយ​សមាគម​បាន​បញ្ជូន​បណ្តឹង​នេះ​បន្ត ទៅ​ក្រសួង មហាផ្ទៃ។

លោក ស្រី ម៉ាលីន បាន​ឲ្យ​ដឹង​ទៀត​ថា ការ​តម្រូវ​ឲ្យ​បង់​ប្រាក់​ទាំង​នោះ ត្រូវ​បាន​អនុវត្ត​យ៉ាង​តឹងរ៉ឹង ហើយ​សិស្ស​ដែល​មាន​ប្រាក់​បង់​ត្រឹម​តែ ៣០០០ រៀល​មិន​ត្រូវ​បាន​ទទួល​យក​ទេ ហើយ​មន្រ្តី​សាលា​ប្រាប់​ពួក​គេ​ថា ពួក​គេ​ត្រូវ​តែ​ត្រឡប់​ទៅ​ផ្ទះ​យក​ប្រាក់​មក​ឲ្យ​បាន​គ្រប់​ចំនួន។ លោក​ស្រី​បន្ត​ថា ការ​តម្រូវ​ឲ្យ​សិស្ស​បង់​ប្រាក់​នេះ មិន​មែន​មាន​ត្រឹម​តែ​ប៉ុណ្ណឹង​ទេ។

លោក​ស្រី ម៉ាលីន ថ្លែង​ថា៖ «វា​មិន​មែន​មាន​តែ​មួយ​ករណី​ទេ ប៉ុន្តែ​វា​មាន​ករណី​ជាច្រើន ពាក់ព័ន្ធ​នឹង​អំពើ​ពុករលួយ​ដែល​ប្រព្រឹត្ត​ដោយ​នាយក​ទាំង​ពីរ​នោះ​ដូចជា សិស្ស​ត្រូវ​តែ​បង់​ប្រាក់ ១០០០ រៀល​ពេល​ពួក​គេ​ខ្ចី​សៀវភៅ​ពី​បណ្ណាល័យ ហើយ​សិស្ស​ដែល​ផ្ទេរ​ពី​សាលា​ផ្សេង​មក​សាលា​នេះ ត្រូវ​បង់​ពី ២ ម៉ឺន​ទៅ ៨ ម៉ឺន​រៀល»។

លោក ប៊ូ សុវណ្ណារិទ្ធ ជា​នាយក​សាលា ដែល​រង​ការ​ចោទ​ប្រកាន់​បាន​អះអាង​កាល​ពី​ថ្ងៃ​ចន្ទ​ថា លោក​បាន​សុំ​ឲ្យ​មាន​ការ​ឧបត្ថម្ភ​ដោយ​ស្ម័គ្រ​ចិត្ត សម្រាប់​ការ​ធ្វើ​ផ្លូវ​បេតុង​ចូល​សាលា។

លោក​បន្ត​ថា៖ «ការ​ចោទ​ប្រកាន់​នេះ ពិត​ជា​ខុស​ទាំង​ស្រុង។ ខ្ញុំ​មិន​បាន​ធ្វើ​អ្វី​ដូច [អ្នក​ស្រី ម៉ាលីន] និយាយ​ទេ។ តាម​ច្បាប់​ក្រសួង អប់រំ ការ​ចុះ​ឈ្មោះ​ចូល​រៀន​សម្រាប់​សិស្ស​ទាំង​អស់ គឺ​មិន​យក​ប្រាក់​ទេ។ ដូច្នេះ​តើ​ខ្ញុំ​អាច​យក​ប្រាក់​ពី​សិស្ស​របស់​ខ្ញុំ​យ៉ាង​ម៉េច​ទៅ?»។

លោក បោយ ប៊ុនណា អ្នក​ប្រឹក្សា​យោបល់​នៅ​ក្រសួង អប់រំ បាន​ថ្លែង​ថា មន្រ្តី​ក្រសួង​នឹង​ធ្វើការ​ស៊ើប​អង្កេត​ករណី​ចោទ​ប្រកាន់​នេះ ហើយ​ថា​ការ​យក​ប្រាក់​សម្រាប់​ការ​ចុះ​ឈ្មោះ​ចូល​រៀន​និង​ការ​ប្រើ​ប្រាស់​បណ្ណាល័យ​គឺ​ពិត​ជា​ខុស​ច្បាប់៕ PS

អត្ថបទគួរចាប់អារម្មណ៍