ភ្នំពេញៈ ក្រសួងមហាផ្ទៃកាលពីម្សិលមិញបានសម្រេចបណ្តេញបុរសជនជាតិចិនម្នាក់ដែលជានិពន្ធនាយកកាសែត Angkor Today ចេញពីកម្ពុជា បន្ទាប់ពីឃាត់ខ្លួនបានពីថ្ងៃទី ២៤ កុម្ភៈ នៅក្រុង-ខេត្តសៀមរាប ពាក់ព័ន្ធនឹងករណីផ្សាយព័ត៌មានមិនពិតថា កម្ពុជាមានលក់វ៉ាក់សាំងកូវីដ ១៩។
ការសម្រេចនេះធ្វើឡើងតាមរយៈសេចក្ដីប្រកាសចុះហត្ថលេខាដោយលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃចុះថ្ងៃទី ២៥ កុម្ភៈ ឆ្នាំ ២០២១។ លិខិតនេះបានសម្រេចបណ្តេញឈ្មោះ ShenKaidong អាយុ ៥២ ឆ្នាំជាជនជាតិចិនពាក់ព័ន្ធនឹងបទល្មើសប្រព្រឹត្តនៅកម្ពុជាឱ្យចេញទៅប្រទេសដើមវិញ និងហាមឃាត់ចូលមកកម្ពុជាជាថ្មី។
លោក កែវ វណ្ណថន អ្នកនាំពាក្យរបស់អគ្គនាយកដ្ឋានអន្តោប្រវេសន៍បានប្រាប់ ភ្នំពេញ ប៉ុស្តិ៍ កាលពីម្សិលមិញថា បុរសជនជាតិចិនរូបនេះបានចុះផ្សាយព័ត៌មានថា កម្ពុជាមានលក់វ៉ាក់សាំងកូវីដ ១៩ ហើយត្រូវបានអគ្គនាយកដ្ឋានអន្តោប្រវេសន៍របស់លោកបណ្តេញចេញពីកម្ពុជាហើយ។
លោកបញ្ជាក់ថា៖ «ជនម្នាក់នេះយើងមិនដាក់ទោសទណ្ឌនៅកម្ពុជាទេ តែយើងត្រូវតែបណ្តេញចេញពីកម្ពុជាតែម្តង»។
ពាក់ព័ន្ធករណីនេះលោក តូច សុគន្ធ ប្រធានការិយាល័យស៊ើបអង្កេត និងអនុវត្តនីតិវិធីនៃស្នងការដ្ឋាននគរបាលខេត្តសៀមរាបប្រាប់ ភ្នំពេញ ប៉ុស្តិ៍ ពីម្សិលមិញថា បុរសឈ្មោះ Shen Kaidong ម្នាក់នេះបានបើកធ្វើអាជីវកម្មកាសែតអនឡាញឈ្មោះ Angor Today នៅខេត្តសៀមរាបតាំងពីឆ្នាំ ២០១៥ មកម្ល៉េះ។
លោកថ្លែងថា៖ «សមត្ថកិច្ចយើងបានឆែកឃើញគាត់សរសេរសារបង្ហោះព័ត៌មានថា កម្ពុជាលក់វ៉ាក់សាំងកូវីដ ១៩ នេះ កាលពីម៉ោង ២៣ នៅយប់ថ្ងៃទី ២៣ កុម្ភៈ ឆ្នាំ ២០២១។ ប៉ុន្តែការឃាត់ខ្លួននេះសមត្ថកិច្ចយើងគ្រាន់តែចូលរួមសហការជាមួយអគ្គនាយកដ្ឋានអន្តោប្រវេសន៍ហើយសមត្ថកិច្ចបានយកជនសង្ស័យទៅក្រសួងមហាផ្ទៃក្រោយឃាត់ខ្លួន»។
ជុំវិញករណីនេះដែរ កាលពីម្សិលមិញ រដ្ឋមន្ត្រីក្រសួងព័ត៌មានលោក ខៀវ កាញារីទ្ធ បានចេញលិខិតមួយច្បាប់ លុបចោលប្រកាសចុះថ្ងៃទី ១៩ សីហា ឆ្នាំ ២០១៥ របស់ក្រសួងព័ត៌មានដែលអនុញ្ញាតឱ្យលោក អ៊ុង អង្គា បើកឱ្យដំណើរការធ្វើអាជីវកម្ម កាសែត AngKor Today។
លិខិតបន្តថា ម្ចាស់អាជ្ញាប័ណ្ណបានផ្សព្វផ្សាយព័ត៌មានបំភ្លៃការពិត មានចេតនាទុច្ចរិតធ្វើឱ្យអន្តរាយដល់សុខភាពសាធារណៈបង្កភាពច្របូកច្របល់ ចលាចលនៅក្នុងសង្គមធ្វើឱ្យប៉ះពាល់ដល់សន្តិសុខជាតិ និងប៉ះពាល់ដល់កិត្យានុភាពរបស់រាជរដ្ឋាភិបាលកម្ពុជា ដែលជាការបំពានយ៉ាងធ្ងន់ធ្ងរលើវិជ្ជាជីវៈ និងកិច្ចសន្យាដែលសាមីខ្លួនបានតម្កល់ទុកនៅក្រសួងព័ត៌មាន។
លោក មាស សុភ័ណ្ឌ អនុរដ្ឋលេខាធិការ និងជាអ្នកនាំពាក្យក្រសួងព័ត៌មានបានបញ្ជាក់បន្ថែមពីម្សិលមិញថាកាសែត AngkorToday គឺមានលោក អ៊ុង អង្គា ជាប្រធានអង្គភាព។ ចំណែកឈ្មោះ ShenKaidong ជានិពន្ធនាយកដែលទទួលបន្ទុកលើការផ្សព្វផ្សាយ។
យ៉ាងណាក្ដី បន្ទាប់ពីចុះផ្សាយករណីលក់វ៉ាក់សាំងនេះ ក្រសួងសុខាភិបាល កាលពីថ្ងៃទី ២៤ កុម្ភៈ បដិសេធ និងថ្កោលទោសដោយលោកស្រី ឱ វណ្ណឌីន អ្នកនាំក្រសួងសុខាភិបាលបានលើកឡើងថា ជាការផ្សព្វផ្សាយរឿងផ្តេសផ្តាស និងបានស្នើសុំឱ្យអាជ្ញាធរមានសមត្ថកិច្ចចាត់វិធានការជុំវិញករណីផ្សព្វផ្សាយព័ត៌មានមិនពិតនេះ។
លោកស្រីបានបញ្ជាក់ថា៖ «អ្នកទៅចាក់ថ្នាំគ្មានបង់ប្រាក់នោះទេ ហើយយើងក៏មិនត្រូវឱ្យអ្នកដែលទៅចាក់ បង់ប្រាក់នោះដែរ។យើងសុទ្ធតែកំណត់មុខសញ្ញាសម្រាប់ក្រុមមនុស្សដែលត្រូវមកចាក់ហើយយើងមានបញ្ជីឈ្មោះអ្នកចាក់ត្រឹមត្រូវ»៕