.jpg)
ទិដ្ឋភាពសាកលវិទ្យាល័យជាតិគ្រប់គ្រងក្នុងរាជធានីភ្នំពេញ។ រូបថត សាកលវិទ្យាល័យជាតិគ្រប់គ្រង
ភ្នំពេញៈ និស្សិតចុះឈ្មោះសិក្សានៅតាមគ្រឹះស្ថានឧត្ដមសិក្សាក្នុងឆ្នាំសិក្សាថ្មីនេះ មានការធ្លាក់ចុះបើធៀបទៅនឹងឆ្នាំសិក្សាមុនៗ ដែលការធ្លាក់ចុះនៃចំនួននិស្សិតចុះឈ្មោះចូលរៀននេះត្រូវបានអ្នកនៅក្នុងវិស័យអប់រំបន្ទោសទៅលើការរីករាលដាលនៃជំងឺកូវីដ ១៩។
លោក ហេង វ៉ាន់ដា ប្រធាន ក្រុមប្រឹក្សាភិបាលសមាគមគ្រឹះស្ថានឧត្ដមសិក្សាកម្ពុជាថ្លែងប្រាប់ ភ្នំពេញ ប៉ុស្ដិ៍ ពីម្សិលមិញថា ចាប់តាំងពីជំងឺកូវីដ ១៩ បានរីករាលដាលមកដល់ប្រទេសកម្ពុជា និស្សិត ដែលសិក្សានៅសាកលវិទ្យាល័យ និងវិទ្យាស្ថានវ៉ាន់ដារបស់លោកផ្ទាល់បានឈប់មកបង់ប្រាក់បន្តការសិក្សាក្នុងឆ្នាំសិក្សាជាបន្តបន្ទាប់ ហើយសម្រាប់ឆ្នាំសិក្សាថ្មីនេះ មានសិស្សចាស់បានមកបន្តការសិក្សាប្រមាណ ៤០ ភាគរយប៉ុណ្ណោះ។
លោកថ្លែងថា៖ «នៅវិទ្យាស្ថានខ្ញុំ និស្សិតត្រូវចូលរៀននៅថ្ងៃស្អែក ខានស្អែកនេះហើយវគ្គសិក្សាដំបូងមានសិស្សចុះឈ្មោះចូលរៀនប្រមាណ ៦០ ភាគរយប៉ុណ្ណោះ បើធៀបនឹងឆ្នាំសិក្សាមុនពេលការរីករាលដាលជំងឺកូវីដ ១៩»។ បើតាមលោក ហេង វ៉ាន់ដា វិទ្យាស្ថានរបស់លោកកាលពីមុនពេលការរីករាលដាលជំងឺកូវីដ ១៩ សម្រាប់ឆ្នាំសិក្សាថ្មី វគ្គដំបូងមាននិស្សិតចុះឈ្មោះចូលរៀនប្រមាណ ១ ៥០០ នាក់។ បើបូករួមនឹងការចូលរៀនវគ្គបន្តបន្ទាប់ទៀតអាចមាននិស្សិតចុះឈ្មោះចូលរៀនប្រមាណ ៣ ០០០ នាក់។
លោកបញ្ជាក់ថា៖ «ឥឡូវយើងឃើញថា ថ្ងៃចូលរៀនវគ្គដំបូងមានសិស្សចុះឈ្មោះចូលរៀនមានចំនួនមិនដល់ ១ ០០០ នាក់ផង។ សាកលវិទ្យាល័យផ្សេងៗទៀតបើតាមខ្ញុំសាកសួរទៅចំនួននិស្សិតមកចុះឈ្មោះសិក្សាមានតិចជាងខ្ញុំផង។ បញ្ហានេះបានប៉ះពាល់ទាំងអស់គ្នា យើងមិនអាចបន្ទោសអ្នកណាបានទេ គឺបន្ទោសវិបត្ដិជំងឺកូវីដ ១៩ តែម្ដង»។
បើតាមលោក វ៉ាន់ដា និស្សិតមកបន្តការសិក្សាមហាវិទ្យាល័យនៅភ្នំពេញប្រមាណ ៨០ ភាគរយ ពួកគេមកពីជនបទគឺមិនមែនជាអ្នករស់នៅភ្នំពេញទេ។ លោកថ្លែងថា នៅពេលនិស្សិតឡើងមកបន្តការសិក្សា ពួកគេត្រូវរកជួលផ្ទះស្នាក់នៅដើម្បីសិក្សាបណ្ដើរស្វែងរកការងារធ្វើបណ្ដើររកប្រាក់មកបង់ថ្លៃសិក្សា និងការចំណាយផ្សេងៗទៀត។
លោកស្រី រដ្ឋា ពុទ្ធិកា ប្រធានការិយាល័យទំនាក់ទំនងសាធារណៈនៃសាកលវិទ្យាល័យអន្តរជាតិផារ៉ាហ្គនថ្លែងកាលពីម្សិលមិញថា ចំនួនសិស្សមកចុះឈ្មោះចូលរៀនក្នុងឆ្នាំសិក្សាថ្មីដែលចាប់ផ្ដើមចូលរៀននៅថ្ងៃទី ១៨ ខែមករាម្សិលមិញ បើធៀបនឹងឆ្នាំមុនគឺមានចំនួនប្រហាក់ប្រហែលនឹងឆ្នាំមុនដែរ។ លោកស្រីបញ្ជាក់ថា៖ «ហើយយើងសង្ឃឹមថា អាចនឹងមានចំនួនច្រើនជាងឆ្នាំមុនទៀត ទម្រាំដល់ថ្ងៃបិទការទទួលចុះឈ្មោះចូលរៀន»។
លោកស្រី ពុទ្ធិកាថា បច្ចុប្បន្នសាកលវិទ្យាល័យអន្តរជាតិ ផារ៉ាហ្គន មានកម្មវិធីសិក្សាថ្នាក់បរិញ្ញាបត្រ និងថ្នាក់អនុបណ្ឌិត។ សម្រាប់ថ្នាក់បរិញ្ញាបត្រមានមុខជំនាញសិក្សាចំនួន ៩ សម្រាប់សិស្សជ្រើសរើសបន្តការសិក្សា។ សម្រាប់សិស្សថ្មីដែលទើបចូលរៀនវគ្គដំបូងនៅថ្ងៃទី ១៨ ខែមករា សាកលវិទ្យាល័យក៏នៅតែបន្តទទួលសិស្សថ្មីចុះឈ្មោះចូលរៀនផងដែរ។
លោក រស់ សុវាចា អ្នកនាំពាក្យក្រសួងអប់រំថ្លែងពីម្សិលមិញថា នាយកដ្ឋានឧត្តមសិក្សាដែលជាសេនាធិការនៃក្រសួងអប់រំបានបញ្ជូនបញ្ជីបេក្ខជន ដែលបានដាក់ពាក្យស្នើសុំអាហារូបករណ៍សិក្សាថ្នាក់បរិញ្ញាបត្រ ឆ្នាំសិក្សា ២០២០-២០២១ នៅតាមគ្រឹះស្ថានឧត្តមសិក្សាដែលបេក្ខជនបានស្នើ។ លោកថ្លែងថា៖ «គ្រឹះស្ថានឧត្តមសិក្សាសាធារណៈ និងឯកជនទាំង ៣៩ ដែលបានផ្តល់អាហារូបករណ៍ជាង ៩ ០០០ កន្លែងនឹងពិនិត្យសំណើសុំអាហារូបករណ៍របស់បេក្ខជនតាមនីតិវិធីរបស់គ្រឹះស្ថានឧត្តមសិក្សានីមួយៗ»។
លោកបណ្ឌិត ឈត ប៊ុនថង ប្រធាននាយកដ្ឋានទំនាក់ទំនងវប្បធម៌ អប់រំ និងទេសចរណ៍នៃវិទ្យាស្ថានទំនាក់ទំនងអន្តរជាតិនៃកម្ពុជានៃរាជបណ្ឌិត្យសភាកម្ពុជាបានសង្កេតចំនួន សាកលវិទ្យាល័យ និងវិទ្យាស្ថាន សម្រាប់ផ្ដល់ការសិក្សាដល់សិស្សកម្រិតមហាវិទ្យាល័យគឺមានចំនួនច្រើនលើសពីចំនួននិស្សិតដែលត្រូវចូលសិក្សា។
លោកថ្លែងថា៖ «បើទោះបីជាគ្មានការវាយលុកនៃជំងឺកូវីដ ១៩ នេះក៏ដោយក៏ចំនួននិស្សិតចុះឈ្មោះចូលរៀននៅតាមសាកលវិទ្យាល័យតិច ឬច្រើនក៏មានការថយចុះដែរ ព្រោះតែសាលារៀនច្រើនលើសចំនួនសិស្ស»។
លោក ប៊ុនថង លើកឡើងថា ព្រោះតែវិបត្ដិកូវីដ ១៩ ស្ថានភាពគ្រួសាររបស់សិស្សក៏មានការលំបាក ដូច្នេះសាកលវិទ្យាល័យ ឬវិទ្យាស្ថានគួរបញ្ចុះតម្លៃសិក្សានៅក្នុងកម្រិតណាមួយ ដើម្បីអាចឱ្យសិស្សបន្តការសិក្សាបាន។
បើតាមក្រសួងអប់រំ សិស្សដែលត្រូវបានឱ្យជាប់បាក់ឌុបដោយស្វ័យប្រវត្តិនៅក្នុងឆ្នាំសិក្សា ២០១៩-២០២០ មានប្រមាណជិត ១២ ម៉ឺននាក់៕
វីដេអូ៖
