ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈបានឲ្យដឹងថា និស្សិតជយលាភីជិត ៥០ នាក់ គ្រោងនឹងទៅបន្តការសិក្សានៅប្រទេសជប៉ុននាពេលខាងមុខ។ លោក ហ៊ុន ម៉ាណែត ប្រធានយុវជនរបស់គណបក្សប្រជាជនកម្ពុជាចាត់ទុកនិស្សិតដែលទទួលបានអាហារូបករណ៍ទាំងនេះជាធនធានដ៏មានសក្តានុពលសម្រាប់កម្ពុជាក្នុងការរួមចំណែករុញច្រានសេដ្ឋកិច្ច និងសង្គមឲ្យកាន់តែរីកចម្រើន។
បើតាមបណ្តាញសង្គមហ្វេសប៊ុករបស់លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈដែលបានផ្សព្វផ្សាយកាលពីថ្ងៃទី ៥ ខែសីហា បានឲ្យដឹងថា និស្សិតដែលគ្រោងនឹងទៅបន្តសិក្សានៅប្រទេសជប៉ុននាពេលខាងមុខមានចំនួន ៤៨ នាក់។ ពួកគេបានទទួលជយលាភីនូវអាហារូបករណ៍ JDS និងជយលាភីនៃអាហារូបករណ៍ MEXT។
លោក ហ៊ុន ម៉ាណែត ប្រធានយុវជនរបស់គណបក្សប្រជាជនកម្ពុជា ក្នុងឱកាសអញ្ជើញចូលរួមសំណេះសំណាល និងផ្តាំផ្ញើដល់បេក្ខភាពនិស្សិតជយលាភីនៅសណ្ឋាគារភ្នំពេញ ដែលមានការចូលរួមពីមន្ត្រីរដ្ឋាភិបាល និស្សិតជាប់ជយលាភី និងអតីតនិស្សិតអាហារូបករណ៍ចំនួន ១២១ នាក់ ពីម្សិលមិញលោកថ្លែងថា និស្សិតដែលទទួលបានអាហារូបករណ៍ចេញទៅសិក្សានៅជប៉ុននោះ គឺជាធនធានដ៏មានសក្តានុពលសម្រាប់កម្ពុជា។ ធនធានបែបនេះសម្រាប់ជាការរួមចំណែករុញច្រានសេដ្ឋកិច្ច និងសង្គមឲ្យកាន់តែរីកចម្រើនបន្ថែមទៀត។
លោក ហ៊ុន ម៉ាណែត ដែលជាអគ្គមេបញ្ជាការងកងយោធពលខេមរភូមិន្ទ និងជាមេបញ្ជាការកងទ័ពជើងគោកផងនោះ លោកក៏បានណែនាំដល់និស្សិតជយលាភីទាំងអស់ត្រូវខិតខំប្រឹងប្រែង រៀនសូត្រទទួលយកបទពិសោធពីប្រទេសជប៉ុនដែលឈានមុខគេ រីកចម្រើនខាងបច្ចេកវិទ្យា។ លោកជំរុញឲ្យនិស្សិតជយលាភីចាប់យកឲ្យបាន ដើម្បីមកអភិវឌ្ឍប្រទេសកម្ពុជាឲ្យកាន់តែជឿនលឿនបន្តទៀត។
ប្រធានយុវជនរូបនេះបញ្ជាក់ថា៖ «ប្អូនៗដែលទទួលបានអាហារូបករណ៍ត្រូវខិតខំប្រឹងប្រែងរៀនសូត្រឲ្យបាន ១២០% ដោយ ១០០% សិក្សានៅក្នុងថ្នាក់ និង ២០% ទៀតសិក្សាស្វែងយល់បន្ថែមទៀតពីបរិយាកាសនៅខាងក្រៅ»។
លោកបន្ថែមថា៖ «ដោយត្រូវចេះបង្កើននូវទំនាក់ទំនង និងមិត្តភាពជាមួយបណ្តានិស្សិតដទៃទៀត និងឆ្លៀតឱកាសធ្វើជាអគ្គរាជទូតរបស់កម្ពុជាក្នុងការផ្សព្វផ្សាយនូវវប្បធម៌ក៏ដូចជាអរិយធម៌ ព្រមទាំងតំបន់ទេសចរណ៍ ដែលមានសក្តានុពលដ៏សម្បូរបែបរបស់កម្ពុជា ដើម្បីលើកជាតិរបស់យើង»។
ក្រសួងការងារបានឲ្យដឹងទៀតថា អាហារូបករណ៍កម្មវិធី JDS បានចាប់ផ្តើមផ្តល់ដោយរដ្ឋាភិបាលជប៉ុន នៅឆ្នាំ ២០០០ ដោយមាននិស្សិតសរុប ៤១៦ នាក់សម្រាប់ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិតចំនួន ២ នាក់ ជារៀងរាល់ឆ្នាំ។ បច្ចុប្បន្នមាននិស្សិតដែលកំពុងបន្តការរស់នៅប្រទេសជប៉ុនចំនួន ៨៥៧ នាក់។ ចំណែកអាហារូបករណ៍របស់ក្រសួងអប់រំ (MEXT) បានចាប់ផ្តើមផ្តល់ដោយរដ្ឋាភិបាលជប៉ុននៅឆ្នាំ ១៩៩៣ ដែលមាននិស្សិតជាង ១ ១០០ នាក់ ដោយមានចាប់ពីកម្រិតកម្មករជំនាញរហូតដល់ថ្នាក់បណ្ឌិត។
ក្រសួងការងារបានបញ្ជាក់ទៀតថា៖ «ចាប់ពីឆ្នាំ ១៩៩៣ រហូតដល់បច្ចុប្បន្ន និស្សិតកម្ពុជាដែលបានចេញទៅសិក្សានៅប្រទេសជប៉ុនមានចំនួនច្រើនពាន់នាក់ បើរាប់បញ្ចូលទាំងវគ្គខ្លីៗមួយចំនួនផងនោះ។ រីឯនិស្សិតដែលបានត្រឡប់មកក្នុងប្រទេសវិញ កំពុងបម្រើការងារក្នុងស្ថាប័នស្រាវជ្រាវ ស្ថាប័នរដ្ឋ អង្គការក្រៅរដ្ឋាភិបាល និងវិស័យឯកជនដែលធនធានទាំងនេះបានជួយអភិវឌ្ឍប្រទេស កសាងសេដ្ឋកិច្ចជាតិឲ្យកាន់តែរីកចម្រើនឥតឈប់ឈរ»។
តំណាងនិស្សិតជយលាភីអាហារូបករណ៍លោក សំ សុភាព បានលើកឡើងពីការប្តេជ្ញាចិត្តរបស់ខ្លួន និងតំណាងឲ្យនិស្សិតដទៃថា ពួកគេនឹងយកចំណេះដឹង និងបទពិសោធល្អៗដែលទទួលបានពីការសិក្សានៅប្រទេសជប៉ុន មកចូលរួមចំណែកអភិវឌ្ឍប្រទេសជាតិបន្ថែមទៀត។
លោក សុភាព បានថ្លែងថា៖ «តំណាងនិស្សិតជយលាភីអាហារូបករណ៍ JDS និង តំណាងនិស្សិតជយលាភីអាហារូបករណ៍ MEXT ថ្លែងអំណរគុណយ៉ាងជ្រាលជ្រៅជូនចំពោះឯកឧត្តមបណ្ឌិត ហ៊ុន ម៉ាណែត ដែលបានរៀបចំពិធីជួបជុំប្រកបដោយភាពរីករាយ និងស្និទ្ធស្នាលនេះឡើង»។
យុវជន សំ សុភាព បានបញ្ជាក់ថា៖ «[ខ្ញុំ] ប្តេជ្ញាចិត្តថានឹងយកចំណេះដឹង និងបទពិសោធល្អៗដែលទទួលបានពីប្រទេសជប៉ុនមកចូលរួមចំណែកអភិវឌ្ឍប្រទេសជាតិដែលកំពុងតែមានការអភិវឌ្ឍស្រាប់ ក្រោមមាគ៌ាដឹកនាំ និងម្លប់សន្តិភាពរបស់សម្តេចតេជោនាយករដ្ឋមន្ត្រី [ហ៊ុន សែន] ដែលបានប្រែក្លាយប្រទេសពីបាតដៃទទេរហូតស្មើមុខ ស្មើសិទ្ធិ ទាំងក្នុងតំបន់ និងក្នុងសកលលោក»៕