ភ្នំពេញៈ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ ១៩ កាលពីថ្ងៃទី ៧ ខែ មេសា ឆ្នាំ ២០២១ បានសម្រេចបង្កើតនីតិវិធីប្រតិបត្តិស្ដង់ដាសម្រាប់គ្រប់គ្រង ថែទាំ និងព្យាបាលអ្នកជំងឺកូវីដ ១៩ នៅតាមផ្ទះ ដោយយោងតាមអនុសាសន៍របស់លោក ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា។
យោងតាមឯកសារ ១៥ ទំព័រនៃនីតិវិធីប្រតិបត្តិស្តង់ដានេះបានបង្ហាញពីគោលបំណង ដើម្បីកំណត់វិធាន និងនីតិវិធីសម្រាប់គ្រប់គ្រង ថែទាំ និងព្យាបាលអ្នកជំងឺកូវីដ ១៩ កម្រិតគ្មានរោគសញ្ញា និងកម្រិតស្រាល។
ឯកសារនេះបានបញ្ជាក់ថា តាមការប៉ាន់ស្មាននៅក្នុងប្រទេសកម្ពុជាមានអ្នកជំងឺកូវីដ ១៩ ចំនួន ៨០ ភាគរយ ស្ថិតក្នុងកម្រិតគ្មានរោគសញ្ញា និងកម្រិតស្រាល ដូច្នេះអ្នកជំងឺកូវីដ ១៩ កម្រិតស្រាលដែលគ្មានកត្តាប្រឈមអាចទទួលការព្យាបាលនៅតាមផ្ទះ ក្រោមការគ្រប់គ្រង ថែទាំ និងព្យាបាលជាប់ជាប្រចាំដោយមន្ត្រីបុគ្គលិកសុខាភិបាល និងអ្នកស្ម័គ្រចិត្តដែលទទួលការបណ្តុះបណ្តាលត្រឹមត្រូវដើម្បីអនុវត្តនៅតាមមូលដ្ឋាន និងតាមការវាយតម្លៃផ្ទះរបស់អ្នកជំងឺឱ្យបានហ្មត់ចត់ជាមុនពីមន្ត្រី និងបុគ្គលិកពាក់ព័ន្ធ។
ឯកសារនេះបានបញ្ជាក់ថា៖ «ការដាក់អ្នកជំងឺកូវីដ ១៩ ឱ្យនៅដាច់ដោយឡែកព្យាបាលនៅតាមផ្ទះមានសារៈសំខាន់ជួយកាត់បន្ថយបន្ទុកប្រព័ន្ធសុខាភិបាល ដោយផ្ដល់ឱ្យមូលដ្ឋានថែទាំ និងព្យាបាលអ្នកជំងឺកូវីដ ១៩ នូវលទ្ធភាពបន្ថែមទៀតក្នុងការគ្រប់គ្រងករណីជំងឺកូវីដ ១៩ ធ្ងន់ធ្ងរ និងសង្គ្រោះបន្ទាន់កម្រិតធ្ងន់»។
ឯកសារនេះក៏បានបញ្ជាក់ថា ផ្អែកលើបទពិសោធជាក់ស្ដែងនៃមន្ទីរពេទ្យមិត្តភាពខ្មែរ-សូវៀតបានឱ្យដឹងថា ៥ ភាគរយ នៃអ្នកជំងឺកូវីដ ១៩ ត្រូវការសង្គ្រោះបន្ទាន់កម្រិតធ្ងន់ (ICU) ១៥ ភាគរយត្រូវការសង្គ្រោះបន្ទាន់ (Emergency) និង ៨០ ភាគរយត្រូវការតាមដាន និងត្រួតពិនិត្យសុខភាព។
ករណីគ្មានរោគសញ្ញា ឬគ្មានសញ្ញានៃការបង្ករោគ គឺជាករណីស្រាលដែលអ្នកជំងឺមានផ្តាសាយ ហៀរសំបោរ ឈឺបំពង់ក ឈឺសាច់ដុំ និងសន្លាក់ កម្ដៅតិចជាង ៣៨ អង្សាសេ និងកំហាប់អុកស៊ីហ្ស៊ែនចាប់ពី ៩៥ ភាគរយឡើង និងចង្វាក់ដង្ហើមធម្មតា (១៨- ២០ ដងក្នុង ១ នាទីសម្រាប់មនុស្សពេញវ័យ) និងមិនមែនជាជនងាយប្រឈម (ស្ត្រីមានផ្ទៃពោះ កុមារ និងចាស់ជរា)។
យោងតាមឯកសារនេះបានឱ្យដឹងថា៖ «ក្រសួងសុខាភិបាលបានឱ្យដឹងថា ក្នុងករណី ៧០ ទៅ ៨០ ភាគរយនៃចំនួនគ្រែសម្រាកពេទ្យត្រូវបានប្រើប្រាស់ គណៈកម្មការប្រយុទ្ធនឹងជំងឺកូវីដ ១៩ ថ្នាក់រាជធានី-ខេត្តត្រូវចាប់ផ្តើមអនុវត្តគោលការណ៍ព្យាបាលនៅតាមផ្ទះដោយរក្សាទុក ២០ ទៅ ៣០ ភាគរយនៃចំនួនគ្រែសម្រាកពេទ្យសម្រាប់អ្នកជំងឺដែលមិនអាចអនុវត្តគោលការណ៍ព្យាបាលនៅតាមផ្ទះ។ ការអនុវត្តការព្យាបាលនៅតាមផ្ទះនេះអាចចាប់ផ្តើមនៅរាជធានី-ខេត្តណាមួយ អាស្រ័យទៅតាមស្ថានភាពផ្ទុះជំងឺកូវីដ ១៩ ថ្មីកើនឡើងច្រើនគួរឱ្យកត់សម្គាល់ ដោយមិនចាំបាច់ចាប់ផ្តើមនៅទូទាំងប្រទេសឡើយ»។
ដោយឡែកនៅថ្ងៃម្សិលមិញនេះ ក្រសួងសុខាភិបាលបានរកឃើញអ្នកឆ្លងវីរុសកូវីដ១៩ បន្ថែមទៀតរហូតដល់ ១១៣ នាក់ ដែលសុទ្ធតែជាអ្នកឆ្លងក្នុងសហគមន៍ទាំងអស់ក្នុងរយៈពេលតែ ១ ថ្ងៃ ចំណែកអ្នកស្លាប់រកឃើញ ២ នាក់បន្ថែម ប៉ុន្តែក៏មានអ្នកព្យាបាលជាសះស្បើយចំនួន ៩០ នាក់ផងដែរ។
យោងតាមសេចក្តីប្រកាសរបស់ក្រសួងសុខាភិបាលនៅថ្ងៃទី ៨ ខែមេសា នេះ បានឱ្យដឹងថា អ្នកជំងឺដែលបានរកឃើញមានវិជ្ជមានកូវីដ១៩ នេះមានជនជាតិខ្មែររហូតដល់ ១០៩ នាក់ និង ៤ នាក់ផ្សេងទៀតជាជនជាតិចិន។
អ្នកដែលឆ្លងថ្មីនេះកើតឡើងច្រើនជាងគេ គឺនៅរាជធានីភ្នំពេញរហូតដល់ ១០៣ នាក់ ខណៈដែលខេត្តព្រះសីហនុ ខេត្តកណ្តាល និងខេត្តស្វាយរៀង មានចំនួន ៣ នាក់ៗដូចគ្នា និងខេត្តកំពតមានចំនួន ១ នាក់។ ក្រសួងក៏បានប្រកាសពីករណីស្លាប់ដោយសារជំងឺកូវីជ ១៩ របស់បុរសជនជាតិខ្មែរចំនួន ២ នាក់អាយុ ៦៨ ឆ្នាំ និងអាយុ ៤៩ ឆ្នាំ នៅមន្ទីរពេទ្យហ្លួងម៉ែផងដែរកាលពីព្រឹកថ្ងៃទី ៧ ខែ មេសា ឆ្នាំ ២០២១។
តាមការសន្និដ្ឋានរបស់គ្រូពេទ្យ ករណីអ្នកជំងឺទាំង ២ នាក់ ដែលបានស្លាប់នេះគឺដោយសារវិបត្តិផ្លូវដង្ហើមស្រួចស្រាល់ ធ្ងន់ធ្ងរ បណ្ដាលមកពីវីរុសកូវីដ-១៩ ដែលក្រុមគ្រូពេទ្យមិនអាចជួយសង្គ្រោះជីវិតបាន។ គិតត្រឹមព្រឹកថ្ងៃទី ៨ ខែមេសា ឆ្នាំ ២០២១ នេះ កម្ពុជាមានអ្នកមានវីរុសកូវីដ១៩ សរុបចំនួន ៣ ០២៨ នាក់ ក្នុងនោះអ្នកដែលឆ្លងក្នុងព្រឹត្តិការណ៍សហគមន៍ ២០ កុម្ភៈ កើនដល់ ២ ៤៩៦ នាក់អ្នកដែលបានព្យាបាលជាសះស្បើយសរុបចំនួន ១ ៩១៤ នាក់ អ្នកកំពុងព្យាបាលចំនួន ១ ០៨៥ នាក់ និងអ្នកស្លាប់ដោយសារជំងឺកូវីដ នេះបានកើនឡើងរហូតដល់ចំនួន ២៤ នាក់៕