.jpg)
នគរបាលបង្ហាញនេន ២ អង្គដែលត្រូវបានផ្សឹក។ រូបថត សហការី
ភ្នំពេញៈ លោកនេន ៤ អង្គគង់នៅវត្ត ២ ផ្សេងគ្នាត្រូវបានកម្លាំងនគរបាលប្រឆាំងគ្រឿងញៀននៃស្នងការដ្ឋាននគរបាលខេត្តកំពតចាប់បញ្ជូនឲ្យព្រះចៅអធិការវត្តផ្សឹកហើយនាំយកទៅធ្វើការអប់រំណែនាំនៅក្នុងមជ្ឈមណ្ឌលបន្សាបគ្រឿងញៀន ខណៈយុវជនម្នាក់ទៀតដែលបាននាំយកគ្រឿងញៀន ទៅលក់ចែកចាយនៅក្នុងវត្តត្រូវបានចាប់បញ្ជូនទៅកាន់តុលាការ ហើយតុលាការបញ្ជាឲ្យនាំយកទៅឃុំខ្លួនជាបណ្ដោះអាសន្នដោយចោទប្រកាន់ពីបទ «ជួញដូរគ្រឿងញៀន»។
លោក ម៉ៅ ច័ន្ទមធុរិទ្ធ ស្នងការនគរបាលខេត្តកំពតបានប្រាប់ភ្នំពេញប៉ុស្តិ៍នៅថ្ងៃអាទិត្យថា កាលពីថ្ងៃសុក្រ (២០-៣-២០២០) ក្រុមកម្លាំងនគរបាលបង្ក្រាបបទល្មើសគ្រឿងញៀននៃស្នងការដ្ឋាននគរបាលខេត្តកំពតបានបង្ក្រាបចាប់ឃាត់ខ្លួនព្រះសង្ឃ ៤ អង្គក្នុងនោះ ២ អង្គគង់នៅវត្តដងទង់ថ្មីស្ថិតក្នុងភូមិត្រពាំងសេះ ឃុំល្អាង ស្រុកដងទង់ និង ២ អង្គទៀតគង់នៅវត្តក្រាំងស្បូវ ស្ថិតក្នុងភូមិ-ឃុំក្រាំងស្បូវ ស្រុកឈូក ព្រមទាំងយុវជនម្នាក់ទៀតពីបទប្រើប្រាស់ និង ជួញដូរគ្រឿងញៀនខុសច្បាប់។
លោក មធុរិទ្ធ បានបន្តថា ក្រោយការឃាត់ខ្លួនព្រះសង្ឃទាំង ៤ អង្គត្រូវបាននាំយកទៅប្រគល់ជូនព្រះចៅអធិការវត្ត ដើម្បីរៀបចំពិធីផ្សឹកទៅតាមប្រពៃណីព្រះពុទ្ធសាសនា រួចនាំខ្លួនទៅសាកសួរ និងអប់រំណែនាំឲ្យធ្វើកិច្ចសន្យាបញ្ឈប់ការប្រើប្រាស់គ្រឿងញៀន ហើយអនុញ្ញាតឲ្យត្រឡប់ទៅជួបជុំក្រុមគ្រួសារវិញ ប៉ុន្តែឪពុកម្ដាយរបស់ពួកគេបានស្នើសុំឲ្យសមត្ថកិច្ចជួយបន្សាបគ្រឿងញៀនដល់ពួកគេ។
លោកបានបញ្ជាក់ថា៖ «ដោយសារអតីតសង្ឃទាំង ៤ អង្គជាជនរងគ្រោះដោយការប្រើប្រាស់គ្រឿងញៀន សមត្ថកិច្ចយើងមិនបានកសាងសំណុំរឿងបញ្ជូនទៅកាន់តុលាការទេ គឺបានអប់រំណែនាំឲ្យបញ្ឈប់ការប្រើប្រាស់គ្រឿងញៀន ហើយបានប្រគល់ឲ្យឪពុក ម្ដាយ របស់ពួកគេនាំយកត្រឡប់ទៅផ្ទះវិញ ប៉ុន្តែឪពុកម្ដាយពួកគេបានស្នើសុំឲ្យយើងជួយបន្សាបគ្រឿងញៀនដល់ពួកគេ ដូច្នេះសមត្ថកិច្ចយើងក៏បានបញ្ជូនពួកគេទៅកាន់មជ្ឈមណ្ឌលបន្សាបគ្រឿងញៀនខេត្តកំពតជាបណ្ដោះអាសន្ន»។
លោកបានបន្ថែមថា ដោយឡែកជនសង្ស័យឈ្មោះ សួន សីហា អាយុ ២២ ឆ្នាំមានលំនៅក្នុងភូមិត្រពាំងឈូក ឃុំមានរិទ្ធ ស្រុកដងទង់ ខេត្តកំពតដែលជាមុខសញ្ញាជួញដូរគ្រឿងញៀននៅតាមវត្តអារាមដែលសមត្ថកិច្ចបានតាមដានជាច្រើនខែមកហើយនោះត្រូវបានមន្ត្រីជំនាញផ្នែកបង្ក្រាបគ្រឿងញៀនកសាងសំណុំរឿងបញ្ជូនទៅកាន់តុលាការ ហើយកាលពីល្ងាចថ្ងៃសៅរ៍ដោយតុលាការខេត្តកំពតក៏បានសម្រេចឲ្យនាំជនសង្ស័យរូបនេះទៅឃុំខ្លួនជាបណ្ដោះអាសន្ននៅក្នុងពន្ធនាគារខេត្តដោយចោទប្រកាន់ពីបទ «ជួញដូរគ្រឿងញៀន»។
យោងតាមរបាយការណ៍របស់នគរបាលការិយាល័យបង្ក្រាបគ្រឿងញៀនខេត្តកំពត ព្រះសង្ឃដែលត្រូវបានឃាត់ខ្លួនពីបទប្រើប្រាស់គ្រឿងញៀនខាងលើនេះមានព្រះជន្មពី ១៥ ឆ្នាំដល់ ១៧ ឆ្នាំ។
ជុំវិញករណីព្រះសង្ឃវ័យក្មេងសេពគ្រឿងញៀននេះប្រជាកសិករនៅស្រុកឈូក ខេត្តកំពតលោក ហេង ភារៈ អាយុ ៥៦ ឆ្នាំបានកត់សម្គាល់ថា កន្លងមកមានឪពុកម្ដាយខ្លះបានស្នើសុំឲ្យគ្រូឧបជ្ឈាយ៍ ដែលជាមេគណ ឬអនុគណនៅតាមបណ្ដាស្រុក ឬខេត្តមួយចំនួនជួយបំបួសកូនរបស់ពួកគេដែលប្រដៅលែងស្ដាប់ ដើម្បីឲ្យក្លាយជាសង្ឃដោយសង្ឃឹមថា កូនៗរបស់ពួកគេនឹងក្លាយជាមនុស្សល្អឡើងវិញ។
ប៉ុន្តែពួកគេមិនបានគិតដល់ចំណុចអវិជ្ជមាន ដែលអាចនឹងកើតមានក្រោយពីកូនៗរបស់ពួកគាត់ក្លាយជាសង្ឃ ហើយនាំទុក្ខដល់ព្រះសង្ឃដទៃទៀត រួមទាំងធ្វើឲ្យប៉ះពាល់ដល់គុណតម្លៃនៃព្រះពុទ្ធសាសនា ដែលជាសាសនារបស់រដ្ឋ ដោយសារតែអត្តចរិតអាក្រក់ពីកំណើតរបស់ពួកគេដែលមិនព្រមបោះបង់ចោលនោះទេ។
លោក ភារៈ បានថ្លែងថា៖ «មុនពេលបំបួសបុគ្គលណាម្នាក់ជាសង្ឃគប្បីត្រូវដឹងពីសាវតាររបស់បុគ្គលនោះឲ្យបានច្បាស់ បើពុំនោះទេនឹងមានផលប៉ះពាល់ដល់សេចក្ដីថ្លៃថ្នូររបស់ព្រះសង្ឃ និងអាប់ឱនដល់វិស័យព្រះពុទ្ធសាសនារបស់យើង»។
ព្រះតេជគុណ ប៉េង សំអាត អនុគណស្រុកដងទង់បានមានព្រះថេរដីកាប្រាប់ភ្នំពេញប៉ុស្តិ៍ថា ក្នុងនាមជាគ្រូឧបជ្ឈាយ៍ ព្រះអង្គមិនអាចបដិសេធចំពោះលិខិតបញ្ជាក់ពីអាជ្ញាធរមូលដ្ឋានដែលបានអះអាងចំពោះបុគ្គលដែលត្រូវបានស្នើសុំឲ្យមានការបំបួសជាសង្ឃនោះឡើយ។
ព្រះអង្គមានព្រះថេរដីកាថា៖ «មុនពេលបំបួសបុគ្គលណាម្នាក់ជាសង្ឃ អាត្មាតែងតែទាមទារឲ្យឪពុកម្ដាយ ឬអាណាព្យាបាលរបស់បុគ្គលនោះបង្ហាញនូវលិខិតបញ្ជាក់ពីសាវតារ និងលិខិតបញ្ជាក់សុខភាពរបស់បុគ្គលនោះពីអាជ្ញាធរដែនដី និងមណ្ឌលសុខភាព ដែលពួកគេរស់នៅ។ មិនមែនអាត្មាចេះតែបំបួសពួកគេដោយចិត្តឯងនោះទេ»។
ពាក់ព័ន្ធករណីនេះលោក សេង សុមុនី រដ្ឋលេខាធិការ និង ជាអ្នកនាំពាក្យក្រសួង ធម្មការ និងសាសនាបានប្រាប់ភ្នំពេញ-ប៉ុស្តិ៍ថា ជាការពិតបញ្ហាប្រឈមនៅក្នុងវិស័យព្រះពុទ្ធសាសនានៅកម្ពុជានាពេលបច្ចុប្បន្នគឺភាគច្រើនកើតឡើងពីបុគ្គលដែលមកពីខាងក្រៅសហគមន៍។
លោកថ្លែងថា៖ «ករណីបុគ្គលសង្ឃសេពគ្រឿងញៀនក្នុងខេត្តកំពតនេះគឺបណ្ដាលមកពីបុគ្គលមកពីក្រៅចូលទៅល្បួង បញ្ឆោតឲ្យនេនតូចៗទាំងនោះ សាកល្បងប្រើប្រាស់គ្រឿងញៀនដោយយកទៅលាយជាមួយភេសជ្ជៈកូកាកូឡាដែលការសាកល្បងនេះធ្វើឲ្យនេនទាំងនោះញៀន ហើយក្លាយទៅជាជនរងគ្រោះក្នុងអំពើសេពគ្រឿងញៀន»។
បើតាមប្រសាសន៍របស់លោក សុមុនី ករណីបែបនេះមិនមែនទើបតែកើតមាននៅក្នុងខេត្តកំពតនោះទេគឺធ្លាប់កើតមាននៅតាមខេត្តមួយចំនួនរួចមកហើយកាលពីប៉ុន្មានឆ្នាំមុនដែលនាំឲ្យក្រសួងធម្មការ និងសាសនារួមទាំងសម្ដេចសង្ឃនាយកទាំង ២ គណៈបានឯកភាពគ្នាចេញនូវសង្ឃប្រកាស និងសេចក្ដីណែនាំមួយចំនួន ដើម្បីឲ្យសង្ឃទាំងអស់គោរពប្រតិបត្តិ ពិសេសព្រះសង្ឃដែលមានតួនាទីជាគ្រូឧបជ្ឈាយ៍។ ក្នុងនោះគឺមានការហាមបំបួសបុគ្គលដែលមកពីក្រៅសហគមន៍មូលដ្ឋាន ឬបុគ្គលដែលធ្លាប់មានប្រវត្តិមិនល្អ (ធ្លាប់ប្រព្រឹត្តបទល្មើស) ពីមុនជាដើម៕
