ភ្នំពេញ៖ ក្រសួងប្រកាសរកឃើញឆ្លងវីរុសកូវីដ១៩ ចំនួន៤៤នាក់បន្ថែមទៀត ក្នុងចំណោមនោះម្នាក់ជាអ្នកដំណើរមកពីបរទេសនិង៤៣នាក់ផ្សេងទៀត ជាអ្នកឆ្លងក្នុងព្រឹត្តិការណ៍សហគមន៍២០កុម្ភៈ ដែលធ្វើឱ្យករណីឆ្លងសរុបក្នុងព្រឹត្តិការណ៍នេះ មានរហូតដល់២១៥៩នាក់ និងស្លាប់១៩នាក់។
យោងតាមសេចក្តីជូនដំណឹងរបស់ក្រសួងសុខាភិបាល បានឱ្យដឹងនៅព្រឹកថ្ងៃអាទិត្យ ទី០៤ ខែមេសា ឆ្នាំ២០២១នេះថា រកឃើញអ្នកឆ្លងជំងឺកូវីដ១៩ចំនួន៤៤នាក់បន្ថែមទៀត ប៉ុន្តែមានអ្នកជាសះស្បើយ ៦៨នាក់ដែលក្នុងនោះមាន៦៧នាក់ជាអ្នកជំងឺពាក់ព័ន្ធនឹងព្រឹត្តិការណ៍សហគមន៍២០កុម្ភៈ។
ក្រសួងបន្តថា អ្នកដែលឆ្លងថ្មីនេះ មាននៅរាជធានីភ្នំពេញចំនួន២៥នាក់ ខេត្តព្រះសីហនុចំនួន១៧នាក់ និងខេត្តស្វាយរៀងចំនួនម្នាក់។ ជាមួយគ្នានេះដែរ អ្នកជំងឺចំនួន៩នាក់ កំពុងរង់ចាំបញ្ជូនទៅកន្លែងសម្រាកព្យាបាល។
អ្នកជំងឺម្នាក់ដែលជាអ្នកដំណើរគឺជាជនជាតិប៉ាគីស្ថាន អាយុ៤៦ឆ្នាំ ស្នាក់នៅរាជធានីភ្នំពេញ ជាអ្នកដំណើរមកពីប្រទេសកូរ៉េខាងត្បួង មកដល់កម្ពុជានៅថ្ងៃទី២១ ខែមីនា ឆ្នាំ២០២១ ដែលលទ្ធផលធ្វើតេស្តវត្ថុសំណាកស្រ្តីរូបនេះលើកទី០២ដោយវិទ្យាស្ថានប៉ាស្ទ័រកម្ពុជាគឺវិជ្ជមានមេរោគកូវីដ។
គិតត្រឹមព្រឹក ថ្ងៃទី០៤ ខែមេសា ឆ្នាំ២០២១ កម្ពុជាមានអ្នកឆ្លងជំងឺកូវីដ១៩ សរុបចំនួន ២៦៨៩ នាក់ អ្នកជាសះស្បើយចំនួន១៦៥៣នាក់ អ្នកកំពុងសម្រាកព្យាបាលចំនួន ១០១២ នាក់ និងអ្នកស្លាប់ចំនួន១៩ នាក់៕