.jpg)
គ្រូពេទ្យធ្វើការយកសំណាក ដើម្បីធ្វើតេស្តរកមេរោគកូវីដ ១៩ នាពេលកន្លងមក។ TYDA PAGE
ភ្នំពេញៈ ថ្ងៃនេះ ក្រសួងសុខាភិបាលរកអ្នកឆ្លងថ្មីបន្ថែមទៀតចំនួន ៦៣ នាក់ទៀត ដែលសុទ្ធតែជាអ្នកឆ្លងក្នុងព្រឹត្តិការណ៍សហគមន៍ ២០ កុម្ភៈ ខណៈមានអ្នកជាសះស្បើយរហូតដល់ ៩៤ នាក់។ ក្រសួងក៏បានប្រកាសពីករណីស្លាប់ជនជាតិចិនម្នាក់ទៀតកាលពីយប់ថ្ងៃអាទិត្យទី ៤ ខែមេសា ម្សិលមិញនេះ។
យោងតាមរបាយការណ៍ក្រសួងសុខាភិបាលនៅថ្ងៃទី ៥ ខែ មេសា ឆ្នាំ ២០២១ បានឱ្យដឹងថា ករណីឆ្លងថ្មីនេះមាននៅរាជធានីភ្នំពេញចំនួន ៣០ នាក់ ខេត្តស្វាយរៀងចំនួន ២២ នាក់ ខេត្តព្រះសីហនុចំនួន ៦ នាក់ និង ៤ ខេត្តផ្សេងទៀតមានអ្នកឆ្លង ១ ករណីៗដូចគ្នា គឺខេត្តកណ្ដាល ខេត្តព្រៃវែង ខេត្តកោះកុង និងខេត្តកំពង់ឆ្នាំង។
គិតត្រឹមព្រឹកថ្ងៃទី ៥ ខែ មេសា ឆ្នាំ ២០២១ នេះ កម្ពុជាមានអ្នកឆ្លងវីរុសកូវីដ ១៩ សរុបចំនួន ២ ៧៥២ នាក់ ក្នុងនោះសរុបអ្នកឆ្លងក្នុងព្រឹត្តិការណ៍ ២០ កុម្ភៈ មានចំនួន ២ ២២២ នាក់ អ្នកជាសះស្បើយទូទាំងប្រទេសចំនួន ១ ៧៤៧ នាក់ អ្នកកំពុងព្យាបាលចំនួន ៩៧៩ នាក់ និងអ្នកស្លាប់ចំនួន ២១ នាក់។
នៅព្រឹកថ្ងៃនេះដែរក្រសួងសុខាភិបាលបានប្រកាសពីករណីស្លាប់បុរសជនជាតិចិនអាយុ ៤២ ឆ្នាំម្នាក់ ដោយសារជំងឺកូវីដ ១៩ កាលពីម៉ោង ១០ យប់ថ្ងៃទី ៤ ខែមេសា នៅមន្ទីរពេទ្យមិត្តភាពខ្មែរ-សូវៀត។
បើតាមក្រសួងសុខាភិបាល បុរសរូបនេះរស់នៅ Appartment PRINCE TOWER សង្កាត់វាលវង់ ខណ្ឌ៧មករា រាជធានីភ្នំពេញ។ អ្នកជំងឺខាងលើត្រូវបានរកឃើញ វិជ្ជមានកូវីដ ១៩ នៅថ្ងៃទី ២៧ ខែ មីនា ឆ្នាំ ២០២១ ហើយត្រូវបានដាក់ឱ្យសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត នៅថ្ងៃដដែលនោះផងដែរ។
ប្រភពដដែលថា៖ «ដោយស្ថានភាពអ្នកជំងឺ មានសភាពធ្ងន់ធ្ងរតាំងពីចូលសម្រាកពេទ្យដំបូង តម្រូវឱ្យក្រុមគ្រូពេទ្យប្រើប្រាស់ម៉ាស៊ីនជំនួយដង្ហើមតាំងពីថ្ងៃចូលសម្រាកពេទ្យដំបូង តែទោះបីជាក្រុមគ្រូពេទ្យបានខិតខំជួយសង្គ្រោះតាមលក្ខណៈបច្ចេកទេសយ៉ាងណាក៏ដោយក៏មិនអាចជួយអ្នកជំងឺបាន ហើយស្ថានភាពអ្នកជំងឺកាន់តែធ្ងន់ធ្ងរឡើងៗ ដែលបណ្តាលឱ្យអ្នកជំងឺបានស្លាប់បាត់បង់ជីវិតតែម្តង»។
ការសន្និដ្ឋានរបស់ក្រុមគ្រូពេទ្យបុរសជនជាតិចិននេះបានស្លាប់បាត់បង់ជីវិតដោយសារខ្សោយសួតធ្ងន់ធ្ងរ និងរលាកសួតទាំងសងខាង ដោយសារជំងឺកូវីដ ១៩៕
