ភ្នំពេញ៖ ក្រសួងសុខាភិបាលបានប្រកាសពីការរកឃើញអ្នកឆ្លងកូវីដរហូតដល់ចំនួន ៦៥៥ នាក់បន្ថែមទៀត និងមានអ្នកជាសះស្បើយចំនួន ២២៤ នាក់ ខណៈក្រសួងបន្ថែមកន្លែងចាក់វ៉ាក់សាំងក្នុងរាជធានីភ្នំពេញបន្ថែមទៀត។
តាមរបាយការណ៍របស់ក្រសួងនៅថ្ងៃនេះ បានឲ្យដឹងថា ការរកឃើញថ្មីនេះ បានធ្វើឲ្យកម្ពុជាមានចំនួនអ្នកឆ្លងជំងឺកូវីដ ១៩ សរុបជិត ៩ ពាន់នាក់ ខណៈករណីស្លាប់សរុបទូទាំងប្រទេសចំនួន ៦១ នាក់។
របាយការណ៍ក្រសួងបញ្ជាក់ថា៖ «នៅថ្ងៃទី ២២ មេសា ឆ្នាំ ២០២១ មានករណីឆ្លងសហគមន៍ ៦៥៤ នាក់ និងអ្នកដំណើរពីបរទេស ០១ នាក់។ ក្នុងនោះ មានអ្នកស្លាប់ថ្មីចំនួន ២ នាក់។ ភ្នំពេញមានចំនួន ៥២២ នាក់ ព្រះសីហនុ ១១៣ នាក់ ខេត្តកណ្ដាល ៥ នាក់ តាកែវ ៥ នាក់ កំពង់ចាម ៣ នាក់ ខេត្តកែប ៣ នាក់ និង មណ្ឌលគិរី ត្បូងឃ្មុំ កំពង់ស្ពឺ មួយករណីៗ»។
ជាមួយនឹងការប្រកាសនេះ គណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសក៏បានប្រកាសពីការបន្ថែមទីតាំងចាក់វ៉ាក់់សាំងស៊ីណូវ៉ាក់ដូសទី២ ក្នុងខណ្ឌទួលគោក ចំនួន ១ កន្លែងទៀតផងដែរ ដើម្បីឲ្យដំណើរការនៃការចាក់វ៉ាក់សាំងក្នុងអំឡុងពេលបិទខ្ទប់នេះ មានដំណើរការល្អ។
សេចក្តីជូនដំណឹងរបស់គណៈកម្មការនេះ បានបញ្ជាក់ថា៖ «សម្រេចបន្ថែមទីតាំងចាក់វ៉ាក់សាំងក្នុងខណ្ឌទួលគោកចំនួន ១ ទីតាំងបន្ថែមទៀត គឺនៅមន្ទីរពេទ្យកុមារជាតិ ដែលចាប់បើកដំណើរការចាក់វ៉ាក់សាំងស៊ីណូវ៉ាក់ដូសទី២ ពីថ្ងៃទី ២៤ ដល់ថ្ងៃទី ៣០ ខែ មេសា ឆ្នាំ ២០២១»។
ដូចនេះ ក្រសួងអំពាវនាវសូមបុគ្គលដែលដល់វេនចាក់វ៉ាក់សាំងស៊ីណូវ៉ាក់ដូសទី២ អញ្ជើញទៅចាក់វ៉ាក់សាំងនៅទីតាំងក្នុងមូលដ្ឋានដែលខ្លួនកំពុងស្នាក់នៅ ដោយមិនត្រូវឆ្លងខណ្ឌជាដាច់ខាត ខណៈការចាក់វ៉ាក់សាំងស៊ីណូហ្វាម (Sinopharm) និងស៊ីណូវ៉ាក់ (Sinovac) ដូសទី២ អាចចាក់អំឡុងពេលពី ១៤ ទៅ ២៨ ថ្ងៃ បន្ទាប់ពីការចាក់វ៉ាក់សាំងដូសទី១។
បន្ថែមពីនេះ ក្រសួងស្នើដល់បុគ្គលដែលបានយកសំណាក ឬកំពុងជាប់វិធានចត្តាឡីស័ក ត្រូវអនុវត្តការធ្វើចត្តាឡីស័កឱ្យបានត្រឹមត្រូវ តាមការណែនាំរបស់ក្រសួងសុខាភិបាល ទើបអាចទៅចាក់វ៉ាក់សាំងដូសទី២ បាន ដើម្បីចៀសវាងការចម្លងណាមួយដល់អ្នកដទៃ ក៏ដូចជាការប្រឈមចំពោះផ្លូវច្បាប់ជាធរមាន៕