.jpg)
នាយក NPA និងលោក លី ធុជ នៅក្នុងពិធីចុះហត្ថលេខា កាលពីថ្ងៃទី ៥ ខែមិថុនា ឆ្នាំ ២០២០។ រូបថត អាជ្ញាធរមីន
ភ្នំពេញ: រដ្ឋាភិបាលន័រវែស តាមរយៈអង្គការ NPA នឹងបន្តផ្ដល់ជំនួយចំនួនជាង ៥ លានដុល្លារបន្ថែមទៀតដល់កម្ពុជា ដើម្បីបម្រើឲ្យសកម្មភាពបោសសម្អាតមីនក្នុងរយៈពេល ៥ ឆ្នាំទៅមុខទៀតគឺចាប់ពីឆ្នាំ ២០២០ ដល់ឆ្នាំ ២០២៥ ខណៈ NPA បានក្លាយជាប្រតិបត្តិករ សកម្មខាងបោសសម្អាតមីនដែលមានសមត្ថភាព និងវិជ្ជាជីវៈខ្ពស់នៅកម្ពុជា។
លោក លី ធុជ ទេសរដ្ឋមន្ត្រីទទួលបន្ទុកបេសកកម្មពិសេស និងជាអគ្គលេខាធិការ អាជ្ញាធរមីនប្រាប់ភ្នំពេញប៉ុស្ដិ៍ពីម្សិលមិញថា រដ្ឋាភិបាលប្រទេសន័រវែសតាមរយៈអង្គការ NPA (Norwegian People''s Aid) ប្រចាំកម្ពុជា បានសម្រេចផ្ដល់ជំនួយដល់រាជរដ្ឋាភិបាលកម្ពុជាប្រមាណជាង ៥ លានដុល្លារ សម្រាប់បម្រើឲ្យវិស័យបោសសម្អាតមីនដោយក្នុង ១ ឆ្នាំត្រូវចំណាយជាង ១ លានដុល្លារចាប់ពីឆ្នាំ ២០២០ ដល់ឆ្នាំ ២០២៥។
អង្គការ NPA មានវត្តមាននៅកម្ពុជាតាំងពីឆ្នាំ ១៩៩៣ ដោយបានជួយលើគម្រោងសកម្មភាពមីនជាទឹកប្រាក់សរុបជាង ២០ លានដុល្លារ ព្រមទាំងជួយលើការបណ្ដុះបណ្ដាលធនធានមនុស្ស និងបង្ហាត់សុនខឲ្យចេះហិតមីនផងដែរ។
លោក លី ធុជ បានបញ្ជាក់ថា៖ «ក្រៅពីប្រទេសន័រវែស យើងនៅមានសហរដ្ឋអាមេរិក អូស្ត្រាលី ជប៉ុន អាល្លឺម៉ង់ អង់គ្លេស ចិន អៀរឡង់ កាណាដា ស្វ៊ីស និងប្រទេសមួយចំនួនទៀតដែលបានជួយក្នុងសកម្មភាពបោសសម្អាតមីនកន្លងមក។ រីឯប្រទេសដែលទើបតែជួយយើងលើកដំបូងរួមមាន នូវែលសេឡង់ និងកូរ៉េខាងត្បូងគឺគាត់នឹងជួយយើងលើកដំបូងចាប់ពីឆ្នាំ ២០២១ គឺទំហំទឹកប្រាក់ប្រមាណជាង ១០ លានដុល្លារ»។
លោកបន្ថែមថា គម្រោងនេះបានដោះមីន និងប្រគល់ដីបោសសម្អាតមីនរួចជូនប្រជាជនរាប់ពាន់នាក់ដែលកំពុងរស់នៅអាស្រ័យផលក្នុងសហគមន៍រងផលប៉ះពាល់ ដោយសារសំណល់ជាតិផ្ទុះពីសង្គ្រាម។ ក្រៅពីគម្រោងបោសសម្អាតមីន និងគ្រាប់បែកចង្កោម អង្គការ NPA បានរួមចំណែកក្នុងគម្រោងអភិវឌ្ឍន៍សមត្ថភាពបុគ្គលិកអង្គការ NPA ប្រចាំនៅកម្ពុជាដែលជាលទ្ធផលបានធ្វើឲ្យអង្គការនេះក្លាយជាប្រតិបត្តិករ សកម្មខាងបោសសម្អាតមីនដែលមានសមត្ថភាព និងវិជ្ជាជីវៈខ្ពស់។
តំណាងអង្គការ NPA ប្រចាំកម្ពុជាមិនអាចស្វែងរកប្រភពទាក់ទងសុំការបញ្ជាក់បន្ថែមជុំវិញការផ្ដល់ជំនួយនេះបានទេកាលពីម្សិលមិញ។ ប៉ុន្ដែតាមរយៈរបាយការណ៍ដែលបានបង្ហាញលើគេហទំព័រហ្វេសប៊ុករបស់អង្គការ NPA ដែលបានចុះផ្សាយកាលពីចុងខែមេសាឲ្យដឹងថា តាមគម្រោងដៃគូអង្គការ NPA និងអង្គភាពស៊ីម៉ាក់ (CMAC) ក្នុងរយៈពេល ៣ ខែដំបូងនៃឆ្នាំ ២០២០ ក្រុមការងារបានធ្វើការបោសសម្អាតគ្រាប់បែកចង្កោម និងសំណល់ជាតិផ្ទុះលើផ្ទៃដីសរុបជាង ៥ លាន ៦ សែនម៉ែត្រការ៉េនៅក្នុងអតីតតំបន់ដែលមានសង្គ្រាម។
របាយការណ៍បន្តថា ក្រោយពីបោសសម្អាតមីនរួចតំបន់ទាំងនោះត្រូវបានប្រគល់ជូនប្រជាសហគមន៍ដើម្បីប្រើប្រាស់ប្រកបដោយផលិតភាព និងផ្តល់អត្ថប្រយោជន៍ដល់ប្រជាជនចំនួន ៧៥០ នាក់។ ការងារនេះមានការគាំទ្រ និងធានាគុណភាពពីក្រុមត្រួតពិនិត្យគុណភាពរបស់អង្គការ NPA។ របាយការណ៍បញ្ជាក់ថា ដៃគូ NPA និង CMAC បានបំផ្លាញអាវុធយុទ្ធភណ្ឌមិនទាន់ផ្ទុះចំនួន ៣ ៦២១ គ្រាប់ និងអាវុធយុទ្ធភណ្ឌធុនតូចៗចំនួន ៧ គីឡូក្រាមក្នុងអំឡុងពេលប្រតិបត្តិការបោសសម្អាតមីន ដើម្បីឆ្លើយតបទៅតាមផែនការនៃការបន្សាបយុទ្ធភណ្ឌផ្ទុះ។
បើតាមលោក លី ធុជ អង្គការ NPA គឺជាអង្គការដំបូងគេបង្អស់នៅលើពិភពលោកដែលបានបណ្តុះបណ្តាលសុនខហិតមីន និងបានជួយការងារជាច្រើនដល់មជ្ឈមណ្ឌលស៊ីម៉ាក់ (CMAC) លើការការងារបោសសម្អាតមីនដោយសុនខនៅកម្ពុជា ខណៈប្រទេសន័រវែសតាមរយៈអង្គការ NPA បានបេ្តជ្ញាបន្តគាំទ្រវិស័យបោសសម្អាតមីននៅកម្ពុជា៕
