.jpg)
លោក សម រង្ស៊ី នៅទីក្រុងឡុងដ៍កាលពីថ្ងៃទី ២ ខែកក្កដា។ រូប ហ្វេសប៊ុក
ភ្នំពេញៈ បក្សកាន់អំណាចអះអាងថាការខ្ចីលុយបរទេសសម្រាប់អភិវឌ្ឍ គឺជារឿងស្របតាមច្បាប់ ហើយក៏មិនឈានដល់ការបាត់ទឹកដីអីទេ និងថាសហគមន៍អឺរ៉ុប អាមេរិកក៏ជំពាក់បំណុលបរទេសយ៉ាងច្រើនផងដែរ ដែលការឆ្លើយតបនេះក្រោយពីអតីតមេបក្សប្រឆាំងលោក សម រង្ស៊ី ចាត់ទុកការជំពាក់បំណុលច្រើនវ័ណ្ឌក ក្រោមការដឹកនាំរបស់លោកនាយករដ្ឋមន្ត្រី ហ៊ុន សែន វាដូចជាកំពុងប្រគល់ទឹកដីនៅតាមឆ្នេរសមុទ្រទៅឲ្យចិនគ្រប់គ្រង។
នៅលើបណ្តាញសង្គមហ្វេសប៊ុករបស់ខ្លួនកាលពីថ្ងៃទី ២ កក្កដា លោក សម រង្ស៊ី អតីតប្រធានគណបក្សសង្គ្រោះជាតិដែលជាបក្សប្រឆាំងដ៏ធំ និងបច្ចុប្បន្នប្រធានចលនាសង្គ្រោះជាតិកំពុងនិរទេសខ្លួននៅក្រៅប្រទេសបានលើកឡើងថា កម្ពុជាក្រោមការដឹកនាំរបស់លោក ហ៊ុន សែន ដែលកំពុងតែខ្ចីលុយពីប្រទេសចិនកាន់តែច្រើនឡើងៗកំពុងតែប្រគល់ទឹកដីយ៉ាងច្រើនឲ្យទៅប្រទេសចិនគ្រប់គ្រងនៅតាមឆ្នេរសមុទ្រក្នុងខេត្តព្រះសីហនុ និងខេត្តកោះកុង។
ប៉ុន្តែលោក សុខ ឥសាន អ្នកនាំពាក្យគណបក្សប្រជាជនកម្ពុជាដែលជាបក្សកាន់អំណាចរបស់លោក ហ៊ុន សែន ចាត់ទុកការចោទប្រកាន់របស់លោក សម រង្ស៊ី ថាជាការវាយប្រហាររដ្ឋាភិបាលជាការភូតភរ និងជាការបង្អាប់ជាតិខ្លួនឯង ដើម្បីកេងចំណេញ [នយោបាយ] ។
លោកថ្លែងពីម្សិលមិញ ថា អឺរ៉ុប និងអាមេរិកជំពាក់លុយចិនច្រើនសន្ធឹកសន្ធាប់ដែរ ហេតុអ្វីលោក សម រង្ស៊ី មិនលើកមកនិយាយផង ហើយថាការខ្ចីបំណុលមកកសាងប្រទេសបែបនេះ ក៏ស្របតាមកិច្ចព្រមព្រៀងទីក្រុងប៉ារីសឆ្នាំ ១៩៩១ ដែលមាន ១៨ ប្រទេសចូលរួមផងដែរ។
លោក សុខ ឥសាន សង្កត់ធ្ងន់ថា៖ «អ៊ីចឹងទេ ការជំពាក់បំណុលបរទេសដែលស្ថិតនៅក្នុងក្របខ័ណ្ឌនៃកិច្ចព្រមព្រៀងប៉ារីសមិនមែនជារឿងខុសច្បាប់អីទេ។ ក៏ប៉ុន្តែទណ្ឌិត សម រង្ស៊ី គ្រាន់តែជ្រើសរើសយកចំណុចណាមួយវាយប្រហារមកលើរាជរដ្ឋាភិបាល គណបក្សប្រជាជនកម្ពុជាដែលជាគណបក្សឈ្នះឆ្នោតតែប៉ុណ្ណោះទេ»។
លោកបញ្ជាក់ថា៖ «បើនិយាយពីរឿងថា ធ្វើខ្ញុំចិន ហើយទាក់ទងចិនមិនបានហើយវាយប្រហារយ៉ាងដូច្នោះ ត្រូវនិយាយថាសហគមន៍អឺរ៉ុបដែលធ្វើជំនួញជាមួយចិន សហរដ្ឋអាមេរិក ដែលធ្វើជំនួញជាមួយចិន ហើយអាមេរិកជំពាក់ចិនរហូតដល់ [រាប់ពាន់លានដុល្លារ] មូលហេតុអីបានទណ្ឌិត សម រង្ស៊ី មិននិយាយថាអាមេរិកាំងធ្វើខ្ញុំចិនផង»។
ឆ្លើយតបនឹងការចោទថាកម្ពុជាអាចបាត់ទឹកដីដោយសារបំណុលហិរញ្ញវត្ថុ និងបំណុលនយោបាយនោះលោក សុខ ឥសាន បញ្ជាក់ថាកម្ពុជាមិនបានជំពាក់បំណុលនយោបាយប្រទេសណាមួយនោះទេ ប្រជាពលរដ្ឋមានតាំងពី ៤ លាននាក់ក្រោយរំដោះឆ្នាំ ១៩៧៩ រហូតមកឥឡូវមានដល់ ១៦ លាននាក់កំពុងរស់នៅលើទឹកដី ១៨១០៣៥ គីឡូម៉ែត្រការ៉េ ហើយបើបាត់ប្រជាពលរដ្ឋទៅរស់នៅកន្លែងណា។
ទោះជាយ៉ាងណាលោក សម រង្ស៊ី បញ្ជាក់ថា៖ «លោក ហ៊ុន សែន មានបំណុលហិរញ្ញវត្ថុជាមួយប្រទេសចិន និងបំណុលនយោបាយជាមួយប្រទេសវៀតណាមដែលបានលើកបន្តុបក្រុមគាត់ឲ្យធ្វើជាមេដឹកនាំអាយ៉ងតាំងពីឆ្នាំ ១៩៧៩ មក។ ទាំងបំណុលហិរញ្ញវត្ថុទាំងបំណុលនយោបាយរបស់លោក ហ៊ុន សែន និងក្រុមគាត់ធ្វើឲ្យប្រទេសកម្ពុជាបាត់បង់ទឹកដីឲ្យទៅប្រទេសចិន និងប្រទេសវៀតណាម»។
ជាមួយនឹងការលើកឡើងនេះលោក សម រង្ស៊ី ក៏បានប្រៀបធៀបប្រទេសកម្ពុជាទៅនឹងប្រទេសស្រីលង្កាដែលជាកោះតូចមួយនៅខាងត្បូងប្រទេសឥណ្ឌា ដែលប្រទេសនោះមេដឹកនាំឈ្មោះ Mahinda Rajapaksa បានខ្ចីលុយពីប្រទេសចិនយ៉ាងសន្ធឹកសន្ធាប់ច្រើនឆ្នាំមកហើយដោយមានជាប់ពាក់ព័ន្ធនឹងការប្រព្រឹត្តអំពើពុករលួយ និងផលប្រយោជន៍សម្រាប់បក្ខពួក។
ដោយសារបំណុលនោះកើនឡើងច្រើនពេកហើយប្រទេសស្រីលង្កាមិនមានលុយសងប្រទេសចិន មេដឹកនាំផ្តាច់ការនោះក៏ប្រគល់ទឹកដីនៅតាមមាត់សមុទ្រឲ្យប្រទេសចិនគ្រប់គ្រងតាមរូបភាពសម្បទានរយៈពេល ៩៩ ឆ្នាំ។ ប៉ុន្តែប្រតិកម្មរបស់ប្រជារាស្ត្រស្រីលង្កាបានងើបឈររើបម្រះដោយទម្លាក់ជនផ្តាច់ការនោះពីតំណែង ដើម្បីទាមទារទឹកដីប្រទេសជាតិវិញ។
លោក រង្ស៊ី ថា៖ «ករណីប្រទេសស្រីលង្កាក៏ដូចប្រទេសកម្ពុជាអ៊ីចឹងដែរ ក្រោមការដឹកនាំរបស់លោក ហ៊ុន សែន ដែលកំពុងតែខ្ចីលុយពីប្រទេសចិនកាន់តែច្រើនឡើងៗ...»។
អ្នកស្រាវជ្រាវកិច្ចការសង្គមលោក មាស នី ថ្លែងថាការខ្ចីលុយបរទេសសម្រាប់ការអភិវឌ្ឍប្រទេសនីមួយៗវាជារឿងធម្មតា ហើយប្រទេសខ្លះក៏ជាប់បំណុលបរទេសច្រើនជាងកម្ពុជាទៀតផង ប៉ុន្តែត្រង់ថា តើការខ្ចីលុយបរទេសនោះយកមកសម្រាប់ផលប្រយោជន៍ជាតិទាំងមូលដោយតម្លាភាព ឬសម្រាប់ផលប្រយោជន៍គណបក្ស។
លោក មាស នី ថា៖ «ក្នុងនាមខ្ញុំជាអ្នកតាមដានកិច្ចការសង្គម គឺរដ្ឋាភិបាលកម្ពុជាក៏ត្រូវតែរៀនសូត្រអំពីអ្វីដែលកើតឡើងនៅស្រីលង្កាដែរ។ ទន្ទឹមនឹងនេះដែរដោយសាររចនាសម្ព័ន្ធនយោបាយនៅស្រុកខ្មែរយើងទន់ជ្រាយជាងគេផង ហើយយើងក៏ក្រជាងគេផង អ៊ីចឹងអាហានិភ័យនៃឥទ្ធិពលរបស់ចិននៅក្នុងប្រទេសមួយនេះវានឹងអាចកើតមានច្រើននៅក្នុងពេលខាងមុខ»៕
