The Phnom Penh Post Search

Search form




Logo of Phnom Penh Post newspaper Phnom Penh Post - បក្ស​កាន់​អំណាច​នឹង​បញ្ចប់​តំណែង​លោក​ កឹម សុខា ​​ថ្ងៃ​នេះ​​ ដោយ​គ្មាន​វត្តមាន​បក្ស​​ប្រឆាំង




បក្ស​កាន់​អំណាច​នឹង​បញ្ចប់​តំណែង​លោក​ កឹម សុខា ​​ថ្ងៃ​នេះ​​ ដោយ​គ្មាន​វត្តមាន​បក្ស​​ប្រឆាំង

Content image - Phnom Penh Post
លោក កឹម សុខា (កណ្តាល) នៅ​ក្នុង​កិច្ចប្រជុំ​របស់​គណបក្ស​កាលពី​ម្សិលមិញ​។ រូបថត ហ្វេសប៊ុក

បក្ស​កាន់​អំណាច​នឹង​បញ្ចប់​តំណែង​លោក​ កឹម សុខា ​​ថ្ងៃ​នេះ​​ ដោយ​គ្មាន​វត្តមាន​បក្ស​​ប្រឆាំង

ភ្នំពេញៈ នៅ​ថ្ងៃ​នេះ​តំណែង​​​ប្រធាន​តំណាង​រាស្រ្ត​សំឡេង​ភាគតិច​នៅក្នុង​រដ្ឋសភា​​​របស់​លោក កឹម សុខា មេដឹកនាំ​គណបក្ស​ប្រឆាំង​ដែល​មាន​ឋានៈ​ស្មើ​នាយក​រដ្ឋមន្រ្តី​សម្រាប់​ការ​ចរចា​នយោបាយ​នឹង​ត្រូវ​​ដក​​​​ចេញ​ដោយ​ក្រុម​​តំណាងរាស្រ្ត​​គណបក្ស​កាន់​អំណាច​​ទៅ​តាម​បំណង​របស់​លោក​នាយករដ្ឋមន្រ្តី ហ៊ុន សែន ​ដែល​ជា​ប្រធាន​គណបក្ស​ប្រជាជន​។

អ្នក​វិភាគ​យល់​ថា​ការ​បង្កើត​តំណែង​​ដែល​​មិន​ចាំបាច់​នេះ​គឺ​ធ្វើ​ឡើង​ក្នុង​គោលបំណង​ដើម្បី​បំបែក​គណបក្ស​ប្រឆាំង ​​ប៉ុន្តែ​នៅ​ពេល​ដែល​បំបែក​គណបក្ស​ប្រឆាំង​មិន​បាន​គណបក្ស​ប្រជាជន​ក៏​លុប​ចោល​តំណែង​នេះ​វិញ​គឺ​គ្មាន​អ្វី​ប្លែក​នោះ​ទេ។

នៅក្នុង​កិច្ចប្រជុំ​​ផ្ទៃ​ក្នុង​បក្ស​កាលពី​ម្សិលមិញ​ក្រុម​តំណាងរាស្រ្ត​​គណបក្ស​សង្គ្រោះ​ជាតិ​​បាន​សម្រេច​រួច​​ហើយ​ថា​ពួកគេ​នឹង​ធ្វើ​ពហិការ​​សម័យ​ប្រជុំ​ពេញអង្គ​នៃ​រដ្ឋសភា​​​នៅ​ថ្ងៃ​នេះ​ដោយសារ​ពួកគេ​មិន​គាំទ្រ​វិសោធនកម្ម​​មាត្រា​ ៤៨ ថ្មី​ (៣​) ​​នៃ​បទបញ្ជា​ផ្ទៃក្នុង​​របស់​រដ្ឋសភា​ដែល​ការ​ធ្វើ​វិសោធនកម្ម​នៃ​មាត្រា​នេះ​គឺ​ដើម្បី​បញ្ចប់​តំណែង​របស់​លោក សុខា​។

លោក សុន ឆ័យ ប្រធាន​តំណាងរាស្រ្ត​​​គណបក្ស​សង្គ្រោះ​ជាតិ​បាន​​ថ្លែង​បន្ទាប់ពី​កិច្ចប្រជុំ​កាលពី​ម្សិលមិញ​ថា​៖ «​យើង​បាន​សម្រេច​​​អម្បាញ់​​មិញ​នេះ​ថា [យើង​] ​​នឹង​មិន​​ចូលរួម​សម័យ​​ប្រជុំ​ [រដ្ឋសភា] ​ទេ​។ ​យើង​មិន​គាំទ្រ​ [វិសោធនកម្ម​នេះ​] ទេ​»។ ​

លោក សុន ឆ័យ បាន​​បដិសេធ​​ធ្វើ​អត្ថាធិប្បាយ​លម្អិត​​អំពី​មូលហេតុ​​នៃ​ការ​ធ្វើ​ពហិការ​របស់​គណបក្ស​សង្គ្រោះ​ជាតិ​ដោយ​ថ្លែង​ថា​សូម​រង់ចាំ​សន្និសីទ​កាសែត​នៅ​ថ្ងៃ​នេះ​។

មាត្រា​ ៤៨ ​ថ្មី (៣) ​នៃ​បទ​បញ្ជា​ផ្ទៃក្នុង​​របស់​រដ្ឋសភា​គឺជា​គំនិត​ផ្តួចផ្តើម​មួយ​​ និង​ស្នើ​ឡើង​ដោយ​​​​លោក​ ហ៊ុន សែន ​​​​ដើម្បី​​តែងតាំង លោក កឹម សុខា ជា​មេដឹកនាំ​​តំណាងរាស្រ្ត​​សំឡេង​ភាគតិច​​​នៅ​ក្នុង​រដ្ឋសភា​​ដែល​មាន​ឋានៈ​ស្មើ​​លោក​ ហ៊ុន សែន នៅ​ក្នុង​​ការ​ជជែក​​បញ្ហា​នយោបាយ​ជាមួយ​គ្នា​ដើម្បី​ដោះស្រាយ​បញ្ហា​​នយោបាយ​​។

ប៉ុន្តែ​ មាត្រា​​នេះ​នឹង​​ត្រូវ​​ធ្វើ​វិសោធនកម្ម​នៅ​ថ្ងៃ​នេះ​​​ ដើម្បី​​លុប​តំណែង​លោក កឹម សុខា​ ពី​​ប្រធាន​តំណាងរាស្រ្ត​​សំឡេង​ភាគតិច​បន្ទាប់ពី​លោក​នាយក​រដ្ឋមន្រ្តី​មិន​សប្បាយ​ចិត្ត​​ដោយ​ចោទ​ថា​ ការ​ចរចា​នយោបាយ​​ជាមួយ​មេដឹកនាំ​គណបក្ស​សង្គ្រោះជាតិ​​មិន​អាច​ទៅ​មុខ​​បាន​ដោយសារ​របៀបវារៈ​​សម្រាប់​ការ​ចរចា​​ដែល​ស្នើ​ឡើង​ដោយ​គណបក្ស​សង្គ្រោះ​ជាតិ​​គឺ​​នឹង​ស្នើ​ឲ្យ​មាន​ការ​ដោះលែង​​មន្រ្តី​សិទ្ធិ​មនុស្ស​មន្រ្តី​ គជប និង​សមាជិក​គណបក្ស​សង្គ្រោះ​ជាតិ​​ជាង​ ១០ ​នាក់​ដែល​កំពុង​ជាប់​ពន្ធនាគារ​។

ទោះ​យ៉ាង​ណា​ក្តី​​អ្នក​នាំ​ពាក្យ​​​​គណបក្ស​ប្រជាជន​លោក សុខ ឥសាន ​បាន​ថ្លែង​ថា​គ្មាន​អ្វី​ជា​ឧបសគ្គ​​សម្រាប់​វិសោធនកម្ម​​នៃ​មាត្រា​នេះ​ទេ​ បើ​ទោះបី​ជា​មាន​ការ​ធ្វើ​ពហិការ​ពី​គណបក្ស​សង្គ្រោះ​ជាតិ​ក៏ដោយ​​​ ដោយ​សារ​សំឡេង​នៃ​ការ​​អនុម័ត​នៅ​ក្នុង​ការ​ធ្វើ​វិសោធនកម្ម​នេះ​ផ្អែក​តាម​រដ្ឋធម្មនុញ្ញ​​ត្រូវ​ការ​តែ​ ៥០ បូក​១ នៃ​តំណាង​រាស្រ្ត​សរុប​ចំនួន​​ ១២៣ ​នាក់។

លោក សុខ ឥសាន ​បញ្ជាក់​ថា ​អ្នក​ដែល​ជា​អ្នក​បង្កើត​​បទបញ្ជា​​ផ្ទៃក្នុង​​នេះ​គឺ​គណបក្ស​ប្រជាជន​ហើយ​អ្នក​ដែល​នឹង​​លុប​ចោល​មាត្រា​នេះ​ក៏​ជា​គណបក្ស​ប្រជាជន​​ដែរ​។

លោក​បាន​បន្ថែម​ថា​៖«​ចូល​តាម​ច្រក​ណា​ចេញ​តាម​ច្រក​​ហ្នឹង​»។ «​គ្មាន​អ្វី​ខុស​ទេ​ជា​ច្បាប់​ធម្មជាតិ​។ [គណបក្ស​សង្គ្រោះ​ជាតិ​] ​ចូលរួម​​ ឬ​មិន​ចូលរួម​វា​ជា​រឿង​របស់​គាត់​»។

អ្នក​វិភាគ​នយោបាយ​លោក គឹម សុខ បាន​ថ្លែង​​ថា​ការ​បង្កើត​តំណែង​ប្រធាន​តំណាងរាស្រ្ត​សំឡេង​ភាគតិច​ ​និង​​​ភាគច្រើន​គឺ​គ្រាន់​តែ​ជា​ល្បិចកល​នយោបាយ​​របស់​គណបក្ស​កាន់​អំណាច​​ប៉ុណ្ណោះ​​ដើម្បី​បំបែក​​គណបក្ស​​សង្គ្រោះ​ជាតិ​ ប៉ុន្តែ​​ជា​ធម្មតា​នៅ​ពេល​គណបក្ស​ប្រជាជន​​កម្ពុជា​មិន​អាច​​បំបែក​​គណបក្ស​សង្គ្រោះ​ជាតិ​បាន​ទៅ​តាម​បំណង​ប្រាថ្នា​របស់​​ខ្លួន​​ ពួកគេ​ត្រូវ​តែ​លុប​ចោល​​តំណែង​​នោះ​វិញ​​។ ​

លោក គឹម សុខ បន្ត​ថា​៖ «​​ការ​ចូលរួម​ [​សម័យ​ប្រជុំ​​រដ្ឋសភា​របស់​គណបក្ស​​សង្គ្រោះ​ជាតិ​]​ មិន​មាន​ប្រយោជន៍​ក្នុង​ការ​រារាំង​​ការ​អនុម័ត​​នេះ​ទេ​។ ​នោះ​ហើយ​ជា​​មូលហេតុ​ការ​ចូលរួម​របស់​គណបក្ស​សង្គ្រោះជាតិ​វា​គ្មាន​ប្រយោជន៍​សូម្បី​ការ​ជជែក​ពិភាក្សា​គ្នា​ក៏​គ្មាន​​»​។

ស្ថានការណ៍​នយោបាយ​បាន​ធូរ​ស្រាល​បន្តិច​​ពី​ដើម​ខែ​មុន​នៅ​ពេល​​​លោក​ កឹម សុខា ​ត្រូវ​បាន​ព្រះមហាក្សត្រ​លើក​លែង​ទោស​​ហើយ​​គណបក្ស​ទាំង​ពីរ​បាន​ប្រកាស​ថា​អ្នក​ទោស​នយោបាយ​ដែល​កំពុង​ជាប់​ឃុំ​អាច​នឹង​ត្រូវ​បាន​ដោះលែង​ជា​បន្តបន្ទាប់​​តាមរយៈ​ការ​ចរចា​នយោបាយ​។ ប៉ុន្តែ​​មក​ដល់​ពេល​នេះ​មិន​មាន​អ្នក​​ជាប់​ឃុំ​ណា​ម្នាក់​ត្រូវ​បាន​ដោះលែង​នោះ​ទេ​ដែល​នេះ​ត្រូវ​បាន​អ្នក​វិភាគ​យល់​ថា​គឺ​ដោយសារ​តែ​លោក​ កឹម សុខា ​មិន​ធ្វើ​ទៅ​តាម​អ្វី​ដែល​លោក​ ហ៊ុន សែន​ ចង់​បាន​៕ PS

អត្ថបទគួរចាប់អារម្មណ៍